Ẹyano
16 Ayen vwo vrẹn nẹ Ilim nu, ọghwẹgbe rẹ ihwo rẹ Izrẹl eje de rhi te aton ri Sin, rọhẹ uvwre rẹ Ilim vẹ Sainai, vwẹ ẹdẹ 15 rẹ emeranvwe rivẹ rẹ ayen vwo vrẹn nẹ otọ rẹ Ijipt nu.
2 Ọtiọyena ọghwẹgbe rẹ ihwo rẹ Izrẹl eje ki brenu kpahan Mosis vẹ Erọn vwevunrẹ aton na. 3 Ihwo rẹ Izrẹl ke ta kẹ ayen: “Mane kẹ avwanre ghwuru vwẹ obọ ri Jihova vwẹ otọ rẹ Ijipt ọke rẹ avwanre vwo chidia kẹrẹ ipọtu rẹ eranvwe, jẹ avwanre ria ibrẹdi vọn evun. Asaọkiephana wọ reyọ avwanre ro evunrẹ aton nana rhe vwẹ owẹnvwe vwo hwe ọsoso rẹ ọghwẹgbe nana ghwu.”
4 Ọtiọyena Jihova da ta kẹ Mosis: “Nighere, me cha nẹrhẹ ibrẹdi rhọ nẹ idjuvwu na rhe kẹ ovwan kerẹ osio, ohwo ọvuọvo kọ cha yanran re koko uche rọyen kẹdi kẹdẹ, me sa vwọ davwen ayen ni rere me vwọ riẹn sẹ ayen cha yan nene urhi mẹ yẹrẹ ayen che ru ọtiọyeen. 5 Ẹkẹvuọvo vwẹ ẹdẹ resan na, ọke rẹ ayen de muegbe rẹ oborẹ ayen kokori, kọ cha dia ọhwọhwọ ivẹ rẹ uche rẹ ayen ghwẹre vwẹ ẹdẹ ọvuọvo rẹ ẹdẹ ri chekọ na.”
6 Ọtiọyena Mosis vẹ Erọn da ta kẹ ihwo rẹ Izrẹl eje: “Vwẹ ovwọnvwọn, kẹ ovwan cha ghene riẹn nẹ Jihova yen reyọ ovwan nẹ otọ rẹ Ijipt rhe. 7 Ovwan cha mrẹ urinrin ri Jihova vwẹ urhiọke, kidie o nyo enuebro rẹ ovwan kpahen Jihova. Ono yen avwanre rẹ ovwan brenu kpahan?” 8 Mosis da je ta: “Ọke rẹ Jihova da kẹ ovwan eranvwe re vwẹ ovwọnvwọn je kẹ ovwan ibrẹdi rẹ ovwan cha re vọn evun vwẹ urhiọke, kẹ ovwan cha mrẹ nẹ Jihova nyo enuebro rẹ ovwan rẹ ovwan vwo brenu kpahọn. Ẹkẹvuọvo ono yen avwanre hepha? Ọ dia avwanre yen ovwan brenu kpahaan, ẹkẹvuọvo vwọ kpahen Jihova.”
9 Ọtiọyena Mosis da ta kẹ Erọn: “Ta kẹ ọghwẹgbe rẹ ihwo rẹ Izrẹl ejobi nẹ, ‘Ovwan yanrhe obaro ri Jihova, kidie o nyo enuebro rẹ ovwan re.’” 10 Ugege rẹ Erọn vwọ ta ota kẹ ọghwẹgbe rẹ ihwo rẹ Izrẹl ejobi nu, ayen de kuomarhẹriẹ hirhe opharo ku aton na, nighere! urinrin ri Jihova da vwomaphia vwẹ evwru na.
11 Jihova da rhoma ta kẹ Mosis nẹ: 12 “Mi nyo enuebro rẹ ihwo rẹ Izrẹl re. Vuẹ ayen, ‘Ovwan cha re eranvwe vwẹ ovwọnvwọn,* ovwan me rha re ibrẹdi vọn evun vwẹ urhiọke, kẹ ovwan cha ghene riẹn nẹ mẹvwẹ yen Jihova Ọghẹnẹ rẹ ovwan.’”
13 Ọtiọyena vwẹ ovwọnvwọn yena ikueli* da rhe, e da vọn asan rẹ ayen wonphiyọ* na, vwẹ urhiọke ọkpan rẹ evwru da riariẹ asan rẹ ayen wonphiyọ na. 14 Ọke rẹ evwru na vwọ wran nu, erọnvwọn re pha kerẹ imibi da rhe vwomaphia vwẹ otọ na vwevunrẹ aton na, e pha yoyovwin vwẹ otọ na kerẹ imicho ri vwo ọkpaan. 15 Ọke rẹ ihwo rẹ Izrẹl vwọ mrẹ, kẹ ayen ta kẹ ohwohwo: “Ọyen die?” Kidie ayen riẹn obo rọ hephaa. Mosis da ta kẹ ayen: “Ọyen ibrẹdi rẹ Jihova vwọ kẹ ovwan nẹ ovwan vwo ru emuọre. 16 Ọnana yen oborẹ Jihova ji iji rọyen, ‘Ohwo ọvuọvo mi koko vwo nene uche rọ sa re. Ovwan me reyọ ovwanvwọ rẹ omar ọvo* vwọ kẹ ohwo ọvuọvo vwo nene uche ihwo* rẹ ohwo ọvuọvo vwori vwẹ utughẹ rọyen.’” 17 Ihwo rẹ Izrẹl ki ruẹ ọtiọyen, ayen de koko, evo koko bun, efa de koko emerha. 18 Ọke rẹ ayen da vwẹ omar na vwanvwọ, ọ ro koko bun na koko bun nọọ, ọ ro koko emerha ji koko hanvwe nọọ. Ayen ohwo ọvuọvo kokiro vwo nene obo rọ sa re.
