“Usoma Wove Wiye”

1, 2. Olondaka vipi via Yehova ovapostolo vatatu va Yesu va yeva, kuenda va tambulula ndati?

NDA Yehova Suku wa pingile kokuove oco o linge ocina cimue, nda wa tambulula ndati? Ove hẽ, ku sanjukila oku pokola kokuaye omo liovina viosi a ku pinga? Ocili okuti, nda wa ci linga!

² Eci oco ca pita lovapostolo vatatu va Yesu ndeci, Petulu, Tiago kuenda Yoano, noke yo Paskoa kunyamo wa 32 K.K. (Tanga Mateo 17:1-5.) Osimbu va kala la cime cavo ‘komunda yimue ya lepa,’ vocinjonde va kuata, va mola Yesu wa vialekiwa komangu Yusoma kilu. Omo okuti ocinjonde caco ca kala ndu okuti cocili muẽle, Petulu wa yonguile oku panga onepa kulandu waco. Osimbu Petulu a kala oku vangula, elende limue lia va sikĩlila. Kuenje, Petulu kumue lakamba vaye va kuata esumũlũho lioku yeva ondaka ya Yehova. Eci Yehova a situlula okuti Yesu Omõlaye, wa popia ndoco: “U yeveleli.” Ovapostolo va kuama onumbi ya Yehova. Ovo va yevelela ovina Yesu a longisa, kuenda va sapuilako vakuavo oco va kuamevo onumbi yaco.​—Ovil. 3:19-23; 4:18-20.

3. Momo lie Yehova a tu vetiyila oku yevelela omõlaye, kuenda ulandu upi tu sukila oku konomuisa lutate?

³ Olondaka viokuti, “U yeveleli,” via sonehiwa Vembimbiliya oco vi tu kuatise. (Va Rom. 15:4) Momo lie? Momo Yesu, eye kapitiya komanu la Yehova. (Yoa. 1:1, 14) Olonjanja viosi, Yesu wa enda oku longisa ovina Isiaye a yonguile okuti, tu vi kũlĩha. Omo okuti Yesu wa vangula calua catiamẽla Kusoma wa Suku okuti ovina vikuavo ci sule, vuviali waco mua kongela Yesu Kristu, leci ci soka 144.000 komanu va ka viala kumue laye. Omo liaco, tu sukila oku konomuisa lutate ulandu waco. (Esit. 5:9, 10; 14:1-3; 20:6) Catete, tu konomuisi esunga lieci Yesu a vanguila calua catiamẽla Kusoma wa Suku.

‘Ceci ci Kasi Vutima’

4. Yesu wa lekisa ndati okuti Usoma wa Suku u kasi vutima waye?

⁴ Yesu wa pitisile kovaso Usoma. Momo lie tu ci popela? Momo, olondaka vietu vi situlula ovina tua velisapo komuenyo. Yesu wa popia hati: ‘Eci ci kasi vutima oco omẽla u popia.’ (Mat. 12:34) Vapuluvi alua, Yesu wa vangula eci catiamẽla Kusoma. Yesu wa lombolola eci ci pitahãla 100 kovolandu a sangiwa Vavanjeliu akuãla atiamẽla Kusoma. Kupange waye woku kunda wa velisilepo Usoma ndomo a ci popia hati: “Ñuete ocikundi coku kundila ondaka yiwa yusoma wa Suku vovaimbo akuavo, momo eci oco nda tumilua.” (Luka 4:43) Yesu noke yoku pinduiwa, wamamako oku lomboluila olondonge viaye ovina viatiamẽla Kusoma. (Ovil. 1:3) Omo okuti Yesu wa solele calua Usoma, co vetiya oku vangula ovina viatiamẽla ku Soma.

5-7. (a) Tua kũlĩha ndati okuti Usoma u kuete esilivilo ku Yehova? Ci lombolola. (b) Tu lekisa ndati okuti, Usoma u kuete esilivilo kokuetu?

⁵ Usoma u kuete esilivilo ku Yehova. Tua ci kũlĩha ndati? Ivaluka okuti, Yehova wa tumĩle Omõlaye wongunga palo posi, momo, eye ono yovina viosi Omõlaye a popia, levi a longisa. (Yoa. 7:16; 12:49, 50) Yehova eye ono yovolandu osi a sangiwa Vavanjeliu akuãla atiamẽla komuenyo wa Yesu, kuenda kupange waye woku kunda. Sokolola lutate elomboloko liovina viaco.

