Ẹyano
10 Ọtiọyena Jihova da ta kẹ Mosis: “Bru Fero ra, kidie me vwẹ uphẹn kẹ ubiudu rọyen kugbe ubiudu rẹ idibo rọyen re vwọ dia gangan, mi se vwo dje eka mẹ nana phia vwẹ obaro rọyen, 2 rere wo vwo ghwoghwo kẹ emọ wẹn rẹ emeshare vẹ ivwrọmọ wẹn rẹ emeshare obo ri mi ru Ijipt djadja te, kugbe eka ri mi ruru vwẹ ohri rayen; ku wọ cha ghene riẹn nẹ mẹvwẹ yen Jihova.”
3 Ọtiọyena Mosis vẹ Erọn de bru Fero ra, ayen da ta kẹ: “Ọnana yen oborẹ Jihova Ọghẹnẹ rẹ ihwo ri Hibru tare, ‘Brọke yen wọ cha sen kri te nẹ wọ cha vwomakpotọ kẹ vwẹẹ? Siobọnu ihwo mẹ yanran rere ayen sa vwọ ga vwẹ. 4 Wọ da je sian nẹ wo che siobọnu ihwo mẹẹ, nighere, mi che siobọnu igurube ro otọ wẹn odẹ rọ cha na. 5 Kẹ ayen che rhurhu otọ na, a rha cha sa mrẹ otọ naa. Ayen cha re obo ri chekọ kẹ ovwan, re vrabọ rẹ osio rẹ imicho na, ayen cha re irhe rẹ ovwan eje re djẹ vwẹ aghwa na. 6 Ayen cha vọn iwevwin wẹn, iwevwin rẹ idibo wẹn eje, kugbe iwevwin rẹ Ijipt eje te asan rẹ esẹ wẹn vẹ esẹ wẹn ride je rhe mrẹ dẹvoo, rhanvwẹ ọke rẹ ayen vwọ hẹ otọ nana rhi te nonẹna.’” Ọtiọyena o de kuomarhẹriẹ, o de nẹ obaro ri Fero.
7 Ọtiọyena idibo ri Fero da ta kẹ: “Mavọ yen ọshare nana cha so okpetu kẹ avwanre kri te?* Siobọnu ihwo na rere ayen ra ga Jihova Ọghẹnẹ rayen. Wọ je rhe mrẹvughe nẹ Ijipt ghwọrọ re?” 8 Ọtiọyena a da reyọ Mosis vẹ Erọn rhivwin bru Fero rhe, ọ da ta kẹ ayen: “Ovwan yanran ra ga Jihova Ọghẹnẹ rẹ ovwan. Ẹkẹvuọvo amono dẹn yen cha yanran?” 9 Ọtiọyena Mosis da ta: “Avwanre vẹ ighene rẹ avwanre, emare rẹ avwanre, emeshare rẹ avwanre, emetẹ rẹ avwanre, igodẹ rẹ avwanre, kugbe ichuru rẹ avwanre yen cha yanran, kidie avwanre cha re orẹ kẹ Jihova.” 10 Ọ da ta kẹ ayen: “Mi de siobọnu ovwan vẹ emọ rẹ ovwan yanran, kọyen Jihova vẹ ovwan ghene herọ! O phẹnre nẹ emu ọbrabra yen ovwan guọnọ ruẹ. 11 Ẹjo! Eshare rẹ ovwan ọvo yen sa yanran ra ga Jihova, kidie ọnana yen oborẹ ovwan nokpẹn rọyen.” Ọtiọyena a da djẹ ayen nẹ obaro ri Fero.
12 Asaọkiephana Jihova da ta kẹ Mosis: “Rionbọ wẹn phiyọ otọ rẹ Ijipt vwọ kẹ igurube na, rere ayen rhe otọ rẹ Ijipt rhe re ẹbe rẹ otọ na eje, kemu kemu rẹ osio rẹ imicho na yan jovwo.” 13 Ugege yena Mosis da riẹn ọkpọ rọyen phiyọ otọ rẹ Ijipt, Jihova da nẹrhẹ odju dju nẹ ẹbẹre ọnre va nẹcha rhe otọ na vwẹ ẹdẹ yena eje kugbe ason yena eje. Vwẹ urhiọke, odju ro dju nẹ ẹbẹre ọnre va nẹcha na rhe na, da hwarhiẹ igurube na rhe. 14 Igurube na da rhe ro otọ rẹ Ijipt eje, ayen da dia ọsoso rẹ ẹkuotọ rẹ Ijipt. Ayen bunru mamọ; a je rhe mrẹ igurube ri bun te ọtiọyen dẹvoo, a je cha mrẹ i ri bun te ọtiọyen ọfaa. 15 Ayen de rhurhu otọ na eje, otọ na da rhe dia biebi fiki rayen; ayen da ghwọrọ ẹbe rẹ otọ na eje kugbe emamọ rẹ irhe na eje rẹ osio rẹ imicho na ghwọrọree; o vwo emu vuọvo ro vwo ikọlọ ri grini ro chekọ vwẹ enu rẹ irhe yẹrẹ vwẹ ẹbe rẹ aghwa vwẹ otọ rẹ Ijipt ejee.
