Ondaka ya Yehova yi Kasi Lomuenyo
Atosi Avelapo Vukanda wa Tiago, Kuenda Via Petulu
NOKE yoku pita 30 kanyamo tunde ko Pendekoste yunyamo wa 33, ndonge Tiago manji a Yesu, wa sonehela ukanda “apata ekũi la avali” a va Isareli yespiritu. (Tia. 1:1) Eye wa kuata ocimãho coku vetiya vamanji oco va pame kespiritu loku pandikisa poku liyaka lovitangi. Eye wa ecavo elungulo kokuavo oco va tẽle oku tetulula ovitangi vekongelo.
Upostolo Petulu wa sonehela Akristão ukanda waye watete kunyamo wa 64, osimbu ombiali yimue yo ko Roma o tukuiwa hati Nero ka fetikile elambalalo. Noke wa va vetiya oco va pandikise lekolelo. Vukanda waye wavali wa vetiya vamanji oco va pokole kondaka ya Suku, kuenda wa va lungula kueci catiamẽla kokuiya kueteke lia Yehova. Omo liaco, tu kuatisiwa lika nda tua pokola kesapulo liukanda wa Tiago kuenda via Petulu.—Va Hev. 4:12.
SUKU ECA OLONDUNGE KUAVA VO ‘PINGA LEKOLELO’
Tiago wa soneha hati: “Omunu o pandikisa lohali wa sumũlũha momo, eci a yula, o tambula ekolowa liomuenyo.” Vana va ‘pinga ekuatiso lekolelo,’ Yehova o va ĩha uloño woku pandikisa kovitangi.—Tia. 1:5-8, 12.
Vana “va linga alongisi,” va sukila oku lekisa ekolelo kuenda olondunge. Tiago noke yoku limbuka okuti ‘okacimatamata katito’ ka pondola oku “vĩhisa etimba liosi,” wa lungula okuti ovituwa violuali vi pondola oku nyõla ukamba wetu la Suku. Eye wa lombolola ndomo vamanji va hongua kespiritu va pondola oku pamisa ekolelo liavo.—Tia. 3:1, 5, 6; 5:14, 15.
Atambululo Kapulilo Embimbiliya:
2:13—‘Ohenda yi pondola ndati oku yula ekanga’? Catiamẽla koku lilombolola ku Suku, eye o kapako ohenda tua siata oku lekisa ku vakuetu, kuenda o tu ecela vonduko yocisembi Comõlaye. (Va Rom. 14:12) Omo liaco, tu sukila oku lekisa ohenda komuenyo wetu.
4:5—Ocinimbu cipi covisonehua Tiago a tukula? Tiago ka tukuile ocinimbu cimue ca ñoliwa. Pole, olondaka viaye wa vitiamisila kelivulu Liefetikilo 6:5; 8:21; Olosapo 21:10; kuenda Va Galatia 5:17.
5:20—Anga hẽ, nda umue wa “tindula ukuakandu kokulueya kuaye,” oka popela omuenyo waye kolofa? Nda Ukristão wa liwekapo oku linga ovina vĩvi, o popela omuenyo womunu wafa kespiritu kuenda u popelavo kenyõleho. Ekuatiso lieciwa komunu wa lueya, li ‘tuvika akandu alua.’
Ceci tu Lilongisilako:
1:14, 15. Olonjongole vĩvi, ovio via siata oku vetiya omunu oku linga ekandu. Omo liaco, tu sukila oku likandangiya oco tu yuvule olonjongole viaco. Tu sukilavo oku ‘kapako’ ovina vi kuete esilivilo oco vi kuatise ovisimĩlo vietu kuenda utima wetu.—Va Fil. 4:8.
2:8, 9. Oku lekisa “ocame,” kua litepa loku lekisa ocisola. Omo liaco, Akristão vocili va sukila oku yuvula oku lekisa ocame.
2:14-26. Tua ‘popeliwa omo liekolelo’ pole, ka tua popeliwile omo liovilinga Viocihandeleko Mose a tambuile, ale vina Akristão va siata oku linga. Ekolelo lietu li limbukiwila kovilinga vietu. (Va Efe. 2:8, 9; Yoa. 3:16) Ekolelo li tu vetiya oku linga ovina vi litava locipango ca Suku.
