Ukeri

29 “‘Vwẹ emeranvwe righwrẹn na, vwẹ ẹdẹ rẹsosuọ rẹ emeranvwe na, ovwan mi ru ọghwẹkoko ọfuanfon. Ovwan ruiruo ọgangan vuọvoo. Ọnana ẹdẹ rẹ ovwan che vwo hworo owanre na. 2 Ovwan me vwẹ erhuẹn otete ọvo, egbon ọvo, kugbe imigodẹ eshare ighwrẹn rẹ ọvuọvo rayen hẹ ẹgbukpe ọvo vwo ze izobo rẹ ẹtorhẹ kerẹ ọnrhe ọvwevwerhen kẹ Jihova, ayen eje me dia e rẹ oma rayen gbare, 3 kugbe izobo rẹ eka rayen rẹ omamọ rẹ iflawa re ku kugbe vẹ evwri, ẹkẹn erha rẹ ẹkẹn ihwe rẹ ovwanvwọ rẹ ifah vwọ kẹ erhuẹn na, ovwanvwọ rẹ ẹkẹn ivẹ rẹ ẹkẹn ihwe vwọ kẹ egbon na, 4 vẹ ovwanvwọ rẹ ẹkẹn ọvo rẹ ẹkẹn ihwe vwọ kẹ omogodẹ ọshare ọvuọvo vwẹ usun rẹ imigodẹ eshare ighwrẹn na, 5 kugbe omokri* ọvo kerẹ izobo rẹ umwemwu re che vwo ru arhuẹrẹ kẹ ovwan. 6 Ovwan me vwẹ ọnana vwọ ba izobo rẹ ẹtorhẹ ri kemeranvwe kemeranvwe vẹ izobo rẹ eka rọyen kugbe izobo rẹ ẹtorhẹ ri kọke kọke vẹ izobo rẹ eka rọyen, e vẹ izobo rẹ udi rayen vwo nene obo re ruẹ ayen jovwo, kerẹ ọnrhe ọvwevwerhen, izobo ra vwẹ erhanre torhẹ kẹ Jihova.

7 “‘Vwẹ ẹdẹ rihwe rẹ emeranvwe righwrẹn nana, ovwan mi ru ọghwẹkoko ọfuanfon, ovwan mi gboja kẹ oma rẹ ovwan.* Ovwan ruiruo vuọvoo. 8 Ovwan me vwẹ erhuẹn otete ọvo, egbon ọvo, kugbe imigodẹ eshare ighwrẹn rẹ ọvuọvo rayen hẹ ẹgbukpe ọvo vwọ kpahotọ kerẹ izobo rẹ ẹtorhẹ kẹ Jihova, kerẹ ọnrhe ọvwevwerhen, ayen eje me dia e rẹ oma rayen gbare. 9 Ovwan me vwẹ izobo rẹ eka rayen rẹ omamọ rẹ iflawa re ku kugbe vẹ evwri vwọ kpahotọ, ovwanvwọ rẹ ẹkẹn erha rẹ ẹkẹn ihwe vwọ kẹ erhuẹn na, ovwanvwọ rẹ ẹkẹn ivẹ rẹ ẹkẹn ihwe vwọ kẹ egbon na, 10 ovwanvwọ rẹ ẹkẹn ọvo rẹ ẹkẹn ihwe vwọ kẹ omogodẹ ọshare ọvuọvo vwẹ usun rẹ imigodẹ eshare ighwrẹn na, 11 ọtiọyen ji te ẹmẹvwe ọvo kerẹ izobo rẹ umwemwu, vwọ vrẹ izobo rẹ umwemwu rẹ arhuẹrẹ kugbe izobo rẹ ẹtorhẹ ri kọke kọke vẹ izobo rẹ eka rọyen, kugbe izobo rẹ udi rayen.

