Diutaronomi

28 “O vwo obo rọ wanree, ovwan da kerhọ rẹ urhuru ri Jihova Ọghẹnẹ rẹ ovwan womarẹ ovwan vwọ jomaotọ ruẹ nene iji rọyen eje re me vwọ kẹ ovwan nonẹna, o muẹro nẹ Jihova Ọghẹnẹ rẹ ovwan cha kpare ovwan kpenu vwọ vrẹ ẹgborho ri chekọ eje rẹ akpọ na. 2 Ebruphiyọ nana ejobi ke cha rhe enu rẹ ovwan je vwa ovwan, kidie ovwan kerhọ rẹ urhuru ri Jihova Ọghẹnẹ rẹ ovwan ọkieje:

3 “Ebruba cha dia kẹ ovwan vwevunrẹ orere, ebruba je cha dia kẹ ovwan vwevunrẹ aghwa.

4 “Ebruba cha dia kẹ emọ* rẹ ovwan vẹ emamọ rẹ otọ rẹ ovwan kugbe emọ rẹ ichuru rẹ ovwan vẹ erhuẹn kugbe igodẹ itete rẹ ovwan.

5 “Ebruba cha dia kẹ obere rẹ ovwan kugbe imize rẹ ovwan vwọ gua iflawa.

6 “Ebruba cha dia kẹ ovwan ọke rẹ ovwan da cha, ebruba je cha dia kẹ ovwan ọke rẹ ovwan da yanran.

7 Jihova cha nẹrhẹ e phi ivwighrẹn rẹ ovwan ri vrẹn vwọso ovwan kparobọ vwẹ obaro rẹ ovwan. Ayen cha vwọso ovwan vwo nẹ idjerhe ọvo rhe, ẹkẹvuọvo ayen cha wan idjerhe ighwrẹn vwọ djẹ kẹ ovwan. 8 Jihova che ku ebruphiyọ ku iwevwin rẹ ovwan sẹro rẹ erọnvwọn phiyọ kugbe kemu kemu rẹ ovwan ruẹ, vwọrẹ imuẹro, o che bruba kẹ ovwan vwẹ otọ rẹ Jihova Ọghẹnẹ rẹ ovwan cha vwọ kẹ ovwan na. 9 Jihova cha vwẹ ovwan vwo mu kerẹ ihwo efuanfon kẹ oma rọyen kirobo ro duvwun iyorin rọyen kẹ ovwan, kidie ovwan vwẹ ọkieje vwọ sẹro rẹ iji ri Jihova Ọghẹnẹ rẹ ovwan je yan nene idjerhe rọyen. 10 Ihwo eje rehẹ akpọ na ke cha rhe mrẹ nẹ a vwẹ odẹ ri Jihova vwo se ovwan, kẹ ayen cha djoshọ rẹ ovwan.

11 “Jihova cha nẹrhẹ ovwan vwo emọ buebun vẹ ichuru buebun kugbe otọ ro yovwon emu vwevunrẹ otọ rẹ Jihova duvwun iyorin rọyen kẹ esẹ rẹ ovwan ride nẹ ọyen cha vwọ kẹ ovwan. 12 Jihova che rhie asan oyoyovwin rọyen rọ sẹro rẹ erọnvwọn phiyọ, rọ dia idjuvwu na vwọ kẹ ovwan, rere ọ nẹrhẹ osio rhọ kuotọ rẹ ovwan vwẹ ọke rọyen, ji ku ebruphiyọ ku erọnvwon eje rẹ ovwan ruẹ, ovwan che momo kẹ ẹgborho buebun, ẹkẹvuọvo ovwan che momo mie ihwo efaa. 13 Jihova cha nẹrhẹ ovwan dia uyovwin, ọ dia urhurhuu; kẹ ovwan cha dia obenu, ọ dia obotọọ, siẹrẹ ovwan da vwẹ ọkieje vwo muọghọ kẹ iji ri Jihova Ọghẹnẹ rẹ ovwan re me vwọ kẹ ovwan nonẹna nẹ ovwan sẹro rayen ji ru nene na. 14 Ovwan nama kuomarhẹriẹ vwo nẹ eta na eje ri mi ji iji rọyen kẹ ovwan nonẹna kpo obọrhen yẹrẹ obohwẹree, rere ovwan vwọ yan nene eghẹnẹ efa je ga ayeen.

