Vanja Vanja Kolonjeveleli

OVASO etu a lekisa ovisimĩlo vietu, a lekisavo ndomo tu liyevite. Ovaso ci tava okuti a lekisavo ekomõho ale usumba. Ci tava okuti a lekisa ohenda ale ocisola. Olonjanja vimue ovaso a pondola oku lekisa atatahãi ale esumuo. Ukulu umue, poku vangula catiamẽla ku umue ukuafeka yaye wa kala loku tala ohali yalua, wa popia hati: “Tu vangula ño lovaso.”

Vakuetu ci tava okuti va pitila kocisimĩlo cimue catiamẽla kokuetu kuenda kueci tu popia omo lioku tala oku tua suñamisila ovaso etu. Kolofeka vialua, omanu va kolela vali komunu una okuti eci a vangula lavo, o vanja kocipala. Omunu okuti eci a vangula o vanja posi ale o vanja kocina cimue okuti ka vanji komunu a kasi loku vangula laye, ovo va sima okuti ka kasi loku vangula ocili ale eci a kasi loku popia ka ci kuetele ekolelo. Kolofeka vikuavo, oku luluvalela ño enene komunu umue va ci tenda ndomanya ale nduhãlo. Ca piãla enene ulume poku vangula lukãi ale ukãi poku vangula lulume ale poku vangula la umue o kasi pomangu ya velapo. Kolonepa vimue, umalẽhe oku luluvalela enene vovaso poku vangula lukulu, ci tendiwa ndekambo liesumbilo.

Pole, kolofeka vina okuti hacĩviko, oku vanja komunu o kasi loku vangula ondaka yimue yesilivilo, ci vokiya ongusu kueci ci popiwa. Eci ci tendiwavo nduvangi wokuti omunu wa kolela kueci a kasi loku vangula. Kũlĩhĩsa ndomo Yesu a tambulula eci olondonge viaye via komõha calua loku popia hati: “[H]elie nga o tẽla oku popeliwa?” Embimbiliya li lombolola hati: “Oku va vanja [kocipala, NW] Yesu wa popia lavo hati, Eci ka ci tẽliwa lomanu, puãi la Suku ovina viosi vi tẽliwa.” (Mat. 19:25, 26) Embimbiliya li lekisavo okuti upostolo Paulu wa enda loku vanja kocipala colonjeveleli viaye. Eteke limue osimbu Paulu a kala loku vangula, pa kala ulume umue wa citiwa lulema. Kelivulu Liovilinga 14:9, 10 ku lombolola hati: “Eye wa yeva Paulu eci a kunda. Paulu wo vanja sui kuenje wo limbuka okuti o kasi lekolelo liokuti, ñaya. Oco Paulu wa popia lolukandi hati, Votoka. Miũha.”

Olonumbi Viatiamẽla Kupange Woku Kunda. Eci o kala kupange woku kunda, lekisa esanju kuenda ukamba poku vangula lomanu. Kovitumãlo kuna kua sunguluka oku linga apulilo, poku fetika ombangulo, linga apulilo a tuala omunu koku sokolola, atiamẽla kocina cimue okuti ove leye u ci kuetele onjongole. Osimbu o ci linga, likolisilako oku vanja vanja kocipala comunu o kasi loku vangula laye, pole ci linga lesumbilo kuenda locisola. Ocinjola cesanju kocipala ca umue okuti ovaso aye a lekisa esanju liovutima, ci vetiya cocili. Oku lekisa ocituwa caco ci pondola oku sitululula ekalo liove komunu o kasi loku vangula laye kuenda cu kuatisa oku lianja poku vangula love.

Oku vanja vanja kocipala comunu, kolonepa vina okuti ca sunguluka oku ci linga, ci pondola oku ku ĩha ocisimĩlo cimue ndomo o tetulula ekatanga limue. Nda omunu wa tema ale ka kasi loku lekisa onjongole, ove oka tẽla oku ci limbuka. Oka tẽlavo oku limbuka nda eci o kasi loku vangula ka colombolokele. Nda eye wa kava, oka ci limbuka. Nda o kasi muẽle lonjongole yocili, cika limbukiwavo. Ovaso aye aka ku lekisa nda ove o sukila oku vangula lonjanga ale levando. Aka ku lekisavo nda ove o sukila oku likolisilako oco u kongele vombangulo, loku limbuka eci o kuete oku vangula, ale pamue, oku lekisa ndomo elilongiso Liembimbiliya li lingiwa.

Cikale okuti o kasi vupange woku eca uvangi ale woku songola elilongiso Liembimbiliya, likolisilako oku vanja vanja lesumbilo kocipala comunu o kasi loku vangula laye. Pole, ku ka luluvalele ño enene kokuaye, sanga o kala losõi. (2 Olos. 8:11) Puãi lekalo limue liocisola, vanja vanja kocipala comunu o kasi loku vangula laye. Kolofeka vialua eci ci lekisa okuti omunu ove o kasi loku vangula laye, wokapako muẽle cocili. Ocili okuti, eci o tanga Embimbiliya ale elivulu limue likuavo, ovaso ove aka luluvalela vemẽla liaco. Oco wece ongusu ketosi limue, pamue oka sukila oku vanja komanu, pole ci linga lonjanga. Nda olonjanja vimue wa vanja vanja komanu o kasi loku tangela, cika ku ecelela oku limbuka ndomo va kasi loku tambuluiya kueci ci kasi loku tangiwa.

Nda okuti kefetikilo omo liosõi oku vanja vanja komunu o kasi loku vangula laye cu ku lingila ekatanga, ku ka liwekepo, amamako ño. Loku likisa, oku vanja vanja komunu o kasi loku vangula laye, cika ku leluka kuenda cika ku kuatisa oku mioñoloha koku vangula la vakuene.

