Ono Yovipama Viohongele Ekalo Lietu Tuakristão Kuenda Oku Kunda
© 2024 Watch Tower Bible and Tract Society of Pennsylvania
4-10 YELOMBO
OVOKUASI A SANGIWA VONDAKA YA SUKU | OLOSAMO 16-17
“Yehova, Ono Yange Yovina Viosi Viwa”
Ene Amalẽhe, vu Pondola Oku Kuata Esanju Komuenyo
KUATA AKAMBA VOCILI
11 Tanga Osamo 16:3. Daviti wa kũlĩhĩle ndomo a ponduile oku sanga akamba vawa. Eye wa “sanjukila” oku kala lakamba vana va solele Yehova. Daviti o tukula akamba vaye okuti “olosandu,” momo ovo va likolisilako oku kuama ovihandeleko via lipua via Yehova. Ukualosamo ukuavo wa kuama onjila yimuamue poku nõla akamba kuenje wa soneha hati: “Ndikamba lia vosi vana va ku sumbila, kuenda lia vana va pokola kolonumbi viove.” (Osamo 119:63) Ndomo tua lilongisa vocipama ca pita, ove o pondolavo oku sanga akamba vawa pokati kava va sole Yehova kuenda vo pokola. Ocili okuti, ka ci sukila okuti akamba vove te lika vana va kuotunga wove.
w15/2/2014 kem. 28 ocin. 11
‘Oku Limbuka Esanju Lia Yehova’
Daviti wa imba ocisungo hati: “Yehova eye o nyĩha ovina viosi ndi tambula kuenda okopo ndi nyua. Eye o teyuila ocipiñalo cange. Olongave viange vi kasi kovitumãlo viwa. Ocili, nda sanjukila ocipiñalo cange.” (Osa. 16:5, 6) Daviti wa eca olopandu omo ‘liocipiñalo’ a tambula, oku kala ekamba lia Yehova, kuenda oku kuata esumũlũho lioku u vumba. Citava okuti, tu liyakavo lovitangi, pole, tu kuete asumũlũho alua, ndeci ca pita la Daviti! Omo liaco, tu amamiko oku endela vefendelo liocili kuenda oku ‘sanjukila oku kala’ vonembele yespiritu ya Yehova.
w15/2/2008 kem. 3 ocin. 2-3
Tu Kapi Yehova Kovaso Etu
2 Vosi yetu tu pondola oku lilongisa ovina vialua kovolandu omanu va tukuiwa calua Vembimbiliya ndeci, Avirahama, Sara, Mose, Ruti, Daviti, Ester, upostolo Paulu, kuenda vakuavo. Pole, ovolandu omanu vana ka va kemalẽle calua a pondolavo oku tu kuatisa. Oku sokolola ovolandu Embimbiliya, ci tu kuatisa oku kuama ongangu yukualosamo wa popia hati: “Yehova otembo yosi o kasi vovisimĩlo viange. Omo okuti eye o kasi konele yange yondio, lalimue eteke ndi ka sengiwa.” (Osa. 16:8) Olondaka evi vi lomboloka nye?
3 Kosimbu, esualali lia enda oku kuata osipata leka liondio, kuenje eka liaco ka lia kuatele ociteyuilo congalau yi kasi peka liepĩli. Pole, ekamba li kasi konele yondio olio lia enda oku u teyuila. Nda tua amamako oku ivaluka Yehova loku linga ocipango caye, o tu teyuila. Omo liaco, tu konomuisi ndomo ovolandu Embimbiliya a pondola oku pamisa ekolelo lietu, oco ‘Yehova otembo yosi a kale vovisimĩlo vietu.’
Ovina vi Sangiwa Vembimbiliya
Perspicaz-2 kem. 349
Omõliso
Kelimi lio Helasi ondaka ʼi·shohnʹ (Esn 32:10; Olo 7:2), eci yi tukuiwa kumue londaka (iso) vupopi wocindekaise yi lomboloka “okamõla katito kukuenje kiso,” cimuamue haeco okuti kelivulu Liasiõsuilo 2:18 ku tukula ondaka (omõla ukãi) locisimĩlo coku tiamisila ondaka yaco “komõla ukãi wiso” olondaka viaco viosi vi tiamisiwila komõliso. Olondaka viaco vivali via kongeliwa oco vi lomboluiwe ciwa Kosamo 17:8, okuti vupopi wocindekaise vi lomboloka “okamõla katito kukuenje kiso, omõla ukãi wiso” (omõliso). Citava okuti ci tiamisiwila konepa yimue yitito yiso yi kuatisa omunu oku mola ovina vikuavo.
Iso ocimatamata cimue ca leñela; ndaño muẽle utele umosi wesinga ale wisokopia, onepa yikuavo iso yi ci limbuka lonjanga. Onepa ya ñuala komõliso, yi sukila oku teyuiwa loku tatiwa ciwa momo, nda onepa yaco ya kuatiwa luvei ale lombundu, omunu ka pondola vali oku vanja ciwa ale o linga muẽle omeke. Embimbiliya li situlula ciwa ondaka, “omõliso liove” poku lombolola catiamẽla kocina cimue ci sukila oku teyuiwa. Ocihandeleko ca Suku ci sukilavo oku tatiwa lonjila ndeyi. (Olo 7:2) Elivulu Lietundilo 32:10 li popia okuti Suku wa teyuila va Isareli “ndomõliso liaye.” Daviti wa likutilila oku pinga eteyuilo kuenda oku tatiwa la Suku “ndomõliso.” (Os 17:8) Eye wa yonguile okuti, Yehova u teyuila lonjanga poku liyaka lovanyãli. (Tala Sak 2:8, ku tukula ondaka yo Helasi yokuti ba·váth ʽá·yin, onepa yiso.”)—Tala Osapi ISO.
