Ocilumba ca Yesu ci Pondola Ndati Oku Kala “Ndocisembi Coku Yovola Omanu Valua?”
Etambululo Liembimbiliya
Pocakati cocisembi ca Yesu, Suku wa yovola omanu kekandu kuenda kolofa. Embimbiliya li lekisa okuti, osonde ya Yesu ya pesiwa yi kasi ndondando yoku yovola. (Va Efeso 1:7; 1 Petulu 1:18, 19) Eli olio esunga lieci Yesu a popela okuti, weya voluali oco a ece omuenyo waye “ndocisembi coku yovola omanu valua.”—Mateo 20:28.
Momo lie kua sukililile “ocisembi coku yovola omanu valua?”
Adama ulume watete, wa lulikiwa loku lipua ale ka kuatele ekandu. Eye wa laikele oku kala komuenyo otembo ka yi pui. Pole, wa pumba epuluvi liaco eci a nõlapo oku sinĩla Suku. (Efetikilo 3:17-19) Ekandu li kasi ndetime limue. Adama eci a fetika oku cita omãla, wa sambuisa etime liaco komãla vaye. (Va Roma 5:12) Eli olio esunga lieci Embimbiliya li popela okuti, Adama wa li “landisa” eye muẽle kumue lomãla vaye ndapika vekandu kuenda volofa. (Va Roma 7:14) Ka kuli omõla laumue wa Adama wa ponduile oku yovola eci eye a pumba omo okuti vosi ka va lipuile.—Osamo 49:7, 8.
Omo liaco, ocitumbulukila ca Adama ka ca kuatele elavoko. Pole, Suku wa va kuatela ocikembe ale ohenda. (Yoano 3:16) Pole, ocihandeleko ca Suku okuti cesunga, ka ca ecelele okuti eye ecela ovitumbulukila via Adama okuti, ka ku kala esunga lalimue. (Osamo 89:14; Va Roma 3:23-26) Suku o sole omanu, omo liaco wa linga esokiyo limue lioku ecela loku malako akandu. (Va Roma 5:6-8) Ocisembi ca Yesu oyo onjila yaco yesunga ya kuamiwa.
Ocisembi ci kuatisa ndati?
Vembimbiliya ondaka “ocisembi” mua kongela ovina vitatu:
Ofeto yimue.—Atendelo 3:46, 47.
Ci nena eyovo.—Etundilo 21:30.
Ondando yalio yimuamue londando yi sukiliwa yoku yovola.a
Limbuka ndomo ovina viaco vitatu vi tiamisiwila kocisembi ca Yesu Kristu.
Ofeto. Embimbiliya li lekisa okuti Akristão va “landiwa londando yimue.” (1 Va Korindo 6:20; 7:23) Ondando yaco osonde ya Yesu, yina a “landela Suku omanu va tunda kovikoti viosi, kalimi osi, komanu vosi, lo kolofeka viosi.”—Esituluilo 5:8, 9.
Eyovo. Ocisembi ca Yesu ca tẽla oku yovola omanu kekandu.—1 Va Korindo 1:30; Va Kolosai 1:14; Va Heveru 9:15.
Ondando yimuamue. Ocisembi ca Yesu ca soka leci Adama a pumba okuti omuenyo umue wa lipua. (1 Va Korindo 15:21, 22, 45, 46) Embimbiliya li popia ndoco: “Ndeci valua va lingisua vakuakandu omo liesino liomunu umosi, [Adama] cimuamue haico, omo liepokolo liomunu umosi, [Yesu Kristu] valua va ka tendiwa ndavakuesunga.” (Va Roma 5:19) Ocinimbu eci, ci lekisa ndomo olofa viulume umosi via feta akandu vomanu valua. Omo liaco, ocilumba ca Yesu ca “yovola vosi” vana va linga ovina vi likuata locisembi caco.—1 Timoteo 2:5, 6.
a Kalimi kua sonehiwa Embimbiliya, ondaka ya pongoluiwa okuti “ocisembi” yi pitiya ocisimĩlo cokuti ondando, ale ocina cimue ci kuete esilivilo lialua, ca eciwa oco ku fetiwe ocina cimue. Ndeci, ondaka yo Helasi ka·fár yi lomboloka “oku sitika.” (Efetikilo 6:14) Olonjanja vialua yi tiamisiwila koku sitika ovitangi via tunda kekandu. (Osamo 65:3) Handi vali, ondaka ka·fár, yi tiamisiwilavo kondando ya fetiwa oco yi sitike ovitangi. (Etundilo 21:30) Cimuamue haico okuti, kelimi lio Heveru ondaka lý·tron okuti olonjanja vialua ya pongoluiwa “ocisembi,” yi pondolavo oku lomboloka okuti “ofeto yondando.” (Mateo 20:28) Asonehi va Helasi va kuama ondaka yaco oco va yi tiamisile kofeto yocisembi ya eciwa yoku yovola omandekua yimue yuyaki ale oku yovola upika umue.