Ceci o Kuata Omõla Umue wa Lemãla

Ove hẽ ivaluka eteke omõlove a citiwa? Ocili okuti, wa kuatele onjongole yoku u langata. Pole, kolonjali vimue ndeci Carlo la Mia, esanju liavo lieya oku pongoloka esumuo eci va va sapuila okuti, omõlavo wa citiwa lulema.

O kuete hẽ omõla umue wa lemãla? Citava okuti o lipula ndomo o pondola oku yula ocitangi caco. Pole, ku ka konyõhe. Olonjali vialua ndove, via siatavo oku yula ovitangi ndevi o kasi oku liyaka lavio. Konomuisa ovitangi vitatu via siata calua pokati komanu, kuenda kũlĩhĩsa ndomo olonumbi Viembimbiliya vi pondola oku ku kuatisa.

OCITANGI 1: OVE KU TAVA OKUTI OMÕLOVE WA LEMÃLA.

Olonjali vialua, ka vi yongola oku yeva okuti, omõlavo wa kuatiwa luvei umue. Ukãi umue o tukuiwa hati, Juliana wo kofeka yo Mesiku, wa popia hati: “Eci olondotolo via ndi sapuila okuti omõletu Santiago, wa kuatiwa luvei vowoño, sia tavele. Nda simĩle siti, oluali lua imũha.” Olonjali vimue via siata oku kuata ovisimĩlo ndevi viukãi umue wo ko Italia o tukuiwa hati, Villana. Eye wa popia ndoco: “Nda nõlelepo oku cita omõla, ndaño okuti oku ci linga ca ponduile oku ndi nenela ovitangi omo liutunga wange. Cilo omo omõlange o kuete uvei umue vowoño, nda siata oku livetela evelo.”

Nda ove wa siata oku yokoka, ale oku livetela evelo, kolela okuti ovisimĩlo viaco via sunguluka. Ulema ka wa pangele onepa kocipango ca Suku. (Efetikilo 1:27, 28) Momo Suku ka lulikile olonjali lepondolo lioku tava oku cita omõla umue wa lemãla. Ocili okuti, pamue o “liyeya” omo liulema womõlove. Oco esumuo liove li pite, o sukila oku pita otembo yalua pole, ocitangi caco o ka ci yula.

Anga hẽ o kuete ekandu omo liulema womõlove? Ivaluka okuti lomue o kuete elomboloko lia suapo lia tiamẽla kovitangi tua piñala kuenda ovina vikuavo via siata oku kokela omãla oku lemãla. Handi vali, pamue o vetela evelo ohueli yove. Yuvula oku lihoyisa lohueli yove. Nda wa likolisilako oku kuatisa ohueli yove, o linga ocina ca velapo poku tata omõlene.—Ukundi 4:9, 10.

ONUMBI: Lilongisila kocitangi comõlove. Embimbiliya li popia hati: “Kuata olondunge oco o kuate epata liwa, kuata ukũlĩhĩso u pamisa epata.”—Olosapo 24:3, New Century Version.

O pondola oku lilongisa ovina vialua lolondotolo kuenda valivulu a koleliwa. Citava okuti o sokisa ovitangi omõlove a kuete loku lilongisa elimi likuavo. Ndaño okuti kefetikilo ka ca lelukile, haimo lumue o pondola oku ci linga.

Carlo la Mia va tukuiwa kefetikilo liocipama cilo, va sandiliya olonumbi kolondotolo kuenda ekuatiso liovisoko vina via kũlĩha ciwa ovitangi viomãla va kuete ulema. Noke va popia vati: “Oku ci linga ka ca tu kuatisile lika oku kuata elomboloko liocitangi tua liyaka laco, pole, ca tu kuatisavo oku kuata elomboloko liovina ‘viwa’ omõla wa lemãla a pondola oku linga. Tua limbuka okuti, omõletu o pondola oku linga ovina vialua ndomanu vakuavo va kasi ciwa. Kuenje, ovina viaco via tu lembeleka calua.”

OCITANGI 2: OVE O SIMA OKUTI WA KAVA KUENDA O KASI ULIKA.

Pamue o sima okuti oku tata omõla wa lemãla ci tepulula ongusu yove. Ukãi umue o tukuiwa hati, Jenney wo ko Nova Zelandia, wa popia hati: “Noke yanyamo amue tunde eci omõletu a kuatiwa luvei voluongo, nda lila calua omo lioku sokolola, kuenda oku seteka oku linga cosi ndi tẽla.”

Ocitangi cikuavo, oku sima okuti, o kasi lika liove. Ben o kuete omõla umue o kuete uvei wo Asperger. Eye wa popia hati: “Omanu valua lalimue eteke va ka kuata elomboloko ndomo omuenyo wetu u kasi. Ove pamue o yongola oku sapela lomunu umue. Omo okuti akamba vove va kuete omãla va kasi ciwa, pamue o kuata ohele yoku vangula lavo.”

ONUMBI: Pinga ekuatiso. Kuenda eci va ku ĩha ekuatiso liaco tava. Juliana, tua tukula vocipama cilo, wa popia hati: “Olonjanja vimue, ulume wange o yeva osõi yoku pinga ekuatiso.” Noke wa amisako hati: “Tua lilongisa okuti, tu sukila ekuatiso liomanu vakuavo. Kuenje, eci omanu va tu kuatisa ka tu liyevi okuti tu kasi ulika.” Nda ekamba limue ale umue ngandiove o pinga oco a tumãle lomõlove wa lemãla eci vu kala kocipito cimue, ale kohongele Yakristão, tava lesanju kepingilo liaco. “Ekamba li sola olonjanja viosi, kuenje li linga manjove koloneke viohali.”—Olosapo 17:17.

