3 ہمت نہ ہاریں

ایک ماہر کا کہنا ہے کہ کسی نئی عادت کو پکا ہونے میں 21 دن لگتے ہیں۔ لیکن تحقیق سے پتہ چلا ہے کہ کچھ لوگوں کو اپنی عادتیں بدلنے میں کم وقت لگ سکتا ہے اور کچھ کو زیادہ۔ کیا اِس بات سے آپ کو بے‌حوصلہ ہو جانا چاہیے؟‏

فرض کریں کہ آپ ہفتے میں تین دن ورزش کرنے کی عادت ڈالنا چاہتے ہیں۔‏

• پہلے ہفتے میں آپ تین دن ورزش کرتے ہیں۔‏

• دوسرے ہفتے میں آپ دو دن ورزش کرتے ہیں۔‏

• تیسرے ہفتے میں آپ پھر تین دن ورزش کرتے ہیں۔‏

• چوتھے ہفتے میں آپ ایک دن ورزش کرتے ہیں۔‏

• پانچویں ہفتے میں آپ دوبارہ تین دن ورزش کرتے ہیں اور اِس کے بعد سے ہر ہفتے اِس معمول پر قائم رہتے ہیں۔‏

آپ کو اپنی عادت کو پکا کرنے میں پانچ ہفتے لگے۔ ہو سکتا ہے کہ آپ کو پانچ ہفتے بہت زیادہ لگیں لیکن جب آپ ایک بار اپنے منصوبے کو پورا کر لیتے ہیں تو آپ کو خوشی ہوتی ہے کہ آپ نے ایک اچھی عادت اپنا لی ہے۔‏

پاک کلام میں ہماری حوصلہ‌افزائی کی گئی ہے کہ ہم ہمت نہ ہاریں۔ اِس بات سے فرق نہیں پڑتا کہ ہم کتنی بار گِرتے ہیں بلکہ اِس بات سے کہ ہم کتنی بار اُٹھ کھڑے ہوتے ہیں۔‏

آپ کیا کر سکتے ہیں؟‏

• اگر آپ اپنے منصوبے کو پورا کرنے میں ایک دو بار ناکام ہو جاتے ہیں تو یہ نہ سوچیں کہ آپ کبھی اِسے پورا نہیں کر پائیں گے۔ اپنے منصوبے پر کام کرتے وقت یہ یاد رکھیں کہ آپ کو کبھی کبھار ناکامی کا سامنا ہو سکتا ہے۔‏

• اُس وقت کے بارے میں سوچیں جب آپ اپنے منصوبے کو پورا کرنے میں کامیاب ہوئے تھے۔ مثال کے طور پر اگر آپ اپنے بچوں کے ساتھ پیار سے بات کرنے کی عادت ڈالنے کی کوشش کر رہے ہیں تو خود سے پوچھیں:‏ ”‏پچھلی بار کب ایسا ہوا تھا کہ مجھے غصہ آیا تھا اور مَیں بچوں پر چیخنا چلّانا چاہتا تھا لیکن مَیں نے ایسا نہیں کِیا تھا؟ اُس وقت مَیں نے کیا کِیا تھا؟ مَیں پھر سے ویسا کیسے کر سکتا ہوں؟“‏ اِس طرح کے سوالوں پر غور کرنے سے آپ اپنی ناکامی کی بجائے اپنی کامیابی پر توجہ دے پائیں گے۔‏

اگر آپ جاننا چاہتے ہیں کہ پاک کلام کے اصول زندگی کے دیگر حلقوں، مثلاً پریشانیوں سے نمٹنے،‏ گھریلو زندگی کو خوش‌گوار بنانے اور حقیقی خوشی حاصل کرنے میں آپ کے کام کیسے آ سکتے ہیں تو کسی یہوواہ کے گواہ سے بات کریں یا ہماری ویب‌سائٹ jw.org کو دیکھیں۔‏