Ono Yovipama Viohongele Ekalo Lietu Tuakristão Kuenda Oku Kunda
© 2024 Watch Tower Bible and Tract Society of Pennsylvania
6-12 YA KUPUMBA
OVOKUASI A SANGIWA VONDAKA YA SUKU | OLOSAMO 36-37
“Ko ka Sumue Omo Liomanu Vakuevĩho”
Nye ci ka Pita Eci Usoma wa Suku u Keya?
4 Olondingaĩvi via siata oku tu kokela ndati ovitangi koloneke vilo? Upostolo Paulu wa popia hati, koloneke via sulako “ekalo li ka tĩla calua.” Noke wa amisako hati: “Omanu vãvi kuenda olohembi va kamamako oku linga eci cĩvi.” (2 Timoteo 3:1-5, 13) Wa siata hẽ oku mõla ovina viaco? Ocili okuti, valua pokati ketu tua siata oku liyaka lohele yomanu vana okuti olondingaĩvi ndeci: Oku saluisiwa lolomondi, olonepele viakova kuenda omanu vana okuti olongangala. Vamue pokati kavo, ka va siatele oku linga ovina viaco vĩvi vuyombeki. Vakuavo va likembisa ndu okuti va yongola oku kuatisa omanu vakuavo pole, ovo olondingaĩvi. Ndaño okuti lalimue eteke va tu lingile cimue cĩvi pole, tua ñualiwa lomanu vaco olondingaĩvi. Tua siatavo oku sumua calua eci tu mola ndomo omãla, akulu kuenda vana ka va pondola oku liteyuila ovo muẽle, va siata oku tatiwa lãvi. Olondigaĩvi viaco vi sokisiwa ndovinyama via tema ale ndolondele. (Tiago 3:15) Ocili okuti, Ondaka ya Yehova yi tu ĩha elavoko.
Yehova o Sumũlũisa Vana va Ecela
10 Oku kala locikumbiti ci koka ohele. Yehova o yongola okuti tu yuvula ocikumbi, oco tu kale lombembua. (Tanga Va Efeso 4:31, 32.) Eye o tu lungula okuti “Imbapo onyeño kuenda siapo oku tema.” (Os 37:8) Nda tua kuama elungulo liaco tu kuatisiwa. Nda tu amamako oku kuatela ocikumbiti omunu wa tu lueyela, tu nyõla uhayele wetu ketimba kuenda kovisimĩlo. (Olo 14:30) Oku amamako oku temẽla omunu wa tu lueyela, tu li talisa etu muẽle ohali, ndeci, nda tu nyua ovihemba vioku liponda etu muẽle tu fa. Pole, eci tu ecela, tu li kuatisa etu muẽle. (Olo 11:17) Nda tua ci linga tu kuata ombembua yovutima, kovisimĩlo kuenda tu amamako oku vumba Yehova.
w1/12/2003 kem. 26 ocin. 20
“Sanjukila Yehova”
20 ‘Ambombe va ka piñala ofeka.’ (Osamo 37:11a) “Ambombe” vaco hẽ velie? Ondaka ya pongoluiwa hati “embombe,” yopiwa kondaka yi lomboloka “oku omboka, oku kala ukuesuluviko.” Omo liaco, ambombe vaco omanu vana va kasi oku kevelela oku tẽlisiwa kuesunga lia Yehova, oco a mãleko ohali yosi va kasi oku liyaka layo. Ulandu Wembimbiliya wamisako ndoco: ‘Ambombe va ka sanjukila ombembua yalua.’ (Osamo 37:11b) Ndaño muẽle kotembo yilo, tu pondola ale oku sanga ombembua kespiritu, yina yi kasi vekongelo Liakristão.
Ovina vi Sangiwa Vembimbiliya
Perspicaz-2 kem. 410
Omunda
Oku kolapo, oku lepa. Olondaka oku kolapo kuenda oku lepa, via siata oku tiamisiwila kolomunda. (Isa 54:10; Hav 3:6; Os 46:2; sokisa Os 46:2.) Omo liaco, olondaka viukualosamo viokuti, esunga lia Yehova “li kasi ndolomunda vinene,” vi lomboloka okuti esunga Liaye ka li pongoloka. (Os 36:6) Omo okuti olomunda via lepa, eci ci lekisa okuti esunga lia Suku lia velapo esunga liomunu. (Sokisa la Isa 55:8, 9.) Catiamẽla koku pesiwa kuetiyela liepanduvali lionyeño ya Suku, Esituluilo 16:20 liti: “Olomunda ka via molẽhele vali.” Eci ci lekisa okuti, ovina viosi via lepa ndolomunda, ka vi puluka konyeño ya Suku.—Tala Yer 4:23-26.
13-19 YA KUPEMBA
OVOKUASI A SANGIWA VONDAKA YA SUKU OLOSAMO 38-39
Yuvula Oku li Vetela Calua Evelo
“Tiamisila “Ovaso Ove” Kovina Vio Kovaso Yoloneke
12 Tanga 1 Yoano 3:19, 20. Vosi yetu tua siata oku livetela evelo. Ndeci, vamue va livetela evelo omo liovina va linga osimbu handi ka va kũlĩhĩle ocili. Vakuavo va livetela evelo omo liovina va linga noke lioku papatisiwa. Ovisimĩlo viaco via siata calua. (Va Rom. 3:23) Ocili okuti, tu yongola oku linga eci ca sunguluka. Pole, “vosi yetu tuakuakulueya olonjanja vialua.” (Tia. 3:2; Va Rom. 7:21-23) Ndaño okuti ka tu sole oku livetela evelo, olonjanja vimue ci tu linga ciwa. Momo lie? Momo ovisimĩlo vioku livetela evelo vi tu vetiya oku linga apongoloko komuenyo kuenda oku yuvula oku pitulula akulueya aco.—Va Hev. 12:12, 13.
