“Suku Eye Ocisola”
“U ka soli ka kũlĩhile Suku, momo Suku eye ocisola.”—1 YOANO 4:8.
1-3. (a) Ndamupi Embimbiliya li lombolola eci catiamẽla kocisola ca Yehova? Kuenda ndamupi ondaka yaco ka yi sokisiwila la yikuavo? (b) Momo lie Embimbiliya li popela okuti “Suku eye ocisola”?
YEHOVA o kuete ovituwa vimue viwa, haivio via lipua kuenda vi vetiya omanu. Pole, ocisola oco ca velapo pokati kovituwa viosi via Yehova. Ocisola ci kuete unene umue okuti u pondola oku tu vetiya oku kuata ukamba wocili la Yehova. Ci sanjuisa calua oku kũlĩha okuti, ocisola oco ca velapo pokati kovituwa viosi via Yehova. Ndamupi tua ci kũlĩha?
2 Embimbiliya li popia vali calua catiamẽla kocisola kuenda lalimue eteke lia popele ovituwa vikuavo via Yehova ndeci li tukula ocisola. Embimbiliya ka li popi okuti Suku eye unene, haeye esunga ale Suku eye olondunge. Eye o kuete ovituwa viaco kuenda eye ono yavelapo yovituwa viaco vitatu. Kueci catiamẽla kocisola, elivulu lia 1 Yoano 4:8, li lombolola ondongosi yondaka yaco ndoco: “Suku eye ocisola.” Ocili okuti, ocisola, oco ocituwa ca velapo ca Yehova kuenda ci kuete esilivilo limue liocili. Kueci catiamẽla kondaka eyi, etu tu pondola oku sima ndoco: Unene wa Yehova u pondola oku u kuatisa oku linga eci ca sunguluka. Esunga kuenda olondunge viaye vi songola ocituwa caye coku linga ovina via sunguluka. Pole, Yehova ocisola caye cu vetiya oku linga eci ca sunguluka. Kuenje, ocisola caye olonjanja viosi ci kapiwako eci eye a lekisa ovituwa vikuavo.
3 Ca siata oku popiwa okuti, Yehova eye ocindekaise ca velapo cocisola. Nda tu yongola oku lilongisa eci catiamẽla kocisola ca velapo, tu sukila oku lilongisa calua catiamẽla ku Yehova. Omo liaco, tu konomuisi ovina vimue viatiamẽla kocisola ca Yehova ka ci sokisiwa.
Elinga Lia Velapo Liocisola
4, 5. (a) Lipi elinga lia velapo liocisola ca lekisiwa vesapulo liomanu? (b) Momo lie tu popela tuti Yehova Lomõlaye va li kuetele ukamba wocisola cocili?
4 Yehova wa siata oku lekisa ocisola caye lolonjila vimue via litepa, pole kuli onjila yimue okuti ya velapo vikuavo. Ndamupi eye a ci linga? Eye wa lekisa ocisola caco poku tuma palo posi Omõlaye loku tala ohali oco a fe omo liakandu etu. Omo liaco, tu pondola oku popia okuti, eyi oyo onjila yimue ya velapo vesapulo liosi liomanu. Momo lie tu popela ndoco?
5 Embimbiliya li tukula Yesu okuti, eye “uveli pokati koviluvo viosi.” (Va Kolosai 1:15) Sokolola okuti, Omõla wa Yehova wa lulikiwa osimbu eci handi oluali ka lua lulikiwile. Oco hẽ, anyamo añami Isia a kala kumosi Lomõlaye? Omanu vana va lilongisa eci catiamẽla kuloño, va siata oku popia hati, tunde eci oluali lua lulikiwa pa pita ale eci ci soka 13 kolohuluwa vianyamo. Ndaño okuti oku tenda kuaco kua sokapo pole, anyamo aco ka a sokisiwa lotembo yomuenyo Womõla a Yehova! Nye eye a lingaile vokuenda kuanyamo aco? Omõla lesanju lialua, wa talavaya la Isiaye “ndomesele.” (Olosapo 8:30; Yoano 1:3) Yehova wa talavaya kumosi Lomõlaye poku lulika oviluvo vikuavo. Hatembokuoyo yiwa yesanju ovo va kuata! Helie pokati ketu o pondola oku sokolola ukamba wa siata oku kala pokati ka Suku Lomõlaye vokuenda kuotembo yalua? Ocili okuti, Yehova Suku o kuete elitokeko liocili Lomõlaye kuenda pokati kavo pali ocisola calua.
