Ọbe Rivẹ rẹ Ivie

7 Ẹlaisha da tanẹ, “Kerhọ rẹ ota ri Jihova. Ọnana yen oborẹ Jihova tare: ‘Vwẹ omarẹ ọke nana vwẹ odẹ rọ cha na vwẹ asan anurhoro* ri Sameria, ovwanvwọ ri siya* rẹ omamọ rẹ iflawa cha dia shẹkẹl* ọvo, ovwanvwọ ri siya ivẹ rẹ ibali cha dia shẹkẹl ọvo.’” 2 Etiyin onotu rẹ ovie na vwẹroso da ta kẹ ohwo rẹ Ọghẹnẹ rẹ uyota na nẹ: “Jihova da tobọ rhie evakpo rẹ idjuvwu na, ọnana ghene sa phia?”* Ọtiọyena Ẹlaisha da tanẹ: “Wọ cha vwẹ ẹro wẹn mrẹ, ẹkẹvuọvo wọ cha re vwọọ.”

3 Ehọnvwoti ẹne hẹ asan anurhoro rẹ orere na, ayen da ta kẹ ohwohwo nẹ: “Diesorọ avwanre vwo chidia etinẹ bẹsiẹ rẹ avwanre vwo ghwu? 4 Avwanre da tanẹ, ‘E jẹ avwanre ro evunrẹ orere na,’ rẹ owẹnvwe na je vwọ hẹ orere na, avwanre che ghwu vwẹ etiyin. Avwanre de chidia etinẹ, avwanre ji che ghwu ghene. Ọtiọyena e jẹ a ro asan rẹ ihwo ri Siria na wonphiyọ.* Ayen rha teyen avwanre hwee, kẹ avwanre dia, ẹkẹvuọvo ayen da teyen avwanre hwe, kẹ avwanre ghwu.” 5 Ayen de vrẹn vwẹ ovwọnvwọn vwẹ ọke rẹ ebri vwo muẹ re, ayen da ro asan rẹ ihwo ri Siria na wonphiyọ. Ọke rẹ ayen vwo te ughere rẹ asan rẹ ihwo ri Siria na wonphiyọ, ohwo vuọvo hẹ etiyiin.

6 Jihova nẹrhẹ ihwo ri Siria na nyo edo rẹ ekpẹrẹ rẹ ofovwin kugbe iyesi, edo rẹ otuofovwin buebun vwẹ asan rẹ ayen wonphiyọ na. Ọtiọyena ayen da ta kẹ ohwohwo nẹ: “Nighere! Ovie rẹ Izrẹl durhie ivie rẹ ihwo ri Hẹt kugbe ivie rẹ Ijipt rhi nene avwanre họnre!” 7 Ayen de vrẹn vwẹ ugege yena, ayen da djẹ vwẹ ovwọnvwọn vwẹ ọke rẹ ebri vwo muẹ re, ayen djẹ jẹ itughẹ, iyesi vẹ ekẹkẹtẹ rayen vwo, kugbe asan rẹ ayen wonphiyọ na eje, kirobo rọ ghwa hepha, ayen da djẹ fikirẹ arhọ* rayen.

8 Ọke rẹ ehọnvwoti nana vwo te ughere rẹ asan rẹ ihwo ri Siria na wonphiyọ na, ayen da ro ọvo vwẹ usun rẹ itughẹ na, kẹ ayen ria je da. Ayen da ghwẹ idọnọ efuanfon, iro, kugbe iwun vwo nẹ utughẹ na, ayen da yanran re si ayen nu. Ayen de rhivwin rhe, ayen da ro utughẹ ọfa, ayen de ji mu erọnvwọn vwo nẹ etiyin, ayen da yanran re si ayen nu.

