“Ka Ndi Kuatisa Oku Vetiya Ovitima Viomanu”
VOLUPALE luo Porto Alegre, kombuelo yofeka yo Brazil, mua lingiwa ohongele yimue mua kongelele olombiali viokolofeka vialua. Kohongele yaco, kua kala omanu valua va tunda kueci ci soka 135 kolofeka. Vokuenda kuepuluvi liepuyuko, ocimunga cimue Colombangi Via Yehova, ca tunda kekongelo lio Porto Alegre, va endele ocipepi lomanu vamue va kala kohongele yaco, oco vava kundile olondaka viwa Viusoma. Vamanji va tẽla ndati oku sapela lavo?
Manji umue ukãi okuti ukundi wotembo yosi o tukuiwa hati, Elizabete, wa popia hati: “Tua va kundila olondaka viwa lekuatiso liokalivulu Boas Novas Para Pessoas de Todas as Nações.” Eye wa amisako hati: “Omanu valua va kala kohongele yaco, ndaño ka va la yeva olondaka viwa Viusoma, pole va tava kesapulo tua va kundila. Tua kundila omanu va tunda kolofeka vimue ndeci: Ko Bolivia, ko China, ko França, ko India, ko Israel, kuenda ko Nigeria. Omanu vamue va tambula lesanju alivulu amue tua ambatele a sandekiwa kelimi liavo.”
Kofeka yo Mexiku manji umue ukundi wotembo yosi o tukuiwa hati, Raúl, wa kuata onima yiwa poku kundila omanu lokalivulu kaco. Eteke limue, wa sapelele lulume umue o vangula elimi lio Arabe o kuete 80 kanyamo okuti otembo yaco ndopo a fisa ukãi waye. Ulume waco, noke yoku tanga esapulo li sangiwa vokalivulu kaco kelimi liaye, wa fetika oku lila omo liesanju. Momo lie? Ohuminyo ya Suku yokuti oku fa ka ku ka kalako vali, yi sangiwa kelivulu Liesituluilo 21:3, 4, yo lembeleka calua, momo wa yi tanga kelimi liaye muẽle. Eteke likuavo eci manji Raúl a kala oku kundila volokololo, wa li sanga lulume umue o vangula elimi Lioputu. Ulume waco wa fisa omõla waye. Manji Raúl wa pinga kokuaye oco a tange kelimi Lioputu esapulo li sangiwa vokalivulu. Noke lioku tanga ulandu waco, ulume wa lekisa onjongole yoku lilongisa ovina vikuavo viatiamẽla Kembimbiliya, kuenda wa tava oku linga elilongiso liaco konjo yaye.
Manji Raúl wa kunda olondaka viwa lekuatiso liokalivulu Boas Novas Para Pessoas de Todas as Nações oco a ece uvangi komanu va vangula elimi lio Arménio, lio Chinês, Liongelesi, lio Francês, lio Alemão, lio Hindi, lio Koreano, lio Mixe, lio Persa, lio Russo, kuenda lio Zapotec. Eye wa popia hati: “Nda limbuka esilivilo lioku talavaya lokalivulu kaco kupange woku kunda. Okalivulu kaco, ka ndi kuatisa oku vetiya ovitima viomanu valua, ndaño si vangula elimi liavo.”
Omo okuti omanu valua va siata oku linga ovongende loku ilukila kolofeka vikuavo, tu kuete epuluvi lioku va kundila olondaka viwa velimi liavo. Omo liaco, tu pondola oku va kundila esapulo Liusoma lekuatiso liokalivulu Boas Novas Para Pessoas de Todas as Nações. Ove hẽ wa siata oku ambata okalivulu kaco kupange woku kunda?
[Elitalatu kemẽla 32]
Manji Raúl lokalivulu ko kuatisa oku vetiya ovitima viomanu