Vangula Lekolelo

ECI omunu a vangula lekolelo, omanu va limbuka okuti eye o tava muẽle kueci a kasi loku popia. Ekolelo liaco lia muĩwila kupange woku kunda wupostolo Paulu. Kuava veya oku kala Akristão ko Tesalonika, eye wa soneha hati: “Ondaka yiwa tuo kundili ka yeyile kokuene loku popiwa lomẽla lika, puãi yeyavo . . . lekolelo lia lua.” (1 Va Tes. 1:5) Ekolelo liaco lia muĩwila kocituwa caye coku vangula kuenda kocituwa cekalo liomuenyo waye. Ekolelo liaco te limuĩwilavo koku kunda kuetu ocili Cembimbiliya.

Oku lekisa ekolelo hacimuamueko loku kala ukualonamalãla ale loku kala ukuamanya. Pole, eci omunu a lekisa ekolelo poku vangula eci catiamẽla Kondaka ya Suku, eye o ci linga locituwa cimue ci lekisa okuti o kuete ekolelo lia pama.​—Va Hev. 11:1.

Kapuluvi ci Sesamẽla Oku Lekisa Ekolelo. Ci kuete esilivilo oku vangula lekolelo kupange woku kunda. Ndomo ca siata, omanu va luluvalela kocituwa cove coku vangula kuenda kondaka o kasi loku kunda. Ovo va limbuka ndomo o liyevite kueci catiamẽla kondaka o kasi loku popia. Ekolelo liove li vetiya vali okuti olondaka lika ci sule. Ekolelo liove li lekisavo okuti o kuete ondaka yimue yesilivilo linene o yongola oku va sapuila.

Ci sukilavo oku lekisa ekolelo poku vanguila pokati kolonjeveleli vina okuti vamanjetu vekolelo. Upostolo Petulu wa soneha ukanda waye watete woku ‘lungula loku imba uvangi wokuti ocali a lombolola oco ocali cocili ca Suku.’ Vukanda waco, eye wa vetiya vamanji hati: “Kolipo laco.” (1 Pet. 5:12) Poku sonehela ekongelo lioko Roma, upostolo Paulu wa lekisa ekolelo limue lieya oku va kuatisa. Eye wa soneha hati: “Nda kolela okuti ndaño okufa, ndaño omuenyo, ndaño ovangelo, ndaño olombiali, ndaño ovina viacilo, ndaño ovina vi laika oku iya, ndaño ovonene, ndaño ovina viokilu, ndaño ovina viokalunga, ndaño ociluvo cikuavo, lacimue ci tẽla oku tu tepa kocisola ca Suku ci kasi vu Kristu Yesu, Ñala yetu.” (Va Rom. 8:38, 39) Paulu wa sonehavo luloño woku tavisa kueci catiamẽla kesukila lioku kunda olondaka viwa. Ombili yaye kupange waco, ya eca uvangi wokuti eye muẽle wa limbukile esilivilo liupange waco. (Ovil. 20:18-21; Va Ro. 10:9, 13-15) Ekolelo liaco te li muĩwilavo kakulu vekongelo Akristão oloneke vilo, eci va longisa Ondaka ya Suku.

Vokuenda kuelilongiso kuenda kotembo yikuavo, olonjali vi sukila oku vangula lekolelo poku lombolola ovina viespiritu komãla vavo. Eci ci kisika okuti olonjali vovitima viavo muẽle, va kuatela ocisola Suku kuenda va solavo olonjila viaye. Poku cilinga vaka lekisa ekolelo liocili poku vangula lomãla vavo, momo “eci ce yuka vutima haico omẽla u popia.” (Luka 6:45; Esin. 6:5-7) Ekolelo liaco lika vetiya olonjali oku eca ongangu yiwa “[y]ekolelo halioku luvikiyako.”​—2 Tim. 1:5.

Ci kuete esilivilo liocili oku vangula lekolelo eci ekolelo lietu li patãliwa. Ci tava okuti umue ove o tangela kumosi laye, ulongisi, ale umue u talavayeli kumosi, o komõha, omo okuti ove ku lingi onepa kocipito cimue. Etambululo limue liekolelo, likuamiwa lalomboluilo amue awa, li kuatisa omunu waco oku sumbila ekalo liove wa nõlapo liatiamẽla Kembimbiliya. Nda hẽ umue wa seteka oku ku kongela kocituwa cimue cĩvi, ndeci kuhembi, koku sipa epangue, ale kukahonga? Ci kuete esilivilo liocili oku lombolola ciwa okuti ove lalimue eteke oka likongela vovina viaco, kuenda lacimue cika pongoluisa ovisimĩlo viove. Ci sukila oku popia lekolelo poku likala elaleko liaco. Yosefe poku likala elaleko liukãi wa Potifara lioku linga ukahonga, wa popia lutõi hati: “Ndinga ndati evĩho eli, hã si kuata ekandu ku Suku?” Eci ukãi a tamalãla laye, eye wa pusumũha peka liaye kuenje wa tilila posamua.​—Efet. 39:9, 12.

