Ọbe rẹsosuọ ri Samuẹl

29 Ihwo ri Filistia na de se ituofovwin rayen eje koko vwẹ Efẹk, jẹ ihwo rẹ Izrẹl won kẹrẹ asan ogbugbu rẹ ame rọhẹ Jẹzriẹl. 2 Isun rẹ ihwo ri Filistia na vẹ ẹko rẹ ujorin kugbe ẹko rẹ uriorin rẹ isodje rayen rha wanvrẹ, jẹ Devid vẹ eshare rọyen kugbe Ekish vwọ kpahan ayen vwẹ obuko. 3 Ẹkẹvuọvo isun rẹ ihwo ri Filistia na da tanẹ: “Diesorọ ihwo ri Hibru nana vwọ hẹ etinẹ?” Ekish da kpahen kẹ isun rẹ ihwo ri Filistia na nẹ: “Ọnana Devid, odibo rẹ ovie Sọl rẹ Izrẹl, rọ vẹ ovwẹ gba herọ vwẹ ẹgbukpe ọvo yẹrẹ vrẹ ọtiọyen rhire na. Me je rhe mrẹ oruchọ vuọvo vwẹ obọ rọyen vwo nẹ ẹdẹ rọ vwọ yanjẹ Sọl vwo bru vwe rhe rhi te nonẹnaa.” 4 Ẹkẹvuọvo ivun de miovwo isun rẹ ihwo ri Filistia na kpahọn gangan, ayen da ta kẹ nẹ: “Jẹ ọshare na rhivwin. Jo rhivwin kpo asan ru wọ kẹ rẹ. Wo jẹ o nene avwanre kpo ofovwin naa, rere o vwo jẹ oma ekuorhẹriẹ vwọsua avwanre vwẹ ofovwin na. Idjerhe ọfa vọ yen me yovwin, rọ cha wan vwọ guọnọ ẹroesiri rẹ ọrovwori rọyen, vwọ vrẹ ọ vwọ vwẹ uyovwin rẹ eshare rẹ avwanre vwọ kẹ? 5 Ọnana dia Devid rẹ ayen so une kpahen ọke rẹ ayen vwo gbeha nẹ:

6 Ọtiọyena Ekish de se Devid, ọ da ta kẹ nẹ: “Jihova vwọ herọ na, wẹ ohwo ọsoso, me guọnọre nẹ wo nene otuofovwin mẹ kpo ofovwin na, kidie me je rhe mrẹ oruchọ vuọvo vwẹ obọ wẹn vwo nẹ ẹdẹ ru wo vwo bru vwe rhe rhi te nonẹnaa. Ẹkẹvuọvo isun na vwẹroso owẹẹ. 7 Ọtiọyena rhivwin vwọrẹ ufuoma, wo ruẹ orọnvwọn vuọvo rọ cha nẹrhẹ ivun miovwo isun rẹ ihwo ri Filistia naa.” 8 Ẹkẹvuọvo Devid da ta kẹ Ekish nẹ: “Diesorọ, die yen mi ruru? Oruchọ vọ yen wọ mrẹ vwẹ obọ rẹ odibo wẹn vwo nẹ ẹdẹ ri mi vwo bru we rhe rhi te nonẹna? Diesorọ mi vwo juwe enene, re nene ivwighrẹn rẹ ọrovwovwe ovie họnre?” 9 Ekish da kpahen kẹ Devid nẹ: “Vwọ kẹ vwẹ, wọ pha kerẹ amakashe rẹ Ọghẹnẹ. Ẹkẹvuọvo isun rẹ ihwo ri Filistia na tare nẹ, ‘Wo jẹ o nene avwanre kpo ofovwin naa.’ 10 Asaọkiephana wẹ vẹ idibo rẹ ọrovwowe ri nene uwe rhe na vrẹn vwẹ edegburhiọke; ovwan vrẹn rere ovwan yanran vwẹ edegburhiọke ọke de ghwe rhie.”

11 Ọtiọyena Devid vẹ eshare rọyen de vrẹn vwẹ edegburhiọke rere ayen rhivwin kpo otọ rẹ ihwo ri Filistia, ihwo ri Filistia na de rhe kpo Jẹzriẹl.