Jẹnẹsis
5 Ọnana ọbe rẹ ikuegbe rẹ Adam. Vwẹ ẹdẹ rẹ Ọghẹnẹ ma Adam, ọ marọ họhọ oma rọyen. 2 Aye gbe ọshare yen ọ ma ayen. Vwẹ ẹdẹ rọ ma ayen, o de bruba kẹ ayen ji se ayen Ohworakpọ.
3 Adam vwọ dia te ẹgbukpe 130, o de vwiẹ ọmọ* ọvo kerẹ oma rọyen, rọ họherọ, o de se Sẹt. 4 O vwo vwiẹ Sẹt nu, Adam da dia ikpe 800. O ji vwiẹ emetẹ vẹ emeshare efa. 5 Ọtiọyena ẹdẹ rẹ Adam dia akpọ eje da dia ikpe 930, o de ghwu.
6 Sẹt vwọ dia te ẹgbukpe 105, o de vwiẹ Inọsh. 7 O vwo vwiẹ Inọsh nu, Sẹt da dia ikpe 807. O ji vwiẹ emetẹ vẹ emeshare efa. 8 Ọtiọyena ẹdẹ rẹ Sẹt dia akpọ eje da dia ikpe 912, o de ghwu.
9 Inọsh vwọ dia te ẹgbukpe 90, o de vwiẹ Kinan. 10 O vwo vwiẹ Kinan nu, Inọsh da dia ikpe 815. O ji vwiẹ emetẹ vẹ emeshare efa. 11 Ọtiọyena ẹdẹ rẹ Inọsh dia akpọ eje da dia ikpe 905, o de ghwu.
12 Kinan vwọ dia te ẹgbukpe 70, o de vwiẹ Mahalalẹl. 13 O vwo vwiẹ Mahalalẹl nu, Kinan da dia ikpe 840. O ji vwiẹ emetẹ vẹ emeshare efa. 14 Ọtiọyena ẹdẹ rẹ Kinan dia akpọ eje da dia ikpe 910, o de ghwu.
15 Mahalalẹl vwọ dia te ẹgbukpe 65, o de vwiẹ Jerẹd. 16 O vwo vwiẹ Jerẹd nu, Mahalalẹl da dia ikpe 830. O ji vwiẹ emetẹ vẹ emeshare efa. 17 Ọtiọyena ẹdẹ rẹ Mahalalẹl dia akpọ eje da dia ikpe 895, o de ghwu.
18 Jerẹd vwọ dia te ẹgbukpe 162, o de vwiẹ Inọk. 19 O vwo vwiẹ Inọk nu, Jerẹd da dia ikpe 800. O ji vwiẹ emetẹ vẹ emeshare efa. 20 Ọtiọyena ẹdẹ rẹ Jerẹd dia akpọ eje da dia ikpe 962, o de ghwu.
21 Inọk vwọ dia te ẹgbukpe 65, o de vwiẹ Mẹtusẹla. 22 O vwo vwiẹ Mẹtusẹla nu, Inọk de ji nene Ọghẹnẹ rẹ uyota na yan ọkieje vwẹ ikpe 300. O ji vwiẹ emetẹ vẹ emeshare efa. 23 Ọtiọyena ẹdẹ rẹ Inọk dia akpọ eje da dia ikpe 365. 24 Inọk de nene Ọghẹnẹ rẹ uyota na yan ọkieje. Ukuko na a rha mrẹ ọfaa, kidie Ọghẹnẹ reyerọ.*
25 Mẹtusẹla vwọ dia te ẹgbukpe 187, o de vwiẹ Lemẹk. 26 O vwo vwiẹ Lemẹk nu, Mẹtusẹla da dia ikpe 782. O ji vwiẹ emetẹ vẹ emeshare efa. 27 Ọtiọyena ẹdẹ rẹ Mẹtusẹla dia akpọ eje da dia ikpe 969, o de ghwu.
28 Lemẹk vwọ dia te ẹgbukpe 182, o de vwiẹ ọmọ* ọvo. 29 O de se Noa,* rọ vwọ ta: “Ọnana cha kẹ avwanre onẹrhẹvwe* vwo nẹ owian ọgangan rẹ avwanre kugbe abọ re miavwa avwanre fikirẹ evoro rẹ otọ rẹ Jihova hanrhere na.” 30 O vwo vwiẹ Noa nu, Lemẹk da dia ikpe 595. O ji vwie emetẹ vẹ emeshare efa. 31 Ọtiọyena ẹdẹ rẹ Lemẹk dia akpọ eje da dia ikpe 777, o de ghwu.
32 Noa vwo te ẹgbukpe 500, o de vwiẹ Shẹm, Ham kugbe Jefẹt.