Oku Kongeliwa Kuovina Viokilu Levi Vioposi
‘Ocipango ca Yehova ceci okuti, ovina viosi viokilu levi vioposi, vi kongeliwa kuenje vi lingiwa vu Kristu.’—VA EFESO 1:9, 10.
1. Cipi ocipango ca Yehova ‘loluali kuenda ilu’?
YEHOVA “Suku yombembua,” o yongola okuti, voluali mu kala ombembua. (Va Heveru 13:20) Eye wa vetiya Paulu oku popia hati: ‘Ocipango caye ceci okuti, ovina viosi viokilu levi vioposi, vi kongeliwa kuenje vi lingiwa vu Kristu.’ (Va Efeso 1:9, 10) Ondaka oku ‘kongela’ ndomo ya tukuiwa vocinimbu eci yi lomboloka nye? Onoño yimue o tukuiwa hati, J. B. Lightfoot, wa popia hati: ‘Ondaka oku kongela, yi lomboloka elitokeko liovina viosi vi kasi voluali levi vi kasi kilu. Ndaño okuti, ovina viaco ka vi likuete omunga, pole, vi tokekisiwa lekuatiso lia Kristu. Ekandu, lolofa, oku lisiõsiõla, kuenda ohali, ka vika kalako vali.’
“Ovina Viokilu”
2. ‘Ovina vipi viokilu’ via sukilile oku kongeliwa?
2 Upostolo Petulu poku lombolola elavoko Liakristão vocili, wa popia hati: “Mekonda liohuminyo ya [Yehova], tu lavoka ilu liokaliye loluali luokaliye omu mu kala esunga.” (2 Petulu 3:13) “Ilu liokaliye,” li lomboloka uviali wokaliye wa Mesiya. “Ovina viokilu” Paulu a tukula vukanda a sonehela va Efeso, via sukilile oku ‘kongeliwa vu Kristu.’ Ovina viaco vi lomboloka omanu va noliwa oku viala la Kristu kilu. (1 Petulu 1:3, 4) Akristão olombuavekua va soka 144.000, ‘va landiwa palo posi, kuenda va noliwa pokati komanu.’ Kuenje lekuatiso liespiritu sandu va linga omãla va Yehova.—Esituluilo 5:9, 10; 14:3, 4; 2 Va Korindo 1:21; Va Efeso 1:11; 3:6.
3. Olombuavekua via ‘tumala ndati kilu’ osimbu vi kasi palo posi?
3 Akristão olombuavekua ‘va citiwa evali lespiritu sandu kuenje va linga omãla va Yehova. (Yoano 1:12, 13; 3:5-7) Omo okuti, va linga omãla va Yehova, va tukuiwa hati, vamanji ya Yesu. (Va Roma 8:15; Va Efeso 1:5) Osimbu va kasi palo posi, va tukuiwa hati, ‘va pinduiwa kumue la Kristu kuenje va tumala kumue laye kilu.’ (Va Efeso 1:3; 2:6) Ovo va kuete esumũlũho liaco, omo ‘lioku kapiwa ondimbukiso yespiritu sandu. Kuenje va tambula ocipiñalo cavo’ kilu Yehova a va selekela. (Va Efeso 1:13, 14; Va Kolosai 1:5) Omanu vaco ovo “ovina viokilu” Yehova a lomboluile okuti, vika kongeliwa.
Efetikilo Lioku Kongeliwa
4. Otembo yipi Yehova a fetika oku ‘kongela ovina viokilu’? Kuenda via fetika oku kongeliwa ndati?
4 ‘Oku kongeliwa kuovina viokilu,’ kua fetika ‘kotembo ya sokiyiwa’ la Yehova. (Va Efeso 1:10) Otembo yaco ya pitĩla keteke Liopendekoste kunyamo wa 33. Keteke liaco, espiritu sandu lia Yehova lia wavekiwa kovapostolo kuenda kolondonge vikuavo alume lakãi. (Ovilinga 1:13-15; 2:1-4) Ulandu waco wa eca uvangi wokuti ocisila cokaliye ca fetika oku tẽlisiwa. Kuenje kua tumbikiwa ekongelo Liakristão va Isareli yespiritu okuti, ‘Isareli ya Suku.’—Va Galatia 6:16; Va Heveru 9:15; 12:23, 24.
