Jẹnẹsis

41 Ẹgbukpe ivẹ soso vwọ wan nu, Fero da vwerhẹn evwerhẹn nẹ ọyen mudia orhoma rẹ Urhie ri Nail. 2 Etiyin erhuẹn ighwrẹn re pha yoyovwin tubie tubie ki nẹ evunrẹ urhie na cha, kẹ ayen ria odin ri Nail na. 3 Erhuẹn ighwrẹn efa re pha miomiovwin dọndọn de nene ayen nẹ Nail na rhe, ayen de mudia kẹrẹ erhuẹn re pha tubie tubie na vwẹ orhoma ri Nail na. 4 Erhuẹn re pha miomiovwin dọndọn na, ke ria erhuẹn ighwrẹn re pha yoyovwin tubie tubie na. Ọke yena Fero de vrẹn.

5 Ọ da rhoma vwerhẹn, ọ da vwerhẹn evwerhẹn rivẹ. Eka ighwrẹn ke djẹ nẹ ugbẹn rẹ ọka ọvo cha, e pha vọnvọn yoyovwin. 6 Eka ighwrẹn efa re pha dọndọn da je djẹ rhe, ayen pha yaya fikirẹ odju ro djuẹ nẹ ẹbẹre ọnre va nẹcha na cha. 7 Eka re pha dọndọn na ke rọ eka ighwrẹn re vọnre re je pha yoyovwin na. Ọtiọyena Fero de vrẹn, ọ da rhe mrẹvughe nẹ evwerhẹn yen ọyen hepha.

8 Ẹkẹvuọvo ọke vwo rhie, ẹwẹn rọyen ko kpokpo. Ọtiọyena o de se irherẹn rẹ Ijipt eje ri ruẹ imajiki vẹ egbaghwanre rọyen eje. Fero da ta evwerhẹn rọyen kẹ ayen, ẹkẹvuọvo o vwo ohwo vuọvo rọ sa fan otọ rayen kẹ Feroo.

9 Ọtiọyena onotu rẹ imuidi na da ta kẹ Fero nẹ: “Me cha fan imwemwu mẹ nonẹna. 10 Ọrovwovwe Fero muophu kpahen idibo rọyen. Ọtiọyena o de mu vwe phiyọ uwodi rọhẹ uwevwin rẹ onotu rọ rhẹrẹ na, te omẹvwẹ te onotu rẹ ihwo ri ruẹ ibrẹdi na. 11 Ọyena vwọ wan nu, avwanre da vwerhẹn evwerhẹn vwẹ ason ọvuọvo. Mẹvwẹ vẹ ọyen vwerhẹn dohwo devwerhẹn rọyen vẹ obo ro mudiaphiyọ. 12 Eghene ọshare ọvo rọ dia ohwo ri Hibru vẹ avwanre hẹ etiyin, odibo rẹ onotu rọ rhẹrẹ Fero, ọke rẹ avwanre vwọ vuẹ kpahen evwerhẹn na, ọ da fan otọ rẹ evwerhẹn na ọvuọvo kẹ avwanre. 13 Ọ phiare abavo kirobo rọ fan evwerhẹn na kẹ avwanre. A reyọ ovwẹ rhivwin vwo kpo akon iruo mẹ, ẹkẹvuọvo a da vwẹ ọshare ro chekọ na vwọ ya urhe.”

14 Ọtiọyena Fero da tanẹ a reyọ Josẹf rhe, ayen da reyọ kpakpata nẹ uwodi* na rhe. Ọ da wanre ẹtuegban rọyen,* o de wene iwun rọyen, o de bru Fero ra. 15 Fero da ta kẹ Josẹf: “Me vwerhẹn evwerhẹn, ẹkẹvuọvo o vwo ohwo vuọvo rọ sa fan otọ rọyeen. Asaọkiephana mi nyori ra vwọ ta kpahen owẹ nẹ wo se nyo evwerhẹn je fan otọ rọyen.” 16 Ọtiọyena Josẹf da kpahen kẹ Fero: “Ọ dia ogangan mẹẹ! Ọghẹnẹ cha ta obo ri shephiyọ kpahen Fero.”

17 Fero da ta kẹ Josẹf: “Vwẹ evwerhẹn mẹ, mi mudia orhoma rẹ Urhie ri Nail na. 18 Etiyin erhuẹn ighwrẹn re pha yoyovwin tubie tubie ki nẹ Nail na cha, kẹ ayen ria odin ri Nail. 19 Erhuẹn ighwrẹn efa da vwọ kpahen ayen, e pha guọguọ miomovwin mamọ, e je pha dọndọn. Me je rhe mrẹ oka rẹ erhuẹn miomiovwin tiọyen vwẹ ọsoso rẹ otọ rẹ Ijipt na dẹvoo. 20 Erhuẹn re pha dọndọn miomiovwin na ke ria erhuẹn ighwrẹn rẹsosuọ re pha tubie tubie na. 21 Ẹkẹvuọvo ọke rẹ ayen vwọ re ayen nu, o vwo ohwo vuọvo rọ sa riẹn nẹ ayen ru ọtiọyeen, kidie oborẹ ayen miovwirin ẹsosuọ ye, ọtiọyen ayen je hepha. Ọtiọyena mi de vrẹn.

