Ukeri
8 Jihova da ta kẹ Mosis: 2 “Ta ota kẹ Erọn rere wọ vuẹ nẹ, ‘Ọke wọ da vwẹ irhukpẹ na vwo mu, irhukpẹ ighwrẹn na mi lo mu asan rọhẹ obaro rẹ ogburhukpẹ na.’” 3 Ọtiọyena Erọn de ru ọnana: Ọ da vwẹ irhukpẹ na vwo mu rere i lo mu asan rọhẹ obaro rẹ ogburhukpẹ na kirobo rẹ Jihova ji iji rọyen kẹ Mosis. 4 Ọnana yen obo re ru ogburhukpẹ na wan: Oro re duvwunru yen e vwo ruo; vwo nẹ ugbẹn rọyen re te idodo rọyen, ọyen iruo rẹ oro re duvwunru. E ru ogburhukpẹ na vwo nene emramrẹ rẹ Jihova vwọ nẹ Mosis.
5 Jihova da rhoma ta ota kẹ Mosis, ọ da ta: 6 “Reyọ ihwo ri Livae vwo nẹ ohri rẹ ihwo rẹ Izrẹl rere wo ru ayen fon. 7 Ọnana yen obo ru wo che ru ayen fon wan: “Fẹrẹn ame re vwo ruẹ ohwo fuan nẹ umwemwu na ku ayen, ayen me vwẹ anre* vwọ wanre ẹton rehẹ oma rayen eje, fọnrhọn iwun rayen, ji ru oma rayen fon. 8 Ayen me reyọ erhuẹn otete ọvo vẹ izobo rẹ eka rọyen rẹ omamọ rẹ iflawa ra vwẹ evwri gua, wọ me je reyọ erhuẹn otete ọfa vwọ kẹ izobo rẹ umwemwu. 9 Wọ me reyọ ihwo ri Livae na rhe obaro rẹ utughẹ ra da vwoma na, wo mi ji koko ọghwẹgbe rẹ ihwo rẹ Izrẹl eje. 10 Ọke ru wọ da vwẹ ihwo ri Livae na rhe obaro ri Jihova, ihwo rẹ Izrẹl me ghwabọ rayen kpahen ihwo ri Livae na. 11 Erọn me vwẹ ihwo ri Livae na vwọ kpahotọ vwẹ obaro ri Jihova kerẹ izobo rẹ edjuo ro nẹ obọ rẹ ihwo rẹ Izrẹl rhe, ayen mi ruiruo rẹ ẹga ri Jihova.
12 “Ọyena da wan nu, ihwo ri Livae na cha ghwabọ rayen kpahen uyovwin rẹ erhuẹn na, a me vwẹ ọvo vwọ kpahotọ kerẹ izobo rẹ umwemwu, ọ ro chekọ na kerẹ izobo rẹ ẹtorhẹ kẹ Jihova vwo ru arhuẹrẹ vwọ kẹ ihwo ri Livae na. 13 Wọ me vwẹ ihwo ri Livae na vwo mudia obaro rẹ Erọn vẹ emọ rọyen rere wọ vwẹ ayen vwọ kpahotọ kerẹ izobo rẹ edjuo vwọ kẹ Jihova. 14 Wọ me hẹriẹ ihwo ri Livae na vwo nẹ ohri rẹ ihwo rẹ Izrẹl, ihwo ri Livae na me dia emẹ. 15 Ọyena da wan nu, ihwo ri Livae na ke cha rhe ga vwẹ utughẹ ra da vwoma na. Ọnana yen obo ru wo che ru ayen fon wan je vwẹ ayen vwọ kpahotọ kerẹ izobo rẹ edjuo. 16 Kidie ayen ihwo ra vwọ kẹ vwẹ, a vwẹ ayen kẹ vwẹ vwo nẹ ohri rẹ ihwo rẹ Izrẹl. Me cha reyọ ayen kẹ oma mẹ vwẹ ẹdia rẹ ihwo eje re dia emekpako* rẹ ihwo rẹ Izrẹl. 17 Kidie emekpako na eje rehẹ ohri rẹ ihwo rẹ Izrẹl na emẹ, te ihworakpọ te eranvwe. Mi ru ayen fon kẹ oma mẹ vwẹ ẹdẹ re me teyen emekpako na eje rehẹ otọ rẹ Ijipt hwe na. 18 Me cha reyọ ihwo ri Livae na vwẹ ẹdia rẹ emekpako na eje vwẹ ohri rẹ ihwo rẹ Izrẹl. 19 Me cha vwẹ ihwo ri Livae na vwọ kẹ Erọn vẹ emọ rọyen kerẹ okẹ vwo nẹ ohri rẹ ihwo rẹ Izrẹl, rẹ ayen vwo ruiruo rẹ ẹga na vwọ kẹ ihwo rẹ Izrẹl vwẹ utughẹ ra da vwoma na ji ru arhuẹrẹ vwọ kẹ ihwo rẹ Izrẹl, rere ọtiekọ vuọvo vwo jẹ oma rẹ ihwo rẹ Izrẹl ete kidie nẹ ihwo rẹ Izrẹl sikẹrẹ asan ọfuanfon na.”
20 Mosis vẹ Erọn kugbe ọghwẹgbe rẹ ihwo rẹ Izrẹl eje de ru ọnana vwọ kẹ ihwo ri Livae na. Vwo nene erọnvwọn eje rẹ Jihova ji iji rọyen kẹ Mosis kpahen ihwo ri Livae na, ọyen oborẹ ihwo rẹ Izrẹl ru kẹ ayen. 21 Ọtiọyena ihwo ri Livae na de ru oma rayen fon je fọnrhọn iwun rayen tavwen Erọn ke vwẹ ayen vwọ kpahotọ kerẹ izobo rẹ edjuo vwẹ obaro ri Jihova. Erọn vwo ru ọtiọyen nu, o de ru arhuẹrẹ kẹ ayen vwo ru ayen fon. 22 Ọyena vwọ wan nu, ihwo ri Livae na de rhi ruiruo rẹ ẹga rayen vwẹ utughẹ ra da vwoma na vwẹ obaro rẹ Erọn vẹ emọ rọyen. Kirobo rẹ Jihova ji iji rọyen kẹ Mosis vwọ kpahen ihwo ri Livae na ọtiọyen ayen ru kẹ ayen.
23 Asaọkiephana Jihova da ta kẹ Mosis: 24 “Ọnana shekpahen ihwo ri Livae na: Vwo nẹ ẹgbukpe 25 kpenu, ọshare cha vwomaba ihwo re ga vwẹ utughẹ ra da vwoma na. 25 Ẹkẹvuọvo ọ da wanvrẹ ẹgbukpe 50 nu, kọ cha dobọ rẹ ẹga na ji, ọ rha cha ga ọfaa. 26 O se gbodibo kẹ iniọvo rọyen re vwẹrote iruo na vwẹ utughẹ ra da vwoma na, ẹkẹvuọvo o che vwobọ vwẹ ẹga na vwẹ etiyiin. Ọnana yen obo wo che ru vwọ kpahen ihwo ri Livae na vẹ iruo rayen.”