15 “Jẹ ovwan rha kerhọ rẹ urhuru ri Jihova Ọghẹnẹ rẹ ovwan, womarẹ ovwan vwọ jomaotọ ruẹ nene iji rọyen eje kugbe irhi rọyen ri mi ji iji rọyen kẹ ovwan nonẹnaa, ekan nana eje ke rhe enu rẹ ovwan je vwa ovwan:

16 “Ekan cha dia kẹ ovwan vwevunrẹ orere, ekan je cha dia kẹ ovwan vwevunrẹ aghwa.

17 “Ekan cha dia kẹ obere rẹ ovwan kugbe imize rẹ ovwan vwọ gua iflawa.

18 “Ekan cha dia kẹ emọ* rẹ ovwan kugbe emamọ rẹ otọ rẹ ovwan vẹ erhuẹn kugbe igodẹ itete rẹ ovwan.

19 “Ekan cha dia kẹ ovwan ọke rẹ ovwan da cha, ekan je cha dia kẹ ovwan ọke rẹ ovwan da yanran.

20 “Jihova cha hwarhiẹ ekan na vẹ otighi kugbe oja rhe enu rẹ ovwan vwẹ kemu kemu rẹ ovwan ruẹ, bẹsiẹ ra vwọ ghwọrọ ovwan ji si ovwan nẹ otọ kpakpata, fikirẹ erharhe rẹ iruemu rẹ ovwan kugbe ẹsiọn rẹ ovwan sen vwẹ. 21 Jihova cha nẹrhẹ ọga tamu ovwan bẹsiẹ ra vwọ ghwọrọ ovwan vwo nẹ otọ rẹ ovwan cha ra re ughwẹ rọyen na. 22 Jihova cha vwẹ owọnrhe ọgangan,* odo ọgangan, asan rọ vwọre, oheri rẹ odo, ọlọkọ, oheri ọgangan ro hwe ekankọn, kugbe eyẹbuẹ vwọ ghwiẹ ovwan; kẹ ayen cha vwọtua ovwan bẹsiẹ rẹ ovwan vwọ ghwọrọ. 23 Irharheghe rọhẹ enu rẹ ovwan cha dia ẹrovwo, otọ na me rha dia utehru. 24 Jihova cha nẹrhẹ osio rẹ otọ rẹ ovwan dia ekpẹn vẹ ighworighwo rọ cha rhọ nẹ idjuvwu na rhe bẹsiẹ ra vwọ ghwọrọ ovwan. 25 Jihova cha nẹrhẹ e phi ovwan kparobọ vwẹ obaro rẹ ivwighrẹn rẹ ovwan. Ovwan cha wan idjerhe ọvo vwọso ayen, ẹkẹvuọvo ovwan cha wan idjerhe ighwrẹn vwọ djẹ kẹ ayen; ovwan cha rhe dia obo ri muoshọ vwọ kẹ uvie rẹ akpọ na eje. 26 Irivwin rẹ ovwan ke cha dia emu vwọ kẹ koka koka rẹ ọphran rọhẹ ophephe na kugbe eranvwe rehẹ otọ na, o rhe vwo ohwo vuọvo rọ cha djẹ ayeen.

