Ẹyano

39 Ayen da reyọ vwo nẹ oruru rẹ iblu, ẹton rẹ ogodẹ rẹ ipọpo, kugbe amwa ọvwavware na vwọ nabọ rhuon iwun iyoyovwin re che vwo gbodibo vwẹ asan ọfuanfon na. Ayen de ru iwun rẹ orherẹn vwọ kẹ Erọn kirobo rẹ Jihova ji iji rọyen kẹ Mosis.

2 Ọ da vwẹ oruru rẹ oro, oruru rẹ iblu, ẹton rẹ ogodẹ rẹ ipọpo, amwa ọvwavware, kugbe amwa oyoyovwin re meri vwo ru ẹfọd na. 3 Ayen vwẹ ihama vwọ teyen oro, ọ da rhe dia pẹpẹghẹ, o de bro kerẹ oruru rere o se vwo rhuon ayen vẹ oruru rẹ iblu, ẹton rẹ ogodẹ rẹ ipọpo, amwa ọvwavware vẹ amwa oyoyovwin na kugbe, a da vwẹ ayen vwo ru ẹfọd na. 4 Ayen ru ẹbẹre rẹ obaro vẹ obuko re ku kugbe vwọ kẹ, e ku ayen kugbe vwẹ asan igabọ ivẹ na. 5 Oruru rẹ oro, oruru rẹ iblu, ẹton rẹ ogodẹ rẹ ipọpo, amwa ọvwavware, kugbe amwa oyoyovwin re rhuonri re vwo ru ẹfọd na yen e ji vwo ru umuehun re rhuonri re ru phiyọ ẹfọd na ra vwọ nabọ churo kokoroko, kirobo rẹ Jihova ji iji rọyen kẹ Mosis.

6 Ayen de phi ibiukuta rẹ ọniks na phiyọ erọnvwọn ra vwẹ oro ru, ayen da kare edẹ rẹ emọ rẹ Izrẹl phiyọ ibiukuta na kirobo ra kara utẹ. 7 O phi ayen phiyọ igabọ rẹ ẹfọd na kerẹ ibiukuta rẹ ẹkarophiyọ vwọ kẹ emọ rẹ Izrẹl, kirobo rẹ Jihova ji iji rọyen kẹ Mosis. 8 O de ru orhurhudu na, o rhuonro kirobo re rhuon ẹfọd na, oruru rẹ oro, oruru rẹ iblu, ẹton rẹ ogodẹ rẹ ipọpo, amwa ọvwavware, kugbe amwa oyoyovwin re meri yen e vwo rhuon. 9 Ẹbẹre ẹne rọyen abavo siẹrẹ e de kpirhon obọ ọvo. Ayen de ru orhurhudu na rẹ ohẹhẹre rọyen vẹ ugrongron rọyen dia omarẹ isẹntimita 22* siẹrẹ e de kpirhon obọ ọvo. 10 Ayen rhuẹrẹ irhiẹ ẹne rẹ ibiukuta phiyọ. Rubi, topaz, kugbe ẹmerad yehẹ urhiẹ rẹsosuọ na. 11 Tọkuẹs, safaya, kugbe jaspa yehẹ urhiẹ rivẹ. 12 Ubiukuta ri lẹshẹm,* aget, kugbe ametist yehẹ urhiẹ rerha na. 13 Krisolait, ọniks, kugbe jed keyen rha hẹ urhiẹ rẹne na. A rhuẹrẹ ayen phiyọ erọnvwọn ra vwẹ oro vwo ru na. 14 Ibiukuta na shephiyọ vẹ edẹ rẹ emọ 12 rẹ Izrẹl, a kare odẹ phiyọ ayen ọvuọvo kerẹ utẹ, odẹ ọvuọvo mudiaphiyọ ọvo vwẹ usun rẹ uvwiẹ 12 na.