11-17 YELOMBO
OVOKUASI A SANGIWA VONDAKA YA SUKU | OLOSAMO 18
“Yehova eye . . . Una o Ndi Yovola”
w1/5/2009 kem. 14 ocin. 4-5
Esanju Lioku Sanjukila Yehova Olio Ongusu Yetu
Embimbiliya li sokisa Yehova lovina ka vi vangula. Eye o sokisiwa “Ndohanda yo Isareli”, “ndesenje” kuenda “ndociteyuilo”. (2 Samuele 23:3; Osamo 18:2; Esinumuĩlo 32:4) Elitokeko lipi li kasi pokati kolondaka viaco? Ndeci esenje limue lia koka halio lia suapo, Yehova Suku o pondola oku kala Ono yimue ya kolapo kokuove.
5 Elivulu Liosamo, lieyuka upopi walua wovindekaise vi lombolola oku litepa kuovituwa via Yehova. Ndeci Osamo 84:11 yi lekisa okuti Yehova eye “ekumbi haeye ociyepelo” momo eye Ono yocinyi, yomuenyo, yongusu kuenda yeteyuilo. Handi vali, Osamo 121:5 yi popia ndoco: “Yehova ulembo wociteyuilo konele yove yondio.” Ndeci ocitumãlo cimue ci kuete ulembo ci teyuila kutanya walua, Yehova o pondola oku teyuila afendeli vaye kowuya wovitangi, poku eca kokuavo ulembo ale poku va teyuila vemẽhi “lieka” ale vemẽhi “liavava aye”.— Isaya 51:16; Olosamo 17:8; 36:7.
Perspicaz-2 kem. 1219 ocin. 5
Ondaka
Suku o yevelela ondaka yafendeli vaye. Vana va fendela Suku lespiritu kuenda ocili, va pondola oku u vilikiya lekolelo liokuti eye o yevelela ondaka yavo ndaño muẽle va ci linga kalimi a litepa. Handi vali, ndaño okuti ka va ci lingi londaka yocindekaise, oku pinga ku Suku okuti ci lingiwa vutima, Suku una wa kũlĩha ovitima viomanu, o “yeva” ale wa kapako calua apingilo aco. (Os 66:19; 86:6; 116:1; 1Sa 1:13; Neh 2:4) Suku o yeva oku liyula kua vana va pinga ekuatiso kokuaye omo liesumuo kuenda wa kũlĩha ovisimĩlo viomanu vana ka va pokola kokuaye kumue la vana va siata oku lambalala afendeli vaye.—Eft 21:17; Os 55:18, 19; 69:33; 94:9-11; Yer 23:25.
w22.04 kem. 3 ocin 1
Ndomo o Pandikisa Poku Liyaka Lasakalalo
2. Sokolola. Eci o vanja konyima kovina via lipita komuenyo wove, o pondola hẽ oku sokolola kovitangi wa tẽla oku yula omo liekuatiso lia Yehova? Eci tu sokolola konjila ndomo Yehova a kuatisa afendeli vaye kosimbu, tu pondola oku kuata ongusu kuenda ekolelo lietu kokuaye li livokiya. (Os 18:17-19) Ukulu umue wekongelo o tukuiwa Joshua, wa popia hati: “Nda soneha ulala umue wolohutililo via tambuluiwa. Owo u ndi kuatisa oku ivaluka otembo nda pinga cimue ku Yehova kuenje eye wa nyĩha eci nda sukilile.” Ocili, eci tu sokolola ovina Yehova a siata oku tu lingila, tu kuata ongusu yoku pandikisa kasakalalo.
Ovina vi Sangiwa Vembimbiliya
Perspicaz-2 kem. 768 ocin. 3
Keruvi
Va keruvi vaco va kala ocindekaise cetukuluko lia Yehova: “Ndi ka limolẽhisa kokuove loku vangula love oku upisa kilu lionuviko yaco. Pokati ka va keruvi vavali va kasi kilu liocikasia Cuvangi.” (Etu 25:22; Ate 7:89) Eli olio esunga lieci ku popiwila okuti Yehova wa kala oku “tumãla kilu lia va keruvi”. (1Sa 4:4; 2Sa 6:2; 2Ol 19:15; 1As 13:6; Os 80:1; 99:1; Isa 37:16) Vupopi wocindekaise, vakeruvi va kala “ocindekaise cekãlu” lia Yehova muna eye a kala oku endela (1As 28:18), kuenda avava a vakeruvi a kala oku eca eteyuilo loku kuatisa oku enda lonjanga vokuenda kungende waco. Ndeci Daviti a linga vocisungo cimue, wa tukula okuti Yehova weya lonjanga oco o kuatise poku popia hati, “eye wa lokila lonjanga yalua vavava ungelo umue”, toke muẽle “vavava espiritu limue.”—2Sa 22:11; Os 18:10.
18-24 YELOMBO
OVOKUASI A SANGIWA VONDAKA YA SUKU | OLOSAMO 19-21
“Ovailu a Sapula Ulamba wa Suku”
w1/1/2004 kem. 20 ocin. 1-2
Tu Sapuli Ulamba wa Yehova
DAVITI omõla wa Jese, eci a kala oku kula, wa kala ungombo kocitumãlo cimue ci lisungue lo Beteleme. Olonjanja vimue eci eye a enda oku kala likaliaye poku lava olomeme via isiaye, wa enda oku tala kilu olombungululu vialua kuteke! Eye wa komohẽle calua poku vanja olombungululu viaco kuenje lekuatiso liespiritu sandu lia Suku, wa tẽla oku sokiya ocisungo cimue ca fina ci sangiwa kelivulu Liosamo 19 poku imba hati: “Ovailu a sapula ulamba wa Suku; o-o a sapula upange wovaka aye. Pole, ocileñi cao ca pitĩla kilu lieve liosi kuenda esapulo liao lia pitĩla toke kasulilo o kilu lieve.”—Osamo 19:1, 4.