3:13-17. “Olondunge viokilu,” via velapo ‘vioposi, haivio violoñeyi vĩvi Vieliapu’! Omo liaco, tu sukila oku ‘sandiliya olondunge viokilu kuenda oku vi kapako.’—Olosap. 2:1-5.
3:18. Vana va kuete ocikele coku sandeka olondaka viwa, va sukila oku ‘vi kunda lombembua ku vana va sole ombembua.’ Omo liaco, tu sukila oku lekisa ombembua kuenda oku yuvula oku lipanda.
‘PANDIKISI LEKOLELO’
Petulu wa ivaluisa vamanji “elavoko” va kuete lioku enda kilu. Petulu wa va sapuila hati: “Ene puãi ‘vumbuto ya noliwa, haene vuvitunda viusoma, vufeka yi kola.’” Noke lioku va ĩha elungulo liatiamẽla kepokolo, wa vetiya vosi hati: “Kali lutima umuamue. Lingi vakuahenda. Kali locisola coku sola vakuẽle. Lingi ambombe kuenda asima.”—1 Pet. 1:3, 4; 2:9; 3:8.
Omo okuti, ‘esulilo liofeka ya va Yudea lia kala ocipepi,’ Petulu wa lungula vamanji oco va ‘amameko oku lavulula kuenda oku likutilila.’ Omo liaco, wa va sapuila hati: “Lunguki. Lavululi. . . . Pami lekolelo liene kuenje tamalali [la Satana].”—1 Pet. 4:7; 5:8, 9.
Atambululo Kapulilo Embimbiliya:
3:20-22—Epapatiso li tu popela ndati? Vosi va yongola oku popeliwa va sukila oku papatisiwa. Epapatiso ka li tu popela. Pole, ‘tu popeliwa lika omo liepinduko lia Yesu Kristu.’ Omunu o papatisiwa o sukila oku kolela okuti, tu popeliwa lika omo liocilumba coku fa kua Yesu, epinduko liaye, kuenje, cilo o kasi “kondio ya Suku,” momo o kuete unene womuenyo kuenda wolofa. Momo oku papatisiwa lekolelo liaco, ku sokisiwa lomanu ‘ecelãla va popeliwa kovava.’
4:6—Velie “va fa” okuti ka va ‘kundiwilile olondaka viwa’? Vana okuti, ‘va fa lakandu kuenda lolohole viavo’, ale vana okuti eci va fa ka va yevele olondaka viwa. (Va Efe. 2:1) Noke, lioku lekisa ekolelo kolondaka viwa, va fetika oku kuata ukamba la Yehova.
Ceci tu Lilongisilako:
1:7. Oco ekolelo lietu li kuate esilivilo, li sukila oku setekiwa. Olio, li pondola oku “tata ovitima vietu.” (Va Hev. 10:39) Pole, tu sukila oku lavulula oco ka tuka kape ekolelo lietu voseteko.
1:10-12. Ovangelo va yonguile oku kuata elomboloko liasuapo liovina via longa via Suku, via sonehiwa lovaprofeto kosimbu, catiamẽla kekongelo Liakristão olombuavekua. Pole, va kuata lika elomboloko liaco eci Yehova a fetika oku tiamisila utima waye kakongelo. (Va Efe. 3:10) Omo liaco, tu sukila oku kuama ongangu yovangelo poku likolisilako oku sandiliya “ovina via longa via Suku.”—1 Va Kor. 2:10.
2:21. Oco tu kuatise uviali wa Yehova, tu sukila oku kuama ongangu ya Yesu Kristu yoku pandikisa kohali toke kolofa.
5:6, 7. Nda tua eca ku Yehova asakalalo etu, eye o tu kuatisa oku pitisa kovaso efendelo liocili. Pole, tu ci tẽlisa lika nda tua yuvula oku sakalala lovina vieteke likuavo.—Mat. 6:33, 34.
‘ETEKE LIA YEHOVA LI KASI OCIPEPI’
Petulu wa soneha hati: “La-umue owanji wovaprofeto weya locipango comunu, puãi omanu va kola va vetiyiwa [lespiritu sandu] va popia ondaka ya tunda ku Suku.” Oku pokola kocitumasuku, ci tu teyuila ‘kalongisi vesanda’ kuenda komanu vakuavo va yongola oku tu yapuisa.—2 Pet. 1:21; 2:1-3.
