Sanjukila Ovikele Viove Vekongelo
“Suku wa sokeka vetimba ovimatamata viosi, cimosi cimosi, ndomo a panga.”—1 VA KOR. 12:18.
1, 2. (a) Nye ci lekisa okuti, vamanji vosi va pondola oku sanjukila ovikele va tambula vekongelo? (b) Apulilo api tu konomuisa vocipama cilo?
TUNDE kotembo ya va Isareli, Yehova wa sokiya ekongelo, oco a tekule afendeli vaye konepa yespiritu, kuenda oku va songuila. Eci va Isareli va tambula olupale luo Hai, Yehosua ‘wa tangela kovaso yavo olondaka viovihandeleko, viasumũlũho levi viesiñalo, ndomo ca sonehiwa velivulu liovihandeleko.’—Yeh. 8:34, 35.
2 Kotembo yovapostolo, Paulu wa sapuila ukulu wekongelo Timoteo hati, ekongelo Liakristão lia linga ‘onjo ya Suku,’ okuti, “ongunji yi talamisa ocili hailio onjaka yaco.” (1 Tim. 3:15) Koloneke vilo, ‘onjo ya Suku,’ yi lomboloka ocimunga ca vamanji va sangiwa voluali luosi. Kocipama 12, vukanda watete Paulu a sonehela va Korindo, wa sokisa ekongelo ndetimba liomunu. Eye wa lekisa okuti, ndaño ovimatamata vietimba vi kuete ovopange a litepa, pole, viosi vi kuete esilivilo. Omo liaco, Paulu wa soneha hati: “Suku wa sokeka vetimba ovimatamata viosi, cimosi cimosi ndomo a panga.” Eye wa lekisavo okuti, ‘ovimatamata vimue vietimba tu sima okuti ka vi kuete esilivilo, ovio tu sumbila calua.’ (1 Va Kor. 12:18, 23) Omo liaco, vamanji vosi va sangiwa vocisoko ca Yehova, lomue o kuete ocikele ca velapo cukuavo. Pole, via litepa lika konjila yi kuamiwa poku vi tẽlisa. Tu sanjukila ndati ovikele tua tambula vocisoko ca Yehova, kuenda tu vi tẽlisa ndati? Ovina vipi via kongeliwa vocikele tua tambula vekongelo? Oku kula kuetu kespiritu, ku ‘limbukiwa ndati lomanu vosi’?—1 Tim. 4:15.
Tu Pondola Ndati Oku Sanjukila Ovikele Vietu Vekongelo?
3. Nye ci lekisa okuti, tua sanjukila ovikele tua tambula vekongelo, kuenda tua vi kapako?
3 Uvangi u lekisa okuti, tua sanjukila ovikele vietu vekongelo, u limbukiwila kekuatiso tu eca ‘kukuenje wa kolelua haeye wa lunguka,’ kuenda Kosungu Yakulu Yolombangi Via Yehova. (Tanga Mateo 24:45-47.) Tu sukila oku konomuisa, nda tu kasi oku pokola kolonumbi viukuenje wa lunguka. Unyamo lunyamo, tua siata oku tambula olonumbi viatiamẽla koku li posuisa luwalo wa sunguluka, ovitalukilo, kuenda oku kũlĩhĩsa lutate ovina tu tala vo Internet. Anga hẽ, tua siata oku pokola kalungulo aco oco tu liteyuile konepa yespiritu? Tu kasi hẽ oku pokola konumbi yoku lilongisa Embimbiliya lepata? Tua kapako hẽ elungulo lioku linga elilongiso liaco koñolosi? Nda ka tua kuelele, tua sokiya hẽ otembo yelilongiso Liembimbiliya pokolika? Cikale okuti tua kuela, ale sio, nda tua pokola kolonumbi viukuenje wa lunguka, tuka tambula asumũlũho a Yehova.
4. Nye tu sukila oku ivaluka, osimbu ka tua nõlele onjila tu yongola oku kuama?
4 Vamue va siata oku sima okuti, omunu eye o nõla ovitalukilo kuenda uwalo a sole. Akristão vana va sanjukila ovikele viavo vekongelo, ndaño va kuete elianjo lioku nõla ovina va yongola oku linga, pole, va pokola kolonumbi va siata oku tambula. Oku pokola kolonumbi via Yehova vi sangiwa Vembimbiliya, ci kuete esilivilo. Ondaka yaye, oyo ‘ovela yolomãhi vietu, kuenda oyo ocinyi conjila yetu.’ (Osa. 119:105) Tu sukila oku ivaluka okuti onjila tua nõla, yi pondola oku kokela ocilondokua vamanji, kuenda vana tu kundila olondaka viwa.—Tanga 2 Va Korindo 6:3, 4.
