Iruo rẹ Iyinkọn Na
6 Asaọkiephana vwẹ ọke yena rẹ idibo na vwo buẹnphiyọ na, ihwo ri Ju re jẹ Grik ki brenu kpahen ihwo ri Ju re jẹ Hibru, kidie a kpairoro vrẹ eyauku rayen vwẹ emu ra ghara kẹdi kẹdẹ na. 2 Ọtiọyena Ihwivẹ na de se idibo na re pha buebun na koko, ayen da tanẹ: “Ofori* rẹ avwanre vwọ yanjẹ ota rẹ Ọghẹnẹ vwo, ra ghare emu phiyọ imẹjẹ-ẹ. 3 Ọtiọyena iniọvo, ovwan sane eshare ighwrẹn ra sa vwẹroso* vwẹ ohri rẹ ovwan, re vọnre vẹ ẹwẹn kugbe aghwanre, rere avwanre vwẹ ayen mu vwẹ enu rẹ iruo nana rọ pha ghanghanre na; 4 ẹkẹvuọvo avwanre che muomaphiyọ ẹrhovwo ẹnẹ kugbe eyono rẹ ota rẹ Ọghẹnẹ.” 5 Oborẹ ayen tare na je ihwo na ejobi, ayen da sane Stivin, ọshare rọ vọnre vẹ esegbuyota kugbe ẹwẹn ọfuanfon, ọtiọyen ji te Filip, Prokorọs, Nikanọ, Taimọn, Pamenas, kugbe Nikoleọs, ohwo rẹ Antiọk ro kurhẹriẹ kpo ẹga rẹ ihwo ri Ju. 6 Ayen da reyọ ayen bru iyinkọn na rhe, ọke rẹ iyinkọn na vwọ nẹrhovwo nu, ayen da ghwabọ kpahen ayen.
7 Ọtiọyena, ota rẹ Ọghẹnẹ kọ hẹrẹphiyọ, idibo na ki buẹnphiyọ vwẹ Jerusalẹm; irherẹn buebun ki ji rhiabọreyọ esegbuyota na.
8 Asaọkiephana Stivin rọ vọnre vẹ ẹroesiri rẹ Ọghẹnẹ kugbe ogangan, ko ruiruo rẹ igbevwunu ride kugbe eka vwẹ ohri rẹ ihwo na. 9 Ẹkẹvuọvo eshare evo ri nẹ ẹko re se Sinagọg rẹ Ihwo re siobọnu rhe, vẹ ihwo ri Sairini kugbe Alẹzandria evo, kugbe ihwo evo ri nẹ Silisha kugbe Esha rhe, de rhi nene Stivin phraphro. 10 Ẹkẹvuọvo ayen se nene phraphro-o kidie ọ ta ota vẹ aghwanre kugbe ukẹcha rẹ ẹwẹn na. 11 Ọtiọyena ayen da bẹbẹ riẹriẹ ihwo evo nẹ ayen tanẹ: “Avwanre nyoro rọ vwọ ta eta rẹ ẹgua vwọsua Mosis kugbe Ọghẹnẹ.” 12 Ayen da kpare ophu rẹ ihwo na, ekpako na kugbe isiẹbe na, ayen de bro rhe siẹvuọvo, ayen de shabọ phiyọ, ayen da reyọ kpo Sanhẹdrin na. 13 Ayen da reyọ iseri rẹ efian rhe, re tare nẹ: “Ọkieje yen ọshare nana vwọ ta eta vwọsua asan ọfuanfon nana kugbe Urhi na. 14 Kerẹ udje, avwanre nyoro rọ vwọ tanẹ Jesu nana rọ dia ohwo ri Nazarẹt na cha guọghọ etinẹ na totọ ji wene ẹkuruemu rẹ Mosis vwọ kẹ avwanre.”
15 Rẹ ihwo eje ri chidia Sanhẹdrin na vwọ tẹnrovio, ayen da mrẹ nẹ opharo rọyen họhọ ọ rẹ amakashe.