بائبل کورس ایک خوش‌گوار سفر کی طرح ہے۔ لیکن اِس سفر میں مشکلیں بھی آ سکتی ہیں۔ کبھی کبھار شاید آپ سوچیں کہ آپ بائبل کورس جاری رکھ پائیں گے یا نہیں۔ آپ کو بائبل کورس کیوں کرتے رہنا چاہیے؟ آپ مشکلوں کے باوجود بائبل کورس جاری کیسے رکھ سکتے ہیں؟‏

1.‏ بائبل کورس کرنا کیوں فائدہ‌مند ہے؟‏

‏”‏خدا کا کلام زندہ اور مؤثر ہے۔“‏ (‏عبرانیوں 4:‏12‏)‏ بائبل ایک بیش‌قیمت کتاب ہے کیونکہ اِس کے ذریعے آپ کو پتہ چل سکتا ہے کہ خدا آپ کے بارے میں کیسا محسوس کرتا ہے اور کیا سوچتا ہے۔ بائبل کے ذریعے آپ کو نہ صرف علم ملتا ہے بلکہ سچی دانش‌مندی اور اُمید بھی ملتی ہے۔ سب سے اہم بات یہ ہے کہ بائبل یہوواہ خدا کا دوست بننے میں آپ کی مدد کر سکتی ہے۔ جب آپ بائبل کی تعلیم حاصل کرتے ہیں تو یہ آپ کی زندگی پر اثر کرتی ہے اور آپ کی زندگی بہتر ہو جاتی ہے۔‏

2.‏ یہ سمجھنا کیوں ضروری ہے کہ بائبل میں پائی جانے والی سچائیاں کتنی اہم ہیں؟‏

بائبل میں پائی جانے والی سچائیاں قیمتی خزانوں کی طرح ہیں۔ اِسی لیے بائبل میں یہ نصیحت کی گئی ہے کہ ‏”‏سچائی کو مول لے اور اُسے بیچ نہ ڈال۔“‏ (‏امثال 23:‏23‏)‏ اگر آپ یہ یاد رکھیں گے کہ بائبل میں پائی جانے والی سچائیاں کتنی قیمتی ہیں تو آپ مشکلوں کے باوجود بھی بائبل کورس جاری رکھ پائیں گے۔—‏امثال 2:‏4، 5 کو پڑھیں۔‏

3.‏ یہوواہ خدا بائبل کورس جاری رکھنے میں آپ کی مدد کیسے کر سکتا ہے؟‏

یہوواہ خدا نے آپ کو بنایا ہے اور وہ آپ کا دوست ہے۔ اِس لیے وہ آپ کی مدد کرنا چاہتا ہے تاکہ آپ اُس کے بارے میں سیکھ سکیں۔ وہ آپ میں ‏”‏خواہش اور طاقت پیدا“‏ کر سکتا ہے تاکہ آپ اُس کے کلام کی تعلیم حاصل کرتے رہیں۔ (‏فِلپّیوں 2:‏13 کو پڑھیں۔)‏ اِس لیے اگر کبھی آپ کا جوش ٹھنڈا پڑ رہا ہو تو وہ آپ کا جوش بڑھا سکتا ہے تاکہ آپ بائبل کورس جاری رکھیں اور اُن باتوں پر عمل کرتے رہیں جو آپ سیکھ رہے ہیں۔ اگر کبھی آپ کو لگے کہ آپ میں اِتنی طاقت نہیں ہے کہ آپ مشکلوں یا مخالفت کا سامنا کر سکیں تو وہ آپ کو اَور طاقت دے سکتا ہے۔ ہر روز یہوواہ خدا سے دُعا کریں کہ وہ بائبل کورس جاری رکھنے میں آپ کی مدد کرے۔—‏1-‏تھسلُنیکیوں 5:‏17‏۔‏

موضوع کی گہرائی میں جائیں

4.‏ بائبل کورس کرنے کو خاص اہمیت دیں

کبھی کبھار ہماری زندگی اِتنی مصروف ہو جاتی ہے کہ ہمیں لگتا ہے کہ ہمارے پاس بائبل کی تعلیم حاصل کرنے کے لیے وقت نہیں ہے۔ ایسی صورت میں ہم کیا کر سکتے ہیں؟ فِلپّیوں 1:‏10 کو پڑھیں اور پھر اِن سوالوں پر بات‌چیت کریں:‏