5. Momo lie tu sukilila oku yuvula ocituwa coku litumila etu muẽle?
5 ‘Esino’ lia livokiya calua voluali, kuenda li kasi ndofela tua siata oku fuima. (Va Efe. 2:2) Esino liaco li pondola oku tu vetiya oku sima okuti, ka tu sukila oku pokola kolonumbi viocisoko ca Yehova. Omo liaco, tu sukila oku yuvula ovituwa ndevi via Deotrefe, una ‘wa likapele kunene okuti, ka tambuile lacimue kupostolo Yoano.’ (3 Yoa. 9, 10) Tu sukila oku yuvula ocituwa coku litumila etu muẽle. Tu sukilavo oku yuvula oku linga ovina vi lekisa esino ku vana va nõliwa la Yehova oco va songuile ocisoko caye koloneke vilo. (Ate. 16:1-3) Pole, tu sukila oku sanjukila esumũlũho tu kuete lioku kuatisa ukuenje wa lunguka. Omo liaco, tuamamiko oku pokola kakulu vekongelo, loku tava kovina va tuma.—Tanga Va Heveru 13:7, 17.
6. Momo lie tu sukilila oku kũlĩhĩsa ekalo lietu?
6 Uvangi ukuavo u lekisa okuti, tua sanjukila ovikele vietu vekongelo, u limbukiwila koku kũlĩhĩsa ekalo lietu, loku linga ovina viosi tu tẽla oco tu ‘kemãlise upange’ tua siata oku linga, kuenda oku sivaya Yehova. (Va Rom. 11:13) Vamanji vamue, va pondola oku litumbika kupange wakundi vavelapo. Vamanji vakuavo voluali luosi, va litumbika kupange wotembo yosi ndeci: Olomisionaliu, oku nyula akongelo, kuenda oku talavaya ko Betele. Kulivo vamanji valua va siata oku kuatisa kupange woku tunga Olonjango Viusoma. Valua pokati kafendeli va Yehova, va siata oku likolisilako oku kuatisa epata liavo konepa yespiritu. Olosemana viosi va siata oku litumbika kupange woku kunda olondaka viwa. (Tanga Va Kolosai 3:23, 24.) Tua kolela okuti, nda tua lieca olumue kupange wa Suku, loku u tẽlisa lutima wosi, tuka tambula ovikele vikuavo vocisoko caye.
Ovina Via Kongeliwa Vovikele Vietu Vekongelo
7. Lombolola ndomo ekalo lietu li tu kuatisa oku tẽlisa ovikele tu tambula vekongelo.
7 Oco tu tambule ovikele vikuavo vekongelo, tu sukila oku kũlĩhĩsa ekalo lietu nda tu pondola oku vi tẽlisa. Ovikele manji ulume a pondola oku tambula, via litepa levi via manji ukãi. Oku kuka, ekambo liuhayele, kuenda ovitangi vikuavo, ovio vi lekisa nda tu pondola oku tẽlisa ovikele vietu kupange wa Yehova. Elivulu Liolosapo 20:29, li popia hati: “Ulamba wakuenje olõhõlo viavo, puãi eposo liakulu owele wavo.” Amalẽhe va pondola oku linga upange walua vekongelo, omo liongusu yalua va kuete. Pole, akulu va pondola oku kuatisa ekongelo omo liolondunge viavo, kuenda ulandu womuenyo wavo. Tu sukila oku ivaluka okuti, tu pondola oku linga ovina viosi vocisoko ca Yehova, omo liocali caye.—Ovil. 14:26; Va Rom. 12:6-8.
8. Olonjongole vietu vi pondola ndati oku tu tateka oku tẽlisa ovikele tu kuete vekongelo?
8 Ulandu wafeko vavali okuti, omunu la manjaye, u lekisa ndomo tu pondola oku tẽlisa ovikele vietu vekongelo. Vosi yavo va linga elilongiso lia pita pokati. Va kuete ekalo limuamue liomuenyo. Olonjali viavo via yonguile okuti, eci va mala oku lilongisa kosikola, va litumbika kupange wakundi vavelapo. Umue pokati kavo eye lika weya oku litumbika kupange wakundi vavelapo. Pole, ukuavo wa fetika oku talavaya kupange woku sanda eteku. Nye ca litepa pokati kolonjila va kuama? Ovo va kuata olonjongole via litepa. Noke, omunu lomunu wa linga eci a yongola. Anga hẽ, ka tua siatele oku pita lulandu waco? Tu sukila oku sokolola lutate catiamẽla kovina tu yongola oku linga kupange wa Suku. Anga hẽ, tu pondola oku vokiya upange wetu woku kunda, ndaño tu sukila oku linga apongoloko amue?—2 Va Kor. 9:7.
