Jẹnẹsis
17 Ebram vwọ hẹ ẹgbukpe 99, Jihova da vwomaphia kẹ Ebram, ọ da ta kẹ: “Mẹvwẹ yen Ọghẹnẹ ro Me Vwo Ẹgba na. Yan vwẹ obaro mẹ rere wo ji dje oma wẹn phia kerẹ ohwo ro vwo ekaan.* 2 Mi che ruo rere ọphọ re me vẹ owẹ rere na vwọ nabọ ghwotọ, ke me cha nẹrhẹ wọ dia buebun mamọ.”
3 Ọtiọyena Ebram de she bọvwọn opharo rhuotọ, jẹ Ọghẹnẹ ji nene ta ota, ọ da ta: 4 “Vwọ kẹ vwẹ, nighere! ọphọ mẹ vẹ owẹ herọ, vwọrẹ imuẹro, wọ cha dia ọsẹ rẹ ẹgborho buebun. 5 Odẹ wẹn rha cha dia Ebram ọfaa;* odẹ wẹn cha dia Ebraham,* kidie me cha nẹrhẹ wọ dia ọsẹ rẹ ẹgborho buebun. 6 Me cha nẹrhẹ wo vwo emọ buebun je nẹrhẹ wọ dia ẹgborho buebun, ivie che nẹ oma wẹn rhe.
7 Me cha sẹro rẹ ọphọ re me vẹ owẹ kugbe emọ* ru wo che vwiẹ rere vwẹ uvwiẹ rayen eje, rere ọ dia ọphọ ri bẹdẹ, me vwọ dia Ọghẹnẹ kẹ wẹ vẹ emọ* ru wo che vwiẹ. 8 Ke me cha kẹ wẹ vẹ emọ* wẹn otọ ru wọ diare kerẹ ọrhorha—otọ ri Kenan eje—kerẹ ughwẹ ri bẹdẹ, ke me cha dia Ọghẹnẹ rayen.”
9 Ọghẹnẹ da je ta kẹ Ebraham: “Vwọ kẹ wẹ, wọ me sẹro rẹ ọphọ mẹ, wẹwẹ vẹ emọ* wẹn vwẹ uvwiẹ rayen eje. 10 Ọnana yen ọphọ mẹ re me vẹ owẹ rere, rẹ wẹ vẹ emọ* wẹn cha sẹro rọyen: kọshare kọshare vwẹ ohri rẹ ovwan kọ yanvwe. 11 Ovwan me yanvwe,* kọ cha dia oka rẹ ọphọ re me vẹ ovwan rere. 12 Vwẹ uvwiẹ rẹ ovwan eje, a me yanvwe kọmọshare kọmọshare ro te ẹdẹ ẹrenren, kohwo kohwo re vwiẹre vwẹ uwevwin na kugbe kohwo kohwo rọ dia ọvo vwẹ usun rẹ emọ* wẹẹn ra vwẹ igho dẹ mie ọrhorha. 13 A me yanvwe kọshare kọshare re vwiẹre vwẹ uwevwin wẹn kugbe kọshare kọshare ra vwẹ igho wẹn dẹ, ọphọ mẹ rọhẹ uvwo wẹn kọ dia ọphọ ri rhirin. 14 Ọ da dianẹ ọshare rọ je rhe yanvwee rhọnvwe yanvwee, ke bru* ohwo* yena nẹ ohri rẹ ihwo rọyen. O muọghọ kẹ ọphọ mẹẹ.”
15 Ọghẹnẹ da ta kẹ Ebraham: “Vwọ kẹ aye wẹn Serai,* wo rhe se Serai ọfaa, kidie Sera* yen cha dia odẹ rọyen. 16 Mi che bruba kẹ, je kẹ wẹ ọmọshare wan oma rọyen; mi che bruba kẹ, ọ me rhe dia ẹgborho buebun; ivie rẹ ihwo che nẹ oma rọyen rhe.” 17 Ọtiọyena Ebraham de she bọvwọn opharo rhuotọ, kọ hwẹ, ọ da ta vwẹ ubiudu rọyen: “E se vwiẹ ọmọ kẹ ọshare rọhẹ ẹgbukpe 100? Sera rọ dia aye rẹ ẹgbukpe 90 ji se vwiẹ?”
18 Ọtiọyena Ebraham da ta kẹ Ọghẹnẹ rẹ uyota na: “Biko, e jẹ ebruphiyọ wẹn nene Ishmẹl dia!” 19 Ọtiọyena Ọghẹnẹ da ta: “Vwọrẹ imuẹro, aye wẹn Sera che vwiẹ ọmọshare kẹ wẹ, wo mi se Aizik.* Mi che ruo rere ọphọ re me vẹ ọyen rere vwọ ghwotọ, rere ọ je dia ọphọ ri bẹdẹ vwọ kẹ erere rẹ emọ* ro che vwiẹ. 20 Ẹkẹvuọvo vwọ kpahen Ishmẹl, mi nyo oborẹ wọ tare. Nighere! Mi che bruba kẹ, je nẹrhẹ o vwo emọ rere ọ dia buebun mamọ. Isun 12 che nẹ oma rọyen rhe, mi che ruo vwọ dia ẹgborho rode. 21 Ẹkẹvuọvo mi che ruo rere ọphọ re me vẹ Aizik cha re vwọ ghwotọ, ọmọ rẹ Sera che vwiẹ kẹ wẹ vwẹ ọke tiọna rẹ ukpe rọ cha na.”
22 Ọghẹnẹ vwo nene ta ota nu, ọ da yanjẹ Ebraham vwo. 23 Ebraham da reyọ Ishmẹl ọmọ rọyen kugbe eshare eje re vwiẹre vwẹ uwevwin rọyen kugbe kohwo kohwo rọ vwẹ igho dẹ, eshare eje rehẹ evwruwevwin rẹ Ebraham, ọ da yanvwe ayen vwẹ ẹdẹdẹ yena kirobo rẹ Ọghẹnẹ vuẹrẹ nẹ o ru. 24 Ebraham hẹ ẹgbukpe 99 ọke rọ vwọ yanvwe. 25 Ọmọ rọyen Ishmẹl hẹ ẹgbukpe 13 ọke rọ vwọ yanvwe. 26 Ẹdẹdẹ yena yen Ebraham yanvwere, ọtiọyen ji te Ishmẹl ọmọ rọyen. 27 Eshare eje rehẹ evwruwevwin rọyen, kohwo kohwo re vwiẹre vwẹ uwevwin na kugbe kohwo kohwo ra vwẹ igho dẹ mie ọrhorha, de ji nene yanvwe.