Ọbe rẹsosuọ ri Samuẹl
11 Ọyena vwọ wan nu, Nehash ohwo rẹ Amọn da rhe, o de wonphiyọ* asan ro de che nene Jebẹsh vwẹ Giliẹd họnre. Eshare ri Jebẹsh eje da ta kẹ Nehash nẹ: “Nene avwanre re ọphọ,* kẹ avwanre cha ga wẹ.” 2 Nehash ohwo rẹ Amọn na da ta kẹ ayen nẹ: “Mi che nene ovwan re ọphọ siẹrẹ ovwan da rhọnvwephiyọ ọnana: nẹ e yoghro ẹro rẹ obọrhen rẹ ovwan eje no. Mi che ru ọnana vwọ phọphọ Izrẹl eje.” 3 Ekpako ri Jebẹsh da kpahen kẹ nẹ: “Kẹ avwanre ẹdẹ ighwrẹn rere avwanre se vwo ji ikọn ro ekogho rẹ Izrẹl eje. A rha mrẹ ohwo vuọvo ro sivwin avwanree, kẹ avwanre cha vwomakpahotọ kẹ wẹ.” 4 Ikọn na de rhi te Gibia, orere ri Sọl,* ayen da ta eta nana kẹ ihwo na nyo, ihwo na eje da viẹ gangan.
5 Ẹkẹvuọvo jẹ Sọl nẹ aghwa cha, ọ vwọ kpahen ichuru vwẹ obuko, Sọl da ta: “Die yen ruẹ ihwo na? Diesorọ ayen vwọ viẹ?” Ọtiọyena ayen da vuẹ eta rẹ eshare ri Jebẹsh na. 6 Ẹwẹn rẹ Ọghẹnẹ da kẹ Sọl ẹgba ọke ro vwo nyo eta nana, ophu de muo gangan. 7 Ọtiọyena ọ da reyọ erhuẹn ivẹ, ọ da nyavwe ayen ibribro, ọ da vwẹ ayen kpo ekogho rẹ Izrẹl eje womarẹ ikọn re tanẹ: “Kohwo kohwo ro nene Sọl vẹ Samuẹẹl gba riẹn nẹ enẹ yen e che ru erhuẹn rọyen!” Jihova da nẹrhẹ oshọ mu ihwo na, ayen da yan phia vẹ ẹwẹn ọvo.* 8 O de kere ayen vwẹ Bizẹk, eshare rẹ Izrẹl da dia 300,000, ihwo ri Juda da rha dia eshare 30,000. 9 Asaọkiephana ayen da ta kẹ ikọn re rhere na nẹ: “Ọnana yen oborẹ ovwan ta kẹ eshare ri Jebẹsh vwẹ Giliẹd, ‘Vwẹ odẹ rọ cha na, ọke rẹ uvo na da gan re, e che sivwin ovwan.’” Ọtiọyena ikọn na da rhe, ayen da vuẹ eshare ri Jebẹsh, ayen da ghọghọ gangan. 10 Ọtiọyena eshare ri Jebẹsh da ta: “Vwẹ odẹ rọ cha na, avwanre cha vwomakpahotọ kẹ ovwan rere ovwan se vwo ru avwanre obo ri je ovwan eje.”
11 Vwẹ ẹdẹ rọ vwọ kpahọn, Sọl da ghare ihwo na phiyọ ẹko erha, ayen da ro uherevie rẹ asan rẹ ayen wonphiyọ na vwẹ ọke rẹ orhẹrẹ rẹ urhiọke na,* ayen da teyen ihwo rẹ Amọn hwe bẹsiẹ uvo na vwọ gan. Ihwo re djẹ vabọ da hrabọ te ẹdia rẹ ihwo ivẹ rhe mudia asan ọvoo. 12 Ihwo na da ta kẹ Samuẹl nẹ: “Ihwo vọ yen tanẹ, ‘Sọl cha dia ovie vwẹ enu rẹ avwanre?’ Vwẹ ayen kpahotọ, rere avwanre teyen ayen hwe.” 13 Ẹkẹvuọvo Sọl da tanẹ: “E jẹ a teyen ohwo vuọvo hwe nonẹnaa, kidie Jihova sivwin Izrẹl nonẹna.”
14 Ọke vwọ yan obaro, Samuẹl da ta kẹ ihwo na nẹ: “Ovwan yanrhe rere e kpo Gilga ra rhoma ghwoghwo nẹ Sọl ovie.” 15 Ọtiọyena ihwo na eje de kpo Gilga, vwẹ Gilga ayen da vwẹ Sọl vwo mu ovie vwẹ obaro ri Jihova. Ọyena vwọ wan nu, ayen de ze izobo rẹ ọrekugbe vwẹ etiyin vwẹ obaro ri Jihova, Sọl vẹ eshare rẹ Izrẹl eje da re orẹ vẹ aghọghọ rode.