O Pondola Oku Kala Ndati Ekamba Lia Suku?

1, 2. Velie va kala akamba va Yehova?

HELIE ove o yongola okuti o linga ekamba liove? O pondola oku linga ukamba lomunu umue o sole. Ove u tata ciwa, kuenda eye oku tatavo ciwa. Omunu waco o kuete ekalo liwa, kuenda ovituwa viaye vi ku komõhisa.

² Yehova Suku wa nõla omanu vamue oco va linge akamba vaye. Avirahama wa kala umue pokati kakamba va Yehova. (Isaya 41:8; Tiago 2:23) Yehova wa solelevo Daviti. Eye wa popia hati, Daviti wa kala ‘omunu umue wa sanjuisa utima waye.’ (Ovilinga 13:22) Uprofeto Daniele ‘wa soliwile calua’ la Yehova.—Daniele 9:23.

3. Momo lie Avirahama, Daviti, kuenda Daniele va kalela akamba va Yehova?

³ Avirahama, Daviti, kuenda Daniele, veya oku kala ndati akamba va Yehova? Ocili okuti Yehova wa sapuilile Avirahama hati: “Wa pokola kondaka yange.” (Efetikilo 22:18) Yehova o pondola oku kala ekamba liomanu vana va pokola kokuaye. Apata omanu a pondolavo oku kala akamba vaye. Yehova wa sapuilile ku va Isareli hati: “Pokoli kondaka yange oco ndinga Suku yene kuenje ene vu linga omanu vange.” (Yeremiya 7:23) Omo liaco, o sukilavo oku pokola ku Yehova, nda o yongola oku kala ekamba liaye.

YEHOVA O TEYUILA AKAMBA VAYE

4, 5. Yehova wa siata oku teyuila ndati akamba vaye?

⁴ Embimbiliya li popia hati, Yehova wa siata oku sandiliya onjila yoku “lekisa unene waye kuvakuavitima vio sungulukila.” (2 Asapulo 16:9) Kosamo 32:8, Eye wa likuminya kakamba vaye hati: “Hu longisa, hu imbaimba onumbi yonjila wenda. Hu lungula, hu imba ovaso.”

⁵ Kuli unyãli umue o kuete unene okuti, o yongola oku tepa ukamba wetu la Suku. Pole, Yehova o yongola oku tu teyuila. (Tanga Osamo 55:22.) Omo okuti tuakamba va Yehova, tu sukila oku u vumba lutima wetu wosi. Ndaño okuti tua siata oku liyaka lovitangi, pole, tua kolela kokuaye. Tu kuetevo ekolelo ndeli ukualosamo a kuatele. Eye wa soneha ovina viatiamẽla ku Yehova ndoco: “Omo eye o kasi kondio yange si sengiwa.” (Osamo 16:8; 63:8) Satana wa siata oku seteka ndati oku tepa ukamba wetu la Suku?

ALUNDI A SATANA

6. Nye Satana a popia catiamẽla komanu?

⁶ Kocipama 11 celivulu lilo, tua lilongisa okuti Satana wa lingila usuanji Yehova poku u lundila hati ohembi, kuenda hukuesungako. Momo, ka ecelele okuti Adama la Heva va nõla ovo muẽle oku linga eci ciwa ale ceci cĩvi. Embimbiliya kelivulu lia Yovi li tu longisa okuti, Satana wa lundilavo omanu vana va yonguile oku kala akamba va Suku. Satana wa popia hati, omanu va kasi lika oku vumba Suku omo liovina va tambula Kokuaye. Pole, ka va ci lingila omo liocisola vo Kuetele. Satana wa popiavo hati, o pondola oku vetiya omanu oco va yanduluke Suku. Omo liaco, tu konomuisi ovina tu pondola oku lilongisa kulandu wa Yovi, kuenda ndomo Yehova o teyuila.

7, 8. (a) Nye Yehova a yeva vutima catiamẽla ku Yovi? (b) Nye Satana a popia catiamẽla ku Yovi?

