وہ کیا ایمان رکھتے ہیں؟‏

یہوواہ کے گواہ آسمان اور زمین کے خالق، قادرِمطلق خدا، یہوواہ پر ایمان رکھتے ہیں۔ کائنات میں ہمارے چوگرد پیچیدہ ترتیب والے عجائب معقول طور پر اِس بات کی دلالت کرتے ہیں کہ ایک نہایت ہی ذہین اور طاقتور خالق ان سب کو وجود میں لایا ہے۔ جس طرح مردوں اور عورتوں کے کام اُن کی خوبیوں کی عکاسی کرتے ہیں، اسی طرح سے یہوواہ خدا کے کام بھی اس کی خوبیوں کو ظاہر کرتے ہیں۔ بائبل ہمیں بتاتی ہے کہ ”‏اُسکی اَن‌دیکھی صفتیں .‏ .‏ .‏ دُنیا کی پیدایش کے وقت سے بنائی ہوئی چیزوں کے ذریعہ سے معلوم ہو کر صاف نظر آتی ہیں۔“‏ نیز ”‏آسمان خدا کا جلال ظاہر کرتا ہے“‏ جس میں ہمیں کسی سازوآواز کا عمل‌دخل نظر نہیں آتا۔—‏رومیوں ۱:‏۲۰؛‏ زبور ۱۹:‏۱-‏۴‏۔‏

لوگ مٹی کے برتن یا ٹیلی‌ویژن سیٹ اور کمپیوٹر بھی بِلامقصد نہیں بناتے۔ زمین اور اسکی نباتاتی اور حیواناتی زندگی کی تخلیقات کہیں زیادہ حیرت‌انگیز ہیں۔ کھربوں خلیوں پر مشتمل انسانی بدن کی ساخت ہماری سمجھ سے باہر ہے—‏ہمارے دماغ کی سوچنے کی صلاحیت بھی ناقابلِ‌فہم طور پر شاندار ہے!‏ اگر انسان اپنی معمولی ایجادات کو وجود میں لانے کیلئے مقصد رکھتے ہیں تو یہوواہ خدا بھی اپنی پُرشکوہ تخلیقات کیلئے ایک مقصد رکھتا تھا!‏ امثال ۱۶:‏۴ یہوواہ کے مقصد کی بابت بیان کرتی ہے:‏ ”‏[‏یہوواہ]‏ نے ہر ایک چیز خاص مقصد کیلئے بنائی۔“‏

یہوواہ نے زمین کو ایک خاص مقصد کے تحت بنایا تھا جیسے کہ اس نے پہلے انسانی جوڑے سے بیان کِیا:‏ ”‏پھلو اور بڑھو اور زمین کو معمورومحکوم کرو اور سمندر کی مچھلیوں اور ہوا کے پرندوں اور کُل جانوروں پر جو زمین پر چلتے ہیں اِختیار رکھو۔“‏ (‏پیدایش ۱:‏۲۸‏)‏ اپنی نافرمانی کی وجہ سے وہ جوڑا راستباز گھرانوں سے زمین کو معمور کرنے میں ناکام ہو گیا جو پُرمحبت طریقے سے زمین اور اُس کے نباتات اور حیوانات کی نگہداشت کرتے۔ لیکن انکی ناکامی یہوواہ کے مقصد کو ناکام نہیں کرتی۔ ہزاروں سال بعد یہ لکھا گیا تھا:‏ ”‏خدا .‏ .‏ .‏ نے زمین بنائی .‏ .‏ .‏ اُس نے اُسے عبث پیدا نہیں کِیا بلکہ اُسکو آبادی کے لئے آراستہ کِیا۔“‏ تباہ ہونے کی بجائے ”‏زمین ہمیشہ قائم رہتی ہے۔“‏ (‏یسعیاہ ۴۵:‏۱۸؛‏ واعظ ۱:‏۴‏)‏ زمین کیلئے یہوواہ کا مقصد ضرور پورا ہوگا:‏ ”‏میری مصلحت قائم رہیگی اور مَیں اپنی مرضی بالکل پوری کرونگا۔“‏—‏یسعیاہ ۴۶:‏۱۰‏۔‏