13 Handi vali, pamue tu livetela evelo, ale tuamamako oku liyeva ndoco, ndaño ceci tu likekembela kuenda eci Yehova a lekisa okuti wa tu ecela. Ovisimĩlo viaco onjanjo yimue. (Osa. 31:10; 38:3, 4) Momo lie? Kũlĩhĩsa ulandu wa manji umue ukãi wa liyaka locitangi coku livetela evelo omo liakandu osimbu. Eye wa popia hati: “Hĩse si ka likolisileko vali kupange wa Yehova momo si ka popeliwa ale.” Citava okuti valua pokati ketu tua liyevele ale ndoco. Omo liaco, tu sukila oku kuata utate walua oco ka tu ka amameko oku livetela evelo. Momo lie? Momo Satana o sanjuka calua nda tua liwekapo oku vumba Yehova, ndaño okuti Yehova wa tu ecela ale!—Sokisa 2 Va Korindo 2:5-7, 11.
w15/11/2002 kem. 20 ocin. 1-2
Nye tu Sukila Oku Linga Oco Oloneke Vietu vi Kuate Esilivilo ku Yehova?
Oloneke viomuenyo wetu vimbumbu kuenda vi pita lonjanga. Ukualosamo Daviti wa kũlĩhĩsa ekalo liomuenyo kuenda wa vetiyiwa oku likutilila ndoco: “A Yehova, ndi kuatise oku kũlĩha lipi li ka kala esulilo liange, kuenda etendelo lioloneke viange, oco ndi kũlĩhe okuti omuenyo wange umbumbulu. Otembo ndi kasi lomuenyo, kokuove yi kasi ndu okuti hacimueko.” Daviti wa yonguile oku sanjuisa Suku, ci kaile kolondaka kuenda kovilinga viaye. Eye poku situlula okuti omuenyo waye wa tambele lika ku Suku, wa popia hati: “Ove lika vulavoko liange.” (Osamo 39:4, 5, 7) Yehova wo yeva. Ocili okuti, eye wa kũlĩhĩsa ovopange a Daviti kuenda wo sumũlũisa calua.
Ocili okuti ca leluka oku sakalala lekalo liomuenyo vokuenda kueteke omo liovopange alua. Ci koka esakalalo, ca piãla enene eci tu kuete ovina vialua vioku linga, pole, otembo yitito. Anga hẽ ndeci Daviti a linga, tu lekisa okuti tu yongola oku ambata omuenyo lonjila yimue yi sanjuisa Suku? Yehova o lete kuenda o kũlĩhĩsa omunu lomunu pokati ketu. Yovi ulume umue wa sumbilile Suku, tunde eci a limbuka okuti Yehova wa kũlĩha ovilinga viaye kuenda oku enda kuaye, papita ale ci soka 3.600 kanyamo. Yovi wa pula ndoco: “Ndu tambulula ndati eci eye a kisika oku lilomboluila kokuaye?” (Yovi 31:4-6, 14) Oloneke vietu vi pondola oku kuata esilivilo kovaso a Suku, poku litumbikila ovimaho konepa yespiritu, oku pokola kovihandeleko viaye kuenda oku talavaya ciwa lotembo yetu. Tu konomuisi lutate ovolandu aco.
Tumbulula Ukamba wa Kuatele la Yehova
Sapela la Yehova olonjanja viosi. Isiove wa kũlĩha okuti, ovisimĩlo vioku livetela evelo vi pondola oku tateka oku likutilila kokuaye. (Va Rom. 8:26) Kuenje ‘pandikisa lolohutililo,’ loku sapuila Yehova okuti ove o yongola muẽle oku kala ekamba liaye. (Va Rom. 12:12) Manji umue o tukuiwa Andrej ivaluka hati: “Ame nda livetela evelo kuenda nda kuata osõi. Pole, eci ndi likutilila ndi liyeva ciwa. Kuenje nda enda oku yeva ombembua vutima.” Nda ku kuete olondaka vioku tukula vohutililo, kũlĩhĩsa olondaka viohutililo ya Soma Daviti eci a likekembela, vi sangiwa Kolosamo 51 kuenda 65.
Ovina vi Sangiwa Vembimbiliya
Lekisa Okuti Wumunu Umue wa Koleliwa
16 Oku likandangiya, ku kuete esilivilo lialua nda tu yongola oku koleliwa la vakuetu. Ocituwa eci ci tu kuatisa oku lava upopi wetu, eci tu setekiwa oku popia ondaka yimue yopokolika. (Tanga Olosapo 10:19.) Pamue ka ci leluka oku likandangiya eci tu kasi vo Internet. Nda ka tua kuatele utate, tu ka sandeka ondaka yopokolika komanu valua. Nda tua tioka polumbutãu luoku tuma esapulo, ka tu ka tẽla vali oku tateka ndomo omanu va ka tenda esapulo liaco kuenda ovitangi vi keyililako. Oku likandangiya ku tu kuatisavo oku ũha, eci ovanyãli va tu kisika oku situlula ovina vi pondola oku kapa kohele omuenyo wa vamanji. Eci ci pondola oku pita letu poku sombisiwa lakuenje velombe vofeka yina okuti efendelo lietu li kasi oku tatekiwa. Kocitangi eci ale cikuavo, tu sukila oku kapako onumbi yoku “lava omẽla [wetu] poku u munĩha.” (Osa. 39:1) Tu sukila oku kala omanu va koleliwa eci tu kasi lepata, lakamba, la vamanji, ale lomanu vakuavo. Omo liaco, oco tu kale omanu va koleliwa tu sukila oku likandangiya.
20-26 YA KUPEMBA
OVOKUASI A SANGIWA VONDAKA YA SUKU OLOSAMO 40-41
Momo Lie tu Kuatisila Vakuetu?
Omanu Vakuacali va Kuete Esanju
16 Omanu vakuacali eci va eca cimue, ka va lavoka oku tambulavo cimue. Yesu wa popia hati: “Eci o pongiya ocipito cimue, laleka olohukũi, ovihata, ovilema kuenda olomeke; kuenje o sanjuka, omo ovo ka va kuete lacimue oco va ku tiuwile.” (Luka 14:13, 14) Embimbiliya li popiavo hati: “Omunu ukuacali o ka sumũlũisiwa” kuenda “wa sumũlũha omunu wosi o kuatisa ohukũi.” (Olosapo 22:9; Osamo 41:1) Tu sukila oku kala vakuacali momo tu yongola oku kuatisa vakuetu.