2 Ndaño okuti ondaka yalio ka yi yevala kuenda kakuli upopi, pole, ilu li komõhĩsa Yehova a lulika, li sapula ulamba waye utanya luteke. Ovina via lulikiwa lalimue eteke via liwekelepo oku eca esivayo ku Suku kuenje uvangi waco u vetiya omunu oku liketisa momo u letiwe lomanu vosi va tunga voluali. Pole, ovina viaco via lulikiwa ka vieci uvangi wosi. Omanu vakuekolelo, va lalekiwa oco va likongele koku eca uvangi waco. Umue ukualosamo okuti onduko yaye ka ya tukuiwile, wa sapuila afendeli vakuekolelo olondaka viokuti: “Tukuili Yehova ulamba lupami. Tukuili Yehova ulamba wa posokela onduko yaye.” (Osamo 96:7, 8) Omanu vosi va kuete ukamba wocili la Yehova va vetiyiwa oku tava kelaleko liaco. Oco hẽ, nye ca kongeliwa voku eca esivayo ku Suku?
w1/6/2004 kem. 24 ocin. 8-10
Ovina Via Lulikiwa vi Situlula Ulamba wa Suku!
8 Daviti wamisako loku lombolola ovina vi komohĩsa Yehova a lulika poku popia hati: ‘Kovailu eye wa tungila ekumbi ombalaka yimue; olio lia soka la sandombua okuti o nina eci a tunda vohondo yaye; olio li sanjuka ndomunu wa pama o lupukila vonjila yaye. olio li tunda kesulilo limue liovailu, kuenda li ñuala toke kesulilo likuavo; kuenje ka kuli ocitumãlo cimue okuti, owuya walio ka u pitĩlako.”—Osamo 19:4-6.
9 Ekumbi oku li sokisa lolombungululu vikuavo, olio lia pita ño pokati. Pole li komohĩsa calua. Momo olombungululu vikuavo vi ñuala ñuala kolonele viaco. Oluali lunene calua kuenda ka lu sokisiwa lekumbi. Ulandu umue u lekisa okuti, ekumbi li kuete olohuluwa violohuluwa violosongo vieca owuya. Olio li kasi vocinãla ci soka 150 kolohuluwa violokilometulu. Kuenje, eci cecelela okuti oluali lu ñuala ciwa kolonele viekumbi kuenda ka lu li tusulamo. Palo posi pa pitĩla lika onepa yimue yitito yolosongo viekumbi. Onepa yaco oyo yecelela okuti palo posi pa kala omuenyo.
10 Ukualosamo o sokisa ekumbi ‘lomunu’ o linga ungende umue unene, okuti kuteke o puyukila ‘vombalaka yaye.’ Komẽle ekumbi li tunda. Kekumbi eci liñila, li kala soketi lia ka puyukapo ‘vombalaka yalio.’ Komẽle eci ekumbi li tunda, li kala ‘nda sandombua o tunda vohondo yaye.’ Omo okuti Daviti wa kala ungombo, wa kũlĩhĩle ciwa ombambi yuteke. (Efetikilo 31:40) Eye wa ivalukile ndomo a enda oku yeva owuya u tunda kolosongo viekumbi. Ekumbi li tunda oloneke viosi, pole ka li kavi. Kuenje li sokisiwa lomunu ‘ukuotõi’ o linga ungende unene.
g95 8/11 kem. 7 ocin. 3
Omesele Yimue ka ya Kapiwileko Koloneke Vietu
Oku vokiya kũlĩhĩso wetu watiamẽla kovina ndomo via lulikiwa, ci tu kuatisa oku kũlĩha ciwa Ululiki wetu una wa panga oviluvo via tu ñuala. Eteke limue Yesu wa sapuila kolondonge viaye oco vi luluvalele kolonelẽho via kala oku kula ko Galiléia. Eye hati: “Lilongisili kolonelẽho viovusenge ndomo ovio vi kula; ka vi talavaya, ndaño oku pota; pole, ndu sapuili siti, ndaño Salomone vulamba waye wosi, ka la liposuisa ndovio.” (Mateo 6:28, 29) Eposo lionelẽho yimue yovusenge yi kasi ndu okuti ka yikuete esilivilo, yi tu ivaluisa okuti Suku ka lekisa ocame kovina omanu va sukila.
Ovina vi Sangiwa Vembimbiliya
Pespicaz-1 kem. 1128 ocin. 7
Heveru, II
Kuli uvangi (ale olondaka via lomboluiwa ciwa), vi lekisa okuti onepa yavali ka yi pisa lika ocisimĩlo cimuamue liocisimĩlo catete kuenda ka yi lekisa etepiso liaco. Handi vali, yi vokiyako ocisimĩlo cokaliye. Osamo 19:7-9 yi lekisa ciwa ulandu waco:
Ocihandeleko ca Yehova ca li pua,
ci tumbulula ongusu.
Onumbi ya Yehova ya koleliwa,
yi kokela omunu wa kamba olondunge oku kuata olondunge.
Olonumbi via Yehova via sunguluka,
vi kokela utima oku sanjuka;
Ovihandeleko via Yehova via li pua,
vi eca olondunge komunu.
Oku sumbila Yehova kuwa,
ku kala otembo ka yi pui.
Asombiso a Yehova ocili;
osi esunga.
Limbuka okuti onepa yavali yondaka londaka, yi suisapo ocisimĩlo; omo liaco, onepa yosi yolondaka ya suapo momo ya kongeliwa kolondaka vikuavo. Handi vali, olondaka vi kuãimo okuti vimbumbulu ndeci “ci tumbulula ongusu” kuenda “yi kokela omunu wa kamba olondunge oku kuata olondunge,” vi kuatisa ukuakutanga oku kũlĩha okuti, “ocihandeleko ca lipua” kuenda olondaka viokuti “olonumbi via Yehova via sunguluka.” Oku tepiwa kuolondaka viaco okuti onepa yatete kuenda yavali, yi kuete esilivilo lioku talamapo kamue osimbu omunu a tanga. Oku kongela ocisimĩlo caco, ceca elomboloko lia suapo liulandu u kasi oku popiwa. Eli olio esunga lieci olonjanja vimue vi tukuiwila okuti, olondaka via vokiyiwako oco viece elomboloko kolondaka vi kuãimo.
25-31 YELOMBO
OVOKUASI A SANGIWA VONDAKA YA SUKU | OLOSAMO 22
Ovitumasuku Via Tukuiwa Viatiamẽla Kolofa Via Yesu
w15/8/2011 kem. 15 ocin. 16
Ovo va Sanga Mesiya!
