Kala Vocimbota Ca Yehova Oco O Popeliwe

1, 2. Uyaki upi afendeli va Suku va lavoka, kuenda nye tu sukila oku yuvula?

KETEKE lia 30, kosãi ya Mbalavipembe kunyamo wo 1938, omanu valua ko Estados Unidos, va yevelela ovipama vimue vovingungu viasapulo viatiamẽla kolomapalo. Vasapulo aco va lombolola okuti, koñolosi ku ka lekisiwa ofilme yimue yatiamẽla Kuyaki u ka Pita Voluali. Vakuavingungu viaco viasapulo va popia vati, Volumbungululu luo Marte mu ka tunda ofela yimue yi ka nyõla Ongongo. Ndaño okuti ovingungu viasapulo via tukula ulandu waco, pole, olonjeveleli vialua via sima okuti, ocilunga caco ca laikele oku iya, kuenje va kuata usumba. Omo liaco, omanu vamue va sandiliya onjila yoku liteyuila kocilunga caco.

² Koloneke vilo, tu kasivo oku lavoka uyaki umue. Pole, omanu ka va kapeleko okuiya kuocilunga caco. Uyaki waco ka watiamẽlele kovina viuhembi, pole, wa tukuiwa Vondaka ya Suku yi sangiwa Vembimbiliya. Uyaki waco u tukuiwa hati, o Harmagedo, momo owo u ka nyõla oluali lulo lua vĩha. (Esit. 16:14-16) Keteke liaco, afendeli va Suku ka va ka sukila oku liteyuila ovo muẽle, ndeci omanu va setaka oku liteyuila kocilunga columbungululu ca tukuiwa ndeti. Pole, va ka komoha calua omo liovilunga vi ka pita voluali, kuenda ovina vi ka lingiwa lunene wa Suku.

3. Ocitumasuku cipi tu kũlĩhĩsa, kuenda momo lie ci kuetele esilivilo kokuetu?

³ Ocitumasuku Cembimbiliya ci sangiwa kelivulu lia Sakariya kocipama 14, ci tukula uyaki wo Harmagedo. Ndaño okuti tunde eci ocitumasuku caco ca sonehiwa pa pita ale 2.500 kanyamo, pole, ci kuete esilivilo kokuetu. (Va Rom. 15:4) Ocitumasuku caco, ci tukula ovitangi via siata oku pita lafendeli va Yehova, tunde kunyamo wo 1914 eci Kristu a fetika oku viala kilu, kuenda ovina vikuavo vi ka pita kovaso yoloneke. Ocitumasuku caco, ci tu sapuilavo ovina viatiamẽla ‘kocimbota cimue cinene’ mu pita “ovava omuenyo.” (Sak. 14:4, 8) Ocimbota caco ci kuete esilivilo lia velapo, momo ci teyuila afendeli va Yehova. Nda tua limbuka esilivilo liovava aco omuenyo, ci tu vetiya oku a sandiliya, kuenda oku a nyua. Omo liaco, tu sukila oku kapako ocitumasuku caco, oco tu kuatisiwe.​—2 Pet. 1:19, 20.

‘ETEKE LIA YEHOVA’LI FETIKA

4. (a) ‘Eteke lia Yehova’ lia fetika o tembo yipi? (b) Esapulo lipi afendeli va Yehova va sandeka oku upisa kunyamo wo 1914? Asongui vatavo va tambulula ndati esapulo liaco?

⁴ Ocitumasuku ca Sakariya ci sangiwa kocipama 14, ci fetika lolondaka viokuti, ‘eteke lia Yehova.’ (Tanga Sakariya 14:1, 2.) Eteke liaco li lomboloka nye? Li lomboloka ‘eteke lia Ñala,’ okuti lia fetika eci ‘uviali woluali wa linga uviali wa Suku yetu, kuenda wa Kristu.’ (Esit. 1:10; 11:15) Eteke liaco lia fetika kunyamo wo 1914, eci Yesu a fetika oku viala kilu. Osimbu afendeli va Yehova ka va pitĩlile kunyamo wo 1914, va sapuila omanu vati, “oloneke via vakualofeka,” vi ka sulila kunyamo waco. Noke, ku fetika otembo yikuavo yovitangi vialua voluali. (Luka 21:24) Anga hẽ vakualofeka va kapeleko esapulo liaco? Sio, ka va kapeleko esapulo liaco, momo asongui vatavo esanda kumue lolombiali violuali, va fetika oku lambalala olombuavekua via kala oku kunda olondaka viwa. Ocituwa caco ci lekisa okuti, ka va sumbilile Suku Ukuonene wa velapo, momo Akristão olombuavekua ovo olonumiwa Viusoma wa Suku u kasi peka lia Mesiya.​—Va Hev. 12:22, 28.