• آپ کے خیال میں زندگی میں ”‏کون سی باتیں زیادہ اہم ہیں“‏؟‏

• آپ بائبل کورس کرنے کو خاص اہمیت کیسے دے سکتے ہیں؟‏

1. ‏(‏1)‏ اگر آپ ایک بالٹی میں پہلے ریت ڈالیں گے اور پھر پتھر تو پتھر اُس میں پورے نہیں آئیں گے۔‏

2. ‏(‏2)‏ اگر آپ بالٹی میں پہلے پتھر ڈالیں گے تو پھر آپ اِس میں کافی ساری ریت بھی ڈال سکیں گے۔ اِسی طرح اگر آپ اُن کاموں کو جو ”‏زیادہ اہم ہیں،“‏ پہلے کریں گے تو آپ کے پاس دوسرے کاموں کے لیے بھی وقت بچ جائے گا۔‏

بائبل کی تعلیم حاصل کرنے سے ہمیں یہ احساس ہوتا ہے کہ ہمیں خدا کی رہنمائی کی ضرورت ہے۔ یوں ہم خدا کو جان پاتے ہیں اور اُس کی عبادت کرنا سیکھ پاتے ہیں۔ متی 5:‏3 کو پڑھیں اور پھر اِس سوال پر بات‌چیت کریں:‏

• اگر آپ بائبل کورس کرنے کو خاص اہمیت دیں گے تو آپ کو کیا فائدہ ہوگا؟‏

5.‏ مخالفت کے باوجود بائبل کورس جاری رکھیں

ویڈیو:‏ ہمت نہ ہارنے کا اجر (‏22:‏5)‏

• جب فرانچسکو نے اپنے گھر والوں اور دوستوں کو اُن باتوں کے بارے میں بتایا جو وہ سیکھ رہے تھے تو اُن لوگوں کا کیا ردِعمل تھا؟‏

• فرانچسکو کو بائبل کورس جاری رکھنے سے کیا اجر ملا؟‏

دوسرا تیمُتھیُس 2:‏24، 25 کو پڑھیں اور پھر اِن سوالوں پر بات‌چیت کریں:‏

• آپ کے گھر والے اور دوست اُن باتوں کے بارے میں کیا سوچتے ہیں جو آپ سیکھ رہے ہیں؟‏

• اگر کوئی اِس بات سے خوش نہیں ہوتا کہ آپ بائبل کورس کر رہے ہیں تو اِن آیتوں کے مطابق آپ کو اُس کے ساتھ کیسے پیش آنا چاہیے؟ آپ کو ایسا کیوں کرنا چاہیے؟‏

6.‏ یہوواہ خدا پر بھروسا رکھیں

ویڈیو:‏ یہوواہ خود کو بدلنے میں ہماری مدد کرتا ہے (‏56:‏3)‏

• جمِ نے یہوواہ خدا کو خوش کرنے کے لیے کون کون سی تبدیلیاں کیں؟‏

• آپ کو جمِ کی کس بات نے متاثر کِیا ہے؟‏

عبرانیوں 11:‏6 کو پڑھیں اور پھر اِن سوالوں پر بات‌چیت کریں:‏

• یہوواہ خدا اُن لوگوں کے لیے کیا کرے گا جو اُسے جاننے اور اُسے خوش کرنے کی پوری کوشش کرتے ہیں؟‏

• اِس آیت کے مطابق یہوواہ خدا اُس وقت کیسا محسوس کرتا ہے جب وہ دیکھتا ہے کہ آپ بائبل کورس کرنے کے لیے کتنی کوشش کر رہے ہیں؟‏

خلاصہ

یہ سچ ہے کہ کبھی کبھار بائبل کورس کرنا مشکل ہو سکتا ہے لیکن ایسا کرنے سے آپ اب اور ہمیشہ تک خوشیوں بھری زندگی گزار پائیں گے۔ یہوواہ خدا پر بھروسا رکھیں اور وہ آپ کو اِس کا اجر دے گا۔‏

دُہرائی

• بائبل میں پائی جانے والی سچائیاں آپ کے لیے قیمتی کیوں ہیں؟‏

• یہ جاننے کے بعد کہ ”‏کون سی باتیں زیادہ اہم ہیں،“‏ آپ کو کیا کرنا چاہیے؟‏

• آپ کو بائبل کورس جاری رکھنے کے لیے یہوواہ خدا سے مدد کیوں مانگنی چاہیے؟‏

مزید جانیں

اِس مضمون میں چار ایسے طریقوں پر غور کریں جن کے ذریعے بہت سے لوگوں نے وقت کا بھرپور اِستعمال کرنا سیکھا ہے۔‏