19 Ọtiọyena Mosis da ta kẹ ayen: “E jẹ ohwo vuọvo yanjẹ ọvuọvo rọyen vwo hrọkee.” 20 Ẹkẹvuọvo ayen kerhọ rẹ Mosisii. Ọke rẹ ihwo evo vwọ yanjẹ evo vwo hrọke, e da ro ihori, ki gbon, ophu de mu Mosis gangan kpahen ayen. 21 Kẹ ayen koko ayen kurhiọke kurhiọke, dohwo duche rọ sa re. Ọke rẹ uvo na da gan re, kẹ ayen wran.
22 Vwẹ ẹdẹ resan na, ayen de koko ọhwọhwọ ivẹ rẹ ibrẹdi na, ovwanvwọ rẹ omar ivẹ vwọ kẹ ohwo ọvuọvo. Isun rẹ ọghwẹgbe na eje da rhe niyẹnrẹn rọyen kẹ Mosis. 23 Ọtiọyena ọ da ta kẹ ayen: “Ọyen oborẹ Jihova tare. Omaerovwon re karekare* cha dia vwẹ odẹ rọ cha na, ẹdẹ urovwoma ọfuanfon kẹ Jihova. Ovwan kake obo ofori nẹ ovwan kake, ovwan chere obo ofori nẹ ovwan chere; rere ovwan sẹro rẹ obo ri chekọ, ovwan me sẹro rọyen re te urhiọke.” 24 Ọtiọyena ayen da sẹro rayen re te urhiọke kirobo rẹ Mosis ji iji rọyen, i gbonrii, e je ro ihorii. 25 Ọtiọyena Mosis da ta: “Ovwan re ayen nonẹna, kidie nonẹna ẹdẹ urovwoma kẹ Jihova. Ovwan cha mrẹ ayen vwẹ otọ na nonẹnaa. 26 Ovwan che koko ayen vwẹ ẹdẹ esan, ẹkẹvuọvo vwẹ ẹdẹ righwrẹn rọ dia Ẹdẹ Urovwoma na, ọvuọvo cha diaa.” 27 Ẹkẹvuọvo evo vwẹ usun rẹ ihwo na ji kpo otafe re koko ayen vwẹ ẹdẹ righwrẹn na, jẹ ayen mrẹ ọvuọvoo.
28 Ọtiọyena Jihova da ta kẹ Mosis: “Mavọ yen o kri te rẹ ovwan vwo jẹ iji mẹ kugbe irhi mẹ ẹyọnrọn? 29 Karophiyọ nẹ Jihova kẹ ovwan Ẹdẹ Urovwoma na. Kọyensorọ rọ vwọ kẹ ovwan ibrẹdi rẹ ẹdẹ ivẹ vwẹ ẹdẹ resan na. Kohwo kohwo me daji asan rọ hepha; e jẹ ohwo vuọvo nẹ ekogho rọyen vwẹ ẹdẹ righwrẹn naa.” 30 Ọtiọyena ihwo na de rovwoma vwẹ ẹdẹ righwrẹn na.
31 Uwevwin rẹ Izrẹl de se ibrẹdi na “imana.”* Ọ pha fuanfon kerẹ ubi ri kọrianda, avwerhen rọyen pha kerẹ avwerhen rẹ ikeki rọ pha pẹpẹghẹ ra vwẹ ame ọnyọn vwọ ba ru. 32 Ọtiọyena Mosis da ta: “Ọnana yen oborẹ Jihova ji iji rọyen, ‘Ovwan ghwẹ ovwanvwọ rẹ omar ọvo vọn kerẹ obo ra cha sẹro rọyen vwẹ uvwiẹ rẹ ovwan ejobi, rere ayen sa vwọ mrẹ ibrẹdi re me vwọ kẹ ovwan re vwevunrẹ aton na, ọke re me vwọ reyọ ovwan nẹ otọ rẹ Ijipt rhe.’” 33 Ọtiọyena Mosis da ta kẹ Erọn: “Reyọ ochẹ ọvo, wọ ghwẹ ovwanvwọ rẹ omar ọvo rẹ imana phiyọ evun rọyen, wo muo phiyọ obaro ri Jihova kerẹ orọnvwọn ra cha sẹro rọyen vwẹ uvwiẹ rẹ ovwan eje.” 34 Kirobo rẹ Jihova ghwe ji iji rọyen kẹ Mosis, Erọn de muo phiyọ obaro rẹ Oseri na rere a sa vwọ sẹro rọyen. 35 Ihwo rẹ Izrẹl re imana na vwẹ ẹgbukpe 40, bẹsiẹ ayen vwo te otọ rẹ ihwo dia. Ayen re imana na bẹsiẹ ayen vwo te ughwru rẹ otọ ri Kenan. 36 Asaọkiephana omar ọvo ọyen ẹkẹn ọvo rẹ ẹkẹn ihwe rẹ ovwanvwọ rẹ ifah.*