27 “Jihova cha vwẹ irubẹ rẹ Ijipt, ọga rẹ unusọ ro yoro, ẹvwen,* kugbe eshẹ rẹ ovwan che se sivwin kpoo vwọ ghwiẹ ovwan. 28 Jihova cha vwẹ orhuẹ vẹ ẹroerhuo kugbe otighi vwọ ghwiẹ ovwan. 29 Ovwan che beghe vwẹ aruphẹn kirobo rẹ orhuẹro beghe vwẹ ason, ovwan che phikparobọ vwẹ orọnvwọn vuọvo rẹ ovwan ruẹẹ; ọkieje yen a cha vwọ ghwa ovwan re ji gborho ovwan, o vwo ohwo vuọvo ro che sivwin ovwaan. 30 Ovwan cha sa aye phiyotọ, ẹkẹvuọvo ọshare ọfa cha gba du. Ovwan cha bọn uwevwin, ẹkẹvuọvo ovwan cha dia evun rọyeen. Ovwan cha kọn ogba rẹ ivaini, ẹkẹvuọvo ovwan cha re omamọ rọyeen. 31 E che hwe erhuẹn rẹ ovwan vwẹ irharo rẹ ovwan, ẹkẹvuọvo ovwan cha re vwọọ. E che cho ekẹkẹtẹ rẹ ovwan vwẹ irharo rẹ ovwan, ẹkẹvuọvo o che rhivwin bru ovwan rhee. A cha vwẹ igodẹ rẹ ovwan vwọ kẹ ivwighrẹn rẹ ovwan, ẹkẹvuọvo ovwan che vwo osivwiin. 32 A cha vwẹ emeshare rẹ ovwan vẹ emetẹ rẹ ovwan vwọ kẹ ihwo efa, jẹ ovwan nughe, urhuru rayen che si ovwan, ẹkẹvuọvo ẹgba che rhe ovwaan. 33 Ihwo rẹ ovwan vugherii cha re emu rẹ otọ rẹ ovwan kugbe obo ri nẹ iruo robọ rẹ ovwan rhe, ọkieje yen a cha vwọ ghwa ovwan re ji gboja kẹ ovwan. 34 Oborẹ ẹro rẹ ovwan mrẹ cha nẹrhẹ ovwan mwa orhuẹ.

35 “Jihova cha vwẹ irubẹ re miavwa re se sivwẹẹn vwọ ghwiẹ igbon vẹ awọ rẹ ovwan, vwo nẹ ẹhẹrhowọ rẹ ovwan re te ekrekruyovwin rẹ ovwan. 36 Jihova cha djẹ ovwan vẹ ovie rẹ ovwan vwo mu vwẹ enu rẹ ovwan vwo kpo ẹkuotọ rẹ ovwan vẹ esẹ rẹ ovwan ride jẹriẹn, kẹ ovwan cha ga eghẹnẹ efa vwẹ etiyin, eghẹnẹ rẹ urhe vẹ e rẹ ukuta. 37 Kẹ ovwan cha rhe dia orọnvwọn ro muoshọ vẹ emu rẹ ọjẹfia,* kugbe obo re sua ehwẹjẹ vwẹ ohri rẹ ihwo na eje rẹ Jihova djẹ ovwan brẹ ra na.

38 “Ovwan cha ghwa ibi buebun kpo evunrẹ aghwa, ẹkẹvuọvo emerha yen ovwan che koko, kidie igurube cha re ayen fiotọ. 39 Ovwan cha kọn ogba rẹ ivaini je vwẹrote, ẹkẹvuọvo ovwan cha da iwaini vuọvo yẹrẹ koko emu vuọvo norhee, kidie ihori cha re ayen fiotọ. 40 Ovwan che vwo irhe rẹ oliv vwẹ ekogho rẹ ovwan eje, ẹkẹvuọvo ovwan cha vwẹ ori vuọvo vwo ghworo oma rẹ ovwaan, kidie emamọ rẹ oliv rẹ ovwan che she. 41 Ovwan che vwiẹ emeshare vẹ emetẹ, ẹkẹvuọvo e cha dia e rẹ ovwan bẹdẹẹ, kidie e che mu ayen yanran. 42 Ekrun rẹ insẹti cha vọn irhe rẹ ovwan eje kugbe emu rẹ otọ rẹ ovwan. 43 Ọrhorha re dia ohri rẹ ovwan che rhe kpenu phiyọ kpenu phiyọ vwẹ enu rẹ ovwan, ẹkẹvuọvo ovwan che rhe kpotọ phiyọ kpotọ phiyọ. 44 O che momo kẹ ovwan, ẹkẹvuọvo ovwan che momo kẹẹ. Ọ cha dia uyovwin na, ovwan me rha dia urhurhu na.