5, 6. (a) Ovina vipi ovanyãli va linga kafendeli va Yehova va kala ‘volupale’? (b) Velie va ‘amamako oku pandikisa lekolelo’?

⁵ Uprofeto Sakariya wa tukula ovina vakualofeka va laikele oku linga poku popia hati: ‘Olupale luo Yerusalãi lu ka kuatiwa.’ ‘Olupale’ lua tukuiwa ndeti, lu lomboloka Usoma wa Suku u kasi peka lia Mesiya. Omo liaco, Akristão olombuavekua va siala palo posi, va panga onepa kuviali waco. (Va Fil. 3:20) Vokuenda Kuyaki Watete wa pita Voluali, vamanji vana va kala oku songuila upange vocisoko ca Yehova, ‘va kuatiwa,’ kuenda va kapiwa vokayike ko Estados Unidos, volupale luo Atlanta, ko Georgia. Kuenje, ovina via kala volonjo via vamanji ‘via nyaniwa,’ kuenda va talisiwa ohali omo liekolelo liavo. Ovanyãli vaco, va kangisa Akristão olombuavekua, kuenje, va tambula alivulu avo, kuenda va tumbika ocihandeleko coku tateka upange woku kunda olondaka viwa.

⁶ Ndaño okuti ovanyãli va lambalalele afendeli va Yehova loku va lundila ovina ka va lingile, pole, ka va tẽlele oku malako efendelo liocili. Momo kua kala ‘Akristão olombuavekua okuti va amamako oku pandikisa lekolelo,’ kuenda ‘ka va tavele oku tundisiwa volupale.’

7. Ongangu yipi yiwa Akristão olombuavekua va sila afendeli va Yehova koloneke vilo?

⁷ Ocitumasuku eci ca tẽlisiwa hẽ kesulilo Liuyaki Watete wa pita Voluali? Sio, ka ca tẽlisiwile. Momo ovanyãli va amamako oku lambalala Akristão olombuavekua, kumue la vamanji vosi va kuete elavoko lioku kala palo posi. (Esit. 12:17) Uvangi waco, u limbukiwila Kuyaki wavali wa pita Voluali. Ekolelo Akristão olombuavekua va lekisa, li tu kuatisa oku pandikisa poku liyaka lovitangi, oku kongelamo elambalalo li tunda komanu ka va fendela Yehova, ku vana tu talavaya lavo kupange umuamue, kuenda ku vana tu tangela kosikola yimuamue. (1 Pet. 1:6, 7) Kolonepa viosi afendeli va Yehova va kasi, va nõlapo oku amamako ‘oku pandikisa lekolelo, kuenda ka va yokokela ovanyãli vavo.’ (Va Fil. 1:27, 28) Afendeli va Yehova va pondola ndati oku sanga ekuatiso voluali lulo lue yuka esuvu?​—Yoa. 15:17-19.

YEHOVA O SOKIYA ‘OCIMBOTA CIMUE CINENE’

8. (a) Olomunda via tukuiwa Vembimbiliya vi lomboloka nye? (b) ‘Omunda yo Oliveira’ yi lomboloka nye?

⁸ Omo okuti ‘olupale’ luo Yerusalãi vupopi wocindekaise lu lomboloka Usoma wa Suku, ‘Omunda yo oliveira yina yi lisungue lo Yerusalãi’ yi tiamisiwilavo vupopi wocindekaise. Omunda yaco yi lomboloka nye? Ya toka ndati pokati okuti ya linga olomunda vivali? Momo lie Yehova a vi tukuila hati ‘olomunda viange’? (Tanga Sakariya 14:3-5.) Vembimbiliya, olomunda vi lomboloka olosoma, ale olombiali. Olio li lekisavo okuti komunda yaco, oko ku tunda asumũlũho kuenda eteyuilo afendeli va Yehova va siata oku tambula. (Osa. 72:3; Isa. 25:6, 7) Omunda yo oliveira yi kasi kutundilo wo Yerusalãi kuna Yehova Suku atãi, yi lomboloka unene waye woku viala.

9. ‘Omunda yo Oliveira’ ya tepiwa ndati pokati?

