Upi Ongangu Kovaprofeto—Nahumi
1. Elivulu lia Nahumi li tu longisa nye?
1 Alunda o ko Ninivei a eca uvangi wokuti ovitumasuku via situluiwa la Nahumi, vi lekisa okuti Yehova o kuete unene woku nyõla ovanyali vaye toke muẽle ovanyãli vana va lekisa ndu okuti va kuete unene walua. (Nah. 1:2, 6) Oku kulĩhĩsa ocitumasuku ca Nahumi, ci tu longisa ovina vialua kupange woku kunda.
2. Tu pondola ndati oku sandeka esapulo liwa lonjila yimue yasunguluka?
2 Eca Elembeleko Kuenda Elavoko: Elivulu lia Nahumi li fetika oku lombolola eyambulo lia tiamẽla ko Ninivei, volupale luo Asuria. (Nah. 1:1; 3:7) Omo liaco eyambulo liaco lia kala esapulo liwa kafendeli va Yehova. Nahumi, okuti onduko yaye yi lomboloka “Elembeleko,” wa kuatisa omanu vo ko Yuda oku kolela okuti ovanyali vavo ka va ka kalako vali! Omo liaco Nahumi, wa lekisa okuti Yehova eye “ocikolo veteke liohali.” (Nah. 1:7) Eci tu enda kupange woku kunda, tu pondolavo oku eca esapulo liwa komanu kuenda oku va kuatisa oku kolela ku Yehova.—Nah. 1:15.
3. Tu kuama ndati ongangu ya Nahumi poku tukula ovolandu kuenda ovindekaise kupange woku kunda?
3 Talavaya Lovolandu kuenda Ovindekaise: Yehova wa vetiya Nahumi, oco a sokise esulilo liolupale luo Ninivei leli liolupale luo Tebas ocipepi lofeka yo Egito (No-amon) okuti, lia nyõliwa la va Asuria. (Nah. 3:8-10) Osimbu tu sapuila omanu ovina viatiamẽla koku nyõliwa kuoluali lulo lua vĩha, tu pondola oku tukula ovitumasuku Viembimbiliya vi lekisa okuti Yehova o tẽlisa ovina viosi a likuminya oku linga. Eci va Bavulono la va Medo Persa va liyaka la va Ninivei kunyamo wo 632 O. Y., andunde ombela yalua, a pesekela volui Tigre kuenda ovimbaka vimue violupale luaco, via kupuka. Va Ninivei va ambatiwa kumandekua, ndeci Yehova a ci popele.—Nah. 1:8; 2:6.
4. Tu pondola ndati oku popia olondaka via leluka vi kuatisa omanu oku kuata elomboloko kupange woku kunda?
4 Vangula Ovina vi Lomboloka Havio Via Leluka: Olondaka Nahumi a soneha via lomboluiwa ciwa havio vi vetiya. Ovina viaco via kuata elomboloko liwa. (Nah. 1:14; 3:1) Cimuamue haco okuti, tu sukila oku popia ovina via leluka. (1 Va Kor. 14:9) Poku sapela lomunu, tete lombolola esunga lieci wa endela oku ko nyula. Poku longisa Embimbiliya komanu va lekisa onjongole, va kuatisa oku kolela kondaka ya Yehova loku sola ndomo va kapako olondaka viaco komuenyo wavo.—Va Rom. 10:14.
5.Ekolelo lipi tu pondola oku sanga kocitumasuku ca Nahumi?
5 Ekolelo Nahumi a kuata lioku tẽlisiwa kuondaka ya Yehova li sangiwa velivulu eye a soneha. Osimbu tu lavoka oku nyõliwa kuoluali lulo lua vialiwa la Satana, tu lembelekiwa londaka ya Suku yokuti: “Ka fetuluinya luvali ovanyãli vaye.”—Nah. 1:9.