Joshua

24 Ọyena vwọ wan nu, Joshua de se ivwiẹ rẹ Izrẹl ejobi koko vwẹ Shikẹm, o de ji se ekpako rẹ Izrẹl, igbuyovwin rọyen, iguẹdjọ rọyen, kugbe inotu rọyen, ayen de mudia obaro rẹ Ọghẹnẹ rẹ uyota na. 2 Joshua da ta kẹ ihwo na eje nẹ: “Ọnana yen oborẹ Jihova Ọghẹnẹ rẹ Izrẹl tare, ‘Ẹbẹre ro chekọ rẹ Urhie na* yen esẹ rẹ ovwan ride diare vwẹ ọke grongron rọ wanre—Tira ọsẹ rẹ Ebraham vẹ Nehọ—eghẹnẹ efa yen ayen gare vwẹ ọke yena.

3 “‘Ọke vwọ yanran na, me da reyọ ọsẹ rẹ ovwan rode Ebraham vwo nẹ ẹbẹre ro chekọ rẹ Urhie na,* me da nẹrhẹ ọ yan wan otọ ri Kenan eje ji ru emọ* rọyen bun. Me da vwẹ Aizik kẹ; 4 me da rha vwẹ Jekọp vẹ Isọ vwọ kẹ Aizik. Ukuko na, me da vwẹ Ugbenu ri Siẹ vwọ kẹ Isọ kerẹ ughwẹ rọyen; Jekọp vẹ emọ rọyen de kpo Ijipt. 5 Ọke vwọ yan obaro mi de ji Mosis vẹ Erọn, me da vwẹ ọtiekọ ghwiẹ Ijipt womarẹ obo ri mi ruru vwẹ ohri rayen, ọyena vwọ wan nu, me da reyọ ovwan no. 6 Ọke re me vwọ reyọ esẹ rẹ ovwan vwo nẹ Ijipt cha, rẹ ovwan rhi vwo te abadi na, ihwo rẹ Ijipt ke vwọtua esẹ rẹ ovwan vẹ ekpẹrẹ rẹ ofovwin kugbe isodje re gua iyesi, rhirin re te Abadi Ọvwavware na. 7 Kẹ ayen viẹ se Jihova, ọtiọyena o de phi ebri phiyọ uvwre rẹ ovwan vẹ ihwo rẹ Ijipt na, ọ da nẹrhẹ abadi na mwavwe rhurhu ayen muotọ, ẹro rẹ ovwan komobọ je mrẹ obo ri mi ruru vwẹ Ijipt. Ọyena vwọ wan nu, ovwan da dia evunrẹ aton na vwẹ ikpe* buebun.

8 “‘Me da reyọ ovwan rhe otọ rẹ ihwo rẹ Amọ re dia ẹbẹre ro chekọ* ri Jọdan na, ayen de nene ovwan họnre. Ẹkẹvuọvo mi de phi ayen phiyọ ovwan obọ rere ovwan sa vwọ reyọ otọ rayen vwọ re ughwẹ, me da ghwọrọ ayen vwo nẹ obaro rẹ ovwan. 9 Ọyena vwọ wan nu, Belak ọmọ ri Zipọ, ovie ri Moab, de vrẹn, o de nene Izrẹl họnre. O de se Belam ọmọ ri Biọ nẹ o rhi duvwun iyorin kẹ ovwan. 10 Ẹkẹvuọvo me kerhọ rẹ Belamuu. Ọtiọyena o de bruba kẹ ovwan abọ buebun, mi de sivwin ovwan vwo nẹ obọ rọyen.

11 “‘Ovwan da wan Jọdan na vrẹ, ovwan de rhi te Jẹriko. Isun* ri Jẹriko, ihwo rẹ Amọ, ihwo ri Pẹriz, ihwo ri Kenan, ihwo ri Hẹt, ihwo ri Giga, ihwo ri Haiv, kugbe ihwo ri Jẹbus de nene ovwan họnre, ẹkẹvuọvo mi de phi ayen phiyọ ovwan obọ. 12 Ọtiọyena mi de ruo rere ẹwẹn rayen vwọ yanghan ku bẹsiẹ rẹ ovwan vwo te etiyin, ayen da djẹ vwo nẹ obaro rẹ ovwan—ivie ivẹ rẹ ihwo rẹ Amọ. Ọ dia womarẹ ọlọkọ vẹ umurhabọ rẹ ovwaan. 13 Ọtiọyena me da kẹ ovwan otọ rẹ ovwan wian phiyọọ kugbe irere rẹ ovwan bọnree, ovwan da dia evun rayen. Ovwan ria vwo nẹ egba rẹ ivaini kugbe idju rẹ oliv rẹ ovwan kọnree.’

14 “Ọtiọyena ovwan djoshọ rẹ Jihova rere ovwan ga vẹ ọyọnregan* kugbe evun-ẹfuọn,* ovwan si eghẹnẹ rẹ esẹ rẹ ovwan ride gare vwẹ ẹbẹre ro chekọ rẹ Urhie na* kugbe vwẹ Ijipt no, rere ovwan ga Jihova. 15 Asaọkiephana ọ da dia obo re chọre vwẹ ẹro rẹ ovwan rẹ ovwan vwọ ga Jihova, ovwan gba jẹ kẹ oma rẹ ovwan nonẹna ohwo rẹ ovwan cha ga, sẹ eghẹnẹ rẹ esẹ rẹ ovwan ride gare vwẹ ẹbẹre ro chekọ rẹ Urhie na* yẹrẹ eghẹnẹ rẹ ihwo rẹ Amọ rẹ ovwan dia otọ rayen na. Ẹkẹvuọvo vwọ kẹ vwẹ vẹ evwruwevwin mẹ, Jihova yen avwanre cha ga.”

