Ọbe rẹsosuọ ri Samuẹl
6 Ekpeti rẹ Ọphọ ri Jihova na dia ekogho rẹ ihwo ri Filistia na emeranvwe ighwrẹn. 2 Ihwo ri Filistia de se irherẹn na vẹ ebọepha na, ayen da nọ: “Die yen avwanre ru kpahen Ekpeti rẹ Ọphọ ri Jihova na? Ovwan jẹ avwanre riẹn oborẹ avwanre se vwo muo rhivwin kpo asan rọyen.” 3 Ayen da kpahen nẹ: “Ovwan de muẹ ekpeti rẹ ọphọ ri Jihova Ọghẹnẹ rẹ Izrẹl na yanran, ovwan muo yanran ababọ rẹ izoboo. Ovwan vwo imuẹro nẹ ovwan vwẹ izobo rẹ abe vwo rhe. Ọke yena ọvo yen oma rẹ ovwan che vwo kpo, e ji che jẹ ovwan riẹn oboresorọ ovwan je vwọ rioja vwẹ obọ rọyen.” 4 Ọtiọyena ayen da nọ nẹ: “Okẹ rẹ abe vọ yen avwanre che vwo rhe?” Ayen da tanẹ: “Vwo nene uchunu rẹ isun rẹ ihwo ri Filistia na, ovwan vwẹ ema rẹ unusọn ro yoro rẹ oro iyorin kugbe ighresi rẹ oro iyorin vwo rhe, kidie ọtiekọ vuọvo na yen teyen ovwan ọvuọvo vẹ isun rẹ ovwan. 5 Ovwan me ma ema rẹ unusọn rẹ ovwan ro yoro na kugbe ema rẹ ighresi rẹ ovwan re ghwọrọ otọ na, ovwan mi muọghọ kẹ Ọghẹnẹ rẹ Izrẹl na. Ọkiọvo o che ru ọnyẹ rẹ obọ rọyen rọhẹ enu rẹ ovwan vẹ ọghẹnẹ rẹ ovwan kugbe otọ rẹ ovwan na pharhe. 6 Diesorọ ovwan vwo ruẹ ubiudu rẹ ovwan gangan kirobo rẹ ihwo rẹ Ijipt vẹ Fero ru ubiudu rayen gangan? Ọke ro vwo gboja kẹ ayen gangan nu, ayen de siobọnẹ Izrẹl, ayen de kpo. 7 Asaọkiephana ovwan muegbe rẹ akpẹrẹ kpokpọ vẹ erhuẹn eya ivẹ ri vwo emọ re ji rhi phi urhekpe phiyọ dẹvoo. Ovwan mi churu akpẹrẹ na si erhuẹn eya na, ẹkẹvuọvo ovwan mu emọ rayen rhivwin kpo asan re de churu ayen. 8 Ovwan mu Ekpeti rẹ Ọphọ ri Jihova na phiyọ akpẹrẹ na, rere ovwan phi ekuakua rẹ oro rẹ ovwan che vwo rhe kerẹ izobo rẹ abe na phiyọ ekpeti mu kẹrẹ. Ọke yena ovwan gbe siobọno 9 rere ovwan ni: Ọ da dianẹ o nene idjerhe ro kpo Bẹt-shimẹsh kpo ekogho robọ rọyen, kọyen ọyen ohwo ro ru avwanre emu ọbrabra rode nana. Ẹkẹvuọvo ọ rha dia ọtiọyeen, avwanre cha riẹn nẹ ọ dia obọ rọyen yen ghwiẹ avwanree; ọ de phia kẹ avwanre ọtiọyen.”