⁷ Helie wa kala Yovi? Eye wa kala ulume umue uwa okuti, tunde eci a kala komuenyo pa pita ale 3.600 kanyamo. Yehova wa popia hati, kotembo yaco vongongo ka mua kalele ulume umue o sokisiwa laye. Yovi wa sumbilile calua Suku, kuenda wa suvukile ovina vĩvi. (Yovi 1:8) Yovi wa kala ekamba liocili lia Yehova.

⁸ Satana wa lundila Yovi hati, wa kala oku vumba Suku omo liocina cimue a yonguile kokuaye. Kuenje, Satana wa sapuila ku Yehova hati: “Haveko hẽ wa vindikiya kolonele viosi oku vindikiya onjo yaye la cosi a kuete? Wa sumũlũisa upange wovaka aye, kuenje ovipako viaye via lua vofeka. Puãi imba eka liove okuti o lamba cosi a kuete kuenje eye oku [likalela] kovaso ove.”​—Yovi 1:10, 11.

9. Nye Yehova a ecelela okuti Satana o ci linga?

⁹ Satana wa lundila Yovi hati, wa kala oku vumba lika Yehova omo liovina a laikele oku tambula Kokuaye. Satana wa popiavo hati, wa laikele oku tateka Yovi oco a liwekepo oku vumba Yehova. Ocili okuti Yehova ka tavele kolondaka viaco. Pole, wa ecelela okuti Satana o seteka Yovi oco a limbuke nda wa kala ekamba lia Yehova omo liocisola o kuetele.

SATANA WA ÑUALELAPO YOVI

10. Satana wa ñualelapo ndati Yovi, kuenda nye Yovi a linga?

¹⁰ Catete, Satana wa ponda ovinyama viosi via Yovi. Noke, wa ponda apika valua va Yovi. Kuenje, ovina viosi Yovi a kuatele via kunduiwa. Noke, Satana wa ponda ekũi liomãla va Yovi lehunguhungu liofela. Pole, Yovi wa pandikisa lekolelo ku Yehova, momo “kovina evi viosi Yovi ka lingile ekandu ndaño oku vela Suku.”​—Yovi 1:12-19, 22.

11. (a) Ovina vipi vikuavo Satana a linga ku Yovi? (b) Nye Yovi a linga?

¹¹ Satana ka liwekelepo. Momo, wa lingila usuanji Suku poku popia hati: “Lamba ekepa liaye letimba liaye kuenje eye o ku likalela kovaso ove.” Omo liaco, Satana wa veta Yovi luvei umue. (Yovi 2:5, 7) Pole, Yovi wamamako lekolelo ku Yehova. Eye wa popia hati: “Toke [ndi] fa si liweka kesunga liange.”​—Yovi 27:5.

12. Yovi wa lekisa ndati okuti Satana ohembi?

¹² Yovi ka kũlĩhĩle lacimue catiamẽla kalundi a Satana, ale esunga lieci a kalela oku tala ohali yalua. Yovi wa simĩle okuti, Yehova eye wa kala oku u kokela ovitangi viaco. (Yovi 6:4; 16:11-14) Pole, Yovi wamamako oku kolela ku Yehova. Kuenje, ka kuatele vali atatahãi, kuenda ka lekisile epela. Yovi wa kala ekamba lia Suku omo lioku lekisa ocisola kokuaye. Alundi osi a Satana a kala esanda!

13. Onima yipi Yovi a tambula omo liekolelo liaye?

¹³ Ndaño okuti Yovi ka kũlĩhĩle ovina via kala oku pita kilu, pole, wa amamako lekolelo ku Suku, kuenda wa lekisa okuti Satana ondingaĩvi. Yehova wa eca onima ku Yovi omo lioku kala ekamba lia koleliwa.—Yovi 42:12-17.

NDOMO SATANA A KU LUNDILA

14, 15. Alundi api Satana a siata oku lingila omanu vosi?