22 “Ọyena vwọ wan nu, vwevunrẹ evwerhẹn mẹ, me da mrẹ eka ighwrẹn re djẹ nẹ ugbẹn rẹ ọka ọvo cha, e pha vọnvọn yoyovwin. 23 Eka ighwrẹn efa re pha dọndọn da je djẹ rhe, ayen pha yaya fikirẹ odju ro djuẹ nẹ ẹbẹre ọnre va nẹcha na cha. 24 Eka re pha dọndọn na ke rọ eka ighwrẹn re pha yoyovwin na. Ọtiọyena me da vuẹ irherẹn ri ruẹ imajiki na kpahọn, ẹkẹvuọvo o vwo ohwo vuọvo rọ sa fan otọ rọyen kẹ vwẹẹ.”

25 Josẹf da ta kẹ Fero: “Evwerhẹn ri Fero ivẹ na ọvuọvo, ofẹnẹ herọọ. Ọghẹnẹ rẹ uyota na vuẹ Fero obo ro che ru. 26 Erhuẹn ighwrẹn iyoyovwin na mudiaphiyọ ẹgbukpe ighwrẹn. Ọtiọyen eka ighwrẹn iyoyovwin na ji mudiaphiyọ ẹgbukpe ighwrẹn. Evwerhẹn na ọvuọvo, ofẹnẹ herọọ. 27 Erhuẹn ighwrẹn re pha dọndọn miomiovwin na re vwọ kpahen erẹsosuọ na mudiaphiyọ ẹgbukpe ighwrẹn, ẹka ighwrẹn ifefe na re pha yaya fikirẹ odju ro nẹ ẹbẹre ọnre va nẹcha na rhe na, cha dia ẹgbukpe ighwrẹn rẹ owẹnvwe. 28 Ọnana yen ghwa obo re me vuẹ Fero: Ọghẹnẹ rẹ uyota na nẹrhẹ Fero mrẹ obo ro che ru.

29 “A cha mrẹ ẹgbukpe ighwrẹn rẹ emuọre buebun gbidiki cha vwọ dia otọ rẹ Ijipt eje. 30 Ẹkẹvuọvo ẹgbukpe ighwrẹn rẹ owẹnvwe cha rhe siẹrẹ ọyena da wan nu, emuọre buebun rehẹ otọ rẹ Ijipt ke cha chọrọ ẹro, owẹnvwe na cha ghwọrọ otọ na. 31 A rha cha karophiyọ emu buebun rehẹ otọ na jovwo naa, fikirẹ owẹnvwe ro che nene, kidie ọ cha gan mamọ. 32 A vwẹ evwerhẹn na phia kẹ Fero abọ ivẹ kidie Ọghẹnẹ rẹ uyota na nẹrhẹ ota na muotọ kokoroko, Ọghẹnẹ rẹ uyota na che ruo kẹrẹkpẹ.

33 “Ọtiọyena asaọkiephana e jẹ Fero guọnọ ohwo ro vwo ọhọ vẹ aghwanre rere ọ reyọ vwo mu vwẹ enu rẹ otọ rẹ Ijipt. 34 E jẹ Fero jowọ rere ọ vwẹ iniruo mu vwẹ otọ na, e jẹ ọ reyọ ẹkẹn ọvo rẹ ẹkẹn iyorin rẹ ekankọn rẹ Ijipt vwẹ uvwre rẹ ẹgbukpe ighwrẹn rẹ emu buebun na. 35 E jẹ ayen koko emu na eje vwẹ uvwre rẹ ikpe iyoyovwin re cha na, ayen mi koko eka vwẹ otọ rẹ ogangan rẹ usuon ri Fero kerẹ emu re che koko vwẹ irere na je sẹro rọyen vwẹ etiyin. 36 Enana me dia emu vwọ kẹ otọ na vwẹ ẹgbukpe ighwrẹn rẹ owẹnvwe ro che fi vwẹ otọ rẹ Ijipt, rere otọ na vwo jẹ ẹghwọrọ fikirẹ owẹnvwe na.”