17 Eci Paulu a tukula olondaka via Yesu viokuti, “Esanju li tunda koku eca olio lia velapo, li tunda koku tambula li sule,” eye ka kaile oku popia lika catiamẽla koku eca ovikuata. Tu pondolavo oku eca elembeleko, elungulo li tunda Vembimbiliya kuenda ekuatiso li sukiliwa. (Ovilinga 20:31-35) Ndeci Paulu a popia kuenda a linga, eye o tu longisa okuti ci kuete esilivilo oku kala vakuacali poku eca otembo yetu, ongusu yetu, oku kapako omanu kuenda ocisola cetu.
18 Olonoño via siata oku lilongisa ovituwa viomanu via limbuka okuti, oku eca ku nena esanju komanu. Ndomo ci lekisa ulandu umue, omanu va popia okuti va yeva esanju lialua noke lioku lingila vakuavo ovina viwa. Olonoño vi popia okuti eci tu kuatisa vakuetu, tu limbuka okuti omuenyo wetu u kuete ocimãho kuenda esilivilo. Omo liaco, olonoño vimue vi popiavo okuti, omanu va sukila oku lieca olumue poku kuatisa kovopange amue, oco va kuate uhayele uwa kuenda esanju. Kuenje esanju va siata oku kuata ka li tu komõhisa, momo Ululiki wetu ukuacisola, Yehova, wa siata oku popia hati, oku eca ci tu nenela esanju.—2 Timoteo 3:16, 17.
w15/12/2015 kem. 24 ocin. 7
Yehova o ka ku Pamisa
7 Nda o kasi oku vela, Yehova o pondola oku ku lembeleka kuenda oku ku kuatisa, ndeci a linga lafendeli vaye kosimbu. Soma Daviti wa soneha hati: “Wa sumũlũha omunu wosi o kuatisa ohukũi; Yehova o ko yovola keteke liohali. Yehova o ko teyuila kuenda o ko wecelela oku kala lomuenyo.” (Osamo 41:1, 2) Pole, Daviti ka lekisile okuti omunu una uwa ivaloka olohukũi lalimue eteke a fa. Yehova o kuatisa ndati omunu waco uwa? Daviti wa lombolola hati: “Yehova o ko u kolisa eci eye a kala pula loku vela; Ove u ko tata vokuenda kuoku vela kuaye.” (Osamo 41:3) Yehova wa kũlĩha ciwa ovitangi vi kasi oku pita lafendeli vaye kuenda lalimue eteke a va ivala. Eye o va ĩha utõi kuenda olondunge. Yehova wa lulikavo etimba liomunu lonjila yimue okuti li pondola oku kaya olio muẽle.
Setukula Ohenda ya Yehova
17 Ndaño okuti oku lekisa ohenda ciwa kokuetu, esunga liavelapo lioku lekisa ohenda lieli okuti, tu yongola oku setukula Yehova kuenda oku u sivaya. Eye ono yocisola kuenda yohenda. (Olosapo 14:31) Yehova eye ongangu yetu yavelapo yoku lekisa ocisola kuanda ohenda. Omo liaco, tu likolisiliko oku setukula Yehova poku lekisa ohenda. Kuenje ukamba wetu la vamanji u pamisiwa kuenda tu kuata ukamba uwa lomanu vakuavo.—Va Galatia 6:10; 1 Yoano 4:16.
Ovina vi Sangiwa Vembimbiliya
Perspicaz-2 kem. 49 ocin. 2
Yehova
Ulandu wosi Wembimbiliya, watiamẽla koku teyuila usoma wa Yehova Suku, u situlula ciwa ocimãho caye ca velapo. Okuti: Oku kemãlisa onduko yaye muẽle. Ekemãlo liaco li kisika oku yelisa onduko ya Suku kalundi osi. Omo liaco, onduko yaco yi sukila oku kemãlisiwa loviluvo viosi, ci kaile kilu kuenda palo posi omo okuti oyo yi kola. Eci ci lekisa okuti ovio vi sukila oku limbuka kuenda oku lekisa esumbilo lutima wosi. Kuenda ocikele ca Yehova coku kala ukuonene wosi, lonjongole yoku u vumba loku linga ocipango caye locisola. Ohutililo Daviti a linga ku Yehova yi sangiwa Kosamo 40:5-10, yi situlula ciwa ocituwa caco kuenda ekemaliso liocili lionduko Yehova. (Limbuka ndomo upostolo Paulu a tiamisila ulandu Wosamo ku Kristu Yesu, kukanda ku Va Heveru 10:5-10.)
27 YA KUPEMBA–2 YEVAMBI
OVOKUASI A SANGIWA VONDAKA YA SUKU OLOSAMO 42-44
Kuatisiwa Lolonumbi vi Tunda ku Yehova
w1/7/2006 kem. 9 ocin. 4
Atosi Avelapo Vonepa Yavali Yelivulu Liolosamo
42:4, 5, 11; 43:3-5. Nda eteke limue tua litepa la vamanji vekongelo omo liovitangi vimue, tu sukila oku ivaluka ndomo tua kala lavo kosimbu. Nda tua ci linga, ci tu kuatisa oku pamisa ekolelo lietu. Kefetikilo citava okuti, tu sumua omo lioku kala ulika. Pole, tu sukila oku ivaluka okuti, Yehova eye ocitililo cetu. Kuenda tu talamẽla lika eyovo li tunda kokuaye.
w15/1/2012 kem. 15 ocin. 2
Ndomo o Linga Elilongiso Limue Liembimbiliya li Sanjuisa Halio li Pamisa
1 LIKUTILILA: Ocina catete tu sukila oku linga, oku likutilila. (Os 42:8) Momo lie? Tu sukila oku tenda elilongiso Liondaka ya Suku, ndonepa yimue yefendelo lietu. Omo liaco, tu sukila oku pinga ku Yehova oco a tu ihe onjongole ya sunguluka kuenda espiritu sandu liaye. (Luk 11:13) Manji Barbara o kasi ale kupange wumisionalio anyamo alua wa popia hati: “Olonjanja viosi ndi likutilila osimbu sia tangele ale oku lilongisa Embimbiliya. Noke ndi limbuka okuti Yeova o kasi lame kuenda ovina ndi kasi oku linga.” Oku likutilila osimbu ka tua lilongisile, ci vetiya utima wetu oku kapako okulia kuespiritu tu kuete.