¹⁴ O pondola oku lilongisa ovolandu a kuete esilivilo lia velapo a pita la Yovi. Koloneke vilo, Satana wa siata oku tu lundila hati, tu kasi oku fendela Yehova omo liovina tu pondola oku tambula Kokuaye. Kelivulu lia Yovi 2:4, Satana wa popia hati: “Cosi omunu a kasi laco o ci ecela omuenyo waye.” Omo liaco, Satana ka lundilile lika Yovi, pole, wa siatavo oku lundila omanu vosi hati, vakuacipululu. Noke lianyamo alua tunde eci Yovi a fa, Satana wamamako oku lingila usuanji Yehova kuenda oku lundila afendeli vaye. Kelivulu Liolosapo 27:11, tu tangako ndoco: “Kuata olondunge amõlange, sanjuisa utima wange, oco nambulule u o njimbula.”

¹⁵ Ove o pondola oku nõla oku pokola ku Yehova kuenda oku kala ekamba liaye liocili, oco o lekise okuti Satana ohembi. Oku linga apongoloko amue komuenyo wove oco o kale ekamba lia Suku, oyo onjila ya velapo o sukila oku kuama! Oku nõla onjila yaco ci kuete esilivilo lia velapo. Satana wa popia hati, ku pondola oku amamako oku kolela ku Suku eci o liyaka lovitangi. Eye wa siata oku tu seteka oco ka tu ka kolele ku Suku. Wa siata oku ci linga ndati?

16. (a) Olonjila vipi Satana a siata oku kuama oco omanu va liwekepo oku vumba Yehova? (b) Satana o pondola oku ku yapuisa ndati oco o liwekepo oku vumba Yehova?

¹⁶ Satana wa siata oku kuama olonjila vialua vioku tu yapula, oco tu liwekepo oku kala akamba va Yehova Suku. Eye o kasi “ndohosi yi koma, oku sandiliya u a lia.” (1 Petulu 5:8) Ku ka komõhe nda akamba vove, vakuepata liove, ale omanu vakuavo va seteka oku ku vetiya oco o liwekepo oku lilongisa Embimbiliya kuenda oku linga ovina via sunguluka. Pamue o kala ndu okuti va kasi oku ku ñualelapo.a (Yoano 15:19, 20) Satana wa siatavo oku likembisa “ndungelo wocinyi.” Pamue o seteka oku tu vetiya oco ka tu ka pokole ku Yehova. (2 Va Korindo 11:14) Onjila yikuavo Satana a siata oku kuama oco tu liwekepo oku vumba Yehova, oku tu vetiya lovisimĩlo viokuti, lalimue eteke tu ka vumba ciwa Yehova.—Olosapo 24:10.

POKOLA KOVIHANDELEKO VIA YEHOVA

17. Momo lie tu sukilila oku pokola ku Yehova?

¹⁷ Eci tu pokola ku Yehova tu lekisa okuti Satana ohembi. Nye ci pondola oku tu kuatisa oku kala vakuepokolo? Embimbiliya li popia ndoco: “Sola Yehova Suku yove lutima wove wosi, lomuenyo wove wosi, longusu yove yosi.” (Esinumuĩlo 6:5) Tua siata oku pokola ku Yehova omo liocisola tu u kuetele. Osimbu ocisola tu kuetele Yehova ci livokiya tu linga ovina viosi eye a pinga okuti, tu vi tẽlisa. Upostolo Yoano wa soneha ndoco: “Eci oco ci lomboloka ocisola ca Suku okuti, tu pokola kovihandeleko viaye; puãi ovihandeleko viaye ka vi lemi.”—1 Yoano 5:3.

18, 19. (a) Ovina vipi Yehova a popia hati ka via sungulukile? (b) Tua kũlĩha ndati okuti Yehova ka pingi kokuetu ovina ka tu tẽla oku linga?