Tata ciwa uhayele wove. Ndeci ekãlu lioku ambata olombei kosipitali li sukila oku kapiwa ongasolina oco lia amameko oku talavaya ciwa, cimuamue haico o sukilavo oku linga poku likolisilako oku vokiya ongusu yove leteku liwa, oku pindisa etimba liove, kuenda oku puyuka ciwa okuti, amamako oku eca ekuatiso lina omõlove a sesamẽla. Javier okuti o kuete omõla umue wa lemãla, wa popia hati: “Omo omõlange ka ci tẽla oku enda, ndi seteka oku lia ciwa. Momo ame nda siata oku wambata oco tu ñuale ñuale. Ovolu ange, a linga ovolu aye!”

Ndamupi o tata uhayele wove? Olonjali vimue vi litambolamo oku tata omõlavo. Oku ci linga cecelela okuti umue pokati kavo o puyuka ciwa, ale o linga ocina cikuavo. Ku ka taluke loku linga ovina ka vi kuete esilivilo, okuti vi ku tateka oku lekisa esunguluko. Linga ndeci ukãi umue o tukuiwa hati, Mayuri wo ko India a linga. Eye wa popia hati: “O sukila oku linga esokiyo liwa.”

Vangula lekamba limue lia koleliwa. Ndaño okuti akamba vove ka va kuete omõla wa lemãla, ovo va pondola oku ku yevelela lohenda. O sukilavo oku likutilila ku Yehova Suku. Anga hẽ ohutililo yi pondola oku ku kuatisa muẽle? Yazmin o kuete omãla vavali va vela uvei wo fribrose cística wa popia hati: “Kua kala olonjanja vimue nda simĩle siti, ndi fa omo liesakalalo lialua nda kuata.” Eye wa amisako hati: “Nda likutilila ku Yehova oco a ndi pamise. Kuenje, nda limbuka okuti, ndi pondola oku yula ocitangi caco.”—Osamo 145:18.

OCITANGI 3: OVE WA SAKALALA CALUA LOKU TATA OMÕLA O VELA OKUTI EPUYUKO LIEPATA CI SULE.

Ekalo liomõla o vela, li pondola oku tateka eci epata li lia, oku li yongola oku enda, kuenda otembo va sukila oku pita lomãla vosi. Kuenje, omãla vakuavo, va sima okuti ka va soliwe. Omo liaco, olonjali vi kuata esakalalo loku tata omõlavo o vela, kuenje, va pondola oku kuata ovitangi volohuela viavo. Ulume umue o tukuiwa hati, Lionel wo kofeka yo Liberia, wa popia hati: “Olonjanja vimue, ukãi wange o ndi sapuila hati, o kuete upange walua, kuenda ame si kasi oku tata omõletu o vela. Omo lioku sima okuti ukãi wange ka ndi sumbilile, nda enda oku u tambulula lukãlu.”

ONUMBI: Oco vu kuatise omãla vosi oku kolela okuti va soliwe, sokiyi oku lingila kumosi upange umue va sole. Jenney, tua tukula ale, wa popia hati: “Onjanja yimue, tua lingila ocina cimue cilikasi omõletu ukulu, okuti tua endele laye vo bar yimue a sole calua.”

Oco o teyuile olohuela viove, vangula lohueli yove kuenda lingili kumosi olohutililo. Ulume umue o tukuiwa hati, Aseem, wo kofeka yo India, okuti o kuete omõla o vela uvei woku lisalokako, wa popia hati: “Ndaño okuti olonjanja vimue ukãi wange o kava calua kuenda o sumua, tua enda oku linga ocina cimue okuti, tu tumãla oco tu sapele kuenda tu lingila kumosi ohutililo. Oloneke viosi komẽle osimbu handi omõletu ka pasukile, tu pita otembo yimue kavali ketu oku konomuisa ocinimbu cimue Cembimbiliya.” Olohueli vimue vi kuete ocituwa coku sapela pokolika osimbu handi ka via pekelele. Oku sapela pokolika, loku linga olohutililo lutima wosi, ku pamisa olohuela viove kotembo yohali. (Olosapo 15:22) Olohueli vimue via popia viti: “Ocina cimue ciwa vomuenyo wetu, oku kala pamosi kotembo yovitangi.”

LEKISA EKOLELO

Vembimbiliya, mu sangiwa ohuminyo yokuti, ndopo Suku o ka mãlako ovovei osi kuenda ulema wa siata oku nenela ovitangi komãla kuenda kakulu. (Esituluilo 21:3, 4) Kotembo yaco, ‘layimue onungi yi ka popia vali yiti, ndi vela.’b—Isaya 33:24.

Pole, osimbu handi otembo yaco ka yeyile, o pondola oku yula ocitangi coku kuata omõla umue wa lemãla. Carlo la Mia tua tukula kefetikilo liocipama cilo, va popia vati: “Eci o limbuka okuti ovina vimue vi molẽha ndu okuti, ka vi kasi oku enda ciwa, ku ka yokoke. Omo omõlove wa lemãla o pondola oku linga ovina vialua viwa, tiamisila utima kovina viaco.”