Oku Ocileñi condaka ya sunguluka

NDA okuti hundi yowiñi ka vangula locileñi ca sokamo, ci tava okuti vamue pokati kolonjeveleli va fetika oku suñila. Kupange woku kunda, nda ukundi o vangula enene levando, ka vetiya onjongole yomunu a sanga yoku u yevelela. Kuenda volohongele, nda atambululo ka eciwa locileñi ca sunguluka, ava va kasi vohongele yaco ka va tambula ekoliso li sesamẽla. (Va Hev. 10:24, 25) Handi vali, nda hundi o vokiyako ocileñi condaka yaye votembo yina okuti ka ya sungulukile oku ci linga, ci tava okuti olonjeveleli vi saluka kuenda toke muẽle ci va kokela ocinyuañi.​—Olosap. 27:14.

Kũlĩhĩsa Etendelo Liolonjeveleli Viove. O kasi oku vangula hẽ la velie? Lomunu umosi? La vakuepata? Locimunga cimue citito comanu va liongoluila oku enda kupange woku kunda? Lekongelo liosi? Ale locimunga cimue cinene kohongele yofeka? Ocili okuti, ocileñi ca sungulukila kekalo limue, pamue ka ca sungulukile kekalo likuavo.

Kosimbu apuluvi alua okuti omanu va Suku va enda oku vanguila kovaso yocimunga cinene colonjeveleli. Poku tumbikiwa kuonembele yoko Yerusalãi, koloneke via Salomone, ka kua kale olomakina vioku vokiya ocileñi. Omo liaco, Salomone wa londele kocina cimue ca lepa kuenje wa sumũlũisa omanu loku “popia lolukandi.” (1 Olos. 8:55; 2 Asap. 6:13) Noke, pana okuti pa pita ovita vianyamo, poku sukumuiwa kuespiritu sandu ko Pendekoste 33 K.K., owiñi umue womanu, okuti vamue va kala vakuanjongole pole vakuavo va kala ño vakuakupembula, va liongoluilile ponele yocimunga cimue citito Cakristão ko Yerusalãi. Lundunguluke, Petulu ‘wa talama vilu, yu wa popia lolukandi.’ (Ovil. 2:14) Kuenje kua eciwa uvangi umue uwa.

Ndamupi o pondola oku kũlĩha nda ocileñi condaka o kasi loku vangula laco ca sungulukila kepuluvi limue ale sio? Ndomo olonjeveleli vi tambuluiya oyo ondimbukiso ya velapo. Nda wa limbuka okuti vamue pokati kolonjeveleli te va likolisilako oco va yeve eci o kasi loku vangula, ove te wa kolisako vali.

Cikale okuti tu kasi oku vangula lomunu umosi ale locimunga cimue, ciwa oku kũlĩhĩsa ava va kasi vocimunga caco. Nda wa limbuka okuti umue o kasi oku likolisilako calua oco a yeve eci o kasi oku vangula, ciwa okuti o vokiyako ondaka yove. Pole, oku kaluka ka cika ku lingisa omunu o soliwe lomanu vana okuti pamue ka va tambulula lonjanga yalua omo lioku kuka. Oku kaluka ku pondola oku tendiwa ndekambo liesumbilo. Kolofeka vimue oku vangula locileñi cinene, ci tendiwa ndondimbukiso yokuti omunu wa tema ale ukuacinyeñousa.

Kũlĩhĩsa Onjuela yi Koka Ocinyuañi. Eci o linga upange woku kunda, ekalo o sanga olio lika lekisa ocileñi condaka o sukila oku yevalisa poku eca uvangi. Pamue ove o sukila oku kolisako omo lionjuela yakãlu, omo lioku yuela kuomãla, omo lioku kua kuolombua, omo liocisikilo ci sikiwa enene longusu ale o Televisão yi yuela calua. Pole, kolonepa vina okuti olonjo vi kasi pamosi, oku vangula enene lolukandi okuti ci yevala kuava va lisungue, ci pondola oku kutisa osõi vamuẽlianjo.

Vamanji va siata oku linga olohundo vekongelo ale kolohongele viofeka, lavovo va kuete oku linalisa lakalo añi añi a pondola oku iyako. Oku vangula lolonjeveleli voluayela kua litepa calua loku lingila ohundo vonjango Yusoma yi kuete ocileñi ca sokiyiwa ciwa. Ko Amerika Latina, olomisionariu vivali via kala loku lingila ohundo yowiñi kocitali culume umue wa lekisa onjongole. Vonjanja yaco, haico kua fetika oku totãlisiwa ovina vimue vi tunda ulienge wondalu kocipito cimue ca kala loku pita pocila ocipepi lonjo yaco, kuenda ocikondombolo cimue ca kalavo loku lila longusu yalua.

Vokati kohundo, ci tava okuti ku molẽha cimue ci kisika oku talama toke eci onjuela yaco yi pita, ale ci kisika oku vokiyako ondaka. Ndeci pamue, nda ohongele yi kasi loku lingiwila vonjo yolosiapa, ombela yina yiya ño ocipikipiki, yi lingisa okuti olonjeveleli ka vi yevi eci hundi a kasi loku vangula. Oku liyula kuomõla ale onjuela yi kokiwa la vana va cilua, ocili okuti yi kala ocitangi. Lilongisa oku linalisa lovina vi tateka oku yeva ciwa, oco olonjeveleli viove vi tẽle okupa esilivilo lia velapo kocipama o kasi loku va sapuila.