16 Mesiya weya oku kala ndomunu wa yandulukiwa la Suku. (Tanga Osamo 22:1.) Ndomo ca lekisiwa vocitumasuku caco, “kowola yecea, [okuti owola yekũi latãlo kekumbi,] Yesu wa kaluka lolukandi hati: “Eli, Eli, lama sabakatani?” ci lomboloka okuti, “A Suku yange, a Suku yange, momo lie wa njandulukila?” (Mar. 15:34) Ekolelo lia Yesu ku Isiaye, lalimue eteke lia tepulukile. Omo Suku ka teyuilile Yesu kovanyãli Vaye, ca ecelela okuti epokolo lia Kristu, li pita voseteko. Eci Yesu a kaluka lolukandi, wa tẽlisa olondaka vi sangiwa Kosamo 22:1.
w15/8/2011 kem. 15 ocin. 13
Ovo va Sanga Mesiya!
13 Daviti wa popele hati, Mesiya o yoliwa epembe. (Tanga Osamo 22:7, 8.) Mateo poku lekisa, ndomo Yesu a talisiwa ohali kuti leci omanu vo yola epembe, wa popia ndoco: “Kuenje vana va kala oku pita onjila, va fetika oku u sepula, loku puka puka ovitue viavo, vati: “Okuakunyõla onembele loku yi tunga voloneke vitatu, lipopela ove muẽle! Nda vumõla a Suku, loka kuti wekangiso!” Cimuamue haico, ovitunda via velapo, la vakuavisonehua kuenda akulu, va fetika oku u yola epembe loku popia vati: “Wa popela vakuavo; eye muẽle ka tẽla oku lipopela! Eye Soma yo Isareli; a loke kuti wekangiso kuenje tu ka tava kokuaye. Eye wa kolelele Suku; kaliye Suku o popele nda Eye o yongola oku u kuatisa, momo wa popia hati, ‘Ndi Mõla a Suku.’” (Mat. 27:39-43) Ndaño lohali yaco, Yesu wa pandikisa kuenda ka popele ondaka yimue yĩvi. Yesu wa tu sila ongangu yimue yiwa!
w15/8/2011 kem. 15 ocin. 14
Ovo va Sanga Mesiya!
14 Veya oku litepela uwalo wa Mesiya. Ukualosamo wa soneha ndoco: “Ovo va litepela pokati ovowalo ange, Kuenda va imbila ocela uwalo wange.” (Osa. 22:18) Ocitumasuku caco, ca tẽlisiwa ‘eci asualali vo ko Roma va valela Yesu kuti, kuenje va litepela uwalo waye poku limbila ocela.’—Mat. 27:35; tanga Yoano 19:23, 24.
Ovina vi Sangiwa Vembimbiliya
w1/11/2006 kem. 29 ocin. 7
Tu Lekisi Esumbilo Kolohongele Vietu vi Kola
7 Kuli olonjila vialua vioku lekisa esumbilo kolohongele vietu. Onjila yimue yoku lekisa esumbilo liaco, oku pitĩla selo okuti tu imbila kumosi ocisungo coku fetika ohongele. Vimue pokati kovisungo viaco, vi lekisa olohutililo viomanu va Suku. Kuenje tu sukila oku vimba lesumbilo. Upostolo Paulu poku tukula Osamo 22, wa lombolola eci ca tiamẽla ku Yesu. Eye wa popia hati: “[Ndi ka sapula onduko yove ku vamanjange; ndi ka ku sivayela pokati kekongelo lovisungo.” (Va Heveru 2:12) Omo liaco, tu sukila oku kuata ocituwa coku tumãla pomangu yetu osimbu handi manji endisa ohongele ka tukuile ocisungo coku fetika. Poku imba ocisungo, tu sukila oku lekisa ocituwa ndeci cukualosamo wa popia hati: “Ndi ka sivaya Yehova lutima wange vocimunga cava va suñama kuenda vekongelo.” (Osamo 111:1) Eli olio esunga lieci tu sukilila oku pitĩlila selo kolohongele. Nda tua ci linga, tu sivaya Yehova lovisungo kuenda tu yevelela ovipama viosi toke kesulilo liohongele.
w1/9/2003 kem. 20 ocin. 1
Sivaya Yehova “Vekongelo”
Koloneke vilo ndeci ca pita kosimbu, kua siata oku lingiwa alingiliyo amue okuti vana va tava kocili va situlula ekolelo liavo “vekongelo.” Ovo va kuete epuluvi lia eciwa kuvosi okuti lioku eca atambululo kapulilo a lingiwa kolohongele viekongelo. Lalimue eteke ku ka nyehule esilivilo lialio. Ndeci, atambululo ana a lekisa ndomo o yuvula ovitangi a situlula ciwa onjila vamanji va siata oku kuama poku kapako olonumbi Viembimbiliya. Atambululo a lombolola ovinimbu Viembimbiliya, okuti ka via tukuiwile, ale vina mua kongela ovisimĩlo via konomuiso omunu a linga, vi pondola oku kuatisa vakuene oku kuata ocituwa coku mioñolola ocituwa cavo coku lilongisa.