45 “Vwọrẹ imuẹro, ekan nana eje cha rhe enu rẹ ovwan, vwọtua ovwan, je vwa ovwan re te ọke ra vwọ ghwọrọ ovwan nu, kidie ovwan rhọnvwe kerhọ rẹ urhuru ri Jihova Ọghẹnẹ rẹ ovwan womarẹ ovwan vwọ sẹro rẹ iji rọyen kugbe irhi rọyen rọ vwọ kẹ ovwan naa. 46 E cha rha dia enu rẹ ovwan vẹ emọ rẹ ovwan kerẹ oka ri bẹdẹ kugbe orhọesio, 47 kidie ọke rẹ ovwan vwo vwo erọnvwọn eje buebun, ovwan ga Jihova Ọghẹnẹ rẹ ovwan vẹ omavwerhovwẹn kugbe aghọghọ rẹ ubiuduu. 48 Jihova che ji ivwighrẹn rẹ ovwan rhe vwọso ovwan, kẹ ovwan cha ga ayen jẹ owẹnvwe hwe ovwan, urhuru rẹ ame siẹ ovwan, ovwan kuẹ omamọ iwun phiyọọ, erọnvwọn eje je kanre ovwan. O che mu urhekpe rẹ utehru phiyọ ohọre rẹ ovwan bẹsiẹ rọ vwọ ghwọrọ ovwan.

49 “Jihova cha kpare ẹgborho ọvo ro sherabọ rhe vwọso ovwan, vwo nẹ oba rẹ akpọ na rhe; o che fru ovwan kerẹ ugo, ẹgborho rẹ ovwan che vwo ẹruọ rẹ ephẹrẹ* rọyeen, 50 ẹgborho ro muoshọ ro che muọghọ kẹ ọmare yẹrẹ gbe arodọnvwẹ kẹ omotetee. 51 Ayen cha re emọ rẹ ichuru rẹ ovwan kugbe emu rẹ otọ rẹ ovwan bẹsiẹ ra vwọ ghwọrọ ovwan. Ayen cha yanjẹ ọka, iwaini kpokpọ yẹrẹ evwri, erhuẹn otete yẹrẹ ogodẹ vuọvo vwo kẹ ovwaan bẹsiẹ rẹ ayen vwọ ghwọrọ ovwan nu. 52 Ayen cha gba riariẹ ovwan phiyọ, je kanre ovwan phiyọ irere* rẹ ovwan eje vwo nene otọ rẹ ovwan, bẹsiẹ rẹ igbẹhẹ rẹ ovwan ri kpenu re je gan rẹ ovwan vwẹroso na vwo she totọ. E, vwọrẹ imuẹro, ayen cha gba riariẹ ovwan phiyọ vwevunrẹ irere rẹ ovwan eje, vwẹ otọ rẹ ovwan rẹ Jihova Ọghẹnẹ rẹ ovwan cha vwọ kẹ ovwan. 53 Ọke yena, kẹ ovwan cha re emọ* rẹ ovwan, uvwo rẹ emeshare vẹ emetẹ rẹ ovwan rẹ Jihova Ọghẹnẹ rẹ ovwan vwọ kẹ ovwan, fikirẹ oborẹ ayen cha gbogba riariẹ ovwan phiyọ gan te kugbe oborẹ ivwighrẹn rẹ ovwan che gboja kẹ ovwan te.

54 “Ọshare rẹ ẹro rọyen ma lọhọ ro ji roro kẹ ohwo dede vwẹ ohri rẹ ovwan, che gbe arodọnvwẹ kẹ oniọvo rọyen yẹrẹ aye rọyen ro vwo ẹguọnọ kpahen yẹrẹ emọ rọyen emeshare ri chekọọ, 55 ọ je cha kẹ ayen vwo nẹ uvwo rẹ ọmọ rọyen rọ cha re naa, kidie o vwo emu vuọvo ọfaa, fikirẹ oborẹ ogba ra gba riariẹ ovwan phiyọ na gan te kugbe oborẹ oja rẹ ivwighrẹn rẹ ovwan gbe kẹ ovwan vwevunrẹ irere rẹ ovwan na je gan te. 56 Aye rẹ ẹro rọyen lọhọre ro ji roro kẹ ohwo vwẹ ohri rẹ ovwan, rọ cha tobọ rhọnvwe nẹ ẹhẹrhowọ rọyen totọọ kidie nẹ ọ lọhọre mamọ, che gbe arodọnvwẹ kẹ ọshare rọyen ro vwo ẹguọnọ kpahen yẹrẹ ọmọ rọyen ọmọshare yẹrẹ ọmọ rọyen ọmọtẹẹ, 57 tobọ te iride ro nẹ uvwre rẹ awọ rọyen ivẹ cha kugbe emọ ro vwiẹre, o che siomanu re ayen fikirẹ oborẹ ogba ra gba riariẹ ovwan phiyọ na gan te kugbe oborẹ oja rẹ ivwighrẹn rẹ ovwan gbe kẹ ovwan vwevunrẹ irere rẹ ovwan na gan te.