“Ovaka Ove ka a ka leñele”
11 Yehova wa siatavo oku tu pamisa lolonumbi tua siata oku tambula kolohongele viekongelo, kolohongele vimbo kuenda kolohongele viofeka oku kongelamo olosikola viupange Wakristão. Olonumbi viaco vi pondola oku tu kuatisa oku fendela Yehova lonjila yimue ya sunguluka, oku kuata ovimãho kuenda oku tẽlisa ovikele vialua Viakristão. (Os 119:32) Anga hẽ wa sanjukila oku pamisiwa lolonumbi via Yehova?
12 Yehova wa kuatisa afendeli vaye oco va yule va Amaleke kuenda va Etiopia. Wa ecavo unene ku Nehemiya kuenda ku va Yudea oco va tumbulule ovimbaka vio Yerusalãi. Cimuamue haico okuti, Suku o ka tu ĩha ongunsu oco tu amameko kupange woku kunda ndaño lasakalalo, alambalalo kuenda omanu vana ka va lekisa onjongole kolondaka viwa. (1Pe 5:10) Yehova ka lingi ocikomo oco a maleko ovitangi tu kasi oku liyaka lavio. Tu sukila oku likolisilako. Tu pondola oku ci linga ndati? Tu ci linga poku tanga Embimbiliya oloneke viosi, oku lipongiya eci tu enda kolohongele olosemana viosi, oku amamako oku linga elilongiso liopokolika ale efendelo liepata kuenda oku likutilila ku Yehova. Ka tu ka ecelele okuti ovina vimue vi tu tateka oku linga ovina Yehova a siata oku eca kokuetu oco vi tu pamise. Nda wa limbuka okuti wa hongua konepa yimue yovina via tukuiwa, pinga ekuatiso ku Suku. Noke limbuka ndomo espiritu sandu lia Suku ‘li ku ĩha onjongole kuenda ongusu yoku linga ovina viosi eye a sole.’ (Flp 2:13) O pondola oku pamisa ndati vamanji?
Ovina vi Sangiwa Vembimbiliya
Perspicaz-1 kem. 479
Olombua Viovusenge
Vovisonehua olombua viovusenge via tukuiwa olonjanja vialua vupopi wocindekaise. Yovi poku lombolola ekalo liaye, wa popia okuti, wa linga “manji yolombua viovusenge.” (Yov 30:29) Catiamẽla koku kunduiwa kuafendeli va Suku, citava okuti ukualosamo wa tukula ocila cuyaki kuna olombua viovusenge vi liongoluila oco vi lie ovivimbi. (sokisa Los 68:23) Eye wa popia hati: “Ove wa tu nyanyũila apa olombua viovusenge via tunga.” (Os 44:19) Eci va Bavulono va nuala ocingonja o Yerusalãi kunyamo 607 K. K., ca koka onjala kuenje olonjali via lia omãla vavo. Omo liaco, Yeremiaya wa sokisa ungangala “womanu” vaco, lonjila ndomo olombua viovusenge vi tata omãla vavo.—Asi 4:3, 10.
3-9 YEVAMBI
OVOKUASI A SANGIWA VONDAKA YA SUKU OLOSAMO 45-47
Ocisungo Cimue Catiamẽla Kuvala wo Soma Yimue
w15/2/2014 kem. 9 ocin. 8-9
Tu Sanjukili Uvala wa Kameme
8 Tanga Osamo 45:13, 14a. Ndombua wa “pongiyiwa luwalo” wa posoka calua, oco a linge uvala la kameme. Elivulu Liesituluilo 21:2 li lombolola okuti, ndombua o sokisiwa lolupale luo Yerusalãi yokaliye kuenda wa “liposuisila sandombua.” Olupale luaco luo kilu lu kuete “ulamba wa Suku” kuenda “oku nina kuayo kua kala ndewe lia tĩla, ndewe lio jaspe li nina ndovitulu yi yela.” (Esit 21:10, 11) Eposo lio Yerusalãi yokaliye, lia tukuiwa kelivulu Liesituluilo. (Esit. 21:18-21) Ukualosamo wa popia eci catiamẽla “keposo lia ndombua”! Noke yoku lipongiya, uvala waco u ka lingiwila kilu.
9 Ndombua o tualiwa kulume waye Soma Mesiya. Eye u ‘pongiya kuenda u yelisa lekuatiso liondaka.’ Ndombua yaco, ‘o kola kuenda wa lipua.’ (Va Efe. 5:26, 27) Ndombua o sukilavo oku wala uwalo wa posoka omo liuvala waco. Omo liaco, “uwalo waye wa pongiyiwa lulu,” kuenda o “tualiwa kusoma luwalo wa tĩla.” Catiamẽla kuvala wa kameme, ‘o walisiwa onanga yovalatanya yi yela tue. Onanga yaco yovalatanya oyo ovilinga via sunguluka violosandu.’—Esit. 19:8
Nye Elivulu Liesituluilo li Popia Catiamẽla Kekalo Liove Liokovaso Yoloneke?
10 Yehova o ka liyeva ndati omo lielambalalo liaco ka lia sungulukile? Eye o tu sapuila hati: “Onyeño yange yalua yi ka wenguka.” (Esk 38:18, 21-23) Kesituluilo ocipama 19, ku lombolola eci ci ka pita noke. Yehova o ka tuma Omõlaye oco a teyuile afendeli vaye kuenda oku kundula ovanyãli vaco. Yesu o ka linga uyaki waco ‘lolohoka viokilu’ okuti, ovangelo vakuekolelo kuenda olombuavekua vi soka 144.000. (Esi 17:14; 19:11-15) Uyaki waco u ka sulila ndati? Omanu vosi kuenda ovisoko vina vi likala Yehova, va ka kunduiwa!—Tanga Esituluilo 19:19-21.
11 Sokolola ndomo omanu vakuekolelo palo posi va ka liyeva, poku popeliwa eci ovanyãli va Suku va ka kunduiwa! Ocili okuti, otembo yaco yi ka kala yesanju lialua! Ndaño okuti kilu va ka kaluka lesanju eci o Bavulono Yinene yi ka kunduiwa, pole, ku ka kala cimue ci ka nena vali esanju lialua. (Esi 19:1-3) Ocina caco ca velapo ca tukuiwa kelivulu Liesituluilo okuti, “uvala wa kameme.”—Esi 19:6-9.