5. Momo lie Yehova a sokiyila ‘ofeka’ yokaliye oco yi piñanye va Isareli yosimbu?
5 Ocisila Yehova a lingile kosimbu la va Isareli, ka ca kuatisile oku tumbika ‘usoma umue wovitunda lofeka yi kola’ oco vaka vumbe Suku kilu otembo ka yi pui. (Etundilo 19:5, 6) Yesu wa sapuilile ovitunda vietavo lia va Yudea hati: “Usoma wa Suku upiwa kokuene kuenje weciwa kofeka yima apako.” (Mateo 21:43) Akristão olombuavekua vatiamẽla kocisila cokaliye, ovo ofeka yaco yespiritu. Catiamẽla kokuavo, Petulu wa popia hati: “Ene puãi, vumbuto ya noliwa, haene vuvitunda viusoma, vufeka yi kola, vucikumba ca Suku, okuti, vu lekisa ovilinga vi komohisa via [una] wo kovongi ho tundi vowelema, ha wiyi kocinyi caye ci komohisa. Kotembo yale ka wa kaili omanu, kaliye puãi vumanu va Suku.” (1 Petulu 2:9, 10) Va Isareli yosimbu ka va lavele ocisila ca Yehova. (Va Heveru 8:7-13) Ndomo Yesu a ci popia, omanu vaco vopiwa esumũlũho lioku tiamẽla Kusoma wa Suku. Kuenje lia eciwa ku va Isareli yespiritu va soka 144.000 Kakristão olombuavekua.—Esituluilo 7:4-8.
Va Kongeliwa Vocisila Cusoma
6, 7. Ocisila cipi cokaliye Yesu a linga Lakristão olombuavekua? Ocisila caco ci lomboloka nye kokuavo?
6 Yesu vuteke una a tumbika Ocipito Conjivaluko Yolofa viaye, wa sapuila ovapostolo vaye hati: “Ene, ene wa pandakaisi lame eci nda nyikaiwa. Oco, ndeci Tate a nukuila usoma haico ndu tukuili usoma okuti, vu lila loku nyuila komesa yange vusoma wange, kuenje vu tumala kovialo oku tetuluila apata ekũi la avali a Isareli.” (Luka 22:28-30) Yesu wa tukula ocisila cokaliye a linga Lakristão olombuavekua va soka 144.000, vana ‘va pandikisa toke kolofa.’ Kuenje va yula oluali.—Esituluilo 2:10; 3:21.
7 Akristão olombuavekua, ka va kuete vali elavoko lioku kala palo posi. Ovo vaka viala la Kristu kilu. Kuenje vaka tumala kovialo viusoma oku tetuluila omanu. (Esituluilo 20:4, 6) Tu konomuisi ovinimbu vikuavo Viembimbiliya viatiamẽla Kakristão olombuavekua. Ovinimbu viaco vi lombolola esunga lieci “olomeme vikuavo” ka vilila kombolo lovinyu Pocipito Conjivaluko yolofa via Yesu.—Yoano 10:16.
8. Akristão olombuavekua oku lia kombolo, ci lomboloka nye kokuavo? (Tanga pokakasia kemẽla 15.)
8 Akristão olombuavekua va talela ohali kumue la Kristu. Kuenda va nolapo oku pokola ku Yehova toke kolofa ndeci eye a linga. Upostolo Paulu una wa tiamẽlavo kocimunga caco, wa popia okuti wa nolapo oku pesela ovina viosi oco ‘a nganyale Kristu loku kũlĩha unene wepinduko liaye kuenda oku tala ohali kumue laye.’ Paulu wa nolelepo oku fa ndeci Yesu a linga. (Va Filipoi 3:8, 10) Valua pokati Kakristão olombuavekua va siatavo oku pandikisa kohali ndeyi ya pita la Yesu.—2 Va Korindo 4:10.