37 Iroroẹjẹ nana je Fero vẹ idibo rọyen eje. 38 Ọtiọyena Fero da ta kẹ idibo rọyen: “Kẹ a je sa mrẹ ọshare ọfa kerẹ ọnana rẹ ẹwẹn rẹ Ọghẹnẹ hẹ oma rọyen na?” 39 Fero da ta kẹ Josẹf: “Ọ vwọ dianẹ Ọghẹnẹ nẹrhẹ wọ riẹn enana eje na, o rhe vwo ohwo ọfa ro vwo ọhọ vẹ aghwanre kerẹ owẹẹ. 40 Wẹ komobọ yen cha vwẹrote uwevwin mẹ, ihwo mẹ ejobi che nyupho wẹn karekare. Vwẹ ẹdia mẹ kerẹ ovie ọvo* yen me da rho nọ wẹ.” 41 Vwọba, Fero da ta kẹ Josẹf: “Nighere, me vwẹ owẹ mu vwẹ enu rẹ otọ rẹ Ijipt eje.” 42 Fero de si ubiosa rẹ utẹ rọyen nẹ obọ rọyen, o de kuo phiyọ obọ ri Josẹf, ọ da vwẹ emwa iyoyovwin vwo rhuon, ji ku orọnvwọn ohọre rẹ oro phiyọ ohọre rọyen. 43 Vwọba, ọ da nẹrhẹ ọ gua akpẹrẹ rivẹ rẹ ọghọ ro vwori, kẹ ayen kperẹ phia vwẹ obaro rọyen, “Avrẹk!”* Ọtiọyena o de vwo mu vwẹ enu rẹ otọ rẹ Ijipt eje.

44 Fero da je ta kẹ Josẹf: “Mẹvwẹ Fero, ẹkẹvuọvo ababọ rẹ ota wẹn, o vwo ohwo vuọvo ro se ru emu vuọvo* vwẹ ọsoso rẹ otọ rẹ Ijipt naa.” 45 Ọyena vwọ wan nu, Fero de se Josẹf Zafẹnat-pania, ọ da kẹ Asenat ọmọtẹ ri Pọtaifẹra orherẹn rẹ Ọn* kerẹ aye. Josẹf kọ vwẹrote* otọ rẹ Ijipt. 46 Josẹf hẹ ẹgbukpe 30 ọke ro vwo mudia obaro ri Fero ovie rẹ Ijipt.*

Josẹf de vrẹn nẹ obaro ri Fero, ọ da yan ọsoso rẹ otọ rẹ Ijipt na eje. 47 Uvwre rẹ ẹgbukpe ighwrẹn rẹ emu buebun na, otọ na kọ vwẹ emu buebun gbidiki vwọ phia. 48 Josẹf ko koko emu eje rẹ ẹgbukpe ighwrẹn na vwo nẹ otọ rẹ Ijipt, o mi koko emu na vwevunrẹ irere na. Vwevunrẹ orere ọvuọvo, o mi koko emu vwo nẹ idju re riarierẹ phiyọ. 49 Josẹf ko koko eka buebun mamọ kerẹ ekpẹn rẹ abadi na, ukuotọ rọyen, kẹ ayen dobọ rẹ ẹvwanvwọ rayen ji kidie ayen rha sa vwanvwe ayeen.

50 Tavwen ukpe rẹ owẹnvwe na ke tonphiyọ, e vwiẹ emeshare ivẹ kẹ Josẹf, Asenat ọmọtẹ ri Pọtaifẹra orherẹn rẹ Ọn* yen vwiẹ ayen kẹ. 51 Josẹf de se ọ rẹ ọkpako Manasẹ,* kidie ọ tare nẹ, “Ọghẹnẹ nẹrhẹ ukpokpogho kugbe uwevwin rẹ ọsẹ mẹ eje chọrọ ovwẹ ẹro re.” 52 O de se ọrivẹ na Ifrem,* kidie ọ tare nẹ, “Ọghẹnẹ nẹrhẹ mi bunphiyọ vwẹ otọ rẹ ojaẹriọ mẹ re.”

53 Ọtiọyena ẹgbukpe ighwrẹn rẹ emu buebun vwẹ otọ rẹ Ijipt na de rhi vwoba. 54 Ẹgbukpe ighwrẹn rẹ owẹnvwe na da tonphiyọ kirobo rẹ Josẹf tarọ. Owẹnvwe na de fi vwẹ etọ na eje, ẹkẹvuọvo ibrẹdi* hẹ otọ rẹ Ijipt eje. 55 Ukuotọ rọyen, otọ rẹ Ijipt eje kọ rioja rẹ owẹnvwe na, ihwo na ke viẹ brẹ Fero ra vwọ kẹ ibrẹdi. Fero da ta kẹ ihwo rẹ Ijipt eje: “Ovwan bru Josẹf ra, rere ovwan ru kemu kemu rọ vuẹ ovwan.” 56 Owẹnvwe na da rhe dia enu rẹ otọrakpọ na eje. Josẹf ko rhie asan eje rọ sẹro rẹ emu phiyọ vwẹ ohri rayen, kọ shẹ ayen kẹ ihwo rẹ Ijipt, kidie owẹnvwe na ganre mamọ vwẹ otọ rẹ Ijipt. 57 Vwọba, ihwo rẹ otọrakpọ na eje da rhe Ijipt rhe dẹ emu mie Josẹf, kidie owẹnvwe na ganre mamọ vwẹ otọrakpọ na eje.