⁶ Sokolola okuti, o kasi oku kapa alitalatu epata liove velivulu lialitalatu. Pali alitalatu alua, pole, velivulu liaco ka mu iñila alitalatu alua. Nye o sukila oku linga? O nõla alitalatu o yongola oku kapamo. Cimuamue haico ci pita lavanjeliu okuti, a sokisiwa lelivulu lialitalatu a tu ĩha elomboloko liovina viatiamẽla ku Yesu. Yehova ka vetiyile omanu va soneha Avanjeliu oco va sonehe ovina viosi Yesu a popia, kuenda vina a linga eci a kala palo posi. (Yoa. 20:30; 21:25) Pole, espiritu lia Yehova lia va songuila oku soneha olondaka vi tu kuatisa oku sanga elomboloko locimãho cupange wa Yesu okuti, oco ocina ca velapo ku Yehova. (2 Tim. 3:16, 17; 2 Pet. 1:21) Omo okuti Vavanjeliu tu sangamo ovina Yesu a longisa viatiamẽla Kusoma wa Suku, tu pondola oku kolela okuti, Usoma u kuete esilivilo ku Yehova. Sokolola elomboloko liaco: Yehova o yongola okuti tu kũlĩha cosi catiamẽla Kusoma!

⁷ Omo liaco, omunu lomunu o sukila oku lipula ndoco: ‘Usoma wa Suku u kuete hẽ esilivilo kokuange?’ Nda tu tava kondaka yaco, tu sukila oku yevelela ovina Yesu a popia, levi a longisa viatiamẽla Kusoma, esilivilo liawo, oku kũlĩha ndomo u keya, kuenda otembo u keya.

“Usoma Wove Wiye”​—Ndamupi?

8. Yesu wa lekisa ndati esilivilo Liusoma?

⁸ Kũlĩhĩsa ohutililo Yesu a longisa. Lolondaka via leluka, Yesu wa lombolola esilivilo Liusoma loku lekisa eci u ka linga. Vohutililo yaco, mua kongela apingilo epanduvali. Vapingilo atatu atete atiamẽla kocipango ca Yehova, oku kemãlisa onduko yaye, oku iya Kusoma waye, kuenda oku tẽlisiwa kuocipango caye palo posi, ndeci ci kasi oku lingiwa kilu. (Tanga Mateo 6:9, 10.) Apingilo atatu a tukuiwa ndeti, a kuete elitokeko. Yehova o ka kemãlisa onduko yaye lekuatiso Liusoma wa Mesiya, oco ocipango caye ci lingiwe.

9, 10. (a) Nye Usoma wa Suku u ka linga eci u keya? (b) Ohuminyo yipi Yembimbiliya o lavoka oku tẽlisiwa kuayo?

⁹ Nye Usoma wa Suku u ka linga eci wiya? Eci tu likutilila okuti, “Usoma wove wiye,” tu kasi oku pinga oco Usoma u linge a pongoloko a sukiliwa. Eci Usoma u keya, u ka viala ongongo yosi. U ka malako evĩho li kasi voluali, oku kongelamo ovoviali osi omanu, kuenda u ka nena oluali luokaliye muna mu ka kala esunga. (Dan. 2:44; 2 Pet. 3:13) Eci Usoma wa Suku u ka viala, Oluali luosi lu ka linga luokaliye. (Luka 23:43) Omanu vosi va kasi volondunge wa Yehova va ka pinduiwa, kuenje, va ka li sanga vali lapata kuenda akamba vavo. (Yoa. 5:28, 29) Omanu vakuepokolo va ka lipua, kuenda va ka kala otembo ka yi pui. (Esit. 21:3-5) Noke, ovina vi ka lingiwa palo posi, vi ka kuata elitokeko levi vio kilu, loku situlula ocipango ca Yehova Suku! Ku yongola hẽ oku mõla oku tẽlisiwa kuolohuminyo viaco? Ivaluka okuti, olonjanja viosi o likutilila oco Usoma wa Suku wiye, o kasi oku pinga oco olohuminyo evi vi komõhisa vi tẽlisiwe.

¹⁰ Ocili okuti, Usoma wa Suku ka weyile handi oco u tẽlise ohutililo Yesu a longisa. Momo olombiali viomanu vi kasi oku viala toke cilo, kuenda oluali luokaliye luesunga ka lueyile handi. Pole, kuli esapulo liwa. Usoma wa Suku wa tumbikiwa ale ndomo tu ka ci konomuisa vocipama cikuãimo. Cilo, tu konomuisi ovina Yesu a popia viatiamẽla kotembo Usoma wa laikele oku tumbikiwa kuenda otembo u keya.

Otembo Yipi Usoma wa Suku nda wa Tumbikiwa?

11. Nye Yesu a lekisa catiamẽla koku tumbikiwa Kusoma wa Suku?

¹¹ Yesu wa lekisa okuti, Usoma ka wa tumbikiwile kocita catete K.K., ndomo vamue pokati kolondonge viaye va kala oku sima. (Ovil. 1:6) Konomuisa ovina Yesu a popia valusapo avali a linga velivala lianyamo avali.