10 Eshare na de ru ọtiọyen. Ayen da reyọ erhuẹn eya ivẹ ri vwo emọ, ayen de churu akpẹrẹ na si ayen, ayen de mu emọ rayen kpo asan rẹ ayen de churu ayen vwẹ obo uwevwin. 11 Ayen de mu Ekpeti rẹ Ọphọ ri Jihova na phiyọ akpẹrẹ na, ọtiọyen ji te ekpeti re phi ighresi rẹ oro kugbe ema rẹ unusọn rayen ro yoro phiyọ na. 12 Erhuẹn eya na da yanran phiọngun nene idjerhe ro kpo Bẹt-shimẹsh, idjerhe rode na yen ayen neneri, jẹ ayen kperẹ rẹ ayen vwọ yanran na; ayen rhẹrioma kpo obọrhen yẹrẹ obohwẹree. Vwẹ ọke nana eje na jẹ isun rẹ ihwo ri Filistia rhe nene ayen vwẹ obuko rhirin re te ughwru ri Bẹt-shimẹsh. 13 Ihwo ri Bẹt-shimẹsh vuẹn orhọ rẹ iwiti vwẹ iyara* na. Ọke rẹ ayen vwọ kpare opharo kpenu je mrẹ Ekpeti rẹ Ọphọ na, oma da vwerhen ayen gangan rẹ ayen vwọ mrẹ. 14 Akpẹrẹ na da ro udju ri Joshua ohwo ri Bẹt-shimẹsh, ọ da domaji kẹrẹ ukuta rode ọvo vwẹ etiyin. Ọtiọyena ayen da nyavwe urhe rẹ akpẹrẹ na, ayen da vwẹ erhuẹn eya na vwo ze izobo rẹ ẹtorhẹ kẹ Jihova.
15 Ihwo ri Livae na de mu Ekpeti rẹ Ọphọ ri Jihova na vẹ ekpeti re mu kẹrẹ re phi ekuakua rẹ oro phiyọ na phiyotọ, ayen de mu ayen phiyọ enu rẹ ukuta rode na. Ihwo ri Bẹt-shimẹsh de ze izobo rẹ ẹtorhẹ vẹ izobo efa kẹ Jihova vwẹ ẹdẹ yena.
16 Ọke rẹ isun iyorin rẹ ihwo ri Filistia na vwọ mrẹ, ayen de rhivwin kpo Ẹkrọn vwẹ ẹdẹ yena. 17 Asaọkiephana enana yen unusọn ro yoro rẹ oro rẹ ihwo ri Filistia vwo rhe Jihova kerẹ izobo rẹ abe: ọvo vwọ kẹ Ashdọd, ọvo vwọ kẹ Gaza, ọvo vwọ kẹ Ashkẹlọn, ọvo vwọ kẹ Gat, ọvo vwọ kẹ Ẹkrọn. 18 Unu rẹ ighresi rẹ oro na vẹ unu rẹ irere eje rẹ isun iyorin rẹ ihwo ri Filistia vwori abavo, te irere ra gbogba riariẹ vẹ eko ra gbogba riariẹẹ.
Ukuta rode rẹ ayen mu Ekpeti rẹ Ọphọ ri Jihova na kpahen na da dia oseri rhi te ọke na vwẹ udju ri Joshua ohwo ri Bẹt-shimẹsh. 19 Ẹkẹvuọvo Ọghẹnẹ da teyen ihwo ri Bẹt-shimẹsh hwe, kidie ayen ni Ekpeti rẹ Ọphọ ri Jihova na. Ọ teyen ihwo 50,070* hwe vwẹ ohri rayen, ihwo na ki vwere uvweri kidie Jihova teyen buebun rayen hwe. 20 Ọtiọyena ihwo ri Bẹt-shimẹsh da nọ nẹ: “Ono yen se mudia vwẹ obaro ri Jihova Ọghẹnẹ ọfuanfon nana, ono yen o che bru ra ọke rọ da yanjẹ avwanre vwo nu?” 21 Ọtiọyena ayen de ji ikọn bru ihwo re dia Kiriat-jiarim ra tanẹ: “Ihwo ri Filistia na mu Ekpeti rẹ Ọphọ ri Jihova na rhivwin rhire. Ovwan yanrhe rhi muo reyọ.”