Petulu wa lungula hati: “Koloneke via sulako, kuiya vakuetombo loku tomba.” Pole, “eteke lia [Yehova] liya ndocimunu.” Petulu wa malusula ukanda waye loku lungula vana va ‘lavoka oku iya kueteke liaco.’—2 Pet. 3:3, 10-12.
Atambululo Kapulilo Embimbiliya:
1:19—“Nanda” wa tukuiwa ndeti helie? Otembo yipi a fetika oku tua, kuenda tu kũlĩha ndati okuti wa fetika oku tua? “Nanda” o lomboloka Yesu Kristu noke yoku tumbikiwa komangu Yusoma. (Esit. 22:16) Kunyamo wo 1914, Yesu wa linga Mesiya Soma yovina viosi okuti, Nanda yomẽle. Epongoloko Yesu a kuata lia lekisa ulamba kuenda unene aka kuata Vusoma waye, ndomo ca lekisiwa vondaka ya Suku. Oku kapako ondaka yaco ci mihila ovitima vietu, kuenda ci tu kuatisa oku limbuka okuti Nanda wa vialekiwa komangu yusoma.
2:4—‘Owelema’ u lomboloka nye, kuenda otembo yipi ovangelo va sina va imbiwamo? Owelema u lomboloka okayike mu kasi ovangelo vana va sina. Ovo vaka amamako vowelema waco toke eci Suku aka tẽlisa ocipango caye. Vana va kasi Vowelema, ka va kuete elavoko. Suku wa va kapa Vowelema waco, koloneke via Noha, kuenda va kalamo toke eci vaka kunduiwa.
3:17—Olondaka Petulu a popia hati, “wa ci kũlĩhi ale osimbu ka ceyile handi,” vi lomboloka nye? Petulu wa tukula eci catiamẽla kukũlĩhĩso wovina a kala oku lavoka kuenda oku tẽlisiwa kuovitumasuku Viembimbiliya. Omo okuti ukũlĩhĩso waco u kuete esulilo, Akristão vatete ka va kuatele ukũlĩhĩso wovina viosi va kala oku lavoka. Momo va kũlĩhĩle lika ovina vimue.
Ceci tu Lilongisilako:
1:2, 5-7. Oco tu vokiye ukũlĩhĩso wetu watiamẽla ku ‘Suku kuenda ku Yesu,’ tu sukila oku lekisa ekolelo, epandi, kuenda esumbilo, oco ka tuka ‘kuate owesi ndava ka va imi apako.’—2 Pet. 1:8.
1:12-15. Oco tu ‘sevetiwile vocili,’ tu sukila alungulo tu tambula kolohongele, kelilongiso liopokolika, kuenda poku tanga Embimbiliya.
2:2. Tu sukila oku lavulula oco ovituwa vietu vi taviwe la Yehova kuenda ocisoko caye.—Va Rom. 2:24.
2:4-9. Omo liovitumasuku via tẽlisiwa kosimbu, tua kolela okuti, “[Yehova] wa linga ovina [viaco], wa kũlĩha oku popela vakuaku sumbila Suku eci va nyikiwa, kuenda oku selekela vakuakandu eyambulo toke keteke liekanga.”
2:10-13. Ndaño “vakuolamba” okuti akulu vekongelo va siata oku lueya, tu sukila oku yuvula oku va popia lãvi.—Va Hev. 13:7, 17.
3:2-4, 12. Nda tua pokola ‘kolondaka viovaprofeto va kola, locihandeleko ca Ñala, haeye Upopeli,’ tu kuatisiwa oku lavoka lekolelo eteke lia Yehova.
3:11-14. ‘Osimbu tu lavoka etukuluko lieteke lia Yehova, tu sukila oku kapako ovina vimue ndeci: (1) Oku lekisa ‘ovituwa via sunguluka,’ oku liyelisa ketimba, kovisimĩlo, kekalo lietu, kuenda kespiritu. (2) Oku linga ovina vi lekisa okuti, tua “sumbila Suku” poku kunda esapulo Liusoma, kuenda oku longisa omanu oco va linge olondonge. (3) Oku yuvula ovitua via ‘vĩha’ via siata voluali. (4) Oku lekisa esunguluko kovina viosi, kuenda oku yuvula “atime.” (5) Oku lekisa “ombembua” ya Suku ku vamanji, kuenda kakamba.