Tu Lingi Ovina vi Eca Ulamba ku Suku Eteke Leteke

UKUALOSAMO Daviti wa likutilila ku Yehova hati: “Omele njukise ocisola cove ka ci pui, momo nda ku kolela. Njimbe onumbi yonjila nda posokela oku endelamo.” (Osa. 143:⁠8) Anga hẽ omẽle lomẽle, eci o pasuka o pandula Yehova, loku pinga kokuaye oco a songuile ovisimĩlo kuenda ovilinga viove, ndeci Daviti a lingaile? Ocili okuti ove wa siata oku ci linga.

Omo okuti etu tuafendeli va Yehova, ‘ndaño tu lia, ndaño tu nyua, cosi tu linga, tu ci lingili ulamba wa Suku.’ (1 Va Kor. 10:​31) Ovina viosi tu linga vomuenyo wetu, vi pondola oku sivaya Yehova ale oku u sepula. Ondaka ya Suku yi tu sapuilavo okuti Satana wa siata oku lundila vamanji a Kristu ‘utanya luteke,’ oku kongelamo afendeli vosi va Suku kulo kilu lieve. (Esit. 12:​10) Omo liaco, tu sukila oku tamãlala lalundi a Satana oco tu sanjuise utima wa Isietu wo kilu, Yehova, poku linga upange u kola ‘utanya luteke.’​—⁠Esit. 7:15; Olosap. 27:⁠11.

Tu konomuisi olonjila vivali vi kuete esilivilo, okuti vi pondola oku tu kuatisa oku eca ulamba ku Suku. Yatete, mua kongela ovina tua velisapo kuenda yavali, oku kapako vakuetu.

Ekalo li Litava Lelitumbiko Lietu

Poku litumbika ku Yehova, tua lekisa onjongole yetu yoku u vumba kuenda tua likuminya oku endela volonjila viaye ‘utanya luteke,’​—⁠otembo yenda ño hũ. (Osa. 61:​5, 8) Tu pondola oku kala ndati lekalo li litava lohuminyo tua linga? Tu lekisa ndati okuti tu sole Yehova lutima wetu wosi eteke leteke?

Ondaka ya Suku yi tukula ovikele Yehova a yongola okuti tu vi tẽlisa. (Esin. 10:​12, 13) Vialua pokati kovikele viaco, vi sangiwa vokakasia losapi hati, “Ovikele Suku a Eca,” kemẽla 22. Ovikele viaco viosi, vi kuete esilivilo momo Suku eye wa vi eca. Tu pondola oku nõla ndati eci ca velapo nda tu kuete ovina vialua vi sukila otembo?

Etu tua pitisa kovaso ovina vi kola ndeci, oku tanga Embimbiliya, oku linga olohutililo, oku enda kolohongele kuenda kupange woku kunda. (Mat. 6:33; Yoa. 4:34; 1 Pet. 2:⁠9) Ocili okuti, etu ka tua siatele oku pita eteke liosi loku litumbika kovina viespiritu. Momo tu sukila oku linga esokiyo lioku talavaya, oku enda kosikola, kuenda ovopange akuavo o vonjo. Omo liaco, ciwa okuti upange woku sanda eteku kuenda ovopange akuavo, ka a tateka upange wetu u kola, ndeci oku endaenda kolohongele. Nda tu yongola oku kala kepuyuko, tu sukila oku sokiya ciwa otembo oco ka tu ka pumbe epasu lia mitavaso o nyula akongelo, pamue eteke liohongele yilikasi, ale ohongele yimbo, leyi yofeka. Olonjanja vimue, tu sukila oku linga ovopange alua. Pole tu pondola oku linga ovopange aco kumue lepata, ndeci, oku yelisa Vonjango Yusoma, oku eca uvangi kepuluvi lionanya kupange lo kosikola. Tu sukilavo oku nõla upange woku sanda eteku, osikola tu ka tangela, akamba vawa vana va tu kuatisa oku pitisa kovaso ovina via velapo, okuti oku fendela Yehova, Isietu ukuacisola.​—⁠Uku. 12:⁠13.

Kapako Vakuene

Yehova o yongola okuti tu lekisa ocikembe ku vakuetu kuenda oku va lingila eci ciwa. Pole, Satana o vetiya omanu oku kuata ocipululu. Voluali luaye mue yuka omanu “vakuakulisola [ovo muẽle],” haivo “vakuakusola calua esanju” kuenda omanu vana va “kũlila [lika] etimba.” (2 Tim. 3:​1-5; Va Gal. 6:⁠8) Omanu valua ka va sokolola vali ovitangi va pondola oku kokela vakuavo. Kolonepa viosi kue yuka “ovilinga vietimba.”​—⁠Va Gal. 5:​19-21.

