Tu Kuatisa Ndati

Citava okuti, wa kũlĩha omunu umue wa linyãla, ale omanu valua va kuete ocitangi caco. Momo, oku linyãla kua siata calua pokati komanu. Akonomuiso a lingiwa kofeka yo Polonia a lekisa okuti, ci soka 30 kanyamo a pita, valua pokati ka vana va tokekisa olohuela va linyãla noke yolosãi vitatu, ale epandu. Pole, amalẽhe havoko lika va siata oku linyãla.

Ocisoko cimue Coku eca Olonumbi Via Sunguluka Vepata kofeka yo Espanya, ca lombolola okuti, “ovolandu a lekisa okuti, [kocifuka co Europa] onepa yalua yomanu va tokekisa olohuela, va siata oku linyãla.” Kolofeka vina kuli ovokuasi, omanu vana va tokekisa olohuela, va siatavo oku liyaka locitangi caco.

ULIKA LOVISIMĨLO VIOKUTI OMUNU KA KAPIWILEKO

Ovina vipi via kongeliwa vocitangi caco okuti, ca siata oku sumuisa omanu valua? Ukãi umue o kuele haeye ondunguli wo kofeka yimue yo kutundilo kocifuka co Europa wa popia hati: “Oku linyãla ku eca uvangi wovina via pita volohuela ndeci: Oku tepa ukamba volohuela, kuenda ovitangi vi tunda koku litepa kuaco okuti, vi nena esumuo lialua.” Noke wa amisako hati: “Noke yoku linyãla omunu wa siala ulika o kala lonyeño yalua, o livetela evelo, ka kuata vali elavoko, o sumua, kuenda o kuata osõi.” Omanu vamue va siata oku kuata ovisimĩlo vioku liponda. “Eci ombonge yi tetulula ocitangi coku linyãla, omunu o fetika oku kuata ovisimĩlo vikuavo. Omo liovisimĩlo viokuti ka kuete esilivilo, pamue o popia hati: ‘Omo okuti cilo nda linyãla lohueli yange, ame elie? Ocimãho cipi ndi kuete komuenyo wange?’”

Manji Ewa poku sokolola ocitangi a liyaka laco anyamo a pita, wa popia hati: “Nda kuata osõi yalua eci nda linyãla lulume wange, kuenje, omanu va kala posongo yetu lakamba vange, va enda oku ndi tukula vati wa ‘linyãla.’ Nda kuata onyeño yalua. Omo okuti nda sialele lomãla vavali vatito, nda sukilile oku kala ina kuenda isiavo.”a Manji umue o tukuiwa hati, Adam wa kala ukulu wekongelo wa sumbiwile vokuenda kueci ci soka 12 kanyamo, wa popia hati: “Sia li kuatelele vali ocisola, kuenje, olonjanja vimue nda enda oku kuata onyeño yalua, kuenda oku yuvula oku kala lomanu.”

ELIKOLISILO LIOKU KUATA OVISIMĨLO VIA SUNGULUKA

Omanu valua noke lianyamo amue tunde eci va linyãla, va siata oku likolisilako oku kuata ovisimĩlo via sunguluka viatiamẽla kovaso yoloneke. Ovo pamue va siata oku sima okuti, ka va kapiwileko. Ulume umue usonehi wovikanda viasapulo wa popia hati, omanu vana va kuete ocitangi caco, va sukila “oku linga apongoloko kovituwa viavo, kuenda oku kũlĩha ndomo va pondola oku tetulula ovitangi viavo muẽle.”

