ELILONGISO 1

Fetika Lonjila yi Vetiya

Ovilinga 17:22

CECI O SUKILA OKU LINGA: Kefetikilo, vangula cimue ci vetiya onjongole yomanu, tukula ulandu wove kuenda lekisa esunga lieci ulandu waco u kuetele esilivilo kokuavo.

NDOMO O CI LINGA:

Vetiya onjongole yolonjeveleli. Nõla epulilo limue, ondaka yimue, ulandu umue weteke leteke, ale esapulo limue li vetiya olonjeveleli.

Tete, sokolola lutate kovina vi vetiya olonjeveleli, kasakalalo avo kuenje vangula eci ci likuata lekalo liavo.
Tukula osapi yove. Olonjeveleli vi sukila oku kuata elomboloko liosapi kuenda ocimãho cayo.
Lekisa esunga lieci ulandu waco u kuetele esilivilo. Vangula eci ci pondola oku kuatisa olonjeveleli. Ovo va sukila oku limbuka ndomo ulandu waco u va kuatisa komuenyo wavo.

Poku pongiya ohundo yimue, lipula ndoco: ‘Ocitangi cipi vamanji vekongelo va kasi oku liyaka laco?’ Kuenje olondaka viove vioku fetika te vi likuata lekalo liavo.