12 Otembo yipi uvala u ka lingiwa? Osimbu uyaki wo Harmagedo ka wa fetikile, olombuavekua viosi vi soka 144.000 vi ka kala ale kilu. Pole, hayoko handi yi ka kala otembo yuvala wa kameme. (Tanga Esituluilo 21:1, 2.) Uvala wa kameme u ka lingiwa noke liuyaki wo Harmagedo, eci ovanyãli vosi va Suku va ka kunduiwa.—Os 45:3, 4, 13-17.
Perspicaz-1 kem. 1099
Uyaki
Noke liuyaki waco oku pua vongongo mu ka kala ombembua vokuenda kuohulukãi yanyamo. Osamo eyi yi lombolola okuti, “Yehova o kasi oku nena esulilo liovoyaki kilu lieve liosi. O teya ohonji kuenda o nyanyõla onjelia; Eye o timĩha akãlu uyaki vondalu.” Osamo yaco, ya tẽlisiwa eci Suku a nena ombembua vofeka ya va Isareli, poku nyõla ovimalẽho viuyaki viovanyãli. Noke lia Kristu oku nyõla vana va koka uyaki ko Harmagedo, kolonepa viosi viluali ku ka kala ombembua. (Os 46:8-10) Omanu va ka kuata omuenyo ko pui, vana okuti “va pongolola olosipata viavo oco vi linge atemo” kuenda ka va ka “lilongisa vali uyaki.” “Momo omẽla wa Yehova ukualohoka wa popia.”—Isa 2:4; Mik 4:3, 4.
Ovina vi Sangiwa Vembimbiliya
Nye ci ka Pita Eci Usoma wa Suku u Keya?
9 Ovisoko vina okuti havakuaciliko vi ka piñanyiwa la nye? Anga hẽ noke lio Harmagedo ku ka kala vali ocisoko cimue palo posi? Embimbiliya li lekisa okuti: Kuli ovailu okaliye longongo yokaliye tu kasi oku lavoka omo liohuminyo yaye kuenje vokuavio mu ka kala esunga.” (2 Petulu 3:13) Ilu liosimbu kuenda ongongo, vi lomboloka olombiali vina okuti havakuaciliko kuenda omanu vana va siata oku vialiwa lavo. Eci ovo va ka kunduiwa va ka piñanyiwa la nye? Va ka piñanyiwa “lovailu okaliye longongo yokaliye.” Ilu liokaliye lilomboloka uviali wokaliye okuti Soma yaco Yesu Kristu kuenda eci ci soka 144.000 komanu. Ongongo yokaliye yi lomboloka omanu va ka vialiwa Lusoma wa Suku. Yesu kumue lomanu vana va ka viala laye, va ka setukula Yehova Suku, okuti o Suku yimue yongotiya ciwa ovina. (1 Va Korindo 14:33) Omo liaco, “ongongo yokaliye” yi ka sokiyiwa ciwa. Vongongo yaco mu ka kala alume vawa va ka tata ciwa ovina. (Osamo 45:16) Alume vaco va ka songuiwa la Kristu kuenda eci ci soka 144.000 komanu. Sokolola esanju tu ka kuata eci ovisoko viosi vina okuti havakuaciliko va ka piñanyiwa locisoko cimosi ci likuete omunga okuti lalimue eteke vi ka lekisa ovituwa viovisoko viokoloneke vilo!
10-16 YEVAMBI
OVOKUASI A SANGIWA VONDAKA YA SUKU OLOSAMO 48-50
Alonjali—Pamisi Ekolelo Liepata Liene Kocisoko ca Yehova
Efendelo Liocili li tu Kuatisa Oku Kuata Esanju
11 Etu tu fendela Yehova eci tu lilongisa Ondaka yaye kuenda oku longisa omãla vetu catiamẽla kokuaye. Esambata lia ecaile ku va Isareli epuluvili, lioku siapo ovopange avo eteke leteke, oco va pamise ukamba wavo la Yehova. (Etu. 31:16, 17) Ovo va longasaile komãla vavo catiamẽla ku Yehova kuenda kohenda yaye. Koloneke vilo, tu sukilavo oku linga esokiyo lioku tanga loku lilongisa Ondaka ya Suku. Eyi onepa yimue yefendelo lietu ku Yehova kuenda ci tu kuatisa oku amẽla kokuaye. (Osa. 73:28) Eci tu lilongisila kumosi lepata, tu kuatisa omãla vetu oku pamisa ukamba uwa la Isietu wokilu ukuacisola.—Tanga Olosamo 48:13.
w15/3/2011 kem. 19 ocin. 5-7
Ove o Kuete Esunga Lioku Sanjuka
“Ñuali ñuali o Siono; ñuali kolonele vialio viosi; tendi olosapalalo vialio. Kũlĩhisi ciwa ovimbaka vialio. Kũlĩhĩsi olosapalalo vialio vi kuete oviteyuilo, oco vu sapuli eci catiamẽla kokualio kovitumbulukila vi keya kovaso.” (Osa. 48:12, 13) Vovinimbu evi, ukualosamo wa vetiya va Isareli oku kũlĩhĩsa lutate o Yerusalãi. Ove hẽ o pondola oku sokolola esanju apata a va Isareli va kuataile poku enda kovipito via lingawaile unyamo lunyamo volupale luaco lu kola loku mola eposo lionembele? Ovo va vetiyiwile oku vi “lombolola kocitumbulukila ci kuamamo.”
Sokolola nasoma wo ko Seva, una okuti tete wa kuatele atatahãi eci vo sapuila eposo liuviali kuenda olondunge via piãla via Salomone. Nye co vetiya oku tava okuti ovina a yevele via kala muẽle viocili? Eye wa popia hati: “Sia kolelele kovolandu aco toke eci ndeya loku ci mõla lovaso ange muẽle.” (2 Asa. 9:6) Ocili okuti ovina tu mola “lovaso etu muẽle” vi pondola oku tu vetiya calua.