9. Ombolo Yocipito Conjivaluko yolofa via Yesu, yi lomboloka nye?
9 Eci Yesu a tumbika Ocipito Conjivaluko, yolofa viaye wa popia hati: “[Ombolo] eyi etimba liange.” (Marko 14:22) Poku popia olondaka evi, wa tukula etimba liaye a laikele oku pesela. Ombolo ka yi kuete etumbisa, ya kala ocindekaise ciwa. Momo lie? Momo Vembimbiliya etumbisa li lomboloka ekandu ale evĩho. (Mateo 16:4, 11, 12; 1 Va Korindo 5:6-8) Yesu wa lipuile kuenda vutima waye ka mua kaile evĩho. Omo liaco, wa eca etimba liaye ndocilumba. (Va Heveru 7:26; 1 Yoano 2:2) Ocilumba caco ci kuatisa Akristão vosi va kuete elavoko lioku enda kilu kuenda ava va kuete elavoko lioku kala voluali luokaliye otembo ka yi pui palo posi.—Yoano 6:51.
10. Akristão vana va nyua kovinyu Pocipito Conjivaluko yolofa via Yesu, va kala ndati ‘vongongela ya Kristu’?
10 Catiamẽla kovinyu yina Akristão olombuavekua va siata okunyua keteke Liocipito Conjivaluko, Paulu wa popia hati: “Okopo yesumũlũho yina tu panduila hayoko hẽ ongongela yosonde ya Kristu?” (1 Va Korindo 10:16) Olombuavekua poku nyua kovinyu, vi kala ndati vongongela yosonde ya Kristu? Eci ka ci lomboloka okuti, vi ecavo ocilumba cocisembi. Momo ovo va sukilavo oku yovuiwa. Omo lioku kuatela ekolelo osonde ya Kristu, va tambula ongecelo yakandu avo. Kuenje va tendiwa okuti, vakuesunga oco va kuate omuenyo ko pui kilu. (Va Roma 5:8, 9; Tito 3:4-7) Olombuavekua via soka 144.000, vina vika viala laye Yesu kilu, vi ‘kolisiwa’ Lekuatiso liosonde yaye, kuenda vi yelisiwa kakandu. Kuenje vi linga omanu ‘va kola.’ (Va Heveru 10:29; Daniele 7:18, 27; Va Efeso 2:19) Yesu omo lioku pesela osonde yaye ‘wa yovola omanu, kuenje wa va nena ku Suku. Omanu vaco va tunda kapata osi, lo kalimi osi, lo kovositue osi, lo kolofeka viosi. Eye wa va lingisa vakuosoma wa Suku yetu, lovitunda viaye, kuenje va viala kilu lieve.’—Esituluilo 5:9, 10.
11. Akristão olombuavekua poku nyua kovinyu Pocipito Conjivaluko yolofa via Yesu, ci lomboloka nye?
11 Eci Yesu a tumbika Ocipito Conjivaluko yolofa viaye, wa tikula okopo yovinyu kuenje wa yeca kovapostolo vaye. Noke wa popia hati: “Nyuiko vosi; momo eyi osonde yange yocisila, yi peseliwila va lua ongecelo yakandu.” (Mateo 26:27, 28) Ocili okuti, osonde yolonãle leyi yolohombo ya kolisa Ocisila Yehova a lingile la va Isareli. Cimuamue haico ca pita losonde ya Yesu. Oyo ya kolisa ocisila cokaliye Yehova a linga la va Isareli yespiritu okupisa Kopendekoste yunyamo wa 33. (Etundilo 24:5-8; Luka 22:20; Va Heveru 9:14, 15) Akristão olombuavekua poku nyua kovinyu yocindekaise ‘cosonde yocisila,’ va lekisa okuti va kasi vocisila cokaliye. Kuenje va tambula esumũlũho li tunda kocisila caco.