12. Olusapo luotiliku losoka lu lekisa ndati okuti Usoma ka wa tumbikiwile kocita catete K.K.?

¹² Olusapo luotiliku kuenda osoka. (Tanga Mateo 13:24-30.) Citava okuti kefetikilo liunyamo wa 31 K.K., eci Yesu a mala oku ta olusapo luaco, oco a lu lomboluila kolondonge viaye. (Mat. 13:36-43) Elomboloko liolusapo luaco lieli: Noke yolofa viovapostolo, Eliapu lia kũla osoka (yi lomboloka Akristão vesanda,) pokati kotiliku (okuti “omãla Vusoma,” ale Akristão olombuavekua). Otiliku losoka via eceliwa oku kulila kumosi toke kotembo yoku ungula, yi lomboloka “esulilo lioluali.” Noke yoku fetika oku ungula, osoka ya laikele oku tepiwa. Kuenje o tiliku, yi kapiwa vosila. Omo liaco, olusapo lu lekisa okuti, Usoma ka wa tumbikiwile kocita catete K.K., pole, wa tumbikiwa lika noke lioku yela kuombuto. Upange woku ungula wa fetika kunyamo wo 1914 K.K., eci otembo yoku yela kuombuto ya pitĩla kesulilo.

13. Yesu wa lekisa ndati okuti ka ka tumbikiwa komangu Yusoma noke yoku tiukila kilu?

¹³ Olusapo luolokondu. (Tanga Luka 19:11-13.) Yesu wa ta olusapo luaco kunyamo wa 33 K.K., eci a endele onjanja ya sulako ko Yerusalãi. Noke yoku yevelela olusapo luaco vamue va simĩle okuti, Yesu o tumbika Usoma waye poku enda ko Yerusalãi. Yesu oco a pengulule ocisimĩlo comanu vaco, loku lekisa kokuavo okuti Usoma u ka tumbikiwa kovaso yoloneke, wa lisokisa “lombuale yimue” yi linga ungende “kofeka yocipãla oco yi ka tambule uviali.”a Catiamẽla ku Yesu, “ofeka yocipãla” ya tukuiwa ndeti, kilu kuna a laikele oku tambula ku Isiaye unene woku kala Osoma. Pole, Yesu wa kũlĩhĩle okuti ka vialekiwa komangu Yusoma vepuluvi a tiukila kilu. Momo wa kũlĩhĩle okuti, tete o sukila oku tumãla kondio ya Suku loku kevelela otembo yoku vialekiwa. Cilo tua kũlĩha okuti, oku kevelela kuaco kuambata anyamo alua.​—Osa. 110:1, 2; Mat. 22:43, 44; Va Hev. 10:12, 13.

Otembo yi pi Usoma wa Suku u Keya?

14. (a) Yesu wa tambulula ndati epulilo lia lingiwa lovapostolo vaye vakuãla? (b) Oku tẽlisiwa kuocitumasuku ca Yesu, ku tu lekisa nye catiamẽla koku tukuluka kuaye kuenda Kusoma?

¹⁴ Eci kua kambele oloneke vimue osimbu Yesu ka pondiwile, ovapostolo vaye vakuãla vo pula vati: “Ondimbukiso yoku tukuluka kuove ye? Londimbukiso yesulilo lioluali ye?” (Mat. 24:3; Mar. 13:4) Yesu wa tambulula poku tukula ocitumasuku ca sonehiwa kelivulu lia Mateo ocipama 24 kuenda 25. Yesu wa tukula ovina vialua via laikele oku pita voluali okuti, vi eca uvangi wondimbukiso yoku “tukuluka” kuaye. Efetikilo lioku tukuluka kuaye, lilikuata loku tumbikiwa Kusoma, kuenda esulilo lioku tukuluka kuaye, lilikuata lokuiya Kusoma oco u viale ongongo. Tu kuete ovovangi alua a lekisa okuti, ocitumasuku ca Yesu ci kasi oku tẽlisiwa tunde kunyamo wo 1914.b Omo liaco, unyamo waco wa lekisa oku tukuluka kuaye kuenda oku tumbikiwa Kusoma.

15, 16. Ondaka “ocitumbulukila cilo,” yi tiamisiwila kulie?

¹⁵ Otembo yipi usoma wa Suku u keya? Yesu ka tukuile otembo yaco. (Mat. 24:36) Pole, wa tukula ovina vialua vi tu kuatisa oku limbuka okuti, tu kasi ocipepi lotembo yaco. Yesu wa lekisa okuti eci Usoma u keya, ‘ocitumbulukila cilo’ ci ka mõla oku tẽlisiwa kuondimbukiso yocitumasuku caco. (Tanga Mateo 24:32-34.) Ondaka “ocitumbulukila cilo,” yi tiamisiwila kulie? Tu konomuisi lutate olondaka via Yesu.