6. Eci Yesu a papatisiwa, ndamupi Yehova a lekisa esanju liaye kueci catiamẽla Komõlaye?
6 Ndaño okuti pokati ka Yehova la Yesu pa kala ukamba wocili, pole eye wa tumĩle Omõlaye oco a citiwe ndomunu palo posi. Yehova poku ci linga, ca lombolokele okuti vokuenda kuanyamo, Eye wa kala lelitokeko liwa Lomõlaye wa soliwa calua oko kilu. Lonjongole yocili, Yehova oko kilu wa mõla Yesu eci a kala oku kula toke eci a linga ulume umue wa lipua. Eci Yesu a tẽlisa ci soka 30 kanyamo wa papatisiwa. Eteke liaco eye a papatisiwa, Isia oko kilu wa popia hati: “U Eye Omõlange wa soliwa, ndo sanjukila.” (Mateo 3:17) Hesanjukuolio Isia a yeva poku mõla Yesu wa tẽlisa ovina viosi eye popele vina a pingile kokuaye oco vi lingiwe!—Yoano 5:36; 17:4.
7, 8. (a) Ohali yipi Yesu a liyaka layo keteke 14 kosãi ya Nisana kunyamo wa 33 K.K.? Ndamupi Isiaye wokilu a yevavo evalo liaco? (b) Momo lie Yehova a ecelela okuti Omõlaye o tala ohali kuenda o fa?
7 Evalo lipi Yehova a yeva keteke 14 kosãi ya Nisana, kunyamo wo 33 K.K. eci Yesu a pakuiwa kuenda ambatiwa lowiñi una wa kuatele onyeño laye? Ndamupi eye a kala eci Yesu a yoliwa epembe, loku u siyila, kuenda oku tipuiwa? Ndamupi eye a kala eci Yesu a tipuiwa toke eci onyima yaye yeyukile apute? Ndamupi eye a kala eci Yesu a valeliwa kovoko kuenda kolomãhi kevaya liuti oco omanu vo tonde? Esumuo lipi Isiaye a pita lalio eci a limbuka okuti Omõlaye wa kala oku lila omo liohali? Ndamupi Yehova a kala eci Omõlaye a fa vonjanja yatete tunde eci oluali lua lulikiwa?—Mateo 26:14-16, 46, 47, 56, 59, 67; 27:26, 38-44, 46; Yoano 19:1.
8 Omo okuti Yehova o kuete ocikembe, ka ca lelukile kokuetu oku lombolola evalo Eye a yeva eci a mõla Omõlaye wa kala oku tala ohali toke kolofa. Pole, tu pondola lika oku lombolola esunga lieci Yehova a ecelela elinga liaco ka lia sungulukile. Momo lie Isia a ecelela okuti eye muẽle o pitavo levalo liaco? Kelivulu lia Yoano 3:16, Yehova o tu lomboluila olondaka vimue vi komohĩsa haivio vi kuete esilivilo liocili okuti vi sangiwa Vevanjeliu. Olondaka viaco vi popia hati: “Omo Suku a sola ndoco oluali, oco a ecela Omõlaye wongunga okuti wosi u kolela ka fi, puai o mola omuenyo ko pui.” Ocili okuti, Yehova wa ecelela oku yeva evalo liaco omo liocisola. Omo liaco, ka kuli omunu umue wa lekisa ocisola ndeci Yehova a lekisa.
Ndomo Yehova a tu Likuminya Ocisola Caye
9. Nye Satana a yongola okuti oco tu tava catiamẽla ku Yehova ndomo a tu tenda? Pole, nye Yehova a tu likuminya?
9 Ku votuiwa epulilo limue li kuete esilivilo liocili liokuti: Anga hẽ Suku o sole omunu lomunu pokati ketu? Kuli omanu vamue va pondola oku tava okuti, Suku wa sola omanu ndomo elivulu lia Yoano 3:16 li ci lombolola. Pole, ovo va siata oku sima ndoco: ‘Suku lalimue eteke aka lekisa ocisola kokuange.’ Omanu vaco va kuete ovisimĩlo evi omo okuti Satana Eliapu o kasi oku tu vetiya oco tu tave kondaka yokuti, Yehova ka kuete ocisola letu kuenda ka tu kapeleko. Handi vali, ndaño tu kuete ovisimĩlo viokuti, ka tu kuete esilivilo, pole Yehova o tu likuminya okuti, omanu vaye vana va pokola kokuaye va kuete esilivilo liocili.