Ceci o Linga Ohundo. Embimbiliya li tu sapuila okuti osimbu handi Yesu ka fetikile Ohundo yaye Yokomunda, wa “petuila ovaso aye kolondonge viaye.” (Luka 6:20) Lilongisila kongangu yaye. Nda oka vanguila kovaso yowiñi, tete vanja kokuavo, kuenje talama vakukutu amue osimbu handi kua fetikile oku linga ohundo yove. Kolonepa vimue, omu mukongela oku vanja ku vamue pokati kolonjeveleli. Oku talama oku, ku pondola oku ku kuatisa oku liwekapo oku luluma. Cika kuatisavo olonjeveleli oku tiamisila ovisimĩlo viavo kueci opolo yove yi lekisa. Handi vali, cika ecelela olonjeveleli oku tumãla ciwa polomangu viavo loku luluvalela kokuove.

Vokuenda kuohundo yove, vanja vanja kolonjeveleli. Ku ka vanje ño kowiñi waco wosi. Likolisilako oku vanja komunu lomunu. Kolofeka viosi, omanu va kevelela okuti ohundi yowiñi yi vanja vanja komanu a kasi loku vangula lavo.

Voku vanja vanja kolonjeveleli viove, mua kongela vali calua okuti hakupakuilako ño konele yimue la yikuavo. Vanja lesumbilo komunu umue pokati kolonjeveleli, kuenda nda ca sunguluka, u vanguila ulala umue wolondaka. Noke vanja komunu umue ukuavo, kuenje u vanguila ulala umue ale ilala vivali violondaka. Ku ka vanje ño enene komunu umue sanga ka liyevi ciwa. Kuenda ku ka luluvalele ño komanu vamue pokati kolonjeveleli. Amamako loku vanja vanja komanu vosi pokati kolonjeveleli osimbu o linga ohundo yove. Pole, poku vanguila omunu umue, vangula muẽle laye kuenda kũlĩhĩsa ndomo a kasi loku tambuluiya eci ove o kasi loku vangula.

Opapelo yove yohundo yi kale komesa yoku lingila ohundo, peka liove, ale Vembimbiliya liove oco o vanje vanjemo ño lovaso okuti ku sukila oku pukuka kutue. Nda ci sukila oku ñualisapo utue wove wosi, oco o vanje kohundo yove, ku ka tẽla oku vanja vanja ciwa kolonjeveleli viove. Kũlĩhĩsavo olonjanja viñami o vanja vanja kolonjeveleli viove kuenda otembo yipi o ci linga. Nda okuti o kasi loku vanja vopapelo yohundo osimbu o kasi kesulilo liohundo yove, ku ka tẽla oku mõla oku tambuluiya kuolonjeveleli viove, kuenda ohundo yove ka yika kuata ongusu yalua. Cimuamue haico nda o tulukila ño enene vopapelo yohundo yove, ku ka tẽla oku vanja vanja kolonjeveleli viove.

Eci wimba ombunje komunu umue, ove u vanja nda wa yi yakela muẽle. Cimuamue haico, ocisimĩlo locisimĩlo vohundo yove, ci kasi ndombunje ove “wimba” kolonjeveleli viove. Nda okuti eci wa vangula ca va “lomboloka”, eci pamue ci limbukiwila koku puka kuavo kutue, koku memẽnako kuenda koku luluvala kuavo. Nda o vanja vanja ciwa kolonjeveleli viove, ci ku kuatisa oku limbuka okuti ovisimĩlo viove via va “lomboloka.”

Nda wa tambula ocipama cimue oco o ci tangele vekongelo, o kuete hẽ oku vanja vanja kolonjeveleli vokuenda kuoku tanga kuove? Nda olonjeveleli vi kasi loku ku kuama koku tanga Embimbiliya, valua pokati kavo ka va ku lete nda o kasi loku vanja kokuavo nda ndati. Pole oku vanja kolonjeveleli viove ku pondola oku eca ongusu koku tanga kuove, momo o kapelako oku tala ndomo va kasi loku ku tambuluiya. Kuenda, ku vana pokati kolonjeveleli okuti ka va kasi loku tuvula Ambimbiliya avo, kuenje ovisimĩlo viavo pamue vi kasi kumue kuiñi, hundi oku vanja kokuavo ci pondola oku va kuatisa oku tiula ovisimĩlo viavo oco va luluvalele kueci ci kasi loku tangiwa. Ocili okuti, oka tẽla lika oku vanja lonjanga, pole o kuete oku ci linga lonjila yimue okuti ka ci ku kokela oku lilondoka koku tanga kuove. Oco o tẽle oku ci linga, ciwa okuti Embimbiliya liove o likuata peka kuenda o votola utue wove. Ociyele cove ku ka ci yeke ponete.

Olonjanja vimue, akulu vekongelo va lalekiwa oku linga ohundo yina yoku tanga cosi kohongele yofeka. Oku ci linga ciwa ci sukila eloñoloho, loku lipongiya ciwa kuenda oku pita pitamo olonjanja vialua. Ocili okuti oku linga ohundo yoku tanga cosi, ka cecelela oku vanja vanja enene kolonjeveleli. Pole, nda hundi wa lipongiya ciwa, eye o tẽla oku vanja vanja kolonjeveleli, pole apa atãi ka po limbi. Nda eye wa ci linga, cika kuatisa olonjeveleli viaye okuti vi luluvalela kokuaye kuenda viupa esilivilo lia velapo kelilongiso liespiritu li kasi loku lomboluiwa.