12 “‘Vwẹ ẹdẹ 15 rẹ emeranvwe righwrẹn na, ovwan mi ru ọghwẹkoko ọfuanfon. Ovwan ruiruo ọgangan vuọvoo, ovwan me re orẹ kẹ Jihova ẹdẹ ighwrẹn. 13 Ovwan me vwẹ erhuẹn itete 13, egbon 2, kugbe imigodẹ eshare 14 rẹ ọvuọvo rayen hẹ ẹgbukpe ọvo vwọ kpahotọ kerẹ izobo rẹ ẹtorhẹ, izobo ra vwẹ erhanre torhẹ kerẹ ọnrhe ọvwevwerhen kẹ Jihova, ayen eje me dia e rẹ oma rayen gbare. 14 Vwọ kẹ izobo rẹ eka rayen rẹ omamọ rẹ iflawa re ku kugbe vẹ evwri, ovwanvwọ rẹ ẹkẹn erha rẹ ẹkẹn ihwe vwọ kẹ erhuẹn ọvuọvo vwẹ usun rẹ erhuẹn 13 na, ovwanvwọ rẹ ẹkẹn ivẹ rẹ ẹkẹn ihwe vwọ kẹ egbon ọvuọvo vwẹ usun rẹ egbon 2 na, 15 kugbe ovwanvwọ rẹ ẹkẹn ọvo rẹ ẹkẹn ihwe vwọ kẹ omogodẹ ọshare ọvuọvo vwẹ usun rẹ imigodẹ eshare 14 na, 16 ọtiọyen ji te ẹmẹvwe ọvo vwọ kẹ izobo rẹ umwemwu, vwọ vrẹ izobo rẹ ẹtorhẹ ri kọke kọke na, izobo rẹ eka rọyen, kugbe izobo rẹ udi rọyen.

17 “‘Vwẹ ẹdẹ rivẹ na, erhuẹn itete 12, egbon 2, kugbe imigodẹ eshare 14 rẹ ọvuọvo rayen hẹ ẹgbukpe ọvo, ayen eje me dia e rẹ oma rayen gbare, 18 vẹ izobo rẹ eka rayen kugbe izobo rẹ udi rayen vwọ kẹ erhuẹn na, egbon na, kugbe imigodẹ eshare na vwo nene uchunu rayen kirobo re ruo jovwo, 19 ọtiọyen ji te ẹmẹvwe ọvo kerẹ izobo rẹ umwemwu, vwọ vrẹ izobo rẹ ẹtorhẹ ri kọke kọke na vẹ izobo rẹ eka rọyen, kugbe izobo rẹ udi rayen.

20 “‘Vwẹ ẹdẹ rerha na, erhuẹn 11, egbon 2, kugbe imigodẹ eshare 14 rẹ ọvuọvo rayen hẹ ẹgbukpe ọvo, ayen eje me dia e rẹ oma rayen gbare, 21 vẹ izobo rẹ eka rayen kugbe izobo rẹ udi rayen vwọ kẹ erhuẹn na, egbon na, kugbe imigodẹ eshare na vwo nene uchunu rayen kirobo re ruo jovwo, 22 ọtiọyen ji te ẹvwe ọvo kerẹ izobo rẹ umwemwu, vwọ vrẹ izobo rẹ ẹtorhẹ ri kọke kọke na, vẹ izobo rẹ eka rọyen, kugbe izobo rẹ udi rọyen.

23 “‘Vwẹ ẹdẹ rẹne na, erhuẹn 10, egbon 2, kugbe imigodẹ eshare 14 rẹ ọvuọvo rayen hẹ ẹgbukpe ọvo, ayen eje me dia e rẹ oma rayen gbare, 24 izobo rẹ eka rayen kugbe izobo rẹ udi rayen vwọ kẹ erhuẹn na, egbon na, kugbe imigodẹ eshare na, vwo nene uchunu rayen kirobo re ruo jovwo, 25 ọtiọyen ji te ẹmẹvwe ọvo kerẹ izobo rẹ umwemwu, vwọ vrẹ izobo rẹ ẹtorhẹ ri kọke kọke, izobo rẹ eka rọyen, kugbe izobo rẹ udi rọyen.