¹⁶ “Ocitumbulukila cilo.” Anga hẽ, Yesu wa kala oku tukula vana okuti ka va tavele handi? Sio. Tu konomuisi omanu a kala oku sapela lavo. Yesu wa lomboluila ocitumasuku eci kovapostolo vamue ‘veyile kokuaye pokolika.’ (Mat. 24:3) Ovapostolo vaco va laikele oku wavekiwa lespiritu sandu. Konomuisavo ovina via kongela vulandu waco. Osimbu Yesu ka tukuile olondaka viokuti, “ocitumbulukila cilo,” wa popia hati: ‘Lilongisi olusapo lukuyu okuti: Eci ovianja viaco vi fetika oku kula okuti amẽla aco a yova, vu limbuka okuti, otembo yondombo yi kasi ocipepi. Cimuamue haico okuti, eci vu mola ovina viaco limbuki okuti, eye o kasi ocipepi pivelo.’ Olondonge via Yesu olombuavekua, via laikele oku limbuka ovina a popele, kuenda oku kuata elomboloko liolondaka a popele hati, ‘o kasi ocipepi pivelo.’ Omo liaco, Yesu poku popia hati, “ocitumbulukila cilo,” wa tiamisila ondaka yaco kolondonge viaye olombuavekua.

17. Olondaka “ocitumbulukila cilo,” kuenda “ovina evi viosi” vi lomboloka nye?

¹⁷ “Ocitumbulukila cilo ka ci pui te ovina evi viosi vi lingiwa.” Olondaka evi vi ka tẽlisiwa ndati? Oco tu tambulule epulilo eli, tu sukila oku kũlĩha ovina vivali ndeci: Elomboloko “liocitumbulukila,” kuenda “ovina evi viosi.” Vembimbiliya ondaka “ocitumbulukila” yi tiamisiwila komanu va kasi komuenyo vokuenda kuotembo yimuamue. Ocili okuti, ocitumbulukila, ci kala ño otembo yimue komuenyo, noke ci sulila. (Etu. 1:6) Vondaka “ovina evi viosi,” mua kongela ovina viosi Yesu a tukula okuti, via fetika oku tẽlisiwa kunyamo wo 1914, eci a vialekiwa komangu yusoma, kuenje, vi ka sulila vokuenda ‘kuohali ya piãla.’​—Mat. 24:21.

18, 19. Tua sanga ndati elomboloko liondaka Yesu a tukula yokuti, “ocitumbulukila cilo,” kuenda petosi li pi tua pitĩla?

¹⁸ Tu kuata ndati elomboloko liondaka Yesu a tukula okuti, “ocitumbulukila cilo”? Vocitumbulukila mua kongela ovimunga vivali Viakristão olombuavekua. Catete, olombuavekua vina via mõla efetikilo lioku tẽlisiwa kuondimbukiso kunyamo wo 1914. Cavali, olombuavekua vina via kongeliwa kocimunga catete. Vamue pokati kocimunga cavali colombuavekua, va ka mõla oku fetika kuohali ya piãla. Ovimunga viaco vivali violombuavekua, vi panga onepa kocitumbulukila cimuamue, momo via kala kumosi komuenyo vokuenda kuotembo yimue.c

¹⁹ Noke lioku konomuisa ocipama cilo, elomboloko lipi tu kuete? Tua kũlĩha okuti, ondimbukiso yoku tukuluka kua Yesu komangu Yusoma, yi letiwe voluali luosi, kuenda tu pondola oku mõla olombuavekua vi kasi handi komuenyo palo posi okuti, vi panga onepa ‘kocitumbulukila cilo.” Pole, vamue pokati kavo va ka mõla eci ohali ya piãla yi ka fetika. Omo liaco, tu kuete elomboloko liokuti, Usoma wa Suku ndopo u viala ongongo! Omo liaco, tu ka kuata esanju poku mõla oku tẽlisiwa kuohutililo Yesu a tu longisa yokuti: “Usoma wove wiye”!

20. Ovolandu api a kuete esilivilo tu ka lilongisa velivulu lilo, kuenda nye tu ka konomuisa vocipama ci kuãimo?

²⁰ Ka tu ka ivaliko olondaka Yehova a popele tunde kilu viatiamẽla komõlaye hati: “U yeveleli.” Omo okuti Tuakristão vocili, tu sanjukila oku pokola konumbi yaco ya Yehova. Tu yongola oku kũlĩha ovina viosi Yesu a popia kuenda evi a longisa viatiamẽla Kusoma wa Suku. Velivulu lilo, tu ka konomuisa ovina Usoma wa Suku wa tẽlisa, kuenda ovina vikuavo vi kuete esilivilo vi ka tẽlisiwa kovaso yoloneke. Ocipama ci kuãimo, ci ka lombolola ndomo Usoma wa Suku wa fetika kilu.