Diutaronomi

12 “Enana yen irhi kugbe orhiẹn-ebro rẹ ovwan cha jomaotọ ru nene vwẹ ẹdẹ na eje rẹ ovwan che vwo yerin vwẹ otọ rẹ Jihova Ọghẹnẹ rẹ esẹ rẹ ovwan ride cha vwọ kẹ ovwan kerẹ ughwẹ na. 2 Ovwan me ghwọrọ asan eje rẹ ẹgborho rẹ ovwan che phikparobọ na da ga eghẹnẹ rayen jovwo karekare, owenẹ ọ dianẹ ọ hẹ igbenu ri kpenu yẹrẹ igbenu itete yẹrẹ otọ ri kurhe kurhe rode. 3 Ovwan mi kporon egbada rayen totọ, guọghọ ichivwo rẹ ẹga rayen, vwẹ erhanre vwọ torhẹ ekpọ rẹ ẹga* rayen, je nyavwe ema rẹ eghẹnẹ rayen rẹ ayen kare totọ, ovwan mi si edẹ rayen nẹ etiyin karekare.

4 “Ovwan ga Jihova Ọghẹnẹ rẹ ovwan vwẹ idjerhe tiọyenaa. 5 Ukperẹ ọtiọyen, ovwan guọnọ Jihova Ọghẹnẹ rẹ ovwan vwẹ kasan kasan rọ jẹre nẹ ọyen da cha vwẹ odẹ rọyen vwo mu kugbe asan rọ cha dia vwẹ ohri rẹ ivwiẹ rẹ ovwan eje, ovwan mi kpo etiyin. 6 Etiyin ovwan cha reyọ izobo rẹ ẹtorhẹ rẹ ovwan rhe, ọtiọyen ji te izobo rẹ ovwan, ẹkẹn ọvo rẹ ẹkẹn ihwe rẹ ovwan, utoro ro nẹ obọ rẹ ovwan rhe, izobo rẹ ive rẹ ovwan, okẹ rẹ ovwan ro nẹ otọ rẹ ẹwẹn rhe, kugbe ọmọkpako rẹ ichuru kugbe ẹvwe vẹ igodẹ rẹ ovwan. 7 Ovwan vẹ evwruwevwin rẹ ovwan me re vwọ vwẹ obaro ri Jihova Ọghẹnẹ rẹ ovwan, ovwan me je ghọghọ vwẹ iruo rẹ ovwan ejobi, kidie Jihova Ọghẹnẹ rẹ ovwan bruba kẹ ovwan re.

8 “Ovwan ruẹ kirobo rẹ avwanre ruẹ vwẹ etinẹ nonẹna rẹ dohwo dobo re gbare vwẹ ẹro rọyen* de ruẹ naa, 9 kidie ovwan ji rhi te asan rẹ omaerovwon kugbe uku rẹ Jihova Ọghẹnẹ rẹ ovwan cha vwọ kẹ ovwan naa. 10 Ọke rẹ ovwan da shariẹ Jọdan na vrẹ, rẹ ovwan da je dia otọ rẹ Jihova Ọghẹnẹ rẹ ovwan cha vwọ kẹ ovwan kerẹ ughwẹ na, kọ cha ghene kẹ ovwan omaerovwon vwo nẹ obọ rẹ ivwighrẹn rẹ ovwan eje re riariẹ ovwan phiyọ, kẹ ovwan cha dia vwọrẹ ofuvwegbe. 11 Ovwan me reyọ erọnvwọn na eje ri mi ji iji rọyen kẹ ovwan na vwọ rhe asan rẹ Jihova Ọghẹnẹ rẹ ovwan sanere nẹ odẹ rọyen cha dia na—izobo rẹ ẹtorhẹ rẹ ovwan, izobo rẹ ovwan, ẹkẹn ọvo rẹ ẹkẹn ihwe rẹ ovwan, utoro ro nẹ obọ rẹ ovwan rhe, kugbe kizobo kizobo rẹ ive rẹ ovwan ve kẹ Jihova. 12 Ovwan cha ghọghọ vwẹ obaro ri Jihova Ọghẹnẹ rẹ ovwan, te ovwan te emọ rẹ ovwan emeshare vẹ e rẹ emetẹ, eviẹn rẹ ovwan eshare vẹ e rẹ eya, kugbe ihwo ri Livae re dia irere rẹ ovwan,* kidie ayen vwo ẹkẹn yẹrẹ uku vuọvo vwẹ ohri rẹ ovwaan. 13 Ovwan jomaotọ rere ovwan vwo jẹ izobo rẹ ẹtorhẹ rẹ ovwan eze vwẹ kasan kasan rẹ ovwan mrẹre. 14 Asan rẹ Jihova jẹre ọvo vwẹ ọvo vwẹ usun rẹ ekogho rẹ uvwiẹ rẹ ovwan yen ovwan de ze izobo rẹ ẹtorhẹ rẹ ovwan, etiyin yen ovwan de ru erọnvwọn eje ri mi ji iji rọyen kẹ ovwan.