10, 11. Ndamupi olusapo lua Yesu luatiamẽla kolongungu, lu lekisa okuti etu tu kuete esilivilo liocili ku Yehova?
10 Konomuisa olondaka via Yesu vi sangiwa kelivulu lia Mateo 10:29-31. Poku lekisa okuti olondonge viaye vi kuete esilivilo liocili, eye wa popia hati: “Olongungu vivali hẽ, ka vi landiwa lolusendu? Kuenje, layimue yavio yi lokila posi te Isiene wa ci panga. Puãi ndaño esinga liovovitue viene lia tendiwa. Oco ko ka kuati ohele, momo wa velipo olongungu via lua.” Tu kũlĩhĩsi elomboloko liolondaka vina Yesu a sapuila kolonjeveleli viaye kocita catete.
11 Koloneke via Yesu, ongungu ya kala onjila yimue okuti ka ya tĩlile calua oku yi landa oco yi liwe. Lopalata yimosi yina ka yi kuete esilivilo lialua, ca tavele okuti omunu o landa layo olongungu vivali. Pole, noke Yesu wa eca uvangi ndomo tu tanga kelivulu lia Luka 12:6, 7 hati, nda omunu o kuete olopalata vivali, ka landi lika olongungu vikuãla, pole o pondola oku landa olongungu vitãlo. Ongungu yikuavo va enda oku vokiyako, ya kala ndocina cimue ka ci kuete ondando okuti ceciwa ocali. Ci tava okuti, olongungu viaco via enda oku sokisiwa ndocina cimue ka ci kuete esilivilo. Oco hẽ, ndamupi Ululiki wetu a enda oku vi tenda? Yesu wa popia hati: “Layimue yavio [okuti ongungu yikuavo va enda oku vokiyako] yivaliwa kovaso a Suku.” Lelomboluilo eli, tu pondola oku kuata elomboloko liolondaka via Yesu. Omo okuti Yehova o lekisa esilivilo kolonjila, eye wa velisapo calua omanu! Ndomo Yesu a ci popia, Yehova wa kũlĩha ciwa ovina viosi viatiamẽla kokuetu. Ndaño muẽle esinga lio vutue wetu eye wa li tenda liosi.
12. Momo lie tu popela okuti Yesu wa kuata esunga eci a popia hati esinga lio vutue wetu lia tendiwa?
12 Omanu vamue va siata oku sima hati, Yesu wa luluviya enene poku popia eci catiamẽla kondaka a tukula ndeti palo. Pole, ivaluka eci catiamẽla kepinduko. Yehova o pondola oku tu pindula kolofa, momo eye wa tu kũlĩha ciwa! Eye wa tu kapako calua momo ivaluka cosi catiamẽla kokuetu, oku kongelamo ovina viatatama viekalo lietu, lovina vikuavo tua linga vokuenda kuanyamo kuenda ovitangi viosi tua pita lavio komuenyo wetu. Ocili okuti, vutue womunu mu sangiwa etendelo limue li soka 100.000 kovikolo viesinga. Pole, oku vi tenda kuaco ocina cimue okuti ku Yehova ka catĩlile. Omo liaco, olondaka via Yesu vi tu ĩha ekolelo liokuti, Yehova wa kapako omunu lomunu pokati ketu!
13. Ndamupi ovitangi Soma Yehosafata a pita lavio vi lekisa okuti Yehova wa kapako ovituwa vietu viwa ndaño okuti ka tua lipuile?
13 Embimbiliya, li lombololavo ocina cimue catiamẽla kocisola Yehova a lekisa kokuetu. Eye o tu sole calua kuenda wa kapako ovina viosi viwa tu linga. Konomuisa ulandu watiamẽla ku Yehosafata una wa kala Osoma yimue yiwa. Eci eye a kuamẽle onjila yimue ka ya sungulukile, Yehova wo sapuila hati: “Onyeño ya Yehova ya ku wengukilila.” Halondakakuovio viocili! Pole, esapulo lia Yehova ka lia sulilile lika vovinimbu evi. Eye wamisako vali hati: “Kokuove kua sangiwa [ovina] vimue viwa.” (2 Asapulo 19:1-3) Omo okuti Yehova omunu umue ukuesunga, eye ka tavele okuti onyeño yaye yu tateka oku kapako ‘ovina vimue viwa’ viatiamẽla ku Yehosafata. Ulandu owu hẽ ka u tu sanjuisa poku kũlĩha okuti Suku wa kapako ovituwa vietu viwa ndaño okuti ka tua lipuile?
