Ceci o Sima Okuti Omuenyo ka u Kuete Esilivilo

Adriana kofeka yo Brazil wa popia hati: “Ovisimĩlo viaco ka vi pui lonjanga. Kuenje nda sima okuti hĩse ndi fe.”

ANGA HẼ wa liyevele ale lesuumuo loku sima okuti omuenyo ka u kuete esilivilo? Nda oco, o pondola oku kuata elomboloko liovisimĩlo Adriana a kuata. Eye wa yeva esakalalo lialua, esumuo kuenda ekambo lielavoko. Adriana wa kuatiwa luveyi umue okuti, otembo yosi o liyeva okuti wa kava.

Kũlĩhĩsavo ulandu wulume umue wo kofeka yo Japãu o tukuiwa Kaoru, okuti wa tata olonjali viaye vi vela haivio via kuka. Eye wa popia hati: “Kotembo yaco nda komõha calua omo liasakalalo kupange. Sia kuatele onjongole yoku lia kuenda sia tẽlele oku pekela. Nda simĩle okuti, ovitangi viaco vi pua lika nda nda fa.”

Ulume umue wo kofeka yo Nigeria o tukuiwa, Ojebode wa popia hati: “Nda enda oku yeva esumuo lialua okuti ndi pitĩla petosi lioku lila, loku sima okuti oco ovitangi viaco vi pue, nda sukilile oku fa.” Ci sanjuisa ceci okuti, Ojebode, Kaoru kuenda Adriana, ka va lipondele. Pole, omanu valua va siata oku liponda.

NDOMO TU SANGA EKUATISO

Omanu valua va siata oku liponda, alume okuti valua pokati kavo va kuata osõi yoku pinga ekuatiso. Yesu wa popia okuti vana va vela va sukila ondotolo. (Luka 5:31) Nda ove o yeva esumuo lialua okuti o sima oku liponda, sanda ekuatiso. Omanu valua va yeva esumuo lialua, va sanga ekuatiso kolondotolo lia va kuatisa oku kuata ekalo liwa kuenda elavoko. Ojebode, Kaoru kuenda Adriana, va tambula ekuatiso liolondotolo kuenje cilo va kasi ciwa.

Olondotolo vi eca ovihemba ale vi sapela lomunu o vela oco vo kuatise oku pongolola ovisimĩlo viaye. Vana va liyaka locitangi caco, va sukilavo ekuatiso liepata kuenda liakamba. Ekamba lia velapo omunu a pondola oku kuata, Yehova Suku, una eca ekuatiso li sangiwa Vondaka yaye, Embimbiliya.

KULI HẼ EKUATISO LI MÃLAKO OVITANGI VIOSI?

Omanu vana va liyaka locitangi cesumuo, va sukila oku tatiwa vokuenda kuotembo yalua loku kũlĩha ndomo va liyaka lapongoloko kekalo liomuenyo wavo. Pole, nda o liyaka locitangi cesumuo lialua, o pondola oku lavoka ekalo liwa kovaso yoloneke ndeci, Ojebode. Eye wa popia hati: “Ndi lavoka oku tẽlisiwa kuelivulu lia Isaya 33:24, kuna ku lekisa otembo eci palo posi ka pa ka kala vali omunu o popia okuti, ‘Ndi vela.’” Ndeci ca pita la Ojebode, sanga elembeleko kolohuminyo via Suku, ‘violuali luokaliye’ muna ka mu ka kala vali ‘oku liyula.’ (Esituluilo 21:1, 4) Ohuminyo yaco yi lomboloka okuti ka ku ka kala vali ocitangi cesumuo lialua. Uveyi o kuete, ka u ka kalako vali. Evalo liosi wa siata oku yeva, lalimue eteke li ka ‘ivalukiwa, ale oku li sokolola.’—Isaya 65:17.

Ovinimbu Viembimbiliya vi tu Kuatisa

Suku wa kapako ovisimĩlo viove.

“Momo ame Yehova, Suku yove, hu kuata peka liondio, . . . mopia love siti, ‘Ku ka kuate usumba, hu kuatisa.’” —Isaya 41:13.

Yehova wa kapako ovisimĩlo vietu okuti omanu ci sule kuenda o yongola oku tu kuatisa.

Sokolola lutate Kondaka ya Suku.

“[Eliya] wa lingila okufa, hati ‘. . . Kaliye a Yehova, njupe omuenyo wange.’” —1 Olosoma 19:4.

Ojebode wa popia hati: “ Oku sokolola lutate Kondaka ya Suku, ca ndi kuatisa. Nda limbuka okuti uprofeto Eliya, wa kuatelevo ovisimĩlo ndevi viange.”

Lilongisila kovolandu Embimbiliya.

“Pole, [Yesu] nda ku likutililako okuti ekolelo liove [Petulu] ka li hongui; kuenda eci o tiuka, kolisa vamanjove.”—Luka 22:32.

Upostolo Petulu noke yoku likala Yesu olonjanja vitatu, wa sumuile calua kuenje wa lila. Kaoru wa popia hati: “Oku sokolola lutate kueci petulu a linga kuenda ndomo Yesu o tata, ca ndi kuatisa oku limbuka okuti Yehova la Yesu va kapeleko ovisimĩlo via Petulu. Eci ca ndi pamisa.”

Evalo liosi wa siata oku yeva lalimue eteke li ka ‘ivalukiwa, ale oku li sokolola.’ —Isaya 65:17