O pondola oku kuatisa ndati omãla vove oku mola “lovaso avo muẽle” eposo liocisoko ca Yehova? Nda o kasi ocipepi lofiliale Yolombangi Via Yehova, linga esokiyo lioku nyulako. Mandy la Bethany va kulila pocitumãlo cimue ci kasi ocinãla ci soka 1.500 kolokilometulu lo Betele yofeka yavo. Pole olonjali viavo, via enda oku linga esokiyo lioku nyula o Betele, ca piãla enene eci omãla vavo va kala oku kula. Omãla vaco va popia vati: “Osimbu ka tua nyulile o Betele, tua simĩle okuti ku sangiwa lika akulu vendamba. Pole, tua mola amalẽhe va likolisilako oku lingila upange Yehova haivo va sanjukila upange waco! Tua limbuka okuti ocisoko ca Yehova, ci sangiwa kolonepa viosi violuali kuenda onjanja lonjanja tua nyula o Betele tua pamisiwa kespiritu.” Oku mola ndomo ocisoko ca Suku ci talavaya, ca vetiya Mandy la Bethany oku iñila kupange wakundi votembo yosi, kuenje va lalekiwa oku talavaya ndoloñuatisi vio ko Betele vokuenda kuotembo yimue.
w15/8/2012 kem. 12 ocin. 5
Kuati Ovituwa Ndevi Violonungi Viusoma wa Suku!
5 Oku lilongisa esapulo liofeka. Omunu una o yongola oku kala onungi yofeka, o sukila oku kũlĩha esapulo liofeka kuenda oku lilongisa ovina viatiamẽla kombiali yaco. Cimuamue haico ci pita la vana va yongola oku kala olonungi Viusoma wa Suku okuti, vi sukila oku lilongisa ovina viosi viatiamẽla Kusoma waco. Kũlĩhĩsa ulandu womãla va Kora va vumba Suku ko Isareli. Ovo va sanjukilile o Yerusalãi, locitumãlo cefendelo kuenda esapulo liolupale waco. Ocili okuti ka va komõhele eposo liovawe va tunga lao ocitumãlo caco, pole, va kapeleko elomboloko lia kuata olupale luaco kuenda ocitumãlo cefendelo. O Yerusalãi, ya kala ‘imbo lia Yehova okuti, eye Osoma ya velapo,’ momo ya kala ombala yefendelo liocili. Vo Yerusalãi, omo va enda oku longisila Ovihandeleko via Yehova. Omo liaco, Yehova wa lekisa ocisola komanu vana va vialiwile Losoma yo Yerusalãi. (Tanga Osamo 48:1, 2, 9, 12, 13.) Ove hẽ o yongola oku lilongisa esapulo liomanu va kasi vocisoko ca Yehova palo posi koloneke vilo loku lombolola ulandu wavo? Osimbu o lilongisa ovina vialua viatiamẽla kocisoko ca Yehova Suku kuenda ndomo a kasi oku kuatisa afendeli vaye, o ka kuata elomboloko lia suapo Liusoma waye. Kuenje, onjongole yove yoku kundila omanu olondaka viwa Viusoma, yi ka li vokiya calua.—Yer. 9:24; Luka 4:43.
Ovina vi Sangiwa Vembimbiliya
Perspicaz-2 kem. 859
Ovokuasi
Va Isareli omo va kuatele okuasi, va pondule oku lia kuenda oku nyua. (1Ol 4:20; Uku 5:18, 19) Kuenda ovokuasi avo a enda oku va teyuila kovitangi vi tunga kuhukũi. (Olo 10:15; Uku 7:12) Ca kala ocipango ca Yehova okuti va Isareli va kuata ovokuasi aico omo liupange wavo. (Sokisa Lolo 6:6-11; 20:13; 24:33, 34) Ndaño ndoco, eye wa va lungula eci catiamẽla kehele yi tunda koku ivalako okuti eye ono yovokuasi aco. Kuenda oku fetika oku kolela kovokuasi avo. (Esn 8:7-17; Os 49:6-9; Olo 11:4; 18:10, 11; Yer 9:23, 24) Wa va ivaluisavo okuti ovokuasi aco ka a kala otembo yalua. (Olo 23:4, 5) Ka citava oku a eca ku Suku ndocisembi coku yovola omunu umue kolofa. (Os 49:6, 7) Kuenda ka a kuete esilivilo lalimue komanu vana va fa. (Os 49:16, 17; Uku 5:15) Vava sapuilavo okuti, oku pitisa calua kovaso ovokuasi nda ca va vetiya oku nyana kuenda oku pumba ohenda ya Yehova. (Olo 28:20; sokisa la Yer 5:26-28; 17:9-11.) Va vetiyiwavo oku “talavaya lovina [viavo] via velapo oco [va] lekise esumbilo ku Yehova.”—Olo 3:9.
17-23 YEVAMBI
OVOKUASI A SANGIWA VONDAKA YA SUKU OLOSAMO 51-53
Ceci o Sukila Oku Linga Oco o Yuvule Akandu Anene
O Pondola Oku Lava Ndati Utima Wove?
4 Kelivulu Liolosapo 4:23 ondaka, “utima” yi lomboloka “ovisimĩlo viutima” ale ceci ci kasi vutima. (Tanga Osamo 51:6.) Volondaka vikuavo “utima” u lomboloka ovisimĩlo, ekalo kuenda olonjongole. Ovina evi vi lomboloka eci tua tuwa vokati, handomoko omanu va tu tenda.
5 Ci kuete esilivilo oku kũlĩhĩsa ndomo tua tuwa vokati. Ndocindekaise, sokolola ketimba liove. Oco o kuate uhayele uwa, o sukila oku li tekula ciwa kuenda oku pindisa etimba liove olonjanja viosi. Cimuamue haico okuti, oco tu kuate uhayele uwa kespiritu, tu sukila oku li tekula ciwa konepa yespiritu kuenda oku pamisa ekolelo lietu ku Yehova olonjanja viosi. Tu pondola oku ci linga ndati? Poku kapako ovina tua lilongisa kuenda oku sapuilako omanu vakuavo catiamẽla kekolelo lietu. (Va Rom. 10:8-10; Tia. 2:26) Ocina cikuavo catiamẽla ketimba lietu ceci okuti, pamue tu sima okuti tu kasi luhayele, pole, vokati tu vela. Cimuamue haico okuti, pamue tu sima okuti ekolelo lietu liapama, pole, olonjongole vĩvi vutima wetu vi kasi oku livokiya. (1 Va Kor. 10:12; Tia. 1:14, 15) Tu ivaluki okuti Satana o yongola oku tu yapuisa lovisimĩlo viaye. Eye o seteka oku ci linga ndati? Tu pondola oku li teyuila ndati?