Suku Umue ‘Ukuakuecela’
14. Eci tu linga ekandu, ovisimĩlo vipi vievalo tu liyaka lalio? Pole, ndamupi tu pondola oku kuatisiwa longecelo ya Yehova?
14 Eci tu linga ekandu, tu sumua calua, tu kuata osõi kuenda tu li vetela etu muẽle evelo loku sima okuti, etu lalimue eteke tuka sesamẽla vali oku vumba Yehova. Pole, ivaluka okuti, Yehova ‘ukuakuecela.’ (Osamo 86:5) Ocili okuti, nda tua likekembela akandu etu okuti ka tu a pitolola vali, Yehova oka tu ecela. Omo liaco, tu konomuisi ndomo Embimbiliya li lombolola eci catiamẽla kocisola ca Yehova ci komohĩsa.
15. Ocinãla cipi Yehova a kapa akandu etu?
15 Ukualosamo Daviti wa lombolola olondaka vikuavo viwa vi lekisa oku ecela kua Yehova, poku popia hati: “Ndeci kutundilo kupãla lutakelo, haico a kapa okulueya kuetu ocipãla.” (Osamo 103:12) Ocinãla cipi ci sangiwa pokati kutundilo lutakelo? Ocili okuti, utundilo u sangiwa ocipãla lutakelo kuenda ovina viaco vivali lalimue eteke vi lisanga. Usonehi umue, wa popia hati, ondaka eyi yi lomboloka okuti, “pokati kutundilo lutakelo pa sangiwa ocinãla cimue calua kuenda omunu ka tẽla oku sokolola ndomo ocinãla caco ci kasi.” Olondaka via Soma Daviti vina via tumiwa la Suku, vi tu sapuila okuti eci Yehova a ecela, akandu etu o a kapa ocipãla okuti etu ka tu tẽla oku sokolola ndomo ocinãla caco ci kasi.
16. Eci Yehova a ecelela akandu etu momo lie tu kuatela ekolelo liokuti eye o tu tenda okuti tua yela?
16 Anga hẽ ove wa setekele ale okupa eliño limue vuwalo u yela? Ndaño pamue ove wa likolisilako calua, ci tava okuti eliño liaco ka lia tundilemo. Konomuisa ndomo Yehova a lombolola epondolo liaye liatiamẽla koku ecela. Eye wa popia ndoco: “Ndaño akandu ene a kusuka ngẽ ndonanga yohusu, a yela ndocikokoto; ndaño a kusuka ndohusu a linga ndutele.” (Isaya 1:18) Ondaka yoku popia hati, ‘ohusu,’ yi lomboloka evala limue li kusuka calua.a ‘Ohusu,’ ya kala evala limue likusuka likasi vonanga yevala limue likuavo. Etu lalimue eteke nda tua tẽla okupa eliño liakandu etu longusu yetu muẽle. Pole, Yehova o pondola okupa akandu ana a kasi ndonanga yi kusuka kuenda ndohusu kuenje o a yelisa ndocikokoto ale ndutele uyela. Eci Yehova a ecela akandu etu, ka tu kala vali leliño liaco komuenyo wetu wosi.
17. Ndamupi Yehova anasi konyima yaye akandu etu?
17 Eci Esekiele a puluka kuveyi umue okuti nda wo tuala kolofa, eye wa imba ocisungo cimue coku eca olopandu kuenje wa popia ku Yehova hati: “Wa takumuila akandu ange konyima yove.” (Isaya 38:17) Olondaka evi vi lekisa okuti, Yehova o tikula akandu omunu una wa likekembela kuenda o anasi konyima Yaye, kuna okuti ka a mõli vali kuenda ka a kapiko vali. Ndomo ca lomboluiwa lelivulu limue, ocisimĩlo colondaka evi ca lomboluiwa ndoco: “Ove wa mãlako [akandu ange] kuenda ndi kasi soketi sia lingile ekandu lalimue.” Oco hẽ, olondaka evi ka viu ku sanjuisa?