‏”‏آپ وقت کا بھرپور اِستعمال کیسے کر سکتے ہیں؟“‏ (‏جاگو!‏ اپریل-‏جون 2014ء)‏

اِس ویڈیو میں دیکھیں کہ یہوواہ خدا نے اُس وقت ایک عورت کی مدد کیسے کی جب اُس کا شوہر یہ نہیں سمجھ پا رہا تھا کہ وہ خدا کو خوش کرنے کے لیے اِتنی محنت کیوں کر رہی ہے۔‏

یہوواہ ہمیں مشکلوں کا مقابلہ کرنے کی طاقت دیتا ہے (‏05:‏5)‏

اِس ویڈیو میں دیکھیں کہ جب ایک عورت بائبل کورس کرنے سے پیچھے نہیں ہٹی تو اِس کا اُس کے شوہر پر کیا اثر ہوا۔‏

مَیں نے سچائی کو پرکھا (‏30:‏6)‏

یہوواہ کے گواہوں پر کبھی کبھار یہ اِلزام لگایا جاتا ہے کہ وہ گھروں میں پھوٹ ڈالتے ہیں۔ کیا یہ سچ ہے؟‏

‏”‏کیا یہوواہ کے گواہ گھروں میں پھوٹ ڈالتے ہیں؟“‏ (‏ویب‌سائٹ پر مضمون)‏

ہم سب کو فیصلے کرنے پڑتے ہیں۔ ہمارے زیادہ‌تر فیصلوں کا ہم پر اور یہوواہ کے ساتھ ہماری دوستی پر اچھا یا بُرا اثر ہو سکتا ہے۔ مثال کے طور پر ہمیں یہ فیصلہ کرنا پڑ سکتا ہے کہ ہم کہاں رہیں گے، کون سی نوکری کریں گے اور شادی کریں گے یا نہیں۔ جب ہم اچھے فیصلے کرتے ہیں تو ہم خود بھی خوش رہ سکتے ہیں اور یہوواہ کو بھی خوش کر سکتے ہیں۔‏

1.‏ اچھے فیصلے کرنے میں بائبل آپ کی مدد کیسے کر سکتی ہے؟‏

کوئی بھی فیصلہ کرنے سے پہلے یہوواہ خدا سے دُعا کریں اور بائبل کے ذریعے اُس معاملے کے بارے میں اُس کی سوچ جاننے کی کوشش کریں۔ (‏امثال 2:‏3-‏6 کو پڑھیں۔)‏ کچھ معاملوں کے بارے میں یہوواہ خدا نے صاف صاف حکم دیے ہیں۔ ایسی صورتوں میں اچھا فیصلہ یہی ہوگا کہ آپ یہوواہ کا حکم مانیں۔‏

لیکن اگر کسی معاملے کے بارے میں بائبل میں کوئی واضح حکم نہیں ہے تو آپ کو کیا کرنا چاہیے؟ ایسی صورت میں بھی یہوواہ ‏”‏اُس راہ“‏ پر چلنے میں آپ کی مدد کرے گا جس پر آپ کو چلنا چاہیے۔ (‏یسعیاہ 48:‏17‏)‏ وہ ایسا کیسے کرے گا؟ بائبل میں دیے گئے اصولوں کے ذریعے۔ بائبل میں دیے گئے اصول ایسی سچائیاں ہیں جن سے خدا کی سوچ اور اُس کے احساسات کا پتہ چلتا ہے۔ اکثر بائبل میں کوئی واقعہ پڑھ کر ہمیں کسی معاملے کے بارے میں خدا کی سوچ کا پتہ چلتا ہے۔ جب ہم یہوواہ کی سوچ اور احساسات کو سمجھنے لگتے ہیں تو ہم ایسے فیصلے کر پاتے ہیں جن سے وہ خوش ہوتا ہے۔‏