⁹ Oku tepiwa kuomunda yo oliveira ku lomboloka nye? Omunda yi sangiwa kutundilo wo Yerusalãi, yi lomboloka okuti, Yehova wa tumbika uviali wavali u kuete ocimãho cimue cilikasi. Uviali waco wavali, u kasi peka lia Yesu Kristu okuti eye Mesiya. Eli olio esunga lieci Yehova a tukuila olomunda viaco vivali hati ‘viange.’ (Sak. 14:4) Omo liaco, olomunda via tukuiwa ndeti viosi viaye.

10. ‘Ocimbota cinene’ ci kasi pokati kolomunda vivali ci lomboloka nye?

¹⁰ Eci omunda yocindekaise ya tepiwa pokati okuti onepa yimue konano yikuavo kombuelo, Yehova wa amamako oku liatela kolomunda viaco. Omo liaco, olomãhi via Yehova vi kasi ‘kocimbota cinene.’ Ocimbota caco cocindekaise, ci lomboloka eteyuilo li tunda ku Yehova kuenda Kuviali Womõlaye Mesiya. Yehova ka ka ecelela okuti, efendelo liaye liocili li nyõliwa. Otembo yipi omunda yo oliveira ya tepiwa pokati? Ya tepiwa kunyamo wo 1914, eci Otembo ya Vakualofeka ya pitĩla kesulilo okuti, oco Usoma wa Mesiya wa tumbikiwa kilu. Otembo yipi afendeli va Yehova va fetika oku iñila vocimbota cocindekaise?

AFENDELI VA YEHOVA VA FETIKA OKU TILILA VOCIMBOTA!

11, 12. (a) Otembo yipi afendeli va Yehova va fetika oku iñila vocimbota cocindekaise? (b) Nye ci lekisa okuti Yehova wa siata oku teyuila afendeli vaye?

¹¹ Yesu wa sapuila olondonge viaye hati: ‘Vu ka suvukiwa lolofeka viosi omo lionduko yange.’ (Mat. 24:9) Elambalalo liafendeli va Yehova lia livokiya oku u pisa kunyamo wo 1914, eci oloneke via sulako violuali lulo via fetika. Ndaño okuti vokuenda Kuyaki Watete wa pita Voluali olombuavekua via siala palo posi via lambalaliwa calua lovanyãli vavo, pole, vamue pokati kavo ka va pondiwile. Momo kunyamo wo 1919, olombuavekua via yovuiwa ko Bavulono Yinene okuti, oyo ono yatavo esanda voluali. (Esit. 11:11, 12)a Kotembo yaco, oco afendeli va Yehova va fetika oku iñila vocimbota caco.

¹² Tunde kunyamo wo 1919, ocimbota ca Yehova, ci kasi oku amamako oku teyuila afendeli vocili palo posi. Kolonepa viosi violuali, ovanyãli va siata oku handeleka Olombangi Via Yehova, oco vi liwekepo oku kunda olondaka viwa, kuenda oku sandeka alivulu. Etateko liaco li kasi oku amamako kolofeka vimue. Ndaño okuti ovanyãli va kasi oku ci linga toke cilo, pole, ka va tẽla oku imula efendelo liocili! Momo Yehova o kasi oku teyuila afendeli vaye.​—Esin. 11:2.

13. Tu pondola ndati oku kala vocimbota ca Yehova ceteyuilo? Momo lie koloneke vilo omanu va sukilila oku iñila vocimbota caco?

¹³ Nda tua kolela Yehova loku kala vefendelo liocili, eye kumue Lomõlaye Yesu Kristu, ka va ka ecelela okuti, cimue ci tu ‘tepa Kokuaye.’ (Yoa. 10:28, 29) Nda tu tava okuti Yehova eye Ombiali Yavelapo loku pokola Kusoma wa Mesiya, eye o tu kuatisa. Omo liaco, tu amamiko oku kala vocimbota ceteyuilo, momo ci kuete elomboloko liavelapo kafendeli vocili vokuenda kuohali ya piãla tu lavoka.

‘ETEKE LIUYAKI’ WA YEHOVA LI KASI OCIPEPI

14, 15. Nye ci ka pita lomanu ka va iñilile vocimbota eci ‘Yehova a ka nyõla ovanyãli vaye’?

¹⁴ Omo okuti esulilo lioluali lulo li kasi ocipepi, Satana o kasi oku lambalala calua afendeli va Yehova. Noke, ku keya ‘eteke Yehova a ka linga uyaki’ woku nyõla ovanyãli vaye. Kuenje, Yehova o ka ecelela okuti, Satana o linga oseteko yaye ya sulako. Omo okuti Yehova eye Ombiali yoluali, keteke liaco, o ka linga uyaki umue wa velapo ‘ovoyaki’ osi a linga kosimbu.​—Sak. 14:3.