16 Ọtiọyena Fero de brokpakpa se Mosis vẹ Erọn, ọ da ta: “Mi ru umwemwu vwọso Jihova Ọghẹnẹ rẹ ovwan kugbe ovwan. 17 Asaọkiephana biko, ovwan vwo ghovwo uvwe udje nana ọvo rere ovwan rẹ Jihova Ọghẹnẹ rẹ ovwan nẹ o si ọtiekọ ọbrabra nana nuvwe oma.” 18 Ọtiọyena o* de nẹ obaro ri Fero, ọ da rẹ Jihova. 19 Jihova da nẹrhẹ odju na kuomarhẹriẹ, ọ da rhe dia odju ọgangan ro dju nẹ ẹbẹre ọnre shera na rhe, o de mu igurube na yanran, o de dju ayen ro evunrẹ Abadi Ọvwavware na. Igurube vuọvo rhe chekọ vwẹ ẹkuotọ rẹ Ijipt ejee. 20 Dedena Jihova da vwẹ uphẹn kẹ ubiudu ri Fero nẹ ọ dia gangan, o rhe siobọnu ihwo rẹ Izrẹl yanraan.
21 Ọtiọyena Jihova da ta kẹ Mosis: “Rionbọ wẹn phiyọ idjuvwu na rere ebri vwọ dia otọ rẹ Ijipt, ebri rọ cha gan te asan rọ da vwan ohwo oma.” 22 Ugege yena Mosis da rionbọ rọyen kpo idjuvwu na, ebri hwi da rhe dia otọ rẹ Ijipt eje vwẹ ẹdẹ erha. 23 Ayen mrẹ ohwohwoo, o vwo ohwo vuọvo ro vrẹn nẹ asan rọ hepha vwẹ ẹdẹ erhaa; ẹkẹvuọvo ihwo rẹ Izrẹl eje vwo urhukpẹ vwẹ asan rẹ ayen dia. 24 Fero de se Mosis, ọ da ta kẹ: “Ovwan yanran rere ovwan ra ga Jihova. Igodẹ rẹ ovwan kugbe ichuru rẹ ovwan ọvo yen che chekọ. Emọ rẹ ovwan dede se nene ovwan yanran.” 25 Ẹkẹvuọvo Mosis da ta: “Wẹ komobọ cha kẹ avwanre erọnvwọn rẹ avwanre che vwo ze izobo ji ru izobo rẹ ẹtorhẹ, kẹ avwanre cha vwẹ ayen vwo ze izobo kẹ Jihova Ọghẹnẹ rẹ avwanre. 26 Ichuru rẹ avwanre ji che nene avwanre yanran. O vwo eranvwe vuọvo ro che chekọọ, kidie avwanre cha reyọ evo vwẹ usun rayen vwọ ga Jihova Ọghẹnẹ rẹ avwanre, avwanre riẹn oborẹ avwanre che vwo ze izobo vwọ ga Jihovaa jokpanẹ avwanre te etiyin tavwen.” 27 Ọtiọyena Jihova da vwẹ uphẹn kẹ ubiudu ri Fero nẹ ọ dia gangan, ọ rha rhọnvwe siobọnu ayen yanraan. 28 Fero da ta kẹ: “Wan nẹ obaro mẹ! E jẹ o muwẹro nẹ wọ davwẹngba wọ vwọ mrẹ opharo mẹ ọfaa, kidie ẹdẹ ru vwọ mrẹ opharo mẹ, wo che ghwu.” 29 Ọtiọyena Mosis da ta: “Kirobo ru wọ tare na, me rha cha davwẹngba me vwọ mrẹ opharo wẹn ọfaa.”