2.‏ آپ کو کوئی فیصلہ کرنے سے پہلے کن باتوں پر غور کرنا چاہیے؟‏

بائبل میں لکھا ہے:‏ ‏”‏ہوشیار آدمی سوچ سمجھ کر قدم اُٹھاتا ہے۔“‏ (‏امثال 14:‏15‏، نیو اُردو بائبل ورشن‏)‏ اِس کا مطلب ہے کہ کوئی بھی فیصلہ کرنے سے پہلے ہمیں وقت نکال کر یہ سوچنا چاہیے کہ ہم اِس صورتحال میں کیا کیا فیصلہ کر سکتے ہیں۔ اِس کے بعد ہمیں خود سے یہ سوال پوچھنے چاہئیں:‏ ”‏میرے معاملے کے حوالے سے بائبل میں کون سے اصول دیے گئے ہیں؟ کون سا فیصلہ کرنے سے میرا ذہنی سکون برقرار رہے گا؟ مَیں جو بھی فیصلہ کروں گا، اُس کا دوسروں پر کیا اثر ہوگا؟ اور سب سے بڑھ کر کیا یہوواہ میرے فیصلے سے خوش ہوگا؟“‏—‏اِستثنا 32:‏29۔‏

یہوواہ ہمیں یہ بتانے کا حق رکھتا ہے کہ کیا صحیح ہے اور کیا غلط۔ جب ہم خدا کے حکموں اور اصولوں کو اچھی طرح جان جاتے ہیں اور اِن پر عمل کرنے کی ٹھان لیتے ہیں تو ہم اپنے ضمیر کی تربیت کر رہے ہوتے ہیں۔ ہمارا ضمیر ہمارے اندر کی آواز ہے جو ہمیں بتاتی ہے کہ کیا صحیح ہے اور کیا غلط۔ (‏رومیوں 2:‏14، 15‏)‏ اگر ہم اپنے ضمیر کی اچھی تربیت کرتے ہیں تو ہم اچھے فیصلے کر پاتے ہیں۔‏

موضوع کی گہرائی میں جائیں

3.‏ بائبل سے رہنمائی حاصل کریں

ویڈیو :‏بائبل کے اصولوں کے مطابق زندگی گزاریں (‏54:‏5)‏

• یہوواہ خدا نے ہمیں کون سی نعمت دی ہے؟‏

• یہوواہ خدا نے ہمیں اپنی مرضی سے فیصلے کرنے کی صلاحیت کیوں دی ہے؟‏

• یہوواہ خدا نے ہمیں ایسی کون سی چیز دی ہے جس کی مدد سے ہم اچھے فیصلے کر سکتے ہیں؟‏

ذرا بائبل میں دیے گئے ایک اصول پر غور کریں۔ اِفسیوں 5:‏15، 16 کو پڑھیں اور پھر اِس بارے میں بات‌چیت کریں کہ آپ اِن حلقوں میں اپنے وقت کا بہترین اِستعمال کیسے کر سکتے ہیں:‏

• روزانہ بائبل پڑھنے کے حوالے سے؟‏

• اچھا شوہر، بیوی، ماں، باپ، بیٹا یا بیٹی بننے کے حوالے سے؟‏

• اِجلاسوں میں جانے کے حوالے سے؟‏

4.‏ اچھے فیصلے کرنے کے لیے اپنے ضمیر کی تربیت کریں

ویڈیو:‏ ‏”‏اپنا ضمیر صاف رکھیں“‏ (‏13:‏5)‏

• بہن نے کون کون سے کام کیے تاکہ وہ اپنے ضمیر کی تربیت کر سکے اور ایسا فیصلہ کر سکے جس سے یہوواہ خوش ہو؟‏

دوسروں سے یہ کہنے کی بجائے کہ وہ کسی معاملے میں ہمارے لیے فیصلہ کریں، ہمیں خود فیصلے کیوں کرنے چاہئیں؟ عبرانیوں 5:‏14 کو پڑھیں اور پھر اِن سوالوں پر بات‌چیت کریں:‏

• شاید ہمیں یہ آسان لگے کہ دوسرے ہمارے لیے فیصلہ کر دیں۔ لیکن اِس آیت کے مطابق ہمیں خود کیا کرنے کے قابل ہونا چاہیے؟‏

• اپنے ضمیر کی تربیت کرنے اور اچھے فیصلے کرنے کے لیے آپ کہاں سے مدد لے سکتے ہیں؟‏

5.‏ دوسروں کے ضمیر کا احترام کریں

شاید کسی معاملے کے بارے میں ایک شخص فرق فیصلہ کرے اور دوسرا شخص فرق۔ ہم دوسروں کے ضمیر کے لیے احترام کیسے ظاہر کر سکتے ہیں؟ اِس سلسلے میں دو صورتحال پر غور کریں۔‏

پہلی صورتحال:‏ ایک بہن کو میک‌اپ کرنا پسند ہے۔ وہ ایک ایسی کلیسیا میں چلی جاتی ہے جہاں زیادہ‌تر بہنوں کو یہ پسند نہیں کہ میک‌اپ کِیا جائے۔‏