Manji umue o tukuiwa hati Stanisław wa popia ndoco: “Eci tua linyãla, una wa kala ukãi wange ka ngecelele oku nyula omãla vange vavali vatito. Kuenje, ocitangi caco ca ndi vetiya oku sima okuti, lomue vali wa ndi kapako, kuenda Yehova wa ndi ­yanduluka. Sia kuatele vali onjongole yoku kala komuenyo. Pole, vokuenda kuotembo, nda limbuka okuti ovisimĩlo viange ka via sungulukile.” Manji umue wa linyãla lohueli yaye o tukuiwa hati Wanda, wa liyakavo lovisimĩlo ka via sungulukile viatiamẽla kovaso yoloneke poku popia hati: “Nda simĩle okuti, noke liotembo yimue, omanu vamue oku kongelamo vamanji, ka va ka lekisa vali onjongole kokuange kuenda komãla vange. Pole, cilo nda limbuka okuti, vamanji va ndi kapako, kuenda va siata oku ndi kuatisa osimbu nda amamako oku tata omãla oco va linge afendeli va Yehova.”

O pondola oku limbuka okuti, omanu vamue noke lioku linyãla va kuata ovisimĩlo ka via sungulukile. Pamue va kuata ovisimĩlo viaco omo lioku sima okuti, ka va kuete esilivilo, kuenda ka va sesamẽla oku kapiwako. Kuenje, va fetika oku popia lãvi omanu vana va kasi lavo. Noke, pamue va sima okuti, vamanji vekongelo ka va kuete ocisola, kuenda ka va sanjukile lomanu. Pole, ulandu wa manji Stanisław, kuenda wa manji Wanda, u lekisa okuti, vana va linyãla lohueli yavo, va pondola oku limbuka okuti, vamanji vekongelo va siata oku va kuatisa. Ocili okuti, vamanji va siata oku eca ekuatiso li sukiliwa ndaño okuti pamue kefetikilo ekuatiso liaco ka li limbukiwa lomanu.

CECI OVISIMĨLO VIULIKA LEVI VIOKUTI KA VA SOLIWE VI LIVOKIYA

Ivaluka okuti, ndaño tu likolisilako oku linga ovina via sunguluka, pole, vamanji vana va linyãla lolohueli viavo, olonjanja vimue, va sumua omo lioku kala ulika. Vamanji vamue akãi va linyãla lalume vavo, pamue va sima okuti, ka va kapiwileko. Manji umue o tukuiwa hati, Alicja wa popia ndoco: “Pa pita ale anyamo ecelãla tunde eci nda linyãla lohueli yange. Pole, olonjanja vimue ndi sima okuti, si kuete esilivilo. Pamue ndi nõlapo oku kala likaliange loku lila, kuenda oku likuatela ohenda ame muẽle.”

Ndaño ulandu wa tukuiwa ndeti u lekisa okuti ka ca lelukile omunu oku pandikisa noke yoku linyãla lohueli yaye, pole, Embimbiliya li tu lungula oku yuvula oku kala likalietu. Omunu wosi ka pokola kelungulo eli, o kasi oku yuvula ‘olondunge viocili.’ (Olosap. 18:1) Nda manji umue ulume o kasi ulika, o sukila oku kuata elomboloko liokuti, ka ca sungulukile oku sandiliya elungulo ale elembeleko ku manji umue ukãi olonjanja viosi. Cimuamue haico manji ukãi a sukila oku linga. Oku kapako onumbi ya tukuiwa ndeti, ci kuatisa oku yuvula oku kuata ovisimĩlo vi vetiya oku linga ukahonga.

Citava okuti vamanji va linyãla lolohueli viavo, va liyaka locitangi coku kala umbumba, oku kongelamo ovina vi ka pita kovaso yoloneke, ovisimĩlo vioku kala ulika, ale oku sima okuti, ka va soliwe lomanu. Omo okuti ovisimĩlo viaco via siata calua pokati ka vana va linyãla, kuenda ka ca lelukile oku yula ovitangi viaco, tu sukila oku kuama ongangu ya Yehova poku eca ekuatiso lietu ku vamanji vaco. (Osa. 55:22; 1 Pet. 5:6, 7) Tu sukilavo oku ivaluka okuti, va sanjukila ekuatiso liosi tu eca kokuavo. Nda tua ci linga, va pondola oku limbuka ekuatiso li tunda kakamba vocili va sangiwa vekongelo!—Olosap. 17:17; 18:24.