15 “Ẹkẹvuọvo kọke kọke ro de si ovwan urhuru,* ovwan se hwe je re eranvwe vwo nene ebruphiyọ rẹ Jihova Ọghẹnẹ rẹ ovwan vwọ kẹ ovwan vwẹ irere rẹ ovwan eje.* Ohwo ro jẹfuọn kugbe ohwo rọ fonro sa riọ kirobo rẹ ovwan ria uzo yẹrẹ orhua. 16 Ẹkẹvuọvo ovwan ria ọbara naa; ovwan mi kuo kuotọ kerẹ ame. 17 A cha rhọnvwe nẹ ovwan re ẹkẹn ọvo rẹ ẹkẹn ihwe rẹ eka rẹ ovwan, iwaini kpokpọ rẹ ovwan kugbe evwri rẹ ovwan vwẹ irere rẹ ovwaan,* ọtiọyen ji te ọmọkpako rẹ erhuẹn vẹ igodẹ kugbe ẹvwe rẹ ovwan, kizobo kizobo rẹ ive rẹ ovwan veri, izobo ro nẹ otọ rẹ ẹwẹn rẹ ovwan rhe, yẹrẹ utoro ro nẹ obọ rẹ ovwan rhe. 18 Enana yen oborẹ ovwan cha re vwẹ obaro ri Jihova Ọghẹnẹ rẹ ovwan vwẹ asan rẹ Jihova Ọghẹnẹ rẹ ovwan cha jẹ—te ovwan te emọ rẹ ovwan rẹ emeshare vẹ e rẹ emetẹ, eviẹn rẹ ovwan eshare vẹ e rẹ eya, kugbe ihwo ri Livae re dia irere rẹ ovwan;* ovwan me je ghọghọ vwẹ obaro ri Jihova Ọghẹnẹ rẹ ovwan fikirẹ iruo rẹ ovwan eje. 19 Ovwan nomaso rere ihwo ri Livae na vwo jẹ ovwan ẹro ẹchọrọ vwẹ uchọke rẹ ovwan dia otọ rẹ ovwan kri te.

20 “Ọke rẹ Jihova Ọghẹnẹ rẹ ovwan de ru ekogho rẹ ovwan hẹrephiyọ kirobo ro ve kẹ ovwan, ovwan da tanẹ, ‘Me guọnọ re eranvwẹ,’ kidie urhuru rẹ eranvwe rẹ ovwan cha re siẹ ovwan, kẹ ovwan sa re eranvwẹ kọke kọke rẹ urhuru rọyen de si ovwan. 21 Ọ da dianẹ asan rẹ Jihova Ọghẹnẹ rẹ ovwan jẹre nẹ ọyen che phi odẹ rọyen phiyọ na sheri kẹ ovwan, ovwan mi hwe evo vwẹ usun rẹ erhuẹn rẹ ovwan yẹrẹ evo vwẹ usun rẹ ẹvwe vẹ igodẹ rẹ ovwan rẹ Jihova vwọ kẹ ovwan, kirobo ri mi ji iji rọyen kẹ ovwan, ovwan me riọ vwevunrẹ irere rẹ ovwan* kọke kọke rẹ urhuru rọyen de si ovwan.* 22 Ovwan sa riọ kirobo rẹ ovwan ria uzo vẹ orhua; ohwo ro jẹfuọn kugbe ohwo rọ fonro sa riọ. 23 Takpe nẹ ovwan vwo imuẹro nẹ ovwan re ọbara naa, kidie ọbara na yen arhọ* na, ovwan ria arhọ* na vẹ uvwo na kuẹgbee. 24 Ovwan riọọ, ovwan kuo kuotọ kerẹ ame. 25 Ovwan riọọ, rere o se vwo yovwin kẹ ovwan vẹ emọ rẹ ovwan re cha vwẹ obuko, kidie ovwan ruẹ obo ri shephiyọ vwẹ ẹro ri Jihova. 26 Erọnvwọn efuanfon re dia e rẹ ovwan ọvo kugbe izobo rẹ ive rẹ ovwan yen ovwan cha ghwa nene oma ọke rẹ ovwan da cha asan rẹ Jihova cha jẹ na. 27 Etiyin yen ovwan de che ze izobo rẹ ẹtorhẹ rẹ ovwan, uvwo na vẹ ọbara na, vwẹ enu rẹ agbada ri Jihova Ọghẹnẹ rẹ ovwan, ovwan mi ku ọbara rẹ izobo rẹ ovwan na kuotọ kẹrẹ agbada ri Jihova Ọghẹnẹ rẹ ovwan, ẹkẹvuọvo ovwan sa re uvwo na.

28 “Ovwan jomaotọ vwo ru nene eta nana eje ri mi ji iji rọyen kẹ ovwan na, rere o vwo yovwin kẹ ovwan ọkieje vẹ emọ rẹ ovwan re cha vwẹ obuko, kidie ovwan ruẹ obo ri yovwirin ro ji shephiyọ vwẹ ẹro ri Jihova Ọghẹnẹ rẹ ovwan.

29 “Ọke rẹ Jihova Ọghẹnẹ rẹ ovwan da ghwọrọ ẹgborho rẹ ovwan che phikparobọ na, ovwan da je dia otọ rayen re, 30 ovwan jomaotọ rere ovwan vwo jẹ ufi eshephiyọ ọke ra da ghwọrọ ayen vwo nẹ obaro rẹ ovwan nu. Ovwan nọ kpahan eghẹnẹ rayeen, nẹ, ‘Mavọ yen ẹgborho nana tobọ ga eghẹnẹ rayen wan jovwo? Mi ji che ru ọtiọyen.’ 31 Ovwan ruẹ ọnana kẹ Jihova Ọghẹnẹ rẹ ovwaan, kidie koka koka rẹ erọnvwọn rẹ ẹgua rẹ Jihova vwo utuoma kpahen yen ayen ruẹ vwọ kẹ eghẹnẹ rayen, ayen tobọ vwẹ erhanre vwọ torhẹ emọ rayen rẹ emeshare vẹ e rẹ emetẹ vwọ kẹ eghẹnẹ rayen. 32 Kota kota ri mi ji iji rọyen kẹ ovwan yen ovwan cha jomaotọ ru. Ovwan phiẹba yẹrẹ siẹ noo.