12. Olombuavekua vi papatisiwa ndati volofa via Kristu?
12 Kuli ondaka yikuavo olombuavekua vi sukila oku ivaluka. Yesu wa sapuila olondonge viaye hati: “Okopo ndi nyua vu yi nyuavo, epapatiso mapatisiwa lalio hailio vu papatisiwa lalio.” (Marko 10:38, 39) Paulu wa popia hati, ‘Akristão va papatisiwa volofa via Kristu.’ (Va Roma 6:3) Olombuavekua, vi kuete omuenyo wohali. Kuenda olofa viavo viohali. Momo eci vi fa, ka vi kuata vali elavoko liomuenyo ko pui palo posi. Epapatiso Liakristão olombuavekua volofa via Kristu, li tẽlisiwa poku fa kuavo leci va pinduiwa. Kuenje va linga oviluvo viespiritu loku ‘viala ndolosoma kumue la Yesu.’—2 Timoteo 2:10-12; Va Roma 6:5; 1 Va Korindo 15:42-44, 50.
Oku Lia Kombolo Lovinyu
13. Akristão vana va kuete elavoko lioku kala palo posi, momo lie ka va lila kombolo lovinyu Pocipito Conjivaluko yolofa via Yesu? Momo lie va kalela Pocipito caco?
13 Vokulia kombolo lovinyu Yocipito Conjivaluko, mua kongela ovina vialua. Omo liaco, omanu vana va kuete elavoko lioku kala palo posi, ka ca sungulukile okuti, valia kombolo lovinyu. Momo va kũlĩha okuti, ka vatiamẽlele Kakristão olombuavekua. Kuenda ka va kasi vocisila cokaliye Yehova a linga la vana vaka viala la Yesu Kristu. Omo okuti, ‘okopo’ yi lomboloka ocisila cokaliye, ava va kasi vocisila caco ovo lika valia kombolo lovinyu. Ava va kuete elavoko lioku kala palo posi otembo ka yi pui Vusoma wa Suku, ka va papatisiwila volofa via Yesu. Kuenda ka va viala kumue laye. Omo liaco, ka va kuete omoko yoku lia kombolo lovinyu. Ovo va kala ño Pocipito caco lesumbilo. Kuenda va lekisa olopandu viavo ku Yehova omo liovina a va lingila vonduko Yomõlaye oku kongelamo ongecelo yakandu avo.
14. Akristão olombuavekua poku lia kombolo lovinyu Pocipito Conjivaluko, va sukila oku linga nye?
14 Etendelo liomanu va nõliwa oku enda kilu oco va viale la Yesu, palo posi ndopo li puapo. Pole, osimbu handi ka va file, va sanjukila okulia kombolo lovinyu Pocipito Conjivaluko. Ovo va likuete omunga kumosi la vamanjavo vatiamẽla ketimba lia Kristu. Okulia kuavo kombolo lovinyu Pocipito Conjivaluko, ku va ivaluisa ocikele va kuete coku pandikisa lekolelo toke kolofa.—2 Petulu 1:10, 11.
Oku Kongeliwa ‘Kuovina Vioposi’
15. Velie va siata oku kongeliwa kocisoko Cakristão olombuavekua?
15 Okupisa kunyamo wo 1930, kua fetika oku molẽha owiñi wakahandangala ‘wolomeme vikuavo’ u kuete elavoko liomuenyo ko pui palo posi. Kuenje va siata oku kuatisa olombuavekua. (Yoano 10:16; Luka 12:32; Sakariya 8:23) Ovo va linga akamba a ‘vamanji ya Kristu.’ Kuenda va siata oku kuatisa kupange woku kunda ‘olondaka viwa viusoma’ oco vi linge uvangi kolofeka viosi. (Mateo 24:14; 25:40) Omo lioku eca ekuatiso liaco, Yesu o va tukula okuti olomeme viaye. Kuenje eci aka tetuluila olofeka, oka va kapa kondio yaye. (Mateo 25:33-36, 46) Omo lioku kuatela ekolelo kosonde ya Kristu, vaka linga owiñi wakahandangala uka puluka ‘kohali ya piãla.’—Esituluilo 7:9-14.