16 Ọtiọyena ihwo na da kpahen nẹ: “Ẹjo kakaka, o vwo ọke vuọvo rẹ avwanre cha vwọ kpairoro vrẹ Jihova ra ga eghẹnẹ efaa. 17 Jihova Ọghẹnẹ rẹ avwanre yen reyọ avwanre vẹ esẹ rẹ avwanre vwo nẹ otọ rẹ Ijipt rhe, vwo nẹ uwevwin rẹ ọviẹn, ọyen yen ru eka ride nana vwẹ irharo rẹ avwanre je sẹro rẹ avwanre vwẹ idjerhe na eje rẹ avwanre wanre kugbe vwẹ ohri rẹ ihwo na eje rẹ avwanre wanvrẹ na. 18 Jihova djẹ ihwo na eje no, ji te ihwo rẹ Amọ re dia otọ nana jovwo. Ọtiọyena avwanre je cha ga Jihova, kidie ọyen yen Ọghẹnẹ rẹ avwanre.”

19 Joshua da ta kẹ ihwo na nẹ: “Ovwan ghene sa ga Jihova ọkieje? kidie ọyen Ọghẹnẹ ọfuanfon; ọyen Ọghẹnẹ rọ guọnọ ẹga ọsoso. Ọ cha vwẹ urhiẹchọ rẹ ovwan kugbe imwemwu rẹ ovwan vwo ghovwo ovwaan. 20 Ọ da dianẹ ovwan kpairoro vrẹ Jihova ra ga eghẹnẹ erhorha, ọ je cha vwọso ovwan je ghwọrọ ovwan dede nẹ o ru emu esiri kẹ ovwan jovwo re.”

21 Ẹkẹvuọvo ihwo na da ta kẹ Joshua nẹ: “Ẹjo, avwanre cha ga Jihova!” 22 Joshua da ta kẹ ihwo na nẹ: “Ovwan iseri vwọ kẹ oma rẹ ovwan nẹ vwọrẹ ọhọre robọ rẹ ovwan, ovwan jẹre nẹ Jihova yen ovwan cha ga.” Ayen da tanẹ: “Avwanre iseri.”

23 “Ọtiọyena, ovwan si eghẹnẹ erhorha na nẹ ohri rẹ ovwan, rere ovwan vwẹ ubiudu rẹ ovwan eje vwọ ga Jihova Ọghẹnẹ rẹ Izrẹl.” 24 Ihwo na da ta kẹ Joshua nẹ: “Avwanre cha ga Jihova Ọghẹnẹ rẹ avwanre, avwanre ji che nyupho rọyen!”

25 Ọtiọyena Joshua vẹ ihwo na da re ọphọ vwẹ ẹdẹ yena, ọ da vwẹ urhi vwo mu kẹ ayen vwẹ Shikẹm. 26 Joshua de si eta nana phiyọ ọbe rẹ Urhi rẹ Ọghẹnẹ, o de mu ukuta rode ọvo, o de muo phiyọ otọ rẹ urhe rode rọ kẹrẹ asan ọfuanfon* ri Jihova na.

27 Joshua da ta kẹ ihwo na eje nẹ: “Nighere! Ukuta nana che soseri vwo hwe avwanre, kidie o nyo erọnvwọn eje rẹ Jihova vuẹ avwanre, ọ je cha dia oseri vwo hwe ovwan rere ovwan vwo jẹ Ọghẹnẹ rẹ ovwan ẹsiọn.” 28 Ọtiọyena Joshua de siobọnẹ ihwo na yanran, ọvuọvo de kpo asan uku rọyen.

29 Enana vwọ wan nu, Joshua ọmọ ri Nọn, odibo ri Jihova na de ghwu rọ vwọ hẹ ẹgbukpe 110. 30 Ọtiọyena ayen de sho phiyọ ekogho rẹ uku rọyen vwẹ Timnat-sira, rọhẹ ekogho rẹ igbenu rẹ Ifrem, vwẹ obohwẹre ọnre rẹ Ugbenu ri Geash. 31 Izrẹl ga Jihova vwẹ ẹdẹ rẹ akpọ ri Joshua eje kugbe ẹdẹ rẹ akpọ rẹ ekpako na eje re tọn nọ Joshua, re je riẹn kpahen erọnvwọn eje rẹ Jihova ru vwọ kẹ Izrẹl.

32 E de shi ibeku ri Josẹf rẹ ihwo rẹ Izrẹl ghwa nẹ Ijipt rhe phiyọ Shikẹm, vwẹ otọ rẹ Jekọp vwẹ igho re se kẹsitah* 100 vwọ dẹ mie emọ ri Hemọ, ọsẹ ri Shikẹm; ọ da rhe dia uku rẹ emọ ri Josẹf.

33 Ẹlieza ọmọ rẹ Erọn de ji ghwu. Ọtiọyena e de sho phiyọ Ugbenu Otete ri Finihas ọmọ rọyen, ra ghare kẹ vwẹ ekogho rẹ igbenu rẹ Ifrem.