Diutaronomi
23 “O vwo ọshare vuọvo ra ghwaranre womarẹ a vwọ pẹtiẹ ibi ivwrite rọyen yẹrẹ ohwo re bru oshọ rọyen no rọ sa ro ọghwẹgbe ri Jihovaa.
2 “O vwo ọmọ vuọvo rẹ ọsen vwiẹre rọ sa ro ọghwẹgbe ri Jihovaa. Tobọ re te uvwiẹ rihwe na, o vwo ọmọ rọyen vuọvo rọ sa ro ọghwẹgbe ri Jihovaa.
3 “O vwo ohwo rẹ Amọn yẹrẹ ohwo ri Moab vuọvo rọ sa ro ọghwẹgbe ri Jihovaa. Tobọ re te uvwiẹ rihwe na, ọmọ rayen vuọvo cha sa ro ọghwẹgbe ri Jihova bẹdẹẹ, 4 kidie ayen vwẹ emuọre vẹ ame vwọ cha ovwan uko ọke rẹ ovwan vwọ hẹ idjerhe nẹ Ijipt chaa, ayen je hwosa kẹ Belam ọmọ ri Biọ ro nẹ Pitọ ri Mẹsopotemia rhe nẹ o rhi duvwun iyorin kẹ ovwan. 5 Ẹkẹvuọvo Jihova Ọghẹnẹ rẹ ovwan rhọnvwe kerhọ ri Belamuu. Ukperẹ ọtiọyen Jihova Ọghẹnẹ rẹ ovwan de wene iyorin na vwo kpo ebruphiyọ kẹ ovwan, kidie Jihova Ọghẹnẹ rẹ ovwan vwo ẹguọnọ rẹ ovwan. 6 Ovwan vwẹ ọke vuọvo vwọ guọnọ erhuvwu rayen yẹrẹ oyovwe rayen vwẹ ẹdẹ rẹ ovwan ejee.
7 “Ovwan vwo utuoma kpahan ohwo rẹ Idọmuu, kidie ọyen oniọvo rẹ ovwan.
“Ovwan vwo utuoma kpahan ohwo rẹ Ijiptii, kidie ovwan dia erhorha vwẹ ẹkuotọ rọyen jovwo. 8 Emọ rẹ uvwiẹ rerha rayen sa ro ọghwẹgbe ri Jihova.
9 “Ọke rẹ ovwan de wonphiyọ* asan vwọso ivwighrẹn rẹ ovwan, ovwan kẹnoma kẹ kemu kemu rọ brare.* 10 Ọshare da rhe dia ẹdia ri jẹfuọn fikirẹ ame oma, e jẹ o kpo otafe asan rẹ ovwan wonphiyọ na, e jẹ ọ rhoma rua evunrẹ asan rẹ ovwan wonphiyọ naa. 11 Ovwọnvwọn de te, e jẹ ọ vwẹ ame vwọ hworhẹ oma rọyen, ọke yena, ko se rhivwin kpo asan rẹ ayen wonphiyọ na siẹrẹ ọnre de shekpotọ nu. 12 Ovwan rhuẹrẹ asan* ọvo san phiyọ otafe rẹ asan rẹ ovwan wonphiyọ na vwọ kẹ ọnana, etiyin kọyen ovwan cha ra. 13 Ubiurhe me dia ọvo vwẹ usun rẹ ekuakua rẹ ovwan. Ọke rẹ ovwan de rhuẹn vwẹ otafe, ovwan me reyọ vwọ tọn unu, ovwan de ru nu, ovwan mi rhurhu isọn rẹ ovwan. 14 Kidie Jihova Ọghẹnẹ rẹ ovwan yan kpenẹ kpenẹ vwẹ asan rẹ ovwan wonphiyọ na rere o vwo sivwin ovwan ji phi ivwighrẹn rẹ ovwan phiyọ obọ rẹ ovwan, asan rẹ ovwan wonphiyọ na me dia fuanfon rere o vwo jẹ orọnvwọn vuọvo ro je fo ẹmrẹ vwẹ oma rẹ ovwan, ro de rhi chukoku ovwan ji jẹ ovwan enene.
15 “Wọ reyọ ọviẹn vwọ kẹ onini rọyen ọke rọ da djẹ va onini rọyen abọ bru we rhee. 16 Ọ sa dia ohri rẹ ovwan vwẹ kasan kasan rọ jẹre vwẹ ọvo vwẹ usun rẹ irere rẹ ovwan, kasan kasan ro jere. Ovwan gboja kẹẹ.
17 “E jẹ ọmọtẹ rẹ Izrẹl vuọvo dia igberadja vwẹ asan rẹ ayen da ga ẹgaa,* e ji jẹ ọmọshare rẹ Izrẹl vuọvo dia igberadja vwẹ asan rẹ ayen da ga ẹgaa. 18 Ovwan reyọ osa ra hwa kẹ igberadja aye yẹrẹ osa ra hwa kẹ igberadja* ọshare rhe uwevwin ri Jihova Ọghẹnẹ rẹ ovwan vwọ hwosa rẹ ivee, kidie ayen ivẹ na orọnvwọn ro tuẹn Jihova Ọghẹnẹ rẹ ovwan oma.
19 “Wo suẹn oborẹ wo momo kẹ oniọvo wẹẹn, owenẹ ọ dia igho, emuọre, yẹrẹ kemu kemu re se suẹn. 20 Wo se sun oborẹ wo momo kẹ ọrhorha, ẹkẹvuọvo wo suẹn oborẹ wo momo kẹ oniọvo wẹẹn, rere Jihova Ọghẹnẹ rẹ ovwan se vwo bruba kẹ wẹ vwẹ kemu kemu wo che ru vwẹ otọ rẹ ovwan cha ra re ughwẹ rọyen na.
21 “Wo de ve ive kẹ Jihova Ọghẹnẹ rẹ ovwan, wo gbe eghẹrẹ wọ ke hwaa. Kidie Jihova Ọghẹnẹ rẹ ovwan cha ghene nokpẹn rọyen mie we; ọ rha dia ọtiọyeen, ọ cha dia umwemwu vwẹ ẹbẹre wẹn. 22 Ẹkẹvuọvo, wọ da kẹnoma kẹ ive, wọ cha riabe rẹ umwemwuu. 23 Sẹro rẹ ota rẹ ẹbẹrunu wẹn rere wo ru oborẹ wọ vwẹ unu robọ wẹn vwo ve kerẹ izobo ro nẹ otọ rẹ ẹwẹn rhe vwọ kẹ Jihova Ọghẹnẹ rẹ ovwan.
24 “Wọ da ro ogba rẹ ivaini rẹ ọrivẹ wẹn, wọ sa re igrepu vọn evun, ẹkẹvuọvo wo phiẹ ọvuọvo phiyọ ekpu wẹẹn.
25 “Wọ da ro udju rẹ eka rẹ ọrivẹ wẹn, wọ sa vwẹ obọ wẹn vwọ kọrọ eka re ghwore, ẹkẹvuọvo wọ vwẹ ubiakpa vwo brẹ eka rẹ ọrivẹ wẹẹn.