¹⁸ Ovina vipi Yehova a siata oku tu sapuila okuti ka via sungulukile? Vimue pokati kovina viaco vi sangiwa pokakasia losapi hati: “Suvuka Ovina Yehova a Suvuka.” Pamue o sima okuti vimue pokati kovina viaco via sunguluka. Pole, eci o tanga ovinimbu Viembimbiliya loku vi sokolola lutate, o pondola oku kuata elomboloko liesilivilo lioku pokola kolonumbi via Yehova. Pamue o limbuka okuti o sukila oku linga apongoloko amue komuenyo wove. Ndaño okuti poku ci linga pamue ka ci leluka, pole, nda wa linga apongoloko aco, o kuata ombembua kuenda esanju li tunda koku kala ekamba lia koleliwa lia Suku. (Isaya 48:17, 18) Tua kũlĩha ndati okuti tu pondola oku linga apongoloko aco?

¹⁹ Yehova ka pingi kokuetu ovina ka tu tẽla oku linga. (Esinumuĩlo 30:11-14) Omo okuti Yehova ekamba limue lia koleliwa, wa tu kũlĩha ciwa okuti etu muẽle ci sule. Eye wa kũlĩha ongusu yetu kuenda ahonguo etu. (Osamo 103:14) Upostolo Paulu o tu vetiya hati: “Suku wa koleliwa kuenda ka ecelela okuti vu yonjiwa leci ka vu tẽla, puãi kumue leyonjo u muisivo evelo lioku puluka okuti vu pandikisi lalio.” (1 Va Korindo 10:13) Tu pondola oku kolela okuti olonjanja viosi Yehova o tu ĩha ongusu yoku linga eci ciwa. Eye oku ĩhavo “unene wa piãla” u pondola oku ku kuatisa oku pandikisa poku liyaka lovitangi. (2 Va Korindo 4:7) Paulu noke yoku kuatisiwa la Yehova poku liyaka lovitangi wa popia hati: “Kovina viosi ñuete ongusu mekonda lia una o nyĩha unene.”—Va Filipoi 4:13.

LILONGISA OKU SOLA OVINA SUKU A SOLE

20. Ovituwa vipi o sukila oku setukula kuenda momo lie?

²⁰ Nda tu yongola oku kala ekamba lia Yehova, tu sukila oku liwekapo oku linga ovina a popia hati, ka via sungulukile, pole, tu likolisilako oku linga ovina viwa. (Va Roma 12:9) Akamba va Yehova va sole ovina eye a sole. Ovo, va tukuiwa Vosamo 15:1-5. (Tanga.) Akamba va Yehova va siata oku setukula ovituwa viaye poku lekisa “ocisola, esanju, ombembua, epandi, esunga, ohenda, ekolelo, umbombe kuenda oku likandangiya.”—Va Galatia 5:22, 23.

21. O pondola oku lilongisa ndati oku lekisa ovituwa Suku a sole?

²¹ O pondola oku lilongisa ndati oku lekisa ovituwa viwa? O sukila oku lilongisa ovina Yehova a sole poku tanga kuenda oku lilongisa Embimbiliya oloneke viosi. (Isaya 30:20, 21) Osimbu amamako oku ci linga, ocisola o kuetele Yehova ci livokiya, kuenje ocisola caco ci ku vetiya oku pokola kokuaye.

22. Onima yipi o pondola oku tambula nda wa pokola ku Yehova?

²² Apongoloko o linga komuenyo wove, a sokisiwa loku lula uwalo wosimbu okuti, o wala uwalo wokaliye. Embimbiliya li popia hati, o sukila oku ‘lula omunu wosimbu,’ kuenje o wala “omunu wokaliye.” (Va Kolosai 3:9, 10) Ndaño okuti pamue ka ca lelukile oku ci linga, pole, nda tu linga apongoloko kuenda tu pokola ku Yehova, eye o tu likuminya oku tu ĩha “onima ya lua.” (Osamo 19:11) Omo liaco, nõlapo oku pokola ku Yehova, kuenda eca uvangi wokuti Satana ohembi. Ku ka vumbe Yehova omo lionima o ka tambula kovaso yoloneke, pole ci linga omo liocisola u kuetele. Nda wa ci linga, o kala ekamba liaye liocili!