Ndomo ku Lekisiwa Ekolelo. Olondaka o vangula vi pondola oku linga calua koku lekisa ekolelo liove. Olonjanja vialua, Yesu wa fetaika olombangulo viaye loku popia hati: “Mopia love siti, Ocili, ocili.” (Yoa. 3:3, 5, 11; 5:19, 24, 25) Ekolelo liupostolo Paulu lia lekisiwila volondaka ndeci evi: “Nda kolela okuti,” “Ame ndi ci, kuenje ñolela vu Ñala Yesu,” kuenda poku popia hati, “Mopia ocili, si kembi.” (Va Rom. 8:38; 14:14; 1 Tim. 2:7) Catiamẽla koku tẽlisiwa kuondaka yaye, Yehova lespiritu liaye wa vetiya ovaprofeto vaye oku sapula olondaka ndeci evi, “Ciya muẽle.” (Hav. 2:3) Eci ove o tukula ovitumasuku evi, o kuete oku kuama upopi umuamue. Nda okuti kua likolelele ove muẽle, pole wa kolela Yehova kuenda wa vangula la vakuene lesumbilo, olondaka vi lekisa ekolelo limuamue oka popia, vika lekisa uvangi wokuti ove o kuete ekolelo lia pama.

Ekolelo li pondola oku lekisiwilavo kocili kuenda kongusu yolondaka viove. Eci ci lekisiwila pupolo wove, oku ilaika kuove, kuenda oku kala kuetimba liove, viosi evi vi kuatisa, ndaño okuti eci ca litepa komunu lomunu. Ndaño okuti kekalo liove ukuasõi ale ku vangula calua, nda wa kolela muẽle okuti eci o kasi loku vangula cocili kuenda vakuene va sukila oku ci yevelela, ekolelo liove lika muĩwa.

Ocili okuti, olondaka viosi viekolelo tu popia vi kuete oku kala viocili. Nda omanu va limbuka okuti tu kasi loku likembisa kuenda eci tu kasi loku vangula ka ci kasi loku tunda vutima, ovo vaka sima okuti eci tu kasi loku vangula ka ci kuete esilivilo. Omo liaco, kala muẽle ndomo wa tuwa. Nda o kasi loku vanguila pokati kolonjeveleli vialua, o sukila oku vokiyako ocileñi condaka kuenda oku vangula longusu, okuti ndeci wa siata oku vangula ci sule. Pole, ocimãho cove te ci kala coku vangula locili cove kuenda ndomo wa tuwa.

Ekuatiso Lioku Vangula Lekolelo. Omo okuti vekolelo mua kongela oku lekisa ndomo o liyevite vutima wove kueci catiamẽla kondaka o kasi loku lombolola, elipongiyo liwa olio osapi. Okupa ño ocipama cimue velivulu noke oku ci lombolola, ka ci tẽla. Ove o sukila oku kuata elomboloko liwa liocipama caco kuenda oku tẽla oku ci lombolola volondaka viove muẽle. O sukila oku kuata ekolelo liokuti eci o kasi loku vangula ocili kuenda ci kuete esilivilo kolonjeveleli viove. Eci ci lomboloka okuti poku pongiya ocipama cove, o kuete oku kapako ekalo liavo kuenda eci va kũlĩha ale catiamẽla kocipama, ale ndomo vaka liyeva locipama caco.

Ca leluka ku vakuetu oku limbuka ekolelo lietu eci tu linga ohundo yetu lekolelo. Omo liaco, hoku angiliyako lika ciwa ocipama, pole likolisilakovo oku pitololamo oku seteka ndomo oka linga ohundo yaco. Luluvalela vali enene kolonepa vina viohundo yove vi kisika ocili calua oco o pondole oku vi lombolola loku lianja okuti ku kakatela ño enene vopapelo. Ivalukavo oku likutilila ku Yehova oco a sumũlũise alikolisilo ove. Nda wa ci linga, oka “kuata utõi vu Suku” woku vangula locituwa cimue ci lekisa okuti wa kolela kocili kuenda kesilivilo liondaka o kasi loku lombolola.​—1 Va Tes. 2:2.