26 “‘Vwẹ ẹdẹ riyorin na, erhuẹn 9, egbon 2, kugbe imigodẹ eshare 14 rẹ ọvuọvo rayen hẹ ẹgbukpe ọvo, ayen eje me dia e rẹ oma rayen gbare, 27 izobo rẹ eka rayen kugbe izobo rẹ udi rayen vwọ kẹ erhuẹn na, egbon na, kugbe imigodẹ eshare na, vwo nene uchunu rayen kirobo re ruo jovwo, 28 ọtiọyen ji te ẹvwe ọvo kerẹ izobo rẹ umwemwu, vwọ vrẹ izobo rẹ ẹtorhẹ ri kọke kọke na, vẹ izobo rẹ eka rọyen, kugbe izobo rẹ udi rọyen.

29 “‘Vwẹ ẹdẹ resan na, erhuẹn 8, egbon 2, kugbe imigodẹ eshare 14 rẹ ọvuọvo rayen hẹ ẹgbukpe ọvo, ayen eje me dia e rẹ oma rayen gbare, 30 izobo rẹ eka rayen kugbe izobo rẹ udi rayen vwọ kẹ erhuẹn na, egbon na, kugbe imigodẹ eshare na vwo nene uchunu rayen kirobo re ruo jovwo, 31 ọtiọyen ji te ẹvwe ọvo kerẹ izobo rẹ umwemwu, vwọ vrẹ izobo rẹ ẹtorhẹ ri kọke kọke na, izobo rẹ eka rọyen, kugbe izobo rẹ udi rọyen.

32 “‘Vwẹ ẹdẹ righwrẹn na, erhuẹn 7, egbon 2, kugbe imigodẹ eshare 14 rẹ ọvuọvo rayen hẹ ẹgbukpe ọvo, ayen eje me dia e rẹ oma rayen gbare, 33 izobo rẹ eka rayen kugbe izobo rẹ udi rayen vwọ kẹ erhuẹn na, egbon na, kugbe imigodẹ eshare na vwo nene uchunu rayen kirobo re ruo jovwo, 34 ọtiọyen ji te ẹvwe ọvo kerẹ izobo rẹ umwemwu, vwọ vrẹ izobo rẹ ẹtorhẹ ri kọke kọke na, izobo rẹ eka rọyen, kugbe izobo rẹ udi rọyen.

35 “‘Vwẹ ẹdẹ rẹrenren na, ovwan mi ru ọghwẹgbe ọfuanfon. Ovwan ruiruo ọgangan vuọvoo. 36 Ovwan me vwẹ erhuẹn ọvo, egbon ọvo, kugbe imigodẹ eshare ighwrẹn rẹ ọvuọvo rayen hẹ ẹgbukpe ọvo vwo ze izobo rẹ ẹtorhẹ, izobo ra vwẹ erhanre torhẹ kerẹ ọnrhe ọvwevwerhen kẹ Jihova, ayen eje me dia e rẹ oma rayen gbare, 37 izobo rẹ eka rayen kugbe izobo rẹ udi rayen vwọ kẹ erhuẹn na, egbon na, kugbe imigodẹ eshare na vwo nene uchunu rayen kirobo re ruo jovwo, 38 ọtiọyen ji te ẹvwe ọvo kerẹ izobo rẹ umwemwu, vwọ vrẹ izobo rẹ ẹtorhẹ ri kọke kọke na, izobo rẹ eka rọyen, kugbe izobo rẹ udi rọyen.

39 “‘Enana yen ovwan cha vwọ kpahotọ kẹ Jihova vwẹ erẹ rẹ ovwan rẹ okẹ sansan, ovwan cha vwẹ ayen vwọ ba izobo rẹ ive rẹ ovwan kugbe izobo rẹ ovwan ro nẹ otọ rẹ ẹwẹn rhe kerẹ izobo rẹ ẹtorhẹ vẹ izobo rẹ eka rẹ ovwan, izobo rẹ udi rẹ ovwan kugbe izobo rẹ ọrekugbe rẹ ovwan.’” 40 Mosis vuẹ ihwo rẹ Izrẹl na erọnvwọn eje rẹ Jihova ji iji rọyen kẹ.