APULILO A LINGIWA LA VAKUAKUTANGA

Ca sunguluka hẽ Kakristão ocituwa coku timĩha etimba noke yoku fa?

Embimbiliya ka li lombolola nda ca sunguluka ale sio ocituwa coku timĩha etimba liomunu wa fa.

Vembimbiliya mu sangiwa ovolandu atiamẽla katimba omanu va fa, ale kakepa avo okuti, a timihĩwa. (Yeh. 7:25; 2 Asa. 34:4, 5) Pamue va ci lingila omo okuti, omanu vaco va fa ka va sesamẽlele oku kendiwa lonjila yimue ya sunguluka. Pole, ndaño atimba omanu vamue va fa a timihĩwa, pamue ka ci lekisa okuti, ka va sesamelẽle oku kendiwa lonjila yimue ya sunguluka.

Tu pondola oku limbuka ulandu waco poku konomuisa ovina via pita la Soma Saulu poku fa, kuenda omãla vaye vatatu. Eye kumue lomãla vaye vatatu, va fila kuyaki va linga la va Filisiti. Umue pokati komãla vaco, Yonatãu, una wa kala ekamba liwa okuti, wa kuatisile Soma Daviti. Va Isareli va kala ko Yavesi Gileada eci va yeva ocitangi caco, vongolola atimba aco akuãla, kuenje va a timĩha, kuenda va kenda akepa aco. Noke, Daviti wa sanjukila ovina va Isareli va linga.—1 Sam. 31:2, 8-13; 2 Sam. 2:4-6.

Embimbiliya li eca elavoko liepinduko, momo Suku o ka tumbulula omuenyo womanu va fa. Cikale okuti etimba liomunu wa fa li timihĩwa ale sio, Yehova o kuete uloño woku tumbulula omuenyo womunu letimba liokaliye. Amalẽhe vatatu va Heveru eci va imbiwa vofolono yondalu ya sokiyiwile la Soma Nevukandesa, ka va kuatele usumba wokuti, nda va fila vondalu yaco, Suku ka pondola oku va pindula. (Dan. 3:16-18) Cimuamue haico ca pita lafendeli va Yehova vakuekolelo va fila Vocila coku kangisila omanu okuti, atimba avo a timihĩwa. Kuli afendeli valua va Yehova okuti, eci va fa va timihĩwa latenda, ale ka pa sialele onepa layimue yetimba liavo. Pole, va ka pinduiwa.—Esit. 20:13.

Yehova ka ka pindula omunu letimba a fa lalio. Cimuamue haico ci kasi oku pita Lakristão olombuavekua eci Yehova a va pindula oco va ende kilu. Ndeci ca pita la Yesu okuti wa ‘pinduiwa vomuenyo wespiritu,’ cimuamue haico ci pita Lakristão olombuavekua okuti, va pinduiwavo letimba liespiritu. Layimue onepa yetimba liavo yenda lavo kilu.—1 Pet. 3:18; 1 Va Kor. 15:42-53; 1 Yoa. 3:2.

Ekolelo lietu kepinduko, ka li tiamisiwila ketimba liomunu nda li timihĩwa ale sio, pole, li tiamisiwila kuloño Suku a kuete, kuenda konjongole yaye yoku tẽlisa olohuminyo viaye. (Ovil. 24:15) Ocili okuti, ka tu kuete elomboloko lia suapo ndomo Yehova a linga ocikomo coku pindula omanu kosimbu, kuenda ndomo a ka ci linga kovaso yoloneke. Pole, tua kolela kokuaye. Eye, wa ‘linga ohuminyo yaco,’ eci a pindula Yesu.—Ovil. 17:31; Luka 24:2, 3.

Omo liaco, Akristão vocili va sukila oku kapako ovihandeleko viofeka va kasi, kuenda ovina vikuavo vi lekisa ovina vi lingiwa latimba omanu va fa. (2 Va Kor. 6:3, 4) Cikale okuti etimba liomunu wa fa li timihĩwa, ale sio, epata olio li nõla onjila yi kuamiwa.