Ukeri
27 Ọtiọyena emetẹ ri Zẹlofihad, ọmọ ri Hifa, ọmọ ri Giliẹd, ọmọ ri Mekiẹ, ọmọ ri Manasẹ, ohwo rẹ orua ri Manasẹ ọmọ ri Josẹf da yanrhe. Edẹ rẹ emetẹ rọyen na yen Mala, Noa, Họgla, Milka, kugbe Tiẹza. 2 Ayen mudia obaro ri Mosis, Ẹlieza orherẹn na, isun na, kugbe ọghwẹgbe na eje vwẹ asan ra wan rua utughẹ ra da vwoma na, ayen da ta: 3 “Ọsẹ rẹ avwanre ghwuru vwẹ aton na, jẹ ọ hẹ usun rẹ ẹko rẹ ihwo ri kuomakugbe vwọso Jihova ri bicha Kora naa, ẹkẹvuọvo o ghwuru fikirẹ umwemwu romobọ rọyen jẹ o vwiẹ ọmọshare vuọvoo. 4 Diesorọ odẹ rẹ ọsẹ rẹ avwanre vwo ghwru nẹ orua rọyen kidie nẹ o vwiẹ ọmọsharee? Ghare uku kẹ avwanre vwẹ ohri rẹ iniọvo rẹ ọsẹ rẹ avwanre.” 5 Ọtiọyena Mosis da vwẹ ota rayen na phia vwẹ obaro ri Jihova.
6 Jihova da ta kẹ Mosis: 7 Oborẹ emetẹ ri Zẹlofihad tare na gbare. O vwo obo rọ wanree, ghare uku kẹ ayen vwẹ ohri rẹ iniọvo rẹ ọsẹ rayen, rere wọ reyọ uku rẹ ọsẹ rayen vwọ kẹ ayen. 8 Wọ me vuẹ ihwo rẹ Izrẹl, ‘Ọshare de ghwu jẹ o vwiẹ omosharee, wo mi jẹ a ghare uku rọyen vwọ kẹ ọmọ rọyen rẹ ọmọtẹ. 9 Ọ da dianẹ o vwiẹ ọmọtẹ vuọvoo, wọ me ghare uku rọyen kẹ iniọvo rọyen eshare. 10 O rhe vwo oniọvo ọshare vuọvoo, wọ me ghare uku rọyen kẹ iniọvo rẹ ọsẹ rọyen. 11 Ọsẹ rọyen rhe vwo oniọvo ọshare vuọvoo, wọ me ghare uku rọyen vwọ kẹ oniọvo rọ ma kẹrẹ vwẹ orua rọyen, ọ me riuku rọyen. Ọnana me dia urhi rẹ orhiẹn-ebro vwọ kẹ ihwo rẹ Izrẹl, kirobo rẹ Jihova ji iji rọyen kẹ Mosis.’”
12 Ọtiọyena Jihova da ta kẹ Mosis: “Yerin kpenu rẹ ugbenu rẹ Abarim nana, rere wo ni otọ re me cha vwọ kẹ ihwo rẹ Izrẹl. 13 Wọ da mrẹ nu, ke ji che koko uwe bru ihwo wẹn ra,* kirobo re ru Erọn oniọvo wen, 14 kidie ọke rẹ ọghwẹgbe na vwo nene uvwe kunu vwẹ aton ri Zin, wo gbe vwọso iji mẹ ru wo vwo ru vwe fon vwẹ obaro rayen womarẹ ame na. Enana yen ame ri Mẹriba vwẹ Kedẹsh vwẹ aton ri Zin.”
15 Mosis da ta kẹ Jihova: 16 “E jẹ Jihova Ọghẹnẹ rẹ ẹwẹn rẹ ihwo eje* vwẹ ọshare ọvo vwo mu vwẹ enu rẹ ọghwẹgbe na 17 rọ cha kobaro kẹ ayen yanran je kobaro kẹ ayen rhivwin, ro che sun ayen yanran ji sun ayen rhivwin, rere ọghwẹgbe ri Jihova vwo jẹ ẹdia kerẹ igodẹ ri jẹ osuigodẹ evwo.” 18 Jihova da ta kẹ Mosis: “Reyọ Joshua ọmọ ri Nọn, ohwo rẹ ẹwẹn hẹ oma rọyen, rere wọ ghwabọ wẹn kpahọn. 19 Reyọ vwo mudia obaro rẹ Ẹlieza orherẹn na kugbe obaro rẹ ọghwẹgbe na eje, wo mi vwo mu vwẹ irharo rayen. 20 Wọ me vwẹ ogangan wẹn evo vwọ kẹ rere ọghwẹgbe rẹ ihwo rẹ Izrẹl na eje sa vwọ kerhọ rọyen. 21 O che mudia obaro rẹ Ẹlieza orherẹn na, rọ cha nọ vwọ kẹ womarẹ orhiẹn-ebro ri Yurim na vwẹ obaro ri Jihova. Vwo nene iji rọyen, kẹ ayen cha yanran, vwo nene iji rọyen kẹ ayen che rhivwin rhe, te ọyen te ihwo rẹ Izrẹl eje re vẹ ọyen gba herọ kugbe ọghwẹgbe na eje.”
22 Ọtiọyena Mosis de ghwe ru kirobo rẹ Jihova ji iji rọyen kẹ. Ọ da reyọ Joshua, o de vwo mudia obaro rẹ Ẹlieza orherẹn na kugbe obaro rẹ ọghwẹgbe na eje, 23 ọ da ghwabọ rọyen kpahọn, o de vwo mu kirobo rẹ Jihova tare womarẹ Mosis.