1-7 YA KUPUPU
OVOKUASI A SANGIWA VONDAKA YA SUKU | OLOSAMO 23-25
“Yehova Eye Ungombo Wange”
w1/5/2011 kem. 31 ocin. 3
“Yehova Eye Ungombo Wange”
Yehova o songuila olomeme viaye. Olomeme nda ka vi kuete ungombo vi pondola oku nyelela. Cimuamue haco okuti, tu sukila ekuatiso oco tu sange onjila ya sunguluka tu kuama komuenyo. (Yeremiya 10:23) Ndomo Daviti a ci lombolola, Yehova o songuila afendeli vaye “vovisenge vi talala” kuenda “kovitumãlo viepuyuko via tapeliwa ciwa.” Eye o va songuila “volonjila viesunga.” (Ovinimbu 2, 3) Olondaka evi vi tu kuatisa oku kolela okuti, tu pondola muẽle oku kolela ku Suku. Poku kuama olonumbi vieciwa lespiritu kuenda vina vi sangiwa Vembimbiliya, ci tu kuatisa oku kuata omuenyo wesanju, oku kavuluka kuenda oku kolapo.
w1/5/2011 kem. 31 ocin. 4
“Yehova Eye Ungombo Wange”
Yehova o teyuila olomeme viaye. Nda okuti ungombo ka kala ocipepi lolomeme, ovio vi kuata usumba kuenda ka vi kũlĩha eci vi linga. Yehova o sapuila afendeli vaye okuti ka va sukila oku kuata usumba, ndaño va endela “vocimbota cowelema walua” ale poku liyaka lovitangi vialua komuenyo wavo. (Ocinimbu 4) Yehova o va tata, o kuente onjongole yoku va kuatisa. Eye o pondola oku eca kokuavo olondunge kuenda ongusu va sukila oco va tẽle oku liyaka lovitangi.—Va Filipoi 4:13; Tiago 1: 2-5.
w1/5/2011 kem. 31 ocin. 5
“Yehova Eye Ungombo Wange”
Yehova o tekula olomeme viaye. Olomeme vi kevelela kungombo wavio oco vi tekuiwe. Etu tu kuete esukila konepa yespiritu okuti li tẽlisiwa lika lekuatiso lia Yehova. (Mateo 5:3) Tu kuete esanju lialua omo okuti Yehova ukuakulinga Eliangiliyo liaco locisola. Eye o pongiyila afendeli vaye omesa yimue yeyuka okulia kualua kuwa. (Ocinimbu 5) Embimbiliya kuenda alivulu a kuavo tua siata oku tanga, ndeci muẽle orevista eyi, ono yimue yokulia kuespiritu yi tẽlisa esukila lietu lioku kũlĩha ocimãho comuenyo kuenda ocipango ca Suku catiamẽla kokuetu.
Ovina vi Sangiwa Vembimbiliya
w15/2/2011 kem. 24 ocin. 1-3
Sola Esunga Lutima Wove Wosi
YEHOVA o songuila omanu vaye “volonjila viesunga” Londaka yaye kuenda espiritu sandu. (Osa. 23:3) Omo okuti ka tua lipuile, ca leluka oku yapuka vonjila yesunga. Oco tu linge vali eci ca sunguluka, tu sukila oku likolisilako calua. Nye ci tu kuatisa oku ci linga? Tu sukila oku sola eci ciwa ndeci Yesu a linga.—Tanga Osamo 45:7.
2 Nye ci lomboloka “olonjila viesunga”? Ondaka onjila, yi lomboloka elila ale ociposa. “Olonjila” viesunga via tukuiwa ndeti, vi lomboloka olonumbi via Yehova. Kelimi lio Heveru kuenda lio Helasi, ondaka “esunga” yi tiamisiwila kocina cimue ca “suñama,” ci lomboloka oku kakatela kolonumbi viovituwa viwa. Omo okuti ‘Yehova [eye] ocitumãlo ca vakuesunga,’ afendeli vaye va kevelela okuti eye o va lekisa olonumbi viesunga vina va sukila oku kuama.—Yer. 50:7.
3 Tu pondola lika oku sanjuisa Suku nda tu likolisilako lutima wosi oku kapako olonumbi viaye viesunga. (Esin. 32:4) Tu pondolavo oku ci linga poku lilongisa ovina viatiamẽla ku Yehova Suku vi tunda Vondaka yaye Embimbiliya. Osimbu tu lilongisa ovina vialua viatiamẽla kokuaye loku pamisa ukamba wetu laye, tu ka sola esunga liaye. (Tia. 4:8) Poku nõla onjila tu yongola oku kuama, tu sukilavo oku songuiwa Londaka ya Suku.
8-14 YA KUPUPU
OVOKUASI A SANGIWA VONDAKA YA SUKU | OLOSAMO 26-28
Ndomo Daviti Amamako Oku Kolela Yehova
w1/12/2004 kem. 23 ocin. 8-9
Endela Vonjila Yesunguluko
8 Daviti wa likutilila hati: “Ñulĩhĩse A Yehova kuenda ndi seteke; Kanguisa ovisimĩlo viange via longa kuenda utima wange.” (Osamo 26:2) Ocili okuti, Daviti wa pingile ku Yehova oco a kũlĩhĩse utima waye. Eye wa yonguile okuti Yehova o kũlĩhĩsa ovisimĩlo viaye kuenda oku vi suñamisa vonjila ya sunguluka.
9 Ndamupi Yehova a kũlĩhĩsile ovisimĩlo viutima wa Daviti? Daviti wa popia hati: “Ndi ka sivaya Yehova una wa siata oku ndi lungula. Ndaño muẽle vokuenda kuteke, ovisimĩlo viange vio vutima vi ndi lemẽla.” (Osamo 16:7) Olondaka evi vi lomboloka nye? Olondaka evi vi lomboloka okuti, elungulo lia Yehova lia vetele ciwa kutima wa Daviti. Kuenje wa pengulula ovisimĩlo viaye. Omo liaco, tu sukilavo oku sanjukila elungulo li tunda Vondaka ya Suku. Kuenda oku pokola kalungulo tu tambula kakulu vekongelo kuenda kocisoko caye. Tu sukilavo oku likutilila ku Yehova oco a kũlĩhĩse ovitima vietu. Momo poku ci linga, ci ka tu kuatisa oku endela vonjila yesunguluko.
w1/12/2004 kem. 24 ocin. 12-13
Endela Vonjila Yesunguluko
12 Soma Daviti wa lombolola vali eci co kuatisa oku pamisa esunguluko liaye. Eye wa popia hati: “Ame si likongela lomanu vakuelimbi, kuenda ndi yuvula vana va limbika eci va tuwa. Ndi suvuka ukamba wolondingaĩvi, kuenda ndi yuvula oku likongela la vakuakandu.” (Osamo 26:4, 5) Daviti wa enda loku yuvula oku tumãla la vakuakandu kuenda oku yuvula akamba vãvi.