9 Ukuotọ rọyen, ayen da ta kẹ ohwohwo nẹ: “Oborẹ avwanre ruẹ na yomaa. Ọnana ẹdẹ rẹ iyẹnrẹn esiri! Avwanre de gbeghẹrẹ je hẹrhẹ bẹsiẹ rẹ ọke vwo rhie, avwanre fo ihwo re gboja kẹ. E jẹ avwanre yanran vwẹ asaọkiephana ra niyẹnrẹn rẹ ọnana vwẹ uwevwin rẹ ovie.” 10 Ọtiọyena ayen da yanran, ayen de kperi se ihwo ri muẹdia phiyọ anurhoro rẹ orere na, ayen da niyẹnrẹn kẹ ayen nẹ: “Avwanre ro evunrẹ asan rẹ ihwo ri Siria na wonphiyọ, ẹkẹvuọvo ohwo vuọvo hẹ etiyiin—avwanre nyo umri rẹ ohwo vuọvo kakakaa. Iyesi vẹ ekẹkẹtẹ re churu si asan yehẹ etiyin, kugbe itughẹ ra djẹ jovwo.” 11 Siẹvuọvo na, ihwo ri muẹdia anurhoro rẹ orere na de kperi phia, a da niyẹnrẹn rọyen vwevunrẹ uwevwin rẹ ovie.

12 Ugege yena, ovie na de vrẹn vwẹ ason, ọ da ta kẹ idibo rọyen nẹ: “Biko, juvwe vuẹ ovwan oborẹ ihwo ri Siria na ru avwanre na. Ayen riẹnre nẹ owẹnvwe hwe avwanre, ọtiọyena ayen de vrẹn nẹ asan rẹ ayen wonphiyọ na re siomanu vwevunrẹ aghwa, ayen tanẹ, ‘Ayen che vrẹn nẹ evunrẹ orere na rhe, kẹ avwanre che mu ayen ekpokpọ je ro evunrẹ orere na.’” 13 Etiyin ọvo vwẹ usun rẹ idibo rọyen da tanẹ: “Biko, e jẹ eshare evo reyọ iyesi iyorin ri chekọ vwẹ orere na. Nighere! Obo re cha phia kẹ ayen yen je cha phia kẹ ihwo rẹ Izrẹl buebun re daji etinẹ. Nighere! Ayen che ghwu kerẹ ihwo rẹ Izrẹl buebun ri ghwuru. Ọtiọyena jẹ avwanre ji ayen yanran re no.” 14 Ọtiọyena ayen de mu ekpẹrẹ ivẹ vẹ iyesi, ovie na de ji ayen kpo asan rẹ ihwo ri Siria na wonphiyọ, ọ da tanẹ: “Ovwan yanran re no.” 15 Ayen da vwọ kpahen ihwo ri Siria na rhirin re te Jọdan, idjerhe na eje vọnre vẹ iwun kugbe ekuakua rẹ ihwo ri Siria na do kufia rẹ ayen vwọ djẹ vẹ uguegue. Ikọn na de rhivwin ayen da niyẹnrẹn rọyen kẹ ovie na.

16 Ihwo na da yanran, ayen da ghwẹ ekuakua rehẹ asan rẹ ihwo ri Siria na wonphiyọ na fiotọ, te ẹdia rẹ ovwanvwọ ri siya rẹ omamọ rẹ iflawa da rhe dia shẹkẹl ọvo, ovwanvwọ ri siya ivẹ rẹ ibali da rhe dia shẹkẹl ọvo, kirobo rẹ Jihova tare. 17 Ovie na vwẹ onotu rọ vwẹroso na vwo mu kerẹ ohwo rọ rhẹrẹ anurhoro na, ẹkẹvuọvo ihwo na de chiyon hwe vwẹ asan anurhoro na, kirobo rẹ ohwo rẹ Ọghẹnẹ rẹ uyota na vuẹ ovie na ọke ro vwo bro rhe. 18 Ọ phiare kirobo rẹ ohwo rẹ Ọghẹnẹ rẹ uyota na vuẹ ovie na nẹ: “Ovwanvwọ ri siya ivẹ rẹ ibali cha dia shẹkẹl ọvo, ovwanvwọ ri siya rẹ omamọ rẹ iflawa cha dia shẹkẹl ọvo vwẹ omarẹ ọke tiọna vwẹ odẹ rọ cha na vwẹ asan anurhoro ri Sameria.” 19 Ẹkẹvuọvo onotu na ta kẹ ohwo rẹ Ọghẹnẹ rẹ uyota na jovwo nẹ: “Jihova da tobọ rhie evakpo rẹ idjuvwu na, emu ọtiọyena sa phia?”* Ọtiọyena Ẹlaisha da tanẹ: “Wọ cha vwẹ ẹro wẹn mrẹ, ẹkẹvuọvo wọ cha re vwọọ.” 20 Ọyena yen obo re ghwa phia kẹ, kidie ihwo na chiyinro hwe vwẹ asan anurhoro na.