Momo Lie o Lilongisila Embimbiliya?

Eteke limue wa sokoluile ale apulilo aco, ndeci ovo va linga? Nda oco, haveko lika. Omanu valua voluali va siata oku sokolola kapulilo a kuete esilivilo komuenyo. O pondola hẽ oku sanga a tambululo aco?

Omanu valua va pondola oku popia hati, “Oco!” Momo lie? Momo va siata oku sanga atambululo apulilo avo Vembimbiliya. O yongola hẽ oku kũlĩha eci Embimbiliya li popia? O pondola oku kuatisiwa lesokiyo lioku lilongisa Embimbiliya li eciwa ocali Lolombangi Via Yehova.a

Ocili okuti, catiamẽla koku lilongisa Embimbiliya omanu vamue va popia ndoco: “Si kuete otembo.” “Ka ca lelukile oku ci linga.” “Ñuete ovina vialua vioku linga.” Pole vakuavo va kuete ocisimĩlo ca litepa.” Ovo va tava kepuluvi lioku lilongisa Embimbiliya. Kũlĩhĩsa ovolandu amue:

• “Nda tiamelẽle ketavo liokatolika, lio Postande, lio Siques, lio Butista kuenda nda lilongisa o teologia kosikola yavelapo. Ndaño lalikolisilo alua, sia sangele atambululo kapulilo ange. Noke Ombangi yimue ya Yehova yeya konjo yange. Nda komõha la tambulula a tunda Vembimbiliya, kuenje nda tava oku lilongisa Embimbiliya.”​—Gill, Inglaterra.

• “Nda kuatele apulilo alua a tiamẽla komuenyo, pole a tambululo ulongisi wonembele yange, ka a ndi sanjuisile. Pole Ombangi yimue ya Yehova ya tambulula apulilo ange lekuatiso Liembimbiliya. Eci a mula nda njongola oku amamako oku lilongisa, nda tava.”​—Koffi, Benin.

• “Nda yonguile oku kũlĩha ekalo liava va fa. Ame nda tavele okuti, ava va fa va pondola oku linga cĩvi vana va kasi lomuenyo pole, nda yonguile oku kũlĩha eci Embimbiliya li popia. Kuenje nda fetika oku lilongisa Embimbiliya lekamba limue okuti, Ombangi ya Yehova.”​—José, Brasil.

• “Nda seteka oku tanga Embimbiliya lika liange pole lacimue ca ndomboloka. Pole, Olombangi Via Yehova via ndomboluila ovitumasuku vialua Viembimbiliya. Nda yonguile oku kũlĩhĩsa ovina vikuavo ndi pondola oku lilongisa.”​—Dennize, Mesiku.

• “Nda enda oku lipula nda Suku wa ñapako muẽle. Kuenje nda nõlapo oku likutilila ku Suku Yembimbiliya. Keteke likuavo, Olombangi Via Yehova via veta kepito liange kuenda nda tava oku lilongisa Embimbiliya.”​—Anju, Nepal.

Ovolandu aco a tu ivaluisa olondaka via Yesu viokuti: “Ava va yeva ondaka ya Suku kuenje va yi pokola ovo va sumũlũha.” (Luka 11:28) Omanu va lulikiwa lonjongole yoku fendela. Suku eye lika o kuete epondolo lioku tẽlisa onjongole yaco kuenda o ci linga lekuatiso liondaka yaye, Embimbiliya.

Nye ca kongela voku lilongisa Embimbiliya? O kuatisiwa ndati lelilongiso liaco? Apulilo ava va ka tambuluiwa vocipama ci kuãimo.