Vana va songuiwa lespiritu sandu lia Yehova, va siata oku lekisa ovituwa viwa ndeci, ocisola, ohenda, kuenda va lingaila ovina viwa vakuavo! (Va Gal. 5:​22) Ondaka ya Suku yi tu vetiya oku kapako olonjongole via vakuetu okuti vietu muẽle ci sule. Oku kapako vakuetu ka ci lomboloka oku kala vakuasiata yoku likapa vovitangi viamãle. (1 Va Kor. 10:​24, 33; Va Fil. 2:​3, 4; 1 Pet. 4:​15) Etu tu sukila oku kuatela ocikembe vamanjetu. Tu sukilavo oku kuatisa vana okuti havamanjetuko. (Va Gal. 6:​10) Ove hẽ wa siata oku sandiliya epuluvi lioku lingila vakuene ovina viwa?​—⁠Tanga okakasia losapi “Lekisa Esumbilo,” kemẽla 23.

Ka tu lekisa lika ocikembe kapuluvi awa. (Va Gal. 6:2; Va Efe. 5:2; 1 Va Tes. 4:​9, 10) Pole, eteke leteke tu sukila oku likolisila oku kuatisa vakuetu, ndaño okuti olonjanja vimue ka ca lelukile oku ci linga. Tu yongola oku kala vakuacali poku eca otembo yetu, ovipako, uloño, olondunge kuenda ovina vikuavo. Eci tu linga ocali ku vakuetu, tu ka tambulavo ocali ca Yehova.​—⁠Olosap. 11:25; Luka 6:⁠38.

Upange u Kola ‘Utanya Luteke’

Anga hẽ citava oku lingila Yehova upange u kola ‘utanya luteke’? Citava, poku linga vakuambili kovina viosi viatiamẽla kefendelo lietu. (Ovil. 20:​31) Tu pondola oku yukisa omuenyo wetu lupange u kola, poku tanga Ondaka ya Suku eteke leteke, oku yi sokolola, oku likutilila lolupili, oku likolisilako oku endaenda kolohongele kuenda oku sandiliya apuluvi oku kundila omanu.​—⁠Osa. 1:2; Luka 2:37; Ovil. 4:20; 1 Va Tes. 3:10; 5:⁠17.

Anga hẽ tu kasi oku lingila Yehova upange waco u kola? Nda oco, onjongole tu kuete yoku u sanjuisa loku eca etambululo kalundi a Satana, yi ka lekisiwila kovina viosi viomuenyo wetu weteke leteke. Kovina viosi tu linga kuenda nda tu sangiwa vekalo lie, nda lie, tu likolisiliko oku eca ulamba ku Yehova. Tu eceleli okuti olonumbi viaye vi vetiya upopi wetu, ovituwa kuenda oku songuila ovisimĩlo vietu viosi. Tu lekisa okuti tua sanjukila ndomo eye a tu tata locisola, poku u kolela loku linga upange waye lolohõlo vietu viosi. Omo ka tua lipuile, eci tu lueya tu tavi lumbombe kalungulo aye kuenda epindiso a siata oku tu ĩha.​—⁠Osa. 32:5; 119:97; Olosap. 3:​25, 26; Va Kol. 3:17; Va Hev. 6:​11, 12.

Tu eci ulamba ku Suku eteke leteke vomuenyo wetu. Nda tu ci linga, ovitima vietu vi sanga elembeleko kuenda tu ka tatiwa la Isietu wo kilu ukuacisola otembo ka yi pui.​—⁠Mat. 11:29; Esit. 7:​16, 17.

[Okakasia kemẽla 22]

Ovikele Suku a Eca

• Oku likutilila lolupili.​—⁠Va Rom. 12:⁠12.

• Oku tanga Embimbiliya loku kapako eci tua lilongisa.​—⁠Osa. 1:2; 1 Tim. 4:⁠15.

• Oku fendela Yehova vekongelo.​—⁠Osa. 35:18; Va Hev. 10:​24, 25.

• Oku kuatisa epata lietu ketimba, kespiritu kuenda kovisimĩlo.​—⁠1 Tim. 5:⁠8.

• Oku kunda olondaka viwa Viusoma loku longisa omanu oco va linge olondonge.​—⁠Mat. 24:14; 28:​19, 20.

• Oku tata uhayele ketimba, kespiritu kuenda kovisimĩlo loku lingainga olomapalo via sunguluka.​—⁠Mar. 6:31; 2 Va Kor. 7:1; 1 Tim. 4:​8, 16.

• Oku tẽlisa ovikele vietu vekongelo.​—⁠Ovil. 20:28; 1 Tim. 3:⁠1.

• Oku tata onjo yetu kuenda Onjango Yusoma.​—⁠1 Va Kor. 10:⁠32.

[Okakasia kemẽla 23]

Lekisa Esumbilo

• Kakulu vendamba, alume lakãi.​—⁠Ovis. 19:⁠32.

• Kuava va vela haivo va sumua.​—⁠Olosap. 14:⁠21.

• Ku vamanji vekongelo va sukila oku kuatisiwa lonjanga nda ove o kuete epondolo liaco.​—⁠Va Rom. 12:⁠13.

• Ku umue ngandiove.​—⁠1 Tim. 5:​4, 8.

• Ku manji umue wa fisa ohueli yaye.​—⁠1 Tim. 5:⁠9.

• Kukulu umue wekongelo o talavaya calua.​—⁠1 Va Tes. 5:​12, 13; 1 Tim. 5:17.