لہٰذا، یہوواہ کے گواہ ایمان رکھتے ہیں کہ زمین ہمیشہ تک قائم رہے گی اور تمام زندہ اور مُردہ لوگ خوبصورت بنائی گئی، آبادشُدہ زمین کے لئے یہوواہ کے مقصد کے مطابق اس پر ہمیشہ تک رہ سکتے ہیں۔ تمام نسلِ‌انسانی آدم اور حوا سے ناکاملیت کی میراث پانے کی وجہ سے گنہگار ہے۔ (‏رومیوں ۵:‏۱۲‏)‏ بائبل ہمیں بتاتی ہے:‏ ”‏گناہ کی مزدوری موت ہے۔“‏ ”‏زندہ جانتے ہیں کہ وہ مرینگے پر مُردے کچھ بھی نہیں جانتے۔“‏ ”‏جو جان گناہ کرتی ہے وُہی مریگی۔“‏ (‏رومیوں ۶:‏۲۳؛‏ واعظ ۹:‏۵؛‏ حزقی‌ایل ۱۸:‏۴، ۲۰)‏ پس ایسی صورتحال میں وہ زمینی برکات سے فائدہ اُٹھانے کیلئے پھر سے کیسے زندہ ہو سکتے ہیں؟ وہ صرف یسوع مسیح کے فدیے کی قربانی کی بدولت ایسا کر سکتے ہیں کیونکہ اُس نے کہا:‏ ”‏قیامت اور زندگی تو مَیں ہوں۔ جو مجھ پر ایمان لاتا ہے گو وہ مر جائے تو بھی زندہ رہیگا۔“‏ ”‏جتنے قبروں میں ہیں اُسکی آواز سنکر نکلینگے۔“‏—‏یوحنا ۵:‏۲۸، ۲۹؛‏ ۱۱:‏۲۵؛‏ متی ۲۰:‏۲۸‏۔‏

یہ کیسے ممکن ہوگا؟ اس کی وضاحت ”‏بادشاہی کی .‏ .‏ .‏ خوشخبری“‏ میں کی گئی ہے جس کی منادی کا آغاز یسوع نے اپنی زمینی زندگی کے دوران کِیا تھا۔ (‏متی ۴:‏۱۷-‏۲۳‏)‏ لیکن آجکل یہوواہ کے گواہ خوشخبری کی منادی ایک نہایت خاص طریقے سے کر رہے ہیں۔‏

‏[‏صفحہ ۱۳ پر چارٹ]‏

یہوواہ کے گواہ کیا ایمان رکھتے ہیں

اعتقاد صحیفائی وجہ

بائبل روایت سے زیادہ قابلِ‌اعتماد ہے متی ۱۵:‏۳؛‏ کلسیوں ۲:‏۸

مسیح خدا کی تمام مخلوقات سے پہلے مولود ہوا تھا کلسیوں ۱:‏۱۵؛‏ مکاشفہ ۳:‏۱۴

مسیح کی ایک ہی قربانی کافی تھی رومیوں ۶:‏۱۰؛‏ عبرانیوں ۹:‏۲۵-‏۲۸

شریر ہمیشہ کیلئے نابود کر دئے جائیں گے متی ۲۵:‏۴۱-‏۴۶؛‏ ۲-‏تھسلنیکیوں ۱:‏۶-‏۹

زندگی کی طرف ایک ہی راستہ جاتا ہے متی ۷:‏۱۳، ۱۴؛‏ افسیوں ۴:‏۴، ۵

انسانی موت آدم کے گناہ کا پھل ہے رومیوں ۵:‏۱۲؛‏۶:‏۲۳

مسیح خود اپنی کلیسیا کی بنیاد ہے افسیوں ۲:‏۲۰؛‏ یسعیاہ ۲۸:‏۱۶؛‏ متی ۲۱:‏۴۲

ارواح‌پرستی سے بچنا چاہئے استثنا ۱۸:‏۱۰-‏۱۲؛‏ گلتیوں ۵:‏۱۹-‏۲۱؛‏ احبار ۱۹:‏۳۱

شیطان دنیا کا نادیدہ حاکم ہے ۱-‏یوحنا ۵:‏۱۹؛‏ ۲-‏کرنتھیوں ۴:‏۴؛‏ یوحنا ۱۲:‏۳۱

‏[‏صفحہ ۱۲ پر تصویر]‏

یہوواہ نے زمین کو خلق کِیا .‏ .‏ .‏ انسان نے اس کی نگہداشت کرنی تھی .‏ .‏ .‏ اور اِسے ہمیشہ کیلئے آباد کرنا تھا