18. Ndamupi uprofeto Mika a lekisa okuti eci Yehova a ecela akandu etu Eye o anasi kuenda ka a sokolola vali?
18 Vohuminyo yimue yatiamẽla koku tumbulula ovina, uprofeto Mika wa lekisa ekolelo liaye a kuata liokuti Yehova o pondola oku ecela omanu vaye vana va likekembela. Eye wa popia hati: “Helie Suku wa soka ndove, u . . . ivala okulueya kuocisupe cocipiñalo caye? . . . Ove wimba ovakandu etu osi valondo okalunga.” (Mika 7:18, 19) Sokolola okuti olondaka evi via kuata elomboloko liocili komanu vo kotembo yapita. Anga hẽ kua kala epuluvi lioku yovola ocina cimue ca imbiwa “valondo okalunga”? Omo liaco, olondaka via Mika vi lekisa okuti eci Yehova a ecela akandu etu, eye o anasi kuenda ka a sokolola vali.
“Suku Yetu o Kasi Lohenda”
19, 20. (a) Ondaka yo Heveru yoku popia hati “oku lekisa ohenda” ale “oku ecela” yi lomboloka nye? (b) Ocikembe cina ci tukuiwa Vembimbiliya cina ina a lekisa komõla waye ci tu longisa nye catiamẽla kohenda ya Yehova?
19 Ohenda ocituwa cimue cikuavo catiamẽla kocisola ca Yehova. Ohenda yi lomboloka nye? Pokati kohenda kuenda oku ecela ndomo ca lomboluiwa Vembimbiliya, pali ukamba wocili. Olondaka viaco kelimi lio Heveru kuenda lio Helasi vi lomboloka ohenda. Ondaka yo Heveru yoku popia hati, ra·cham,’ ya siata oku pongoluiwa hati, “oku lekisa ohenda” ale “oku ecela.” Ondaka yaco eyi yo Heveru yina Yehova atiamisila kokuaye muẽle, yi lomboloka ‘imo’ kuenda “ohenda yonjali yukãi.”
20 Embimbiliya li tukula ocikembe ina a lekisa komõla waye oco li tu longise eci catiamẽla kohenda Yehova a kuete. Kelivulu lia Isaya 49:15, tu tangako ndoco: “Ukãi nga, ivala omõlaye o nyama okuti ka lingi ohenda [ra·chamʹ] omõla wovimo liaye? Oco muẽle, ci tava okuti . . . ivala, ame puãi siu ku ivala.” Ka ca lelukile oku sima okuti onjali yimue yukãi ivalako oku nyamisa loku tata oñaña yaye. Ocili okuti, oñaña ka yi tẽla oku liteyuila oyo muẽle, kuenda yi sukila oku tatiwa la inaye utanya luteke. Cisumuisa calua ceci okuti, olonjali vimue ka via siatele oku tata ciwa omãla vavo, ca piãla vali enene “koloneke vilo via sulako.” (2 Timoteo 3:1, 3) Pole, Yehova wa popia hati, “ame puãi siu ku ivala.” Yehova afendeli vaye o va kuetele ohenda yimue yocili okuti ka yi sokisiwa. Handi vali, ohenda Yaye ka yi sokisiwa la yina onjali yukãi ya siata oku lekisa komõlaye utito.
21, 22. Ovitangi vipi va Isareli va liyaka lavio ko Egito kuenda ndamupi Yehova a tambulula oku liyeya kuavo?
21 Ndamupi Yehova a sokisiwa lonjali ya siata oku lekisa ohenda? Ohenda yaco ya limbukiwila konjila eye a kuama poku tata va Isareli kosimbu. Kesulilo liocita 16 O.Y., olohũlũkãi via va Isareli va kala kupika kofeka yo Egito kuna va kala oku talisiwila ohali. (Etundilo 1:11, 14) Omo liovitangi va Isareli va liyaka lavio, va sukilile oku pinga ekuatiso ku Yehova. Ndamupi Suku ukuahenda a va kuatisa?
22 Yehova wa yeva evalo kutima waye. Kuenje wa popia hati: “Nda mõla ohali yomanu vange va kasi ve Egito. Nda yeva ndeci va lilila asongui vavo vupange, nda kulĩha olohali viavo.” (Etundilo 3:7) Yehova ka solaile oku mõla omanu vaye va kasi oku tala ohali ale oku yeva okuti va kasi oku lila kuenje eye ka va kuatela ohenda. Yehova eye Suku umue ukuacisola. Ocisola ci pondola oku kuatisa omunu oku limbuka ohali ya vakuavo, kuenje cu vetiya oku kuata ohenda. Yehova ka yevele ño evalo liomanu vaye pole, eye wa lekisavo onjongole yoku va kuatisa. Elivulu lia Isaya 63:9 li popia hati: “[Yehova] wa va yovola locisola caye kuenda ohenda yaye.” Yehova wa yovola va Isareli kofeka yo Egito leka ‘liaye lia pama.’ (Esinumuĩlo 4:34) Kuenje, noke eye wa va lingila ocikomo coku va pongiyila okulia kuenda wa va nena vali vofeka yina yima apako awa.
