Tanga Embimbiliya Poku Eca Atambululo

ECI tu puliwa catiamẽla kekolelo lietu, kekalo liomuenyo wetu, kocisimĩlo cimue catiamẽla kovina vi kasi loku pita cilo, kelavoko lietu lio kovaso, tu likolisilako oku tanga Embimbiliya oco tuece etambululo. Momo lie? Momo Embimbiliya olio Ondaka ya Suku. Vembimbiliya omo tupa ovina tu tava. Ekalo liomuenyo wetu omo tua li tiamisila. Olio li suñamisa ovisimĩlo vietu kueci catiamẽla kovina vi kasi loku pita voluali. Elavoko lietu lio kovaso lia sevetiwa ciwa kolohuminyo vi sangiwa Vembimbiliya.​—2 Tim. 3:16, 17.

Tua kũlĩha ciwa ocikele ciyilila konduko tua tambula. Etu, Tulombangi via Yehova. (Isa. 43:12) Omo liaco, ka tu tambulula apulilo loku kuama ovoloño omanu, pole tu tambulula loku kuama eci Yehova a popia Vondaka yaye yi Kola. Ocili okuti etu vosi, omunu lomunu o kuete ovisimĩlo viaye muẽle, pole tu ecelela okuti Ondaka ya Suku oyo yi suñamisa ovisimĩlo vietu, momo tua kolela okuti eci oyo yi popia, oco ocili. Ka kuli atatahãi, Embimbiliya li tu ĩha omoko yoku nõla pokati kovina vialua ndomo ca sungulukila omunu lomunu. Etu ka tu kisika ovisimĩlo vietu komanu, pole onjongole yetu oku va longisa olonumbi vi sangiwa Vovisonehua. Eci cecelela kolonjeveleli vietu oku kuata elisanjo lioku nõla ndeli tu kuete. Ndeci upostolo Paulu a linga, etu tu vetiya oku ‘pokola lekolelo.’​—Va Rom. 16:26.

Yesu Kristu kelivulu Liesituluilo 3:14, wa tukuiwa okuti, ‘ombangi yocili haiyo yesunga.’ Ndamupi eye a enda loku tambulula apulilo kuenda oku tata ovikele a tambuile? Olonjanja vimue, wa enda loku ci linga loku ta alusapo a lingisa omanu oku sokolola. Olonjanja vikuavo, poku pula komunu wa linga epulilo, ocisimĩlo caye kueci catiamẽla kocisonehua cimue. Olonjanja vialua, wa enda loku ci linga loku tukula ovisonehua kuenda oku va vi lomboluila. (Mat. 4:3-10; 12:1-8; Luka 10:25-28; 17:32) Kocita catete oviña Viovisonehua, ndomo ca siataile, via solakawaile volosunangonga. Ka kuli uvangi u lekisa okuti Yesu wa kuatele oviña viaco, pole eye wa kũlĩhĩle ciwa Ovisonehua kuenda ka endale loku suma suma oku vi tukula poku longisa vakuavo. (Luka 24:27, 44-47) Eye lesunguluko lialua, wa popia hati, eci a kala loku longisa ka kale loku ci vangula locipango caye muẽle. Eye wa vangula eci a yeva ku Isiaye.​—Yoa. 8:26.

Onjongole yetu oku kuama ongangu ya Yesu. Etu ka tuala yeva okuti Suku wo vangula, ndeci Yesu o yeva. Pole Embimbiliya olio Ondaka ya Suku. Eci tu li tanga ndono yokupa atambululo etu, tu yuvula oku li kemãlisa etu muẽle. Tu lekisa okuti ka tu kuama ondaka yomunu ka ya lipuile, pole tua likapelako oku tava okuti eci Suku a vangula oco ocili.​—Yoa. 7:18; Va Rom. 3:4.

Ocili okuti, onjongole yetu hakutangako lika Embimbiliya, pole oku li tanga lonjila yimue okuti yika kuatisa olonjeveleli vietu. Tu yongola okuti ovo va yevelela ciwa lutima wavo wosi. Ndaño muẽle omunu o kuete ocisimĩlo cimue ca litepa, ove o pondola oku fetika ombangulo yimue yatiamẽla Kembimbiliya loku pula ndoco: “Ku tava hẽ okuti eci ca velapo ceci Suku a vangula?” Ale o popia ndoco: “Wa kũlĩhĩle ale okuti Embimbiliya li vangula eci catiamẽla kondaka eyi?” Nda okuti o kasi loku vangula la umue ka sumbile Embimbiliya, ove o sukila oku vangula olondaka via litepa vioku fetika. Ove o pondola oku popia ndoco: “Ngecelele oku tanga love ocitumasuku eci cokosiahũlu.” Ale o pondola oku popia ndoco: “Elivulu okuti olio lia sandekiwapo vali vesapulo liomanu lia popia hati. . . ”

Volonjanja vimue, ci tava okuti o nõlapo lika oku lombolola ocisonehua cimue. Pole nda ci sukiliwa, hĩse oku tuvula muẽle Embimbiliya liaco loku tanga eci li popia. Lekisa ocisonehua komunu Vembimbiliya liaye muẽle nda ci sukiliwa. Oku tanga muẽle Vembimbiliya, olonjanja viosi ci kuete unene uwa komanu.​—Va Hev. 4:12.

Akulu vekongelo akristão va kuete ocikele cimue ci likasi coku tanga Embimbiliya poku eca atambululo kapulilo. Ocituwa cimue ci kisikiwa ku umue manji o yongola oku kala ukulu wekongelo, oku ‘limbuka ocikele caye coku kolela lika ondaka yocili ndomo yo longisiwa.’ (Tito 1:9) Umue vekongelo ci tava okuti o nõlapo oku kuama onjila yimue komuenyo waye noke yeci umue ukulu wekongelo o wĩha limue elungulo. Hesilivilokuolio ci kuete nda elungulo liaco lia sevetiwa muẽle Vovisonehua! Ongangu ya umue ukulu wekongelo yoku ci linga, yi pondola oku vetiya valua oku ci lingavo poku longisa.