Momo Lie Omanu Va Lingila Ovina Vĩvi?

KULI ocina cimue omanu valua ka va patãla: Vosi yetu ka tua lipuile, kuenda tua siata oku lueya. Pamue tu linga ovina vimue okuti noke tu livela. Nda okuti ondaka eyi yocili, anga hẽ eli olio esunga lieci tu letele ovilinga vĩvi, ci kale vinene levi vitito, evi tua siata oku mola loku yeva eteke leteke, ci kale komanu ale vovingungu viasapulo?

Omanu ndaño ka va lipuile, va kũlĩha okuti kuli ovihandeleko vimue viatiamẽla kovituwa va sukila oku pokola, kuenda va pondola oku yuvula ovilinga vĩvi. Omanu valua va tava okuti, oku vangula ondaka yoku mumũla loku popia uhembi, ca litepa. Oku kokela olofa omunu kuenda oku ponda locipango, ca litepa. Pole, olonjanja vimue ovina vĩvi, via siata oku lingiwa lomanu vana va molẽha ndu okuti va sunguluka vimbo. Momo lie? Momo lie omanu va siatela oku lingila ovina vĩvi?

Embimbiliya li lombolola ciwa ondaka eyi. Olio li lekisa esunga lieci omanu va siatela oku lingila ovina va kũlĩha okuti vĩvi. Kũlĩhĩsa eci olio li popia.

▪ “Okukangisua ku pongolola ukualondunge kuenje o linga eyui.”—UKUNDI 7:7.

Embimbiliya li lekisa okuti, olonjanja vimue omanu omo liovitangi va pondola oku linga ovina ka va yongola. Vamue citava okuti va lekisa ovituwa viungangala omo liovisimĩlo viokuti, poku cilinga va pondola oku malako ohali kuenda evĩho. Elivulu limue li tukuiwa hati, Terrorismo Urbano lia popia hati: “Olonjanja vimue, ocina catete ca siata oku vetiya omanu oku kala olongangala, onyeño yoku mola uyaki vofeka, olonepele, kuenda uhukũi.”

▪ “Ocisola coku sola olombongo oco olumbombo luavĩho osi.”—1 TIMOTEO 6:10.

Kuli olusapo lumue lu popia hati, omunu lomunu o kuete ondando yaye. Olusapo olu lu lekisa okuti, ndaño muẽle omanu vana va sunguluka, va kuete onjongole yoku lueya ovihandeleko viwa kuenda oku linga ovina vĩvi nda va fetiwa olombongo. Omanu vana okuti kotembo yiwa va molẽha ndu okuti va sunguluka, haivo vakuacisola, eci ku moleha epuluvi lioku linga cimue civĩ oco va fetiwe olombongo, va pongolola ovituwa viavo viwa kuenje va linga olongangala. Sokolola ovina vialua vĩvi via siata oku lingiwa omo liocipululu, oku iva, undiandia, oku ambata utiku omanu kuenda umondi.

▪ “Omo eyambulo lia tukuiwila vekanga ka li lingiwa lombili oco ovitima viomãla vomanu vi kuata utõi woku linga cĩvi.”—UKUNDI 8:11.

Ocisonehua eci ci lekisa ovisimĩlo omanu va siata oku kuata viokuti, nda usongui wavo ka va lete, citava okuti va lueya ovihandeleko. Omo liaco, omanu poku endisa oviendelo, va pitahãla olupesi lua kisikiwa vocihandeleko, va feta olombongo vioku yula koloseteko viokosikola, va nyana olombongo viombiali, kuenda oku linga ovina vikuavo vĩvi. Omanu eci va limbuka okuti ocihandeleko ka ca kapiwileko calua, ale ka va kuete vali usumba woku kuatiwa, vana vakuakupokola kovihandeleko va vetiyiwavo oku linga ovina ka va siatele oku linga. Orevista yimue yi tukuiwa hati, Argumentos e Factos, ya lombolola hati: “Omo okuti olondingaĩvi via siata oku tila ciwa okuti ka vi yambuiwa, olondingesunga via siata oku kuata ovisimĩlo vioku kalavo olongangala.”

▪ “Omunu omunu o yonjiwa eci a tambiwa loku kokiwa loloñeyi viaye muele. Oloñeyi, eci vi mina, vi cita ekandu, ekandu, eci li kula, li cita okufa.”—TIAGO 1:14, 15.

Lomue omunu ka kuete ovisimĩlo vĩvi. Eteke leteke tua siata oku vetiyiwa lovisimĩlo kuenda lolonjongole vioku linga eci cĩvi. Kosimbu, Akristão va va sapuilile hati: “Lalimue eyonjo lio sangi, te eli lia siata pokati komanu.” (1 Va Korindo 10:13) Pole, onima yosi yĩvi omunu a pondola oku kuata, yi tunda koku ecelela okuti ovisimĩlo vĩvi vi kulila vutima. Ocisonehua copiwa ndeti vukanda wa Tiago, ci lekisa okuti, nda omunu ecelela okuti oloñeyi vĩvi ‘vi kula,’ o linga ovina ka viasugulukile.

▪ “U endaenda la vakualondunge o lingavo ukualondunge, u puãi endaenda laveke o yambuiwa.”—OLOSAPO 13:20.

Tu sukila oku kapako calua ondaka yoku kuata akamba. Momo citava okuti va tu vetiyila koku linga ovina viwa ale ovina vĩvi. Valua omo lioku vetiyiwa lakamba, ale omo lioku kuata akamba vãvi, va siata oku linga ovina ka va yongola, kuenje va pita lovitangi vialua. Vembimbiliya ondaka “aveke” ka yi lomboloka omanu vana va seluka, pole, yi tiamisiwila komanu vana ka va kapeleko elungulo Liondaka ya Suku. Ci kale okuti tuamalẽhe ale tuakulu, nda ka tua nõlele ciwa akamba vetu loku kapako olonumbi Viembimbiliya, tu lavoka oku “yambuiwa.”

Ovinimbu evi kuenda vikuavo Viembimbiliya, vi lombolola esunga lieci omanu, toke muẽle vana vakualondunge va lingila ovina vĩvi haivio vi sumuisa calua. Ndaño okuti ci kuete esilivilo oku kũlĩha unene u vetiya omanu oku linga ovina vĩvi, anga hẽ, kuli elavoko liokuti eteke limue ovina viaco vi ka pongoloka? Embimbiliya ka li lombolola lika esunga lieci omanu va lingila ovina vĩvi, pole, lia likuminyavo okuti evĩho liaco ndopo lipua. Vipi olohuminyo viaco? Anga hẽ, evĩho liosi li kasi voluali, li ka pua? Ocipama ci kuaĩmo ceca etambululo liaco.