رومیوں 15:‏1 اور 1-‏کُرنتھیوں 10:‏23، 24 کو پڑھیں اور پھر اِن سوالوں پر بات‌چیت کریں:‏

• اِن آیتوں کے مطابق وہ بہن کیا فیصلہ کر سکتی ہے؟ اگر آپ کا ضمیر آپ کو ایک کام کرنے کی اِجازت دیتا ہے لیکن دوسرے شخص کا ضمیر اُسے وہ کام کرنے سے منع کرتا ہے تو ایسی صورت میں آپ اِن آیتوں پر کیسے عمل کریں گے؟‏

دوسری صورتحال:‏ ایک بھائی کو پتہ ہے کہ بائبل میں حد میں رہ کر شراب پینے سے منع نہیں کِیا گیا لیکن وہ پھر بھی شراب نہیں پیتا۔ اُسے ایک ایسی دعوت میں بلا‌یا جاتا ہے جہاں دوسرے بھائی شراب پی رہے ہوتے ہیں۔‏

واعظ 7:‏16 اور رومیوں 14:‏1،‏ 10 کو پڑھیں اور پھر اِن سوالوں پر بات‌چیت کریں:‏

• اِن آیتوں کے مطابق وہ بھائی کیا فیصلہ کر سکتا ہے؟ اگر دوسروں کا ضمیر اُنہیں ایک کام کرنے کی اِجازت دیتا ہے لیکن آپ کا ضمیر آپ کو وہ کام کرنے سے منع کرتا ہے تو ایسی صورت میں آپ اِن آیتوں پر کیسے عمل کریں گے؟‏

اچھے فیصلے کرنے کے لیے یہ کام کریں:‏

1.‏ یہوواہ سے دُعا کریں کہ وہ صحیح فیصلہ کرنے میں آپ کی مدد کرے۔—‏یعقوب 1:‏5‏۔‏

2.‏ بائبل اور اِس سے تیار کی گئی کتابوں اور رسالوں سے ایسے اصول ڈھونڈیں جو آپ کی صورتحال پر لاگو ہوتے ہیں۔ آپ تجربہ‌کار مسیحیوں سے بھی بات کر سکتے ہیں۔‏

3.‏ غور کریں کہ آپ کے فیصلے کا آپ کے ضمیر اور دوسروں کے ضمیر پر کیا اثر ہوگا۔‏

خلاصہ

کسی معاملے میں اچھا فیصلہ کرنے کے لیے ضروری ہے کہ ہم اُس معاملے کے بارے میں یہوواہ کی سوچ جانیں۔ اِس کے علاوہ ہمیں اِس بات پر بھی غور کرنا چاہیے کہ ہمارے فیصلے کا دوسروں پر اچھا اثر ہوگا یا بُرا۔‏

دُہرائی

• آپ ایسے فیصلے کیسے کر سکتے ہیں جن سے یہوواہ خوش ہو؟‏

• آپ اپنے ضمیر کی تربیت کیسے کر سکتے ہیں؟‏

• آپ دوسروں کے ضمیر کا احترام کیسے کر سکتے ہیں؟‏

مزید جانیں

آپ ایسے فیصلے کیسے کر سکتے ہیں جن سے خدا کے ساتھ آپ کی دوستی مضبوط ہو؟‏

‏”‏ایسے فیصلے کریں جن سے خدا کی بڑائی (‏مینارِنگہبانی،‏ 1 اپریل 2011ء)‏

اِس بات کو اَور اچھی طرح سمجھیں کہ یہوواہ اپنے بندوں کی رہنمائی کیسے کرتا ہے۔‏

یہوواہ اپنے بندوں کی رہنمائی کرتا ہے (‏50:‏9)‏

اِس ویڈیو میں دیکھیں کہ ایک شخص ایک مشکل فیصلہ کیسے کر پایا۔‏

یہوواہ اچھی چیزوں کا وعدہ کرتا ہے (‏46:‏5)‏

جانیں کہ آپ اُن معاملوں میں یہوواہ خدا کو کیسے خوش کر سکتے ہیں جن کے سلسلے میں اُس نے کوئی واضح حکم نہیں دیا۔‏

‏”‏کیا آپ کو ہمیشہ بائبل کے حکم کی ضرورت پڑتی ہے؟“‏ (‏مینارِنگہبانی،‏ 1 دسمبر 2003ء)‏