58 “Ovwan rha jomaotọ ru nene eta rẹ Urhi nana eje re si phiyọ ọbe nana naa, ovwan rha je djoshọ rẹ odẹ ri Jihova Ọghẹnẹ rẹ ovwan rọ vọnre vẹ urinrin kugbe udidi naa, 59 Jihova cha reyọ etiekọ re pha gangan vwọ ghwiẹ ovwan vẹ emọ rẹ ovwan, etiekọ ride ri che krotọ kugbe ega ri muoshọ ri ji che krotọ. 60 Ọ cha reyọ ega rẹ Ijipt eje rẹ ovwan djoshọ rayen rhivwin bru ovwan rhe, kẹ ayen cha tamu ovwan. 61 Vwo kpobarophiyọ, Jihova cha hwarhiẹ koka koka rẹ ọga yẹrẹ koka koka rẹ ọtiekọ re si phiyọ evunrẹ ọbe rẹ Urhi nanaa bru ovwan rhe, bẹsiẹ ra vwọ ghwọrọ ovwan. 62 Dede nẹ ovwan rhi bun kerẹ isio rẹ idjuvwu na, imihwo krẹn vwẹ usun rẹ ovwan yen che chekọ, kidie ovwan kerhọ rẹ urhuru ri Jihova Ọghẹnẹ rẹ ovwaan.

63 “Oborẹ oma vwerhen Jihova rọ vwọ nẹrhẹ o yovwin kẹ ovwan je nẹrhẹ ovwan bunphiyọ ye, ọtiọyen oma je cha vwerhen Jihova rọ vwọ ghwọrọ ovwan karekare; ji si ovwan nẹ otọ rẹ ovwan cha ra re ughwẹ rọyen na.

64 “Jihova cha hra ovwan nene ẹgborho na eje, vwo nẹ oba ọvo rẹ otọrakpọ na re duvwun oba ro chekọ rẹ otọrakpọ na, etiyin kọyen ovwan da cha ga eghẹnẹ rẹ urhe kugbe e rẹ ukuta rẹ ovwan vẹ esẹ rẹ ovwan ride riẹnre jovwoo. 65 Ovwan che vwo ufuoma vwẹ ohri rẹ ẹgborho yenaa yẹrẹ vwo asan rẹ omaerovwon vwọ kẹ ẹhẹrhowọ rẹ ovwaan. Ukperẹ ọtiọyen, Jihova cha kẹ ovwan ubiudu rọ rua ẹnwan, ẹro ri she divwẹn, kugbe omaemuophiyọ* vwẹ oboyin. 66 Akpọ rẹ ovwan cha vọn vẹ imuoshọ rode, oshọ che mu ovwan te ason te uvo; ovwan che vwo imuẹro rẹ arhọ rẹ ovwaan. 67 Vwẹ urhiọke, ovwan cha tanẹ, ‘Mane kẹ ovwọnvwọn vwenẹ!’ vwẹ ovwọnvwọn, ovwan me rha tanẹ, ‘Mane kẹ urhiọke vwenẹ!’ fikirẹ oshọ ro che mu ovwan vwevunrẹ ubiudu rẹ ovwan kugbe oborẹ ẹro rẹ ovwan cha mrẹ. 68 Vwọrẹ imuẹro, Jihova cha vwẹ okuna vwo mu ovwan rhivwin kpo Ijipt kirobo re me vuẹ ovwan jovwo, ‘Ovwan rha cha mrẹ ọfaa,’ etiyin yen ovwan da cha shẹ oma rẹ ovwan vwọ kẹ ivwighrẹn rẹ ovwan kerẹ eviẹn rẹ eshare kugbe eviẹn rẹ eya, ẹkẹvuọvo a cha mrẹ ohwo rọ cha dẹ ovwaan.”