w15/6/2015 kem. 15 ocin. 5-6
Tu Pondola Oku Amamako Oku Liyelisa
5 Nda tua amamako oku likutilila loku pinga ekuatiso lia Yehova, eye o tu kuatisa oku liyaka lovisimĩlo vĩvi. Yehova o tu ĩha espiritu sandu oco li tu pamise okuti, tu amamako oku liyelisa. Volohutililo vietu tu pondola oku sapuila ku Yehova okuti, tu yongola oku kuata ovisimĩlo viu sanjuisa. (Osamo 19:14) Tu sukila oku pinga ku Yehova lumbombe oco a tale nda vutima wetu muli oloñeyi vi pondola oku tu vetiya oku linga ekandu. (Osamo 139:23, 24) Omo liaco, amamako oku pinga ekuatiso ku Yehova oco o yuvule ovina via vĩha okuti, o linga ovina via sunguluka ndaño ka ca lelukile.—Mateo 6:13.
6 Osimbu ka tua lilongisile ovina viatiamẽla ku Yehova, pamue tua solele oku linga ovina ka vi taviwa laye, kuenda tu kasi oku liyaka loloñeyi viaco vĩvi toke cilo. Pole, Yehova o pondola oku tu kuatisa oku linga apongoloko oco tu linge ovina viu sanjuisa. Sokolola ulandu wa pita la Soma Daviti eci a linga ukahokolo la Batisieva okuti noke wa likekembela, kuenje wa pinga ku Yehova oco a ece kokuaye “utima wa lipua,” okuti, u kuatisa oku lekisa epokolo. (Osamo 51:10, 12) Nda kosimbu tua kuatele onjongole yalua yoku linga ukahonga okuti tu kasi oku liyaka layo toke cilo, Yehova o pondola oku tu kuatisa oco tu kuate onjongole yalua yoku pokola kokuaye, kuenda oku linga ovina via sunguluka. Eye o pondola oku tu kuatisa oco tu yuvule ovisimĩlo ka via sungulukile.—Osamo 119:133.
Ovina vi Sangiwa Vembimbiliya
Perspicaz-1 kem. 719
Doege
U Edome umue wa talavaya ndungombo wa velapo konjo ya Soma Saulu, okuti ca kala ocikele cimue ci kuete esivililo lialua. (1Sa 21:7; 22:9) Doege ka kaile u Isareli. Omo okuti wa “kisikiwa oku kala kovaso a Yehova” ko Nove, citava okuti, omo liocisila cimue, oku vĩhisiwa ale omo lioku sima okuti wa kuatiwa lovilundu, Doege wa mõla eci ocitunda Cinene Ahimeleke a eca ku Daviti olombolo viocisila kuenda osipata ya Goliata. Noke eci Saulu a sapuila akuenje vaye okuti, ovo va kala oku u pakula, Doege wa lombolola ovina a mõla ko Nove. Saulu noke yoku vilikiya ocitunda cinene kuenda ovitunda vikuavo vio ko Nove, loku pulisa Ahimeleke, Saulu wa eca ocihandeleko kasualali oco va ponde ovitunda. Eci asualali a likala oku ci linga, Doege wa tava ocihandeleko ca Saulu kuenje wa ponda eci ci soka 85 kovitunda. Noke lielinga liaco liungangala, Doege wa kundula o Nove, poku ponda olonungi viosi ci kaile amalẽhe, akulu kuenda ovinyama.—1Sa 22:6-20.
Ndomo ci lekisiwa kolondaka vioku fetika Viosamo 52, Daviti wa soneha ndoco catiamẽla ku Doege: “Elimi liove lia tua ndomoko, li sokiya oku linga eci cĩvi kuenda ovopange elimbi. Ove o sole vali evĩho okuti eci ciwa ci sule, ove o kemba calua okuti oku vangula eci ca sunguluka ci sule. Ove o pondola oku kemba calua lelimi liove! Ove o sole olondaka viosi vi pondola oku valula vakuene.”—Os 52:2-4.
24-30 YEVAMBI
OVOKUASI A SANGIWA VONDAKA YA SUKU OLOSAMO 54-56
Suku o Kasi Ocipepi Love
w1/8/2006 kem. 24 ocin. 10-11
Kuata Olondunge Vioku Sumbila Yehova
10 Otembo yimue, Daviti wa tilile toke ku Akisi soma ya va Gati kolupale lua va Filisiti. Kolupale luaco, oko kua kala Goliata. (1 Samuele 21:10-15) Noke, akuenje va soma va fetika oku sandeka Daviti komanu okuti, eye unyãli wofeka yavo. Oco hẽ, nye Daviti a linga? Daviti wa likutilila ku Yehova. (Osamo 56:1-4, 11-13) Noke poku sanda onjila yoku tila, wa likembisa oku kala ocitende. Pole, wa kũlĩhĩle okuti, Yehova eye wa kala oku u yovola poku sumũlũisa elikolisilo liaye. Ekolelo liaye, lia lekisa okuti, wa sumbilile Yehova.—Osamo 34:4-6, 9-11.
11 Etu, tu sukila oku kuama ongangu ya Daviti yoku lekisa esumbilo ku Yehova, kuenda oku kolela kohuminyo yaye yoku tu kuatisa eci tu liyaka lovitangi. Soma Daviti wa popia hati: “Ecelela okuti Yehova o songuila onjila yove; Kolela kokuaye kuenda eye muẽle o ka ku kuatisa.” (Osamo 37:5) Eci ka ci lomboloka okuti, tu kundika ku Yehova ovitangi viosi tu liyaka lavio loku tula utima okuti, ka tu lingi vali cimue. Daviti eci a liyaka lovitangi, ka pingile lika ekuatiso ku Yehova okuti ka lingi vali cimue. Eye wa likolisilako oku talavaya lolondunge a tambula Kokuaye oco a yule ovitangi viaco. Pole, wa kũlĩhĩle okuti, omunu ka tẽla oku yula ovitangi longusu yaye muẽle. Cimuamue haico tu sukila oku linga. Noke yoku likolisilako oku yula ovitangi vietu, tu sukila oku vi eca peka lia Yehova. Pole, olonjanja vimue, ka tu tẽla oku linga cimue catiamẽla kovitangi viaco. Omo liaco, tu sukila oku kolela ku Yehova. Esumbilo lietu Kokuaye, li lekisiwa poku liyaka lovitangi. Soma Daviti wa popia hati: “Ukamba wocili la Yehova wa tiamẽla ku vana vo sumbila.”—Osamo 25:14.