15 Ayen de ru ejọnrọn re meri phiyọ orhurhudu na kerẹ ifi rẹ uvi rẹ oro. 16 Ayen de ru erọnvwọn ivẹ ra vwẹ oro ru kugbe isa ivẹ ra vwẹ oro ru, ayen de phi isa ivẹ na phiyọ ọkọkọ ivẹ rẹ orhurhudu na. 17 Ayen vwo ru ọyena nu, ayen de duvwun ifi rẹ oro ivẹ na wan isa ivẹ rehẹ ọkọkọ rẹ orhurhudu na. 18 Ayen de duvwun ẹbẹre ivẹ ri chekọ vwẹ ifi ivẹ na wan erọnvwọn ivẹ ra vwẹ oro vwo ru na, ayen de ku ayen kugbe abọ rẹ ẹfọd na vwẹ obaro. 19 Ayen vwo ru ọyena nu, ayen da vwẹ oro vwo ru isa ivẹ, ayen de phi ayen phiyọ oberivwin rẹ orhurhudu na, vwẹ erhọ ivẹ rẹ obotọ rọyen, isa na de hirharoku ẹfọd na. 20 Ayen da vwẹ oro vwo ru isa ivẹ efa, ayen de phi ayen phiyọ obaro rẹ ẹfọd na vwẹ obotọ rẹ obaro rẹ ẹfọd na, vwẹ obenu rẹ asan re de ku umuehun re rhuonri na kugbe vẹ ẹfọd na. 21 Ukuotọ rọyen, ayen da vwẹ ufi rẹ iblu vwọ gba isa rẹ orhurhudu na si isa rẹ ẹfọd na, rere orhurhudu na sa vwọ daji asan ọvo vwẹ enu rẹ ẹfọd na, vwẹ obenu rẹ umuehun re rhuonri na, kirobo rẹ Jihova ji iji rọyen kẹ Mosis.

22 O de ru ikotu rẹ ẹfọd na ro jẹ abọ evwo na, rẹ ohwo ro rhuẹn emwa rhuonri, oruru rẹ iblu yen e vwo rhuon ọsoso rẹ ikotu na. 23 Asan ro rhiephiyọ vwẹ ewun ro jẹ abọ evwo na hẹ uherevie rọyen. Ọ pha kerẹ asan ro rhiephiyọ vwẹ ewun rẹ isodje ro vwo itehru. E rhuon asan ro rhiephiyọ na riariẹ rere o vwo jẹ ẹbẹrẹ. 24 O vwo ru ọyena nu, ayen da reyọ oruru rẹ iblu, ẹton rẹ ogodẹ rẹ ipọpo, kugbe amwa ọvwavware, ayen de me ayen kugbe vwo ru ipọmigranẹti riariẹ ejọjọ rẹ ikotu ro jẹ abọ evwo na phiyọ. 25 Ayen da vwẹ uvi rẹ oro vwo ru igogo, ayen de phi igogo na phiyọ uvwre rẹ ipọmigranẹti na riariẹ ejọjọ rẹ ikọtu ro jẹ abọ evwo na phiyọ, vwẹ uvwre rẹ ipọmigranẹti na; 26 Ayen de ru agogo ọvo vẹ ipọmigranẹti ọvo vwọ kpahen ohwohwo, agogo vẹ ipọmigranẹti ọfa vwọ kpahen ohwohwo, ọtiọtiọyen yen ayen ruro riariẹ ejọjọ rẹ ikotu ro jẹ abọ evwo re vwo gbodibo na phiyọ, kirobo rẹ Jihova ji iji rọyen kẹ Mosis.