13 Nye ci popiwa kokuetu? Anga hẽ tua siata oku yuvula oku yapuisiwa lovipama ka via sungulukile vi lekisiwa vo televisão, valitalatu omanu va kasi epolõla, kuenda vo Internet? Tua siata hẽ oku yuvula akamba vana va limbika eci va tuwa? Kupange wetu woku sanda eteku citava okuti, omanu vamue va limõlehisa ndakamba vocili oco va tu yapuise. Anga hẽ ca sunguluka oku kuata ukamba la vana ka va kasi oku endela vonjila ya Suku? Omanu vana va siapo etavo liocili, va pondolavo oku limõlehisa nda vakuacili oco va tu yapule koku vumba Yehova. Nye ci lingiwa nda vekongelo muli vamue vambata omuenyo umue ka wa sungulukile? Omanu vaco va siatavo oku limbika ekalo liavo. Jayson okuti cilo oñuatisi yekongelo, wa kuatelevo akamba vamue vãvi. Eye wa popia hati: “Umue pokati kavo wa ndi sapuila hati: ‘Ndaño tua linga cimue cĩvi, ka ci lingi cimue. Momo eci oluali luokaliye lu keya, otembo yaco tua fa ale. Kuenda ka tu ka kũlĩha vali ovina tua lingile.’ Ombangulo yaco ya ndi vetiya oku lunguka. Momo eci oluali luokaliye lu keya, siyongola oku fa.” Manji Jayson, wa liwekapo oku kuata ukamba laye. Upostolo Paulu wa lungula hati: “Ko ka kembiwi. Akamba vãvi va nyõla ovituwa viwa.” (1 Va Korindo 15:33) Omo liaco, tu sukila oku yuvula akamba vãvi!
w1/12/2004 kem. 26 ocin. 17-18
Endela Vonjila Yesunguluko
17 Otavernakulu lutala wovilumba, ovio via kala ono yefendelo lia Yehova ko Isareli. Soma Daviti poku lekisa esanju liaye lioku kala pocitumãlo caco, wa popia hati: “A Yehova, ndi sole onjo muna o kasi, ocitumãlo muna ulamba wove u kasi.”—Osamo 26:8.
18 Anga hẽ tua siata oku sanjukila olohongele vietu eci tu lilongisa ovina viatiamẽla ku Yehova? Onjango Yusoma lolonumbi viaco viespiritu, ovio via linga ono yefendelo lia Yehova pocitumãlo lopocitumãlo. Handi vali, unyamo lunyamo, tua siata oku kuata olohongele viofeka kuenda olohongele vimbo. Kolohongele viaco, tua siata oku tambula ‘olonumbi’ via Yehova. Nda tua ‘sola calua’ ovihandeleko viaye, tu ka kuata onjongole yoku endaenda kolohongele viaco. (Osamo 119:167) Ocili okuti, oku kala la vamanji vana va kuete onjongole yoku tu kuatisa, ci lembeleka utima wetu. Momo vamanji va pondolavo oku tu kuatisa oku endela vonjila yesunguluko!—Va Heveru 10:24, 25.
Ovina vi Sangiwa Vembimbiliya
w1/8/2006 kem. 21 ocin. 15
Yehova o Popela Vakuahali
15 Soma Daviti wa popia hati: “Ndaño isiange ale ina yange va ndi yanduluka, Yehova o ka ndi tambula.” (Osamo 27:10) Tu sanga elembeleko lialua poku kũlĩha okuti, ocisola ca Yehova ka ci sokisiwa leci colonjali. Citava okuti, olonjali viove vi ku tata lãvi, kuenda vi ku yanduluka. Pole, ovituwa viavo ka vi pongolola ovisimĩlo via Yehova vioku ku tata locisola. (Va Roma 8:38, 39) Ivaluka okuti, Yehova o kokela kokuaye omanu a sole. (Yoano 3:16; 6:44) Omo liaco, ndaño wa siata oku tatiwa lãvi lomanu, Yehova oku kuetele ocisola calua!
15-21 YA KUPUPU
OVOKUASI A SANGIWA VONDAKA YA SUKU | OLOSAMO 29-31
Epindiso—Li Situlula Ocisola ca Suku
Perspicaz-1 kem. 929 ocin. 12
Ocipala
Ondaka yokuti oku ‘vundisa ocipala’ yi kuete alomboloko alua ca tamba lika kekalo lekalo. Yehova Suku oku vundisa ocipala caye, olonjanja vialua ci lomboloka oku upa ohenda yaye ale unene waye. Ovina viaco vi lipita omo liomunu umue ale ocimunga comanu vana okuti va lekisa esino, ndeci ca pita la va Isareli. (Yov 34:29; Os 30:5-8; Isa 54:8; 59:2) Olonjanja vimue ci limbukiwa okuti Yehova ka lisitulula pocakati cocina cimue ale cetambululo limue omo lioku kevelela otembo yaye a sokiya. (Os 13:1-3) Daviti wa likutilila ndoco: “Ecela akandu ange,” eye wa pinga ku Suku ongecelo ale oku malako akandu aye.— Os 51:9; ci sokisa Los 10:11.
w1/3/2007 kem. 19 ocin. 1
Va Sanjuka Omo Lioku Talamẽla ku Yehova
Ekuatiso liepindiso lia Yehova, li sokisiwa lepako limue li kula toke eci lipia. Catiamẽla kepindiso lia Yehova Embimbiliya li popia ndoco: “Puãi vana va pindisiwa lalio, noke li va nenela ombembua yi tunda kesunga.” (Va Heveru 12:11) Ndeci apako a sukila otembo oco a pie, tu sukilavo otembo oco tu pongolole ovituwa vietu viatiamẽla kepindiso Yehova a eca kokuetu. Ndeci, nda omo liocituwa cimue ka ca sungulukile ovikele vimue vi tu upiwa vekongelo, onjila ndomo tu kevelela ku Suku yi ka tu tateka oku lekisa eumuo kuenda oku yuvula oku liwekapo. Nda tu sangiwa vekalo liaco, olondaka Daviti a soneha vi pondola oku tu kuatisa calua eye hati: “Momo onyeño yaye komunu yi kala ño otembo yitito, pole, uwa waye ku una eye a lekisa ohenda u kala vokuenda kuomuenyo wosi. Koñolosi pamue ku iya oku lila, pole, komẽle ku kala oku liyula kuesanju.” (Osamo 30:5) Nda tua lekisa ocituwa coku talamela loku kapako alungulo tu tambula Vondaka ya Suku kuenda viocisoko caye, otembo yetu yoku “liyula kuesanju” yi ka pitĩla.