Omakina yoku vokiya ondaka yika eca ekuatiso liocili nda yi kuetiwe. Pole, eci ka ci mãliko esukila lioku vokiya ondaka konepa ya hundi eci ku molẽha cimue ci kisika oku ci linga. Kolonepa vimue okuti olusu yenda enda olonjanja vialua, olohundi vi yeva ekisika lioku linga olohundo viavo, ndaño ka va kuete ekuatiso lienguena.

Kũlĩhĩsa Ulandu Uka Lomboluiwa. Ekalo liohundo yove, li lekisavo ocileñi condaka ci sukiliwa. Nda ulandu waco u kisika oku u linga longusu, ku ka u honguise mekonda lioku vangula levando. Ndeci, eci o tanga olondaka viesombiso Vembimbiliya, ocileñi condaka yove te ca pamapo vali, okuti eci weca elungulo liocisola ci sule. Ocileñi condaka yove ci sokisiwe leci ulandu waco u kisika, pole poku ci linga kala lutate walua oco ku ka tiamisile ovisimĩlo violonjeveleli kokuove muẽle.

Kũlĩhĩsa Ocimãho Cove. Nda o yongola oku vetiya olonjeveleli viove oco vi kuate ombili kupange woku kunda, ove o sukila oku vangula longusu. Pole, nda o yongola oku pongolola ovisimĩlo viavo, ku ka vangule longusu yalua enene, sanga o yandulula ovisimĩlo viavo. Nda o kasi loku likolisilako oku lembeleka, vangula locileñi comboka.

Okupa Esilivilo Kevokiyo Liondaka. Nda o yongola oku vangula lomunu umue okuti wa sakalala loku linga upange umue, oco a ku yeve, oku vokiya ocileñi condaka olonjanja vimue ci kuatisa. Olonjali via ci kũlĩha ciwa, momo ovo va siata oku vangula lolukandi poku vilikiya omãla vavo eci owola yoku papala yipua. Oku vokiya ocileñi condaka pamue ci sukiliwavo eci mitavaso yohongele a eca onumbi yimue kekongelo ale kohongele yimbo. Eci akundi va panga onepa kupange woku kunda, ci tava okuti va lama lolukandi eci va sanga omanu va kasi loku talavaya posamua.

Ndaño muẽle ceci okuti omunu o kasi ale loku ku yevelela, ci kuete esilivilo liocili oku amamako oku vangula londaka yi yevala ciwa. Ondaka ya lenda enene yeca elomboloko liokuti hundi ka lipongiyile ciwa ale ka kolelele eci a kasi loku vangula.

Eci kueciwa ondaka yoku handeleka, oku votolako vali ondaka ku vetiya omanu oku linga eci ci yonguiwa. (Ovil. 14:9, 10) Cimosi haico, oku eca ocihandeleko lolukandi pamue ci popela kovitangi. Ko Filipoi, umue kalei wa yonguile oku liponda omo wa simĩle okuti ovikonde via kala vokayike vio tila. “Paulu wa vi likiya lolukandi hati, ku ka lilinge cimue. Vosi tua suapo.” Lonjila eyi kua popeliwa omuenyo. Noke, Paulu la Siluano va kundila kalei kaco lepata liaye kuenje vosi yavo va tava kocili.​—Ovil. 16:27-33.

Ndomo o Mioñolola Ocileñi Condaka Yove. Ku vamue, ci sukila oku likolisilako calua oco va lilongise oku votolako vali ondaka poku vangula. Omunu pamue o vangula londaka yimue ka yi yevala ciwa omo okuti o kuete ondaka yitito. Pole, loku likolisilako, ci tava okuti o kolisako vali poku vangula, ndaño okuti lopo o vangula levando. Kũlĩhĩsa ciwa ndomo o talama kuenda ndomo o fuima. Ci linga okuti wa tumãla kuenda ci lingavo okuti o talama. Votola apepe, noke fuima longusu. Kũlĩhĩsa ciwa okuti o kasi loku yukisa onepa yokombuelo yapuvi ove lofela. Ofela yaco, nda ya sokiyiwa ciwa, oyo yi kuatisa oku lavulula ocileñi condaka yove eci o vangula.

Komanu vamue, ocitangi cavo oku vangula calua lolukandi. Pamue ocituwa caco ca veya omo lioku talavaya voluayela ale vekalo limue lionjuela yalua. Ale pamue va kulila vekalo limue okuti omanu vosi va vangula enene lolukandi, kuenda oku tetiwa kondaka, kua siata calua. Omo liaco, ovo va sima okuti onjila ya sunguluka yoku kuata onepa kombangulo, oku vangulapo vali lolukandi okuti omanu vosi ci sule. Osimbu ovo vamamako loku kapako elungulo Liembimbiliya, lioku wala “ohenda . . . ocikembe lumbombe loku unjuka kuenda epandi,” ovo vaka linga apongoloko kocileñi condaka yavo poku vangula la vakuavo.​—Va Kol. 3:12.

Oku lipongiya ciwa, leloñoloho liyilila koku panga onepa olonjanja vialua kupange woku kunda kuenda oku likutilila ku Yehova, kuka ku kuatisa oku vangula locileñi ca sokamo. Cikale eci o vanguila kembumbua ale ceci o vangula lomanu kupange woku kunda, likolisilako oku tiamisila ovisimĩlo viove koku sokolola ndomo omunu o kasi loku ku yevelela a pondola oku kuatisiwa leci o kasi loku popia.​—Olosap. 18:21.