Jẹnẹsis
48 Enana vwọ wan nu, a da vuẹ Josẹf: “Nighere, oma rẹ ọsẹ wẹn ganree.” Ọtiọyena ọ da reyọ emeshare rọyen ivẹ, Manasẹ kugbe Ifrem nene oma. 2 A da vuẹ Jekọp: “Nighere, ọmọ wẹn Josẹf bru we rhire.” Ọtiọyena Izrẹl da vwẹ ẹgbẹgba vrẹn, o de chidia ehwa rọyen. 3 Jekọp da ta kẹ Josẹf:
“Ọghẹnẹ ro Me Vwo Ẹgba na vwomaphia kẹ vwẹ vwẹ Lọz vwẹ otọ ri Kenan o de bruba kẹ vwẹ. 4 Ọ da ta kẹ vwẹ, ‘Me cha nẹrhẹ wo vwiẹ, me je cha nẹrhẹ wọ dia buebun, mi che ru we phiyọ urogho rẹ ihwo, ke me cha vwẹ otọ nana vwọ kẹ emọ* wẹn re cha vwẹ obuko wẹn kerẹ ughwẹ ri bẹdẹ.’ 5 Asaọkiephana emọ ivẹ re vwiẹ kẹ wẹ vwẹ otọ rẹ Ijipt tavwen mi ki bru we rhe Ijipt na emẹ. Ifrem vẹ Manasẹ ke cha dia emẹ kirobo rẹ Rubẹn vẹ Simiọn je dia emẹ na. 6 Ẹkẹvuọvo emọ re che vwiẹ kẹ wẹ nẹ etiyin yanran cha dia ewẹn. Ka cha vwẹ odẹ rẹ iniọvo rayen vwo se ayen vwẹ ughwẹ rayen. 7 Vwọ kẹ vwẹ, ọke ri mi vwo nẹ Padan cha, Rechẹl de ghwu vwẹ abọ mẹ vwẹ otọ ri Kenan, ọke yena avwanre sherabọ kẹ Ẹfrat. Ọtiọyena mi de sho vwẹ orhoma rẹ idjerhe ra wan kpo Ẹfrat, kọyen Bẹtlẹhẹm.”
8 Izrẹl da mrẹ emọ ri Josẹf, ọ da nọ: “Enana amono?” 9 Ọtiọyena Josẹf da ta kẹ ọsẹ rọyen: “Enana emọ mẹ rẹ Ọghẹnẹ vwọ kẹ vwẹ vwẹ etinẹ na.” Ọtiọyena Jekọp da ta: “Biko reyọ ayen rhe vwe rere mi bruba kẹ ayen.” 10 Asaọkiephana ẹro rẹ Izrẹl rhuẹ fikirẹ ọghwo re, ọ rha mrorẹẹ. Ọtiọyena Josẹf de si ayen kẹrẹ, Jekọp da fiọnfiọn ayen, ọ da gbane ayen. 11 Izrẹl da ta kẹ Josẹf: “Me nama roro nẹ me cha mrẹ opharo wẹẹn, ẹkẹvuọvo nighere, Ọghẹnẹ da je nẹrhẹ me mrẹ emọ* wẹn.” 12 Josẹf de mu emọ na nẹ awọ rẹ Izrẹl, o de she bọvwọn opharo rhuotọ.
13 Asaọkiephana Josẹf da reyọ emọ na ivẹ na, ọ da vwẹ obọrhen rọyen reyọ Ifrem kpo obohwẹre rẹ Izrẹl, ọ da vwẹ obohwẹre rọyen vwọ reyọ Manasẹ vwo kpo obọrhen rẹ Izrẹl, o de si ayen kẹrẹ. 14 Ẹkẹvuọvo Izrẹl da riẹn obọrhen rọyen phia, ọ da ghwẹ kpahen uyovwin rẹ Ifrem, dede nẹ ọyen yen ọ rẹ otete, ọ da ghwẹ obohwẹre rọyen kpahen uyovwin ri Manasẹ. Arudo ọyen ọ vwọ ghwabọ rọyen kpahen ayen vwẹ idjerhe nana, kidie Manasẹ yen ọmọkpako. 15 O de bruba kẹ Josẹf, ọ da ta:
“E jẹ Ọghẹnẹ rẹ uyota na rẹ esẹ mẹ Ebraham vẹ Aizik yan nene bruba kẹ emeshare na,
Ọyen Ọghẹnẹ rẹ uyota na ro sun vwe vwẹ akpeyeren mẹ eje rhi duvwun ọke nana,
16 Ọ reyọ amakashe rọyen vwo sivwin uvwe vwo nẹ okpetu eje.
E jẹ a vwẹ odẹ mẹ vwo se ayen ọtiọyen ji te odẹ rẹ esẹ mẹ, Ebraham vẹ Aizik,
E jẹ ayen bunphiyọ rere ayen dia urogho rẹ ihwo vwẹ otọrakpọ na.”
17 Ọke rẹ Josẹf vwọ mrẹ nẹ ọsẹ rọyen mu obọrhen rọyen kpahen uyovwin rẹ Ifrem, oma rha vwerhọọn, ọtiọyena kọ davwẹngba ro vwo si obọ rẹ ọsẹ rọyen nẹ uyovwin rẹ Ifrem vwo kpo uyovwin ri Manasẹ. 18 Josẹf da ta kẹ ọsẹ rọyen: “Ọ dia ọtiọyeen, ọsẹ mẹ, kidie ọnana yen ọkpako. Ghwẹ obọrhen wẹn kpahen uyovwin rọyen.” 19 Ẹkẹvuọvo ọsẹ rọyen kọ sian, ọ da ta: “Me riẹnre ọmọ mẹ, me riẹnre. Ọ je cha dia ihwo buebun, ọ je cha rho. Dedena oniọvo rọyen otete cha rho nọ, emọ* rọyen che bun te asan rẹ ayen da dia ọsoso ẹgborho.” 20 Vwọba, o de bruba kẹ ayen vwẹ ẹdẹ yena, rọ vwọ ta:
“E jẹ Izrẹl se odẹ rẹ ovwan ọke rẹ ayen de ghwoghwo ebruphiyọ tanẹ,
‘E jẹ Ọghẹnẹ nẹrhẹ wọ dia kerẹ Ifrem vẹ Manasẹ.’”
Ọtiọyena kọ vwẹ Ifrem vwọ kobaro kẹ Manasẹ.
21 Ọyena vwọ wan nu, Izrẹl da ta kẹ Josẹf: “Nighere, ughwu mẹ sikẹre re, ẹkẹvuọvo vwọrẹ imuẹro Ọghẹnẹ vẹ owẹ cha dia, ọ cha reyọ owẹ rhivwin kpo otọ rẹ esẹ wẹn ride. 22 Vwọ kẹ vwẹ, me kẹ wẹ ẹkẹn ọvo rẹ otọ* vwọ rho nọ e rẹ iniọvo wẹn, re me vwẹ ọlọkọ mẹ kugbe umurhabọ mẹ vwọ reyọ mie ihwo rẹ Amọ.”