Nye ci Lomboloka oku Likekembela Lutima wosi?
18 Oku lekisa okuti omunu una wa tundisiwa vekongelo wa likekembela muẽle lutima wosi, eye o sukila oku enda kolohongele olonjanja viosi kuenda poku kuama olonumbi via eciwa lakulu vekongelo vioku kuata esokiyo lioku likutilila loku lilongisa Embimbiliya eteke leteke. Eye o sukilavo oku yuvula ovina vina vi pondola oku u kokela oku linga vali ekandu. Nda eye wa likolisilako oku tumbulula ukamba waye la Yehova, eye o pondola oku kolela okuti Yehova o ko wecela lutima wosi kuenda akulu vekongelo va ko kuatisa oco a likongele vali la vamanji vekongelo. Eci akulu vekongelo va fetika oku limbuka okuti una wa tundisiwa vekongelo wa likekembela lutima wosi, ovo va kũlĩha okuti ocitangi locitangi ca litepa kuenje va yuvula oku sombisa lekambo liesunga.
Ovina vi Sangiwa Vembimbiliya
w1/6/2006 kem. 31 ocin. 9
Atosi Avelapo Vonepa Yatete Yelivulu Liolosamo
31:23—Vakuakulitunula onima yipi va sesamẽla? Va sesamẽla eyambulo. Pole, omo okuti vakuesunga ka va lingi akandu ocipango, va tambula onima yoku pindisiwa la Yehova. Vakuakulitunula omo okuti ka va yongola oku likekembela, va sesamẽla eyambulo linene.—Olosapo 11:31; 1 Petulu 4:18.
22-28 YA KUPUPU
OVOKUASI A SANGIWA VONDAKA YA SUKU | OLOSAMO 32-33
Momo Lie ci Kuetele Esilivilo Oku Likekembela Ekandu Limue?
w15/3/1993 kem. 9 ocin. 7
Ohenda ya Yehova yi tu Yovola Kesumuo
7 Nda okuti tu kuete eko omo liakandu lioku lueyela ocihandeleko ca Suku, pamue tu sima okuti ca tĩla calua oku likekembela akandu etu ku Yehova. Nye ci pondola oku pita nda tu sangiwa vekalo liaco? Kelivulu Liosamo 32, Daviti wa popia hati: “Osimbu sia litavelele ekandu liange, akepa ange a hongua omo nda sakalalele vokuenda kueteke liosi. Momo utanya luteke eka liove lia ndi lema. Ongusu yange ya takata ndovava powuya wondombo.” (Ovinimbu 3, 4) Daviti omo lioku seteka oku limbika ekandu liaye co kekela oku hongua. Esumuo liaco, lio honguisa calua kuenda wa kala nduti umue wa kukuta okuti ka u tambula ovava. Ocili okuti, eye wa tala ohali ketimba kuenda kovisimĩlo omo liekandu liaye. Eye ka kuatele esanju. Nda umue pokati ketu o kasi oku liyaka locitangi caco, nye a sukila oku linga?
Suku Umue “Ukuakuecela”
8 Soma Daviti poku likekembela wa popia hati: “Nda litavela ekandu liange kokuove; Sia limbikile okulueya kuange. . . . Kuenje wa njupa evĩho liekandu liange.” (Osamo 32:5) Ondaka yokuti, “wa njupa,” yopiwa kelimi lio Heveru yi lomboloka “oku katuiwa” ale “oku ambata.” Ondaka yaco palo yi kuete elomboloko lioku upiwa “eko ale ekandu.” Omo liaco, Yehova wa ambata akandu a Daviti, kuenda wa a imũla. Ka kuli atatahãi okuti, eci ca kuatisa ketulumuho liutima wa sumũile wa Soma Daviti omo liekandu a lingile. (Osamo 32:3) Letuvo tu pondola oku kuatela ekolelo ku Suku, omo okuti eye imũlako akandu omanu vana va vanjiliya ongecelo yaye omo liekolelo va kuetele kocilumba cocisembi ca Kristu.—Mateo 20:28.
w1/6/2001 kem. 30 ocin. 1
Oku Likekembela ku Kayisa
Daviti noke yoku likekembela ekandu liaye, ka kuatele ovisimĩlo viokuti ka kuete esilivilo. Olondaka a soneha vi sangiwa Kosamo vi situlula catiamẽla kelikekembelo liaye, vi lekisa ekavuluko a kuata kuenda onjila a nõlapo yoku vumba Suku lutima wosi. Ndeci, kũlĩhisa Osamo 32. Kocinimbu 1 tu tangako ndoco: “Wa sumũlũha una okuti Suku ecela okulueya kuaye, haeye ekandu liaye li tuvikiwa.” Nda okuti omunu umue wa linga ekandu linene, o pondola oku kuata esanju nda wa likekembela lutima wosi. Eye o lekisa okuti wa likekembela lutima wosi kovituwa, ndeci Daviti a linga. (2 Samuele 12:13) Eye ka lisandelele esunga kovaso a Yehova ale oku kapa eko vakuavo. Ocinimbu 5 ci popia ndoco: “Oku sulako, nda litavela ekandu liange kokuove; Sia limbikile okulueya kuange. Nda popia siti: “Ndi ka litavela ku Yehova akulueya ange.” Kuenje ove wa ecela okulueya kuange kuenda akandu ange.” Oku likekembela lutima wosi, ku nena ekavuluko kuenda omunu ka sukila vali oku livetela evelo ale oku kuata usumba omo liakandu a linga kosimbu.
