Apulilo A Lingiwa La Vakuakutanga

Nda ulume lukãi umue okuti haloweliko va pita uteke vonjo yimuamue, pole, ka va kuete esunga lioku ci linga, anga hẽ eci uvangi wokuti va linga ekandu kuenda ci tava okuti akulu vekongelo va linga esombiso?

Ocili okuti, oku pekela kumosi okuti kakuli esunga lioku ci linga ceca uvangi wokuti ovo va linga evĩho liukahonga. Nda ka pali esunga li kisika oku ci linga, akulu vekongelo va sukila oku linga esombiso.—1 Va Korindo 6:18.

Akulu vekongelo va sukila oku kũlĩhĩsa lutate ovina via kongeliwamo nda ci sukiliwa oku linga esombiso. Ku lingiwa apulilo ndeci: Ovo va kasi hẽ oku namũlala? Anga hẽ akulu vekongelo va va lunguile ale kosimbu catiamẽla kovituwa va sukilile oku yuvula omunu lukuavo? Momo lie va lalela kumosi? Va linga hẽ esokiyo lioku ci linga? Anga hẽ va kuata onjila yikuavo, ale kua pita cimue okuti ka va kuatele ndomo ci tatekiwa ndeci, ocipito cimue, ale ocitangi cimue ka va lavokaile okuti ka va kuatele onjila yikuavo te lika oku lala pamosi? (Ukundi 9:11) Pi ovo va lale? Ocitangi locitangi ca litepa, citava okuti ku kala onumbi yikuavo yi tateka onjila akulu vekongelo va yongola oku kuama.

Eci akulu vekongelo va konomuisa ovina viosi via kongelamo va ka nõla nda va sokiya akulu vakuacimunga cesombiso.