16. Velie va kongeliwa ‘vovina vioposi’? Omanu vaco vaka kuata ndati epuluvi lioku linga ‘omãla va Suku’?
16 Eci omanu va nõliwa oku enda kilu palo posi va puapo, kuiya esulilo lioluali lulo lua Satana. (Esituluilo 7:1-4) Vokuenda Kuviali wa Yesu Wohulukãi Yanyamo kumue lolosoma viaye, owiñi wakahandangala uka likongela lowiñi ukuavo womanu vaka pinduiwa. (Esituluilo 20:12, 13) Lekuatiso liuviali wa Yesu, omanu vaco vaka longisiwavo Ondaka ya Suku oco va kale otembo ka yi pui palo posi. Kesulilo Liohulukãi Yanyamo, omanu vosi va kasi voluali okuti, ovo ‘ovina vioposi,’ vaka pita voseteko ya sulako. Ava vaka yula oseteko yaco lekolelo, vaka tendiwa ‘ndomãla va Suku.’—Va Efeso 1:10; Va Roma 8:21; Esituluilo 20:7, 8.
17. Yehova oka tẽlisa ndati ocipango caye?
17 Yehova oka tẽlisa ocipango caye coku ‘kongela ovina viosi vu Kristu okuti, ovina viokilu levi vioposi.’ Ovangelo vokilu kuenda omanu vosi palo posi, vaka kuata ombembua ya lipua. Kuenje vaka pokola lika kuviali wa Yehova.
18. Olombuavekua kuenda olomeme vikuavo, vi kuatisiwa ndati poku enda Kocipito Conjivaluko yolofa via Yesu?
18 Keteke 12 kosãi ya Kupupu wo 2006, olombuavekua kuenda olomeme vikuavo, vika linga Ocipito cimue ca velapo. Ovo vaka ivaluka olofa via Yesu ndomo a ci handeleka hati: “Ci lingili onjivaluko yange.” (Luka 22:19) Vosi vaka enda Kocipito caco, vaka ivaluka ovina Yehova a siata oku va lingila vonduko Yomõlaye Yesu Kristu.
Oku Pitulula Atosi Tua Lilongisa
• Cipi ocipango ca Yehova catiamẽla kovina viokilu levi vio posi?
• ‘Ovina viokilu’ velie, kuenda via sukilile oku kongeliwa ndati?
• ‘Ovina vioposi’ velie, kuenda va kuete elavoko lie?
[Okakasia kemẽla 15]
“Etimba Lia Kristu”
Kelivulu lia 1 Va Korindo 10:16, 17, Paulu poku lombolola ondaka yatiamẽla kolombuavekua, wa tukula etimba lia Yesu lonjila yimue ya velapo. Eye wa popia hati: “Ombolo yina tu timbola, hayoko hẽ ongongela yetimba lia Kristu? Omo kuli ombolo yimosi, oco etu tu va lua [tua linga etimba] limosi.” Eci olombuavekua vilia kombolo Yonjivaluko yolofa via Yesu, vi sapula ukamba vakuete la vakuavo vatiamẽlavo ketimba lia Kristu.—Mateo 23:10; 1 Va Korindo 12:12, 13, 18.
[Elitalatu kemẽla 15]
Momo lie olombuavekua ovio lika vilia kombolo lovinyu?
[Elitalatu kemẽla 17]
Lekuatiso lieliangiliyo lia Yehova lioku tẽlisa ocipango caye, ovina viosi viokilu levi vioposi, vika kongeliwa