9, 10. Nye tu sukila oku linga, nda ombili yetu kupange wa Yehova ya tepuluka?
9 Nye tu sukila oku linga nda tu kuete owesi kupange wa Yehova, kuenda ka tu tẽlisa ciwa ovikele vietu vekongelo? Vukanda Paulu a sonehela va Filipoi, wa popia hati: “Suku o kasi loku linga upange waye vokati kene, kuenje haeye o tu iha ongusu kuenda utima woku linga ocipango caye.” Yehova o pondola oku tu kuatisa oku tẽlisa ovimãho vietu vekongelo.—Va Fil. 2:13; 4:13.
10 Tu sukila oku pinga ku Yehova oco a tu kuatise oku linga ocipango caye, ndeci Soma Daviti woko Isareli a linga, poku likutilila hati: “A Yehova, ndekise olonjila viove. Njimbe onumbi yalila ove. Ngendise vocili cove loku ndongisa, momo ove Suku yeyovo liange. Nda ku imbila ovaso eteke liosi.” (Osa. 25:4, 5) Tu pondola oku kuama ongangu ya Daviti poku likutilila ku Yehova loku pinga ekuatiso, oco tu linge ovina vi eca esivayo kokuaye. Eci tu limbuka ndomo Yehova Suku kumue Lomõlaye va sanjukila upange tu kasi oku va lingila, ci tu vetiya oku eca olopandu kokuavo. (Mat. 26:6-10; Luka 21:1-4) Nda tua ci linga, tu vetiyiwa oku likutilila ku Yehova, oco tuamameko oku linga upange waye. Tu sukila oku kuama ongangu yuprofeto Isaya yoku lekisa ombili kupange wa Yehova. Eci a yeva ondaka ya Yehova, wa pula hati: “[Helie] numa, [helie] o tu endelako?” Noke, uprofeto wa tambulula hati: “Ame ulo, va nume ño.”—Isa. 6:8.
O Pondola Ndati Oku Kula Kespiritu?
11. (a) Nye vamanji alume va sukila oku linga oco va tambule ovikele vekongelo? (b) Manji ulume o lekisa ndati okuti, wa sanjukila ovikele viaye vekongelo?
11 Vokuenda kunyamo wupange wo 2008, kua papatisiwa 289.678 komanu. Omo liaco, ku sukiliwa vamanji valua alume, oco va kuatise oku songuila akongelo. Manji ulume o pondola ndati oku eca ekuatiso liaye konepa eyi? O ci linga poku likolisilako oku kuata ovituwa akulu vekongelo loloñuatisi viavo va sukila oku lekisa ndomo via tukuiwa Vovisonehua. (1 Tim. 3:1-10, 12, 13; Tito 1:5-9) Manji ulume o pondola ndati oku tẽlisa olonumbi viaco Viovisonehua? O ci linga poku lekisa ombili kupange woku kunda, poku tẽlisa ovikele viaye vekongelo, poku eca atambululo a mioñoloha kolohongele, kuenda oku kapako vakuavo. Nda wa ci linga, o lekisa okuti, wa sanjukila ovikele viaye vekongelo.
12. Amalẽhe alume va pondola ndati oku lekisa ombili kupange wa Yehova?
12 Nye amalẽhe alume va sukila oku linga oco vamameko oku kula kespiritu? Va sukila oku likolisilako oku kuata ‘olondunge vi va kuatisa oku kula kespiritu,’ loku kuata ukũlĩhĩso Wovisonehua. (Va Kol. 1:9) Oco va tẽlise ocimãho caco, va sukila oku lekisa ombili kelilongiso Liondaka ya Suku, kuenda oku endaenda kolohongele olonjanja viosi. Amalẽhe alume, va pondolavo oku tẽlisa ocimãho caco poku ‘iñila vepito linene liupange,’ kuenda oku nõla olonjila via litepa viupange wakundi votembo yosi. (1 Va Kor. 16:9) Oku litumbika kupange wa Yehova, ci nena esanju komuenyo, kuenda asumũlũho alua.—Tanga Ukundi 12:1.
13, 14. Vamanji akãi va pondola ndati oku lekisa okuti, va sanjukila ovikele viavo vekongelo?
