ELILONGISO 2

Vangula Lutima Wosi

2 Va Korindo 2:17

CECI O SUKILA OKU LINGA: Vangula ndeci wa tuwa okuti, ci situlula ndomo o liyevite catiamẽla kulandu waco kuenda ndomo olonjeveleli vi liyevitevo.

NDOMO O CI LINGA:

Likutilila kuenda lipongiya ciwa. Likutilila oco ku ka tiamisile utima kokuove muẽle, pole kesapulo. Patekela lika atosi a velapo. Vangula ovisimĩlo volondaka viove muẽle; ku ka patekele ondaka londaka ndu okuti o kasi oku tanga.

Nda wa sokiya oku tanga Vembimbiliya ale velivulu likuavo, poku pongiya pitololamo oco o tange ciwa. Eci ci ka ku kuatisa oku tanga lonjila ya sunguluka. Poku tanga ulandu womunu umue, tanga olondaka viaco locikembe okuti, ku ci lingi lovinjembe.
Vangula lutima wosi. Nda wa tiamisila utima kesapulo kuenda konjila ndomo o kuatisa omanu, ekalo liove li ka situlula ndomo wa tuwa. Kuenje omanu va lianja, momo va ka limbuka okuti o kasi oku vangula lutima wosi.

Oku vangula ndomo wa tuwa, ka ci lomboloka oku vangula ño cosi wa panga. Ivaluka esilivilo liesapulo liove kuenda vangula lonjila ya leluka haiyo yi lomboloka.
Luluvalela kolonjeveleli. Eci o vangula, vanja komunu nda cecelela oku ci linga. Poku linga ohundo, vanja komunu lomunu olonjanja vimue okuti, ku vanji komanu vosi ndocimunga.