27 Ayen da vwẹ amwa oyoyovwin vwo ru iwun igrongron rẹ ohwo ro rhuon emwa rhuonri vwọ kẹ Erọn vẹ emọ rọyen, 28 ayen ji ru ọpharuyovwin rẹ oghẹresan na ra vwẹ amwa oyoyovwin vwo ru, ọpharuyovwin ra rhuẹrẹ fia ra vwẹ amwa oyoyovwin vwo ru, iwun rẹ agada* ra vwẹ amwa oyoyovwin re meri vwo ru, 29 kugbe umuehun rẹ amwa oyoyovwin re meri, ra vwẹ oruru rẹ iblu, ẹton rẹ ogodẹ rẹ ipọpo, kugbe amwa ọvwavware re rhuon kugbe vwo ru, kirobo rẹ Jihova ji iji rọyen kẹ Mosis.

30 Ukuotọ rọyen, ayen da vwẹ uvi rẹ oro vwo ru ophapha ro lo na, oka ọfuanfon rẹ omaẹvwọkpahotọ na,* ayen da kare eta phiyọ kirobo rẹ ohwo kara erọnvwọn phiyọ utẹ: “Ofuanfon ọ ri Jihova.” 31 Ayen de phi oruru rẹ iblu phiyọ, re che vwo churo si ọpharuyovwin rẹ oghẹresan na, kirobo rẹ Jihova ji iji rọyen kẹ Mosis.

32 Ọtiọyena e de ruiruo rẹ itabanako na eje re, kọyen utughẹ ra da vwoma na, ihwo rẹ Izrẹl ru erọnvwọn eje rẹ Jihova ji iji rọyen kẹ Mosis. Ọyen oborẹ ayen ghini ru.

33 Ọtiọyena ayen de mu ẹbẹre sansan rẹ itabanako na vwo rhe Mosis, utughẹ na vẹ ekuakua rọyen eje: ahwa rọyen, ifremu rọyen, ekpọ rọyen kugbe ichivwo rọyen vẹ inu rẹ ichivwo rọyen; 34 urhurho rọyen rẹ ophiẹn rẹ egbon ra vwẹ ikọlọ ọvwavware vwo gbe, urhurho rọyen rẹ ophiẹn rẹ eranvwe,* ikọtini rẹ ohẹriẹ na; 35 okọ rẹ Oseri na vẹ ekpọ rọyen kugbe urhurho na; 36 imẹjẹ na, ekuakua rọyen eje vẹ ibrẹdi re vwo dje na; 37 ogburhukpẹ ra vwẹ uvi rẹ oro vwo ru na, irhukpẹ rọyen, irhukpẹ ra rhuẹrẹphiyọ urhiẹ na vẹ ekuakua rọyen eje kugbe evwri rẹ urhukpẹ na; 38 agbada rẹ oro na, evwri rẹ ẹjẹreyọ na, insẹnsi ro gbon phanphanphan na, obo re vwo gbere asan ra wan rua utughẹ na; 39 agbada rẹ ẹrovwo na vẹ ovuvwiyerin rọyen ra vwẹ ẹrovwo vwo ru na, ekpọ rọyen, ekuakua rọyen eje, ize na vẹ awọ rọyen; 40 ikọtini rẹ otegodo na ra jẹphiyọ, ichivwo rọyen kugbe inu rẹ ichivwo rọyen, obo re vwo gbere asan ra wan rua otegodo na, ifi rẹ utughẹ rọyen vẹ ipẹrẹn rẹ utughẹ rọyen, kugbe ekuakua eje ra vwọ ga ẹga vwẹ itabanako na, rọ dia utughẹ ra da vwoma na; 41 iwun iyoyovwin re rhuonri re vwo gbodibo vwẹ asan ọfuanfon na, iwun rẹ orherẹn vwọ kẹ Erọn orherẹn na, kugbe iwun rẹ emọ rọyen re ga kerẹ irherẹn.

42 Ihwo rẹ Izrẹl ruiruo na ejobi vwo nene iji na eje rẹ Jihova vwọ kẹ Mosis. 43 Ọke rẹ Mosis vwọ fuẹrẹn iruo rayen eje, ọ da mrẹvughe nẹ ayen ruro kirobo rẹ Jihova ji iji rọyen, Mosis de bruba kẹ ayen.