13 Vamanji akãi, va pondola oku lekisa okuti, va kongeliwavo koku tẽlisiwa kuolondaka Viosamo 68:11, vi popia hati: ‘Akãi vana va kunda olondaka viwa, va linga ohoka yinene.’ Vamanji akãi va pondolavo oku lekisa okuti va sanjukila ovikele viavo vekongelo, poku longisa omanu oco va linge olondonge. (Mat. 28:19, 20) Va ci lingavo poku likolisilako oku tẽlisa upange wavo woku kunda.
14 Vukanda Paulu a sonehela Tito, wa popia hati: “Lungulavo akulu vakãi okuti va linga vakuesumbilo, . . . alongisi vovina viwa okuti va longisa akãi [amalẽhe] oku sola vaveyavo lomãla vavo, loku lisuluvika, loku lipua, loku linga upange [volonjo] viavo, loku unjuka, loku pokola ku vaveyavo, oco ondaka ya Suku ka yi ka tondaliwe.” (Tito 2:3-5) Vamanji akãi okuti, va loñoloha kespiritu, va pondola oku kuatisa vakuavo vekongelo! Ovo va siata oku sumbila vamanji alume va songuila ekongelo, poku lekisa ongangu yiwa koku wala, kuenda koku nõla ovitalukilo. Poku ci linga va lekisa okuti, va sanjukila ovikele viavo vekongelo.
15. Nye vamanji akãi ka va kuelele va sukila oku linga oco va yuvule esumuo lioku kala ulika?
15 Vamanji akãi ka va kuelele, pamue ka ci leluka kokuavo oku sanjukila ovikele viavo vekongelo. Manji umue ukãi, wa pita locitangi caco, wa popia hati: “Vana ka va kuelele, olonjanja vimue, va siata oku sumua omo lioku kala ulika.” Eci a puliwa ndomo a siata oku pandikisa poku liyaka locitangi caco, wa popia hati: “Olohutililo lelilongiso Liembimbiliya, via ndi kuatisa oku sanjukila ovikele viange vekongelo. Nda siata oku konomuisa ndomo Yehova a ndi tenda. Nda siatavo oku kuatisa vakuetu vekongelo, kuenda oku va kapako.” Osamo 32:8, yi lekisa olondaka Yehova a sapuila Daviti hati: “Hu lungula, hu imba ovaso.” Yehova wa kapapo afendeli vaye vosi oku kongelamo akãi ka vakuelele, kuenda wa siata oku va kuatisa oku sanjukila ovikele viavo vekongelo.
Amamako Oku Sanjukila Ovikele Viove Vekongelo
16, 17. (a) Momo lie oku tava kelaleko lia Yehova lioku tiamẽla vocisoko caye, oyo onjila ya sunguluka tu sukila oku nõla? (b) Tu pondola ndati oku sanjukila ovikele vietu vocisoko ca Yehova?
16 Yehova wa siata oku kuata ukamba lafendeli vaye. Yesu wa popia hati: “Lomue o tẽla oku iya kokuange, te Isia wa numa u koka.” (Yoa. 6:44) Ndaño koloneke vilo voluali muli omanu valua, pole, Yehova wa laleka omunu lomunu pokati ketu oco tu tiamẽle vocisoko caye. Oku tava kelaleko liaco, oyo onjila ya sunguluka tua nõla. Momo yi tu kuatisa oku limbuka esilivilo liomuenyo. Tua sanjuka calua omo lioku tẽlisa ovikele vietu vekongelo!
17 Ukualosamo wa popia hati: “A Yehova, [ndi] sole onjo yove omu o tumayala.” Eye wamisako hati: “[Omahi] yange yi [tãi] apa pa tapika. [Ndi] sivayaila Yehova pokati kakongelo.” (Osa. 26:8, 12) Suku yocili wa tu ĩha ovikele vocisoko caye. Tu pondola oku amamako oku sanjukila ovikele vietu vocisoko ca Yehova, poku pokola kolonumbi viaye, kuenda oku linga upange waye.
Ivaluka Eci Tua Lilongisa?
• Momo lie ca sungulukila oku popia hati, Akristão vosi va kuete ovikele vekongelo?
• Tu lekisa ndati okuti, tua sanjukila ovikele vietu vocisoko ca Yehova?
• Ovina vipi via kongeliwa vovikele vietu vekongelo?
• Amalẽhe Akristão kuenda akulu, va pondola ndati oku lekisa okuti, va sanjukila ovikele viavo vocisoko ca Yehova?
[Elitalatu kemẽla 16]
Vamanji alume, va pondola ndati oku tambula ovikele vekongelo?
[Elitalatu kemẽla 17]
Vamanji akãi, va lekisa ndati okuti, va sanjukila ovikele viavo vekongelo?