Kuata ukamba kem. 243 ocin. 9
Lacimue ci Tẽla “Oku tu Tepa Kocisola ca Suku”
9 Yehova o kapako epandi lietu. (Mateo 24:13) Ivaluka okuti Satana o yongola okuti ove o siapo Yehova. Eteke leteke eci ove o lekisa okuti ukuacili ku Yehova, ove o kasi oku kuatisa koku eca etambululo koku imbula kua Satana. (Olosapo 27:11) Olonjanja vimue ka ca lelukile oku pandikisa. Omo liovitangi viuhayele, ocitangi coku kuata olombongo, esumuo, ovisalu kuenda ovitangi vikuavo, vi pondola oku kala ndoseteko yimue yeteke leteke. Elavoko ka li tẽlisiwa lonjanga li pondolavo oku sumũisa. (Olosapo 13:12) Eci tu pandikisa koloseteko viaco viosi, olio ocina cimue ci kuete vali esilivilo liocili ku Yehova. Eli olio esunga lieci Soma Daviti a pingila ku Yehova oco a soleke asuẽlela aye ‘vonjeke yocipa,’ kuenje omo liekolelo liaye wa vokiyako loku pula hati: “Siti via sonehiwa velivulu liove?” (Osamo 56:8) Ocili okuti, Yehova o kapako omanu kuenda ivaluka asuẽlẽla etu osi kuenda olohali omo lioku pandikisa kuetu loku amamako oku pokola kokuaye. Asuẽlẽla aco a soliwe calua laye.
Ndomo Ocisola ci tu Kuatisa Oku Yula Usumba
16 Satana wa kũlĩha okuti etu tu tenda omuenyo okuti u kuete esilivilo lialua. Eye wa popia hati, tu pondola oku eca cosi tu kuete oku kongelamo oku nyõla ukamba wetu la Yehova, oco tu yovole omuenyo wetu. (Yov 2:4, 5) Eci Satana a popia haciliko! Omo okuti Satana “o kuete unene woku koka olofa,” eye o kuama usumba tu kuetele olofa oco tu liwekepo oku vumba Yehova. (Hev 2:14, 15) Olonjanja vimue vana va tiamẽla ku Satana, va seteka oku ponda afendeli va Yehova omo okuti, ka va yongola oku liwekapo kekolelo liavo. Ale pamue Satana o seteka oku tu konyuisa, nda tu kasi luveyi umue u kapa kohele omuenyo wetu. Olondotolo, ale apata ana okuti Halombangiko Via Yehova, pamue va tu kisika oco tu tave oku tambula osonde, okuti ocina cimue ci lipatãla locihandeleko ca Suku. Ale pamue omunu umue o seteka oku tu kisika oku sakuiwa lonjila yimue ka yi likuata lolonumbi Viembimbiliya.
17 Ndaño okuti ka tu yongola oku fa, tua kũlĩha okuti Yehova lalimue eteke a ka liwekapo oku tu sola nda tua fa. (Tanga Va Roma 8:37-39.) Eci akamba va Yehova va fa ovo va amamako vovisimĩlo viaye ndu okuti, handi va kasi lomuenyo. (Luka 20:37, 38) Eye o ka va nena vali komuenyo. (Yovi 14:15) Yehova wa feta ondando yimue yalua oco tu ‘kuate omuenyo ko pui.’ (Yoano 3:16) Etu tua kũlĩha okuti Yehova o tu kuetele ocisola calua kuenda wa tu kapako. Yehova ka tu yanduluka eci tu vela, ale tu kala kohele yoku fa omo liaco, tua kolela kelembeleko liaye kolondunge kuenda kongusu yaye. Eci oco ca linga manji Valérie kumue lulume waye.—Os. 41:3.
Ovina vi Sangiwa Vembimbiliya
Perspicaz-2 kem. 708-709
Oku Sokiya
Ocituwa ca Yuda Isikariote coku pakula, ca tẽlisa ovisonehua kuenda ca situlula unene wa Yehova lowu womõlaye. (Os 41:9; 55:12, 13; 109:8; Ovl 1:16-20) Eci ka ci lekisa okuti Suku wa sokiyile ale okuti Yuda o linga ocina caco. Ovitumasuku via lekisile lika okuti, umue pokati kakamba va Yesu u ko pakula, pole, ka via tukuile onduko yomunu waco. Handi vali, nda Suku wa tukuile ale ovituwa via Yuda, nda ka ca likuatele lolonumbi Viembimbiliya. Onumbi ya Suku ya tukuiwa lupostolo yeyi yokuti: “Lalimue eteke, ku ka kape lonjanga ovaka kulume umue; ndaño oku litenga vakandu a vakuene; kuenje amamako oku pua etondelo.” (1Ti 5:22; sokisa 3:6.) Yesu oco a lekise okuti 12 kovapostolo va nõliwa lolondunge kuenda lonjila ya sunguluka, wa pita uteke wosi loku likutilila ku Isiaye osimbu ka situluile onjila a nõlapo. (Luk 6:12-16) Nda Suku wa sokiyile ale okuti Yuda o ka linga omakuli, eci nda ka ca likuatele lonjila ya Suku yoku songola kuenda ndomo ci lekisiwa, eye nda wa panga onepa kakandu Yuda a linga.
Omo liaco, eci Yuda a nõliwa oco a linge upostolo, utima waye ka wa situluile ondimbukiso layimue yi lekisa okuti eye o ka linga omakuli. Eye wa ecelela okuti olumbombo lumue luevĩho lukula, loku u vĩhisa kuenje co yapuisa kuenda ka tavele konumbi ya Suku, pole wa tava konumbi ya Satana yoku kala ocimunu kuenda omakuli. (Hev 12:14, 15; Yoa 13:2; Ovl 1:24, 25; Tia 1:14, 15; talavo YUDA No. 4.) Eci oku yapuisiwa kuaco kua fetika oku lisitulula, Yesu wa limbuka eci ca kala vutima wa Yuda, loku situlula okuti eye u ko pakula.—Yoa 13:10, 11.