23. (a) Ndamupi olondaka viukualosamo vi tu ĩha ekolelo liokuti Yehova wa kapako omunu lomunu pokati ketu? (b) Ndamupi Yehova a siata oku tu kuatisa?
23 Yehova ka lekisa lika ohenda komanu vaye omo va kasilili ocimunga. Suku yetu ukuacisola wa tu kapako vosi yetu omunu lomunu. Eye wa kũlĩha ciwa ovitangi viosi tu liyaka lavio. Ukualosamo wa popia hati: “Ovaso a Yehova a vanja vakuesunga, o vonguila ovatui aye kevilikiyo liavo. Yehova yu ocipepi la vakuavitima via teka. O popela ava va kasi lovitima via samba.” (Osamo 34:15, 18) Ndamupi Yehova a siata oku kuatisa omunu lomunu pokati ketu? Eye ka sukila oku mãlako ovitangi vietu, Pole, Eye wa linga eliangiliyo lioku kuatisa omanu vana vo liyeyela oco a va kuatise. Ondaka Yaye yeca alungulo ana a pondola oku eca ekuatiso liocili. Vekongelo, Yehova wa sokiya akulu vekongelo valoñoloha vana va siata oku lekisa ohenda poku eca ekuatiso ku vakuavo. (Tiago 5:14, 15) Omo okuti Yehova “ukuakuyeva olohutililo,” eye wa siata oku eca “espiritu sandu [liaye] kuava vo pinga.” (Osamo 65:2; Luka 11:13) Omo liaco, aliangiliyo aco a siata oku eciwa la “Suku yetu o kasi lohenda.”—Luka 1:78.
24. Ndamupi ove oka pokola kocisola ca Yehova?
24 Etu hẽ ka tu sanjukila oku sokolola Isietu ukuacisola? Vocipama ca tete, tua ivaluisiwa okuti, Yehova wa siata oku lekisa unene waye, lesunga kuenda olondunge locisola cocili oco a tu kuatise. Kuenje, vocipama cilo, tua lilongisavo okuti Yehova wa siata oku lekisa ocisola caye ku vosi kuenda komunu lomunu pokati ketu lonjila yimue yi komohĩsa calua. Cilo, omunu lomunu pokati ketu o sukila oku lipulisa eye muẽle ndoco: ‘Ndamupi ndika pokola kocisola ca Yehova?’ Ove o pondola oku ci linga poku lekisa ocisola kokuaye lutima wove wosi, lolondunge viove viosi lomuenyo wove wosi kuenda longusu yove yosi. (Marko 12:29, 30) Ovituwa viove vieteke leteke komuenyo wove, vi lekise okuti o kuete onjongole yoku kuata ukamba wocili la Yehova. Nda wa ci linga, Yehova Suku ukuacisola oka linga ekamba liove liocili vokuenda kuotembo ka yi pui!—Tiago 4:8.
[Etosi pombuelo yemẽla]
a Omunu umue ukuakukonomuisa Embimbiliya wa popia hati, onanga yi kusuka ya “kala onanga yimue okuti ka yi kunguka ndaño ya pita volume, vombela, ale pamue ya sukuiwa lovava.”
Handi Ocivaluka?
• Ndamupi tua kũlĩha okuti ocisola oco ca velapo pokati kovituwa viosi via Yehova?
• Momo lie ci popiwila okuti, Yehova poku tuma Omõlaye oku tala ohali kuenda oku tu fila, elinga limue liocisola ca velapo eye a lekisa okuti lalimue eteke ca lekisiwile?
• Ndamupi Yehova a tu likuminya okuti eye o lekisa ocisola ku vosi yetu omunu lomunu?
• Lolonjila vipi via velapo Embimbiliya li lombolola eci catiamẽla kocituwa cokuecela ca Yehova?
[Elitalatu kemẽla 24]
‘Suku wa eca Omõlaye wongunga’
[Ofoto ya eciwa]
© J. Heidecker/VIREO
[Elitalatu kemẽla 25]
“Ene wa velipo okuti olongungu via lua vi sule”
[Elitalatu kemẽla 26]
Ocikembe ina a lekisa komõla waye ci tu longisa eci catiamẽla kohenda ya Yehova