¹⁵ Keteke liuyaki wa Yehova, nye ci ka pita lomanu ka va iñilile ‘vocimbota’ ceteyuilo? Omanu vaco, ka va ka kuata ‘ocinyi’ ca Yehova okuti ci va tuila. Keteke liaco liuyaki wa Yehova, ovinyama vimue ndeci: ‘Otuvalu, lolomula, olongamelo, ovimbulu, kuenda ovinyama viosi vi sangiwa kovilombo’ okuti vi lomboloka asualali vo kolofeka vialua va kuete ovimalẽho, vi ka nyõliwa. Kuenje, ovimalẽho viavo, vi ka linga ‘ocikokoto. Keteke liaco, Yehova o ka nenavo “afengi,” kuenda ovina vikuavo. Cikale okuti afengi aco a ka muiwa lovaso ale sio, pole, a ka kokela omanu usumba walua. Keteke lia Yehova, ovaso omanu a ka vola, kuenda alimi avo, a ka volela vovimẽla viavo,’ momo vana va ka linga uyaki waco, va ka tẽla oku ponda olomeke, kuenda alimi avo ka a ka tumbuka ondaka yimue. (Sak. 14:6, 7, 12, 15) Ocilunga caco ci ka pita voluali luosi. Omanu vosi va kasi konele ya Satana va ka kuata usumba walua. (Esit. 19:19-21) Kuenje, ‘keteke liaco, omanu va ka pondiwa la Yehova va ka li nyalẽha kolonepa viosi viokilu lieve.’​—Yer. 25:32, 33.

16. Omo okuti eteke lia Yehova li kasi ocipepi, apulilo api tu sukila oku kũlĩhĩsa, kuenda nye tu sukila oku linga?

¹⁶ Uyaki wa siata oku nena ohali yalua komanu oku kongelamo vana va yula uyaki waco. Citava okuti noke liuyaki, ku kala ekambo liokulia, olonjo vi tambuiwa lomanu vakuavo, kuenje omanu va liyaka lovitangi vialua, kuenda ka va kuata elianjo. Nda kovaso yoloneke tua ka pita lovitangi viaco nye tu sukila oku linga? Tu ka kuata hẽ usumba? Tu ka liwekapo hẽ oku vumba Yehova omo lielambalalo? Anga hẽ tu ka pua elavoko? Vokuenda kuohali ya piãla, tu sukila oku pamisa ekolelo lietu poku kolela kunene wa Yehova kuenda oku amamako oku kala vocimbota ceteyuilo liaye!​—Tanga Havakuki 3:17, 18.

‘OVAVA OMUENYO A KA PITA’

17, 18. (a) “Ovava omuenyo” a lomboloka nye? (b) Nye ci lomboloka ‘okalunga kokutundilo,’ kuenda ‘okalunga kokutakelo’? (c) Nye wa nõlapo oku linga osimbu tu lavoka ovina vi keya kovaso yoloneke?

¹⁷ Noke liuyaki wo Harmagedo, tu ka amamako oku tambula “ovava omuenyo” a tunda kocalo Cuviali wa Mesiya. ‘Ovava aco omuenyo,’ a lomboloka eliangiliyo lia Yehova lioku eca omuenyo ko pui. ‘Okalunga ka kasi kutundilo,’ ka lomboloka Okalunga Kõha, kuenda ‘okalunga kokutakelo,’ ka enda toke Vokalunga ko Mediteraneo. Olokalunga vivali via tukuiwa ndeti, vi lomboloka omanu. Okalunga Kõha, ka lomboloka omanu vosi va fa. Omo okuti Okalunga ko Mediteraneo ka kuete akimba, ka lomboloka “owiñi wakahandangala” u ka puluka kuyaki wo Harmagedo. (Tanga Sakariya 14:8, 9; Esit. 7:9-15) Owiñi wakahandangala kuenda omanu vana va fa, vosi yavo va ka yovuiwa kolofa via tunda ku Adama, poku nyua kovava a tunda ‘volui luovava omuenyo.’​—Esit. 22:1, 2.

¹⁸ Yehova o ka tu popela kesulilo lioluali lulo lua vĩha, kuenje, tu ka iñila voluali luaye luokaliye muna mu ka kala esunga. Ndaño okuti tua siata oku suvukiwa lolofeka viosi, pole, tua nõlapo oku pokola Kusoma wa Yehova Suku, kuenda oku kala vocimbota ceteyuilo liaye.