Livitikọs
9 Vwẹ ẹdẹ rẹrenren na, Mosis de se Erọn vẹ emọ rọyen kugbe ekpako rẹ Izrẹl. 2 Ọ da ta kẹ Erọn: “Reyọ erhuẹn otete ọvo vwọ kẹ izobo rẹ umwemwu wẹn kugbe egbon ọvo vwọ kẹ izobo rẹ ẹtorhẹ, e rẹ oma rayen gbare, rere wọ vwẹ ayen kpahotọ vwẹ obaro ri Jihova. 3 Ẹkẹvuọvo wọ me ta kẹ ihwo rẹ Izrẹl nẹ, ‘Ovwan reyọ okri* ọvo vwọ kẹ izobo rẹ umwemwu kugbe erhuẹn otete vẹ egbon otete, ayen ọvuọvo me dia ẹgbukpe ọvo, e rẹ oma rayen gbare, vwọ kẹ izobo rẹ ẹtorhẹ, 4 kugbe erhuẹn ọvo vẹ egbon ọvo vwọ kẹ izobo rẹ ọrekugbe, rere ovwan vwẹ ayen ze izobo vwẹ obaro ri Jihova, kugbe izobo rẹ eka ra vwẹ evwri vwọ ba ru, kidie Jihova cha vwomaphia kẹ ovwan nonẹna.’”
5 Ọtiọyena ayen da hwarhiẹ oborẹ Mosis ji iji rọyen kẹ ayen na rhe obaro rẹ utughẹ ra da vwoma na. Ọghwẹgbe na eje da yanrhe, ayen de mudia obaro ri Jihova. 6 Mosis da ta: “Ọnana yen oborẹ Jihova ji iji rọyen kẹ ovwan nẹ ovwan ru, rere urinrin ri Jihova sa vwọ vwomaphia kẹ ovwan.” 7 Ọtiọyena Mosis da ta kẹ Erọn: “Yan kpo asan rẹ agbada na hepha rere wọ vwẹ izobo rẹ umwemwu wẹn vẹ izobo rẹ ẹtorhẹ wẹn vwọ kpahotọ, rere wo ru arhuẹrẹ vwọ kẹ oma wẹn kugbe uwevwin wẹn; wọ vwẹ izobo rẹ ihwo na vwọ kpahotọ, rere wo ru arhuẹrẹ vwọ kẹ ayen, kirobo rẹ Jihova ji iji rọyen.”
8 Kpakpata Erọn de kpo asan rẹ agbada na hepha, o de hwe erhuẹn otete rẹ izobo rẹ umwemwu vwọ kẹ umwemwu rọyen. 9 Ọtiọyena emọ rẹ Erọn de mu ọbara na vwọ kẹ, o de duvwun urhiobọ rọyen phiyọ ọbara na, o de vwo ghworo idjo rẹ agbada na, o de ku ọbara ro chekọ na kuotọ kẹrẹ agbada na. 10 Ọ da reyọ ivwri na kugbe ibiehun na vẹ ivwri rẹ irhue na vwo nẹ izobo rẹ umwemwu na, ọ da nẹrhẹ ayen bru ivwirhi vwẹ enu rẹ agbada na, kirobo rẹ Jihova ji iji rọyen kẹ Mosis. 11 Ọ da vwẹ erhanre vwọ torhẹ uvwo kugbe ohọrọ na vwẹ otafe rẹ asan rẹ ayen wonphiyọ* na.
12 O de hwe egbon rẹ izobo rẹ ẹtorhẹ na, emọ rẹ Erọn de mu ọbara na vwọ kẹ, ọ da fẹrẹn ku ẹbẹre eje rẹ agbada na. 13 Ayen da vwẹ ibro rẹ eranvwe rẹ izobo rẹ ẹtorhẹ na vẹ uyovwin na vwọ kẹ, ọ da nẹrhẹ ayen bru ivwirhi vwẹ enu rẹ agbada na. 14 Vwọba, ọ da hworhẹ ivun na vẹ awọ na, ọ da nẹrhẹ ayen bru ivwirhi vwẹ enu rẹ izobo rẹ ẹtorhẹ na rọhẹ enu rẹ agbada na.
15 Ọ da vwẹ izobo rẹ ihwo na vwọ kpahotọ, ọ da reyọ ẹvwe rẹ izobo rẹ umwemwu rẹ ihwo na, o de hwe, ọ da reyọ vwo ze izobo rẹ umwemwu kirobo ro ru ọrẹsosuọ na. 16 Ọ da vwẹ izobo rẹ ẹtorhẹ na vwọ kpahotọ, o de ruo kirobo rẹ urhi na tare.
17 O vwo ru ọyena nu, ọ da vwẹ izobo rẹ eka na vwọ kpahotọ, ọ da ghwẹ obọ rọyen vọn vẹ evo vwẹ usun rọyen, ọ da nẹrhẹ o bru ivwirhi vwẹ enu rẹ agbada na, vwọ ba izobo rẹ ẹtorhẹ rẹ urhiọke na.
18 Ọyena vwọ wan nu, o de hwe erhuẹn vẹ egbon rẹ izobo rẹ ọrekugbe rẹ ihwo na. Emọ rẹ Erọn de mu ọbara na kẹ, ọ da fẹrẹn ku ẹbẹre eje rẹ agbada na. 19 Vwọ kẹ ibro rẹ ivwri rẹ erhuẹn na, ivwri rẹ urhurhu rẹ egbon na, ivwri ri rhurhu obo rehẹ obevun rẹ eranvwe na, ibiehun na kugbe ivwri rẹ irhue na, 20 ayen de mu ibro rẹ ivwri yena eje kpahen enu rẹ ivie na, ọyena vwọ wan nu, ọ da nẹrhẹ ibro rẹ ivwri na bru ivwirhi vwẹ enu rẹ agbada na. 21 Ẹkẹvuọvo Erọn de dju ivie na vẹ owọrhen na kpuko kparo kerẹ izobo rẹ edjuo vwẹ obaro ri Jihova, kirobo rẹ Mosis ji iji rọyen.
22 Ọtiọyena Erọn da kpare abọ rọyen kpenu vwẹ obaro rẹ ihwo na, o de bruba kẹ ayen, o de vrẹn nẹ asan ro de ze izobo rẹ umwemwu na kugbe izobo rẹ ẹtorhẹ na vẹ izobo rẹ ọrekugbe na rhe. 23 Ukuotọ rọyen, Mosis vẹ Erọn da ro evunrẹ utughẹ ra da vwoma na, ayen da ro otafe, ayen de bruba kẹ ihwo na.
Asaọkiephana urinrin ri Jihova da vwomaphia kẹ ihwo na eje, 24 erhanre de nẹ obọ ri Jihova rhe, kọ torhẹ izobo rẹ ẹtorhẹ na kugbe ibro rẹ ivwri rehẹ enu rẹ agbada na. Ọke rẹ ihwo na ejobi vwọ mrẹ, kẹ ayen kperẹ, ayen de she bọvwọn opharo rhuotọ.