Oku Eca Ekuatiso Kusoma​—Oku Tunga Ovitumãlo Viefendelo Kuenda Oku Kuatisa Vana va Pita Lovilunga

OVE iñila vonjango yene Yusoma kuenda ka ci leluka kokuove oku limbuka ocitumãlo caco. Olonjanja viosi wa sanjukilile ocitumãlo caco. Citava okuti, ivaluka ovolandu awa omo lioku kuatisa koku tunga ocitumãlo caco kanyamo apita. Pole, esanju liove lia livokiya omo okuti, Onjango yaco Yusoma cilo va kasi oku lingilamo upange woku eca ekuatiso. Noke yoku pita ocilunga cimue okuti andunde ovava a nyõla onepa yimue yimbo liene, lonjanga yalua Ocisoko Cakulu vo Betele ca linga eliangiliyo lioku kuatisa vana va pita locilunga caco poku va ĩha okulia, uwalo kuenda ovava. Olombanjaile via eciwa, viongotiyiwa ciwa. Vamanji va kala kulala poku iñila vonjango Yusoma oco va kuate ovina va sukila kuenda va lila omo liesanju.

Yesu wa popele hati, ondimbukiso ya velapo yomanu vaye, ocisola ci sangiwa pokati kavo. (Yoano 13:34, 35) Vonepa eyi, tu ka konomuisa ndomo Olombangi Via Yehova via siata oku lekisa ocisola cavo koku tunga kuenda oku eca ekuatiso eci kuiya ovilunga. Ocisola caco ceca uvangi wokuti tu kasi vemehi liuviali Wusoma wa Yesu.