Ovina vi Sangiwa Vembimbiliya
w1/6/2006 kem. 31 ocin. 10
Atosi Avelapo Vonepa Yatete Yelivulu Liolosamo
33:6; etosi—‘Ofela’ yi tunda vomẽla wa Yehova yi lomboloka nye? Yi lomboloka ongusu yaye ya pama a lulika layo ovina viosi vi kasi kilu. (Efetikilo 1:1, 2) Ofela yaco, yi lombolokavo ongusu yi tunda vomẽla waye momo o yi tuma palo posi oco yi tẽlise ovina viosi a yongola oku linga.
29 YA KUPUPU–5 YA KUPEMBA
OVOKUASI A SANGIWA VONDAKA YA SUKU | OLOSAMO 34-35
“Sivayi Yehova Otembo Yosi”
w1/3/2007 kem. 25 ocin. 11
Tu Sivayeli Kumuamue Onduko ya Yehova
11 Daviti wa popia hati: “Ndi ka sivaya Yehova otembo yosi; si ka liwekapo oku u sivaya.” (Osamo 34:1) Omo okuti Daviti omuenyo waye wa kala woku tumboka, wa kuatele esakalalo lioku sanda eteku. Pole, ka ecelele okuti esakalalo liaco li tateka onjongole yaye yoku sivaya Yehova. Eyi oyo ongangu tu sukila oku kuama eci tu liyaka lovitangi. Ci kaile okuti, tu kasi kosikola, ale kupange woku sanda eteku, poku kala la vamanji kuenda kupange woku kunda, tu sukila oku kuata ombili yoku sivaya Yehova. Tu kuete esunga lialua lioku ci linga. Koku lilongisa ovilinga vi komõhisa via Yehova kuenda oviluvo viaye, ka kuli esulilo. Kũlĩhĩsa ovina a siata oku linga lekuatiso liocisoko caye palo posi! Yehova wa siata oku tẽlisa ocipango caye lekuatiso liomanu vaye ndaño okuti, ka va lipuile. Ovilinga via Yehova ka vi sokisiwa levi viomanu vana va siata oku sivayiwa voluali lulo. Omo liaco, ove o tava kolondaka via Daviti wa popia hati: “Pokati kolosuku ka pali laumue wa lisoka love, a Yehova, ka kuli ovopange a lisoka la-a ove.”—Osamo 86:8.
w1/3/2007 kem. 26 ocin. 13
Tu Sivayeli Kumuamue Onduko ya Yehova
13 Soma Daviti wamisako hati: “Ndi ka kemainya Yehova; Ambombe va ka yeva kuenje va ka sanjuka.” (Osamo 34:2) Daviti ka kaile oku lipandela ovilinga viaye. Ndaño okuti otembo yimue wa kembele soma ya va Gati, eye ka lipandele omo liuloño waye. Momo wa kũlĩhĩle okuti, Yehova eye wo teyuila eci a kala vofeka yaco, kuenje wa puluka omo lioku kuatisiwa laye. (Olosapo 21:1) Daviti wa lipanda omo lioku kuatisiwa la Yehova. Eye omo lioku sivaya Yehova, ambombe va vetiyiwavo oku ci linga. Yesu wa sivayavo onduko ya Yehova olonjanja viosi, kuenje omanu vana va kuete onjongole yoku longisiwa, va kokiwila Kokuaye. Koloneke vilo, omanu vo kolofeka viosi, va kasi oku kokiwa kocisoko Cakristão olombuavekua vina okuti, Yesu eye utue wavo. (Va Kolosai 1:18) Ovitima viomanu vaco via siata oku vetiyiwa calua eci va yeva ndomo olombuavekua vi kasi oku sivaya onduko ya Suku. Omo lioku kuatisiwa lespiritu sandu lia Suku va kuete elomboloko Liondaka Yaye.—Yoano 6:44; Ovilinga 16:14.
w1/3/2007 kem. 26 ocin. 15
Tu Sivayeli Kumuamue Onduko ya Yehova
15 Daviti wamisako hati: “Nda likutilila ku Yehova kuenje eye wa nambulula. Eye wa ndi yovola kusumba wange wosi.” (Osamo 34:4) Olondaka evi via kuata esilivilo kokuaye, momo wamisako loku popia hati: “Ohukũi eyi ya vilikiya kuenje Yehova wa yevelela. Eye wo popela kohali yaye yosi.” (Osamo 34:6) Eci tu kala kumosi la vamanji, tu kuata epuluvi lioku li sapuilako ovolandu a lekisa ndomo Yehova a siata oku tu kuatisa oku pandikisa kovitangi. Ovolandu aco a pamisa ekolelo lia vamanji, ndeci ulandu wa Daviti wa pamisa ekolelo liakuenje vaye. Akuenje va Daviti, ‘va imbile lika ovaso ku Yehova kuenje, va sanjukile calua. Lalimue eteke ovipala viavo, via nyumãlele.’ (Osamo 34:5) Ovo ndaño okuti, va kala oku tila Saulu, ka va kuatele usumba. Momo va kuetele ekolelo liokuti Yehova o kasi la Daviti, kuenje ovipala viavo via sanjukile calua. Cimuamue haico ca siata oku pita koloneke vilo. Omanu vana va fetika ndopo oku lilongisa Embimbiliya kuenda vana va kasi ale osimbu vocisoko ca Yehova, va siata oku limbuka ndomo va kasi oku kuatisiwa Laye. Poku limbuka ekuatiso liaco, ovipala viavo via sanjuka. Momo va nõlapo oku sivaya Yehova.
Ovina vi Sangiwa Vembimbiliya
w1/6/2006 kem. 31 ocin. 2
Atosi Avelapo Vonepa Yatete Yelivulu Liolosamo
35:19—Daviti wa popia hati, kuka ecelele okuti ovanyãli vange va tieña kiso. Olondaka evi vi lomboloka nye? Ovanyãli poku tieña kiso, ci lomboloka okuti va sanjukilile oku talisa ohali Daviti. Kuenje, wa